ERTAHUN-TAHUN dekahna, lit si ngataken maka Raja Belsasar si iceritaken bas buku Daniel labo tuhu-tuhu lit. (Dan. 5:1) Ikatakenna bage perban la pernah idat arkeolog ntah pe ahli benda sejarah sada bukti maka Belsasar e pernah lit. Tapi, bas tahun 1854, lit perubahen. Kai e?

Bas tahun e, lit sekalak konsul arah Inggris si gelarna J. G. Taylor erban penelitin bas kota Ur si nai si nggo runtuh, si lit gundari bas Irak bagin selatan. I je, bas sada menara si galang, idatna piga-piga silinder ntah pe benda si bentukna kibul ergedang si iban arah taneh liat. Gedang tiap silinder e kira-kira 10 sentimeter janah dem alu tulisen paku. Bas salah sada silinder e, lit itulis toto si isina gelah gedang umur Raja Babilonia si gelarna Nabonidus bage pe anakna sintua, Belsasar. Emaka, enda mbuktiken maka Belsasar e pernah lit, janah enda la tertogan.

Tapi labo ngenca ikataken Pustaka maka Belsasar e pernah lit. Ikatakenna ka maka Belsasar e sekalak raja. Lit ka kalak si sangsi kerna si e. Misalna, sekalak ilmuwan arah Inggris si gelarna William Talbot. Kira-kira tahun 1875, itulisna maka menurut piga-piga kalak, “Bel-sar-ussur [Belsasar] merentah i bas waktu si seri ras bapakna, Nabonidus. Tapi la lit sada pe bukti kerna si e.”

Tapi dungna lanai lit si mpermasalahken kerna si e sanga idat ka piga-piga silinder taneh liat. Tulisen bas piga-piga silinder e mbuktiken maka bapak Belsasar, Raja Nabonidus, mon-mon la tading i Babilon ertahun-tahun dekahna. Sanga la ia bas Babilon, ise si erkuasa? Nina Encyclopaedia Britannica, “Sanga lawes Nabonidus ku negeri si deban, si isuruhna erkuasa bas kerajanna eme Belsasar janah menam kerina pasukenna iberekenna ka bana.” Emaka banci ikataken, paksa si e, Belsasar pe jadi penguasa i Babilon. Ikataken Alan Millard, sekalak arkeolog ras ahli bahasa, maka cocok adi “Belsasar e igelari ‘raja’ bas Buku Daniel.”

Tapi, kai bukti si pentingna si erban umat Dibata tek maka buku Daniel e terteki janah rehna bas Dibata nari? Tek kalak e perban buku Daniel e bagin arah Pustaka janah Nabi Daniel pe ituriken ka bas buku-buku si deban bas Pustaka.​—2 Tim. 3:16.