E VICA vata na yabaki nodra kaya tiko na dau vakalewa na iVolatabu ni sega ni bula dina o Tui Pelisasari e cavuti ena ivola i Taniela. (Tani. 5:1) Na cava era kaya kina qori? Nira sega ni kunea na daukelikeli e dua na ivakadinadina ni bula dina o koya. Ia e veisau qori ena 1854. Meda raica mada!

E dikeva ena yabaki qori o J. G. Taylor, e dua na mata ni Peritania, eso na irusarusa ena koro makawa o Uri, sa ceva kei Iraki nikua. E raica ena dua na valececere levu e vica na ivola qele, e rauta ni 10 na sedimita na kedra balavu, e ceuti tu kina na matanivola makawa. E volai ena dua na ivola qele qori na masu me bula balavu na Tui Papiloni o Nabonidus kei na luvena tagane ulumatua, o Pelisasari. Era mani vakadinata na dau vakalewa na iVolatabu ni ka e kunei qori e vakadinadinataka ni bula dina o Pelisasari.

E vakamatatataki ena iVolatabu ni sega wale ga ni bula dina o Pelisasari, ia e tui tale ga. Era sega ni vakabauta qori na dau vakalewa na iVolatabu. Kena ivakaraitaki, e vola o William Talbot e dua na saenitisi ni Igiladi ena ika19 ni senitiuri nira kaya eso ni “veiliutaki vata kei tamana o Nabonidus o Peli-sa-sari [Pelisasari]. Ia e sega ni bau dua mada ga na kena ivakadinadina lailai.”

Ia e qai oti na veileti qori ni laurai na ka e volai ena so tale na ivola qele. E tukuni kina ni dua na gauna a yali tu mai Papiloni me vica vata na yabaki o Tui Nabonidus na tamai Pelisasari. Na cava gona e yaco ena gauna qori? E kaya na Encyclopaedia Britannica: “Ni tu e vanuatani o Nabonidus, e tataunaka vei Pelisasari na idabedabe vakatui, kei na dua na iwase levu ni nona mataivalu.” Kena ibalebale, e sosomitaki tamana tiko ena gauna qori o Pelisasari ena veiliutaki e Papiloni. Sa rauta me kaya e dua na daukelikeli o Alan Millard, e dau dikeva tale ga na vosa, ni donu vinaka na kena tukuni ena “iVola i Taniela ni ‘tui’ o Pelisasari.”

Ia vei keda na dauveiqaravi ni Kalou, na iVolatabu sara ga e vakadinadinataka ni donu vinaka na ivola i Taniela, e uqeti vakalou tale ga.—2 Tim. 3:16.