Önine la itre ka icilekeu memine la Tusi Hmitrötr ka hape, pëkö joxu ekö hna hën ka hape, Belesaza, tune lo hna amamane ngöne la tusi Daniela. (Dan. 5:1) Ngo hna saze ngöne lo macatre 1854. Pine nemen?

Hnei John George Taylor, ketre consul britannique, hna wange la itre itraetë ne la traon e Ure, götrane kolopi e Irak. Nge hna öhn e hnine la ita ka hoea, la itre etë hna sija ka 10 cm la eqean. Hna cinyihan hune la ketre etë la thith thatraqane la mele ka hoea i Nabonide, Joxu ne Babulona, memine la neköi nyidrë haetra, ene Belesaza. Celë hi lai ka anyipicine koi itre ka icilekeu laka, ka mel ekö Belesaza.

Hnei Tusi Hmitrötr mina fe hna amaman laka, ketre joxu Belesaza. Hnei angatr fe hna luelu. Ame lo 1875, hnei William Talbot, ka inamacan qa Agele, hna cinyihan ka hape: “Hnei Belesaza hna ce musi me Nabonide, keme i angeic. Kola anyipicine hnyawa laka, ka mel Belesaza ekö.”

Ketre, hna cinyihane hune la itre xaa etë hna sija la ëje i Nabonide, ngöne lo nyidrëti a pane feke qa Babulona. Nemene la ewekë ka traqa? Önine la Encyclopaedia Britannica: “Ame ngöne la kola po hnei Nabonide, hnei nyidrëti hna pane nue koi Belesaza la hnanyijoxu memine la trongene isi nyidrë.” Celë hi matre, kola qaja ka hape, hnei Belesaza hna ce musi me Nabonide e Babulona. Öni Alan Millard, atr ka sine thele la itre apak: “Kola anyipicine hnyawa lo hna qaja göi Belesaza, ngöne la kola hë angeic ka hape, ‘joxu.’ ”

Catrecatre la lapaune ne la itre hlue i Akötresie kowe la itre hna qaja ngöne la tusi Daniela. Xecie hnyawa koi angatr laka, Iehova la atrekë ewekëne la Tusi Hmitrötr.—2 Tim. 3:16.