REI BELSASAR kädekateta tärä Daniel yebätä ye ñaka nünanbare jire ye nitre ja mikaka Biblia rüere nämäne niere kä kwati krubäte te (Dan. 5:1). Rei yebätä kukwe ñaka kwen jire nitre arqueólogo (jondron kira känänkä) ie yebätä nämänentre ja mike Biblia rüere. Akwa, ¿ñobätä kä 1854 yete ñaka namanintre kukwe ye niere mada?

Kä ye arabe te juta kira Ur yekänti cónsul británico John Taylor käkwe kä muani. Nengwane kä ye nemenkä juta Irak mötörikri yete. Jondron (krükwä ye kwrere) 10 centímetro sribebare dobrobiti abokänbätä kukwe tika nämäne ye kabre kwani torre kri yekänti. Jondron ye nämäne täräi mikaninkä aune rei Nabonido juta Babilonia yete aune monso kwe Belsasar ye nünandre kärekäre kräke orasion nämäne tikani. Ye käkwe mikani gare Belsasar ye nünanbare kira, aisete jondron kwani ye köböire nitre ja mikaka Biblia rüere käkwe kukwe ye kani ngäbiti.

Akwa Biblia tä mike gare Belsasar ye namani reire arato. Kukwe ye ñan namani nükebiti nitre ja mikaka Biblia rüere yei. Ñodre, William Talbot ni ja tötikaka kri siklo 19 yete käkwe tikani, nitre ruäre nämäne niere “rei Nabonido Bel-sar-ussur [Belsasar] rün nämäne gobrane ngwane niara namani reire arato. Akwa kukwe mika ñaka gare jire kukwe ye mikakäre era jai”.

Rei Nabonido Belsasar rün ñan nämäne jutate kä kabre te ye nämäne tikani jondron kwani yebätä, ye ngwane nitre nämäne kukwe jene jene niere ye mikani krüte. ¿Nire gobranbare Nabonido täbiti? Encyclopaedia Britannica tä niere: “Nabonido nämäne juta madate ngwane, Belsasar mikani kwe gobrane ja täte aune nitre rükä ye bäsi jökrä mikani gare kwe ie”. Aisete niara ñaka nämäne gwi ye ngwane Belsasar käkwe gobranbare kä ye näire. Ye medenbätä ni arqueólogo aune lingüista Alan Millard käkwe niebare, tärä Daniel yebätä rei niedre Belsasar ie ye ñaka blo.

Tärä Daniel ye Ngöbö kukwei aune kukwe metre tä tikanibätä ye gare metre ni Ngöbö mikaka täte ie ñan ñobätä aune Biblia ara tä mike gare (2 Tim. 3:16).