SADOKAH martahun-tahun, dong piga-piga peneliti na mangkatahon anggo Raja Beltsasar na ipatugah bani buku Daniel lang ongga adong. (Dan. 5:1) Sonai pandapot ni sidea halani lang dong bukti arkeologi na patuduhkon ongga do adong raja ai. Tapi bani tahun 1854 mubah ma pandapot ni sidea ai. Mase?

Bani tahun ai, dong sahalak peneliti hun Inggris na margoran si J. G. Taylor mambahen penelitian i kota Ur, sonari dong i bagian selatan ni Irak. Ijai, dohorhon sada menara na banggal, dapotsi ma piga-piga silinder na ibahen humbani tanoh liat. Ganjangni tiap silinder ai hira-hira 10 sentimeter janah marisi tulisan-tulisan paku. Bani sada silinder dong isurat pasal tonggo na mangindo ase ganjang umur ni si Nabonidus raja ni Babel, pakon si Beltsasar, anakni sikahanan. Humbani penemuan ai, tarbukti ma anggo si Beltsasar ai ongga do adong. Jadi lang boi be marsidalian piga-piga peneliti ai.

Bani Bibel ihatahon do homa anggo si Beltsasar ai raja. Tapi piga-piga peneliti lang porsaya pasal ai. Umpamani, hira-hira tahun 1875 si William Talbot, sada ilmuwan hun Inggris mangkatahon dong piga-piga halak na marpandapot “rap mamarentah do si Beltsasar ai pakon si Nabonidus, bapani ai. Tapi lang dong bukti na patuduhkon sintong do ai”.

Tapi ujungni boi ma ibotoh hatorangan na sasintongni dob jumpah use piga-piga silinder na legan. Bani silinder ai ipatuduh sipata ra do Raja Nabonidus ai lang dong i Babel sadokah martahun-tahun. Jadi ise ma na manggantihkonsi sanggah lang i Babel ia? Buku Encyclopaedia Britannica mangkatahon “ipilih ia do si Beltsasar, anakni ai, laho mamarentah ampa mangatur bahat tentarani”. Jadi boi ihatahon markuasa do homa si Beltsasar bani panorang ai. Si Alan Millard, sahalak arkeolog ampa pakar bahasa mangkatahon sosok do ihatahon bani “buku Daniel anggo si Beltsasar ai ‘raja’”.

Tapi, Saksi Jahowa porsaya bani isi ni buku Daniel halani sidea porsaya sinahapkon ni Naibata do ganup isi ni Bibel.​—2 Tim. 3:16.