LE WƆSILA bɔɔbɔɔ, wanaa sɛɛŋgiaa sɔɔŋ Baabuiyo wa wa dimioo maa Masaa Bɛtisiasa, o yau Daaniɛɛ wo soo a ndu okɔɔ wo ve achal kposoŋ te. (Daan. 5:​1) Le yɛɛ? Kanifuule, wanaa tuau nyɔɔŋ lɛŋnda ndaa seeluŋ ndɔ kona kɛ kɛ a ndu okɔɔ le. Kɛ mi nyɛ nda wa koŋ dimioo wo simnuŋ choolaŋ o wɔsi 1854 niŋ. Vɛɛnɛ?

O wɔsi koŋ niŋ, mi J.G Telɔ, laŋunɔ Bilitisiiya vem hɔlte nda le nyɔɔŋ touwɔɔ lɛŋndo kandu bembelaŋ touwɔɔ naa chioo Ɔɔ wa sindɛ wa. Fonda Ɔɔ wa koŋ sindɛ wo nda veelu niŋ hau ni aa Ilaki batouwo. Mɛɛ laŋunɔɔ hoo wa bembela laŋ touwɔɔ, mbo saaluŋ baabɔŋnda ndaa toosiaa a puuloo laŋ tau naa chiɛi bɛndoo pum wa isisi wa. La wa bandei le iŋchisiilaŋ la hiɔɔlu (sɛŋtimitɛilaŋ 10.) Le poonyiaa lechoo ndaa toosiaa laŋ ni nduyɛ, poonyiaa masindɔɔ wa lechoo. Piɛileŋ le wa le poonyiaa o baabɔŋndo opilɛ choo maa Masaa Nabonidɔs nda Bɛtisiasa po ndɔ tasoo viou nda choo yoomu. Mi wanaa sɛɛŋgiaa haa mɛɛlu niŋ chɛlɔɔ maa Bɛtisiasa wa achal.

Baabuiyo dimi vɛlɛ pɛŋ maa masaa Bɛtisiasa wa ni. Kɛ hei bɛɛ, wanaa sɛɛŋgiaa haa yala ndi chɛlɔɔ le. Le taamaseliiyo, mi laŋunɔ sinaa dɛnɛ pilɛ o wɔsi 1875 niŋ diolaŋ aa Wuliɛm Talibɔɔ dimi maa “Bɛtisalusɔ [Bɛtisiasa] nda Nabonidɔs finya ndɔ tosa masaleŋ latulu ni. Kɛ nyɛ o nyɛ cho o chɔm maa hei wa tonya wo le.”

Kɛ mi yooŋgu nda saaluŋ o baabɔŋ cheleŋ choo wo chii vɛlɛ sɛɛŋgiaŋndo hoo. Mbo dimi maa teleŋ pilɛ, mi Nabonidɔs kua kelaa nduyɛ mbo chua wɔsila bɔɔbɔɔ malaŋ o miiŋgu. Nɛɛ wa yɛ o kpeŋgbei lemasaa choo o faŋaŋndɔ koŋ kɔɔli? Mi yau pilɛ dimi aa, “Mɛɛ Nabonidɔs wa kɔlaŋ kelaa, mbo mɛi Bɛtisiasa po ndɔ o kpeŋgbei lemasaa choo nduyɛ, mbo mel ndu puaa nduaa chɔuwa tau.” Mɛɛ ŋ dimi maa a teleŋ koŋ, mi Bɛtisiasa tosa masaleŋ Babilɔŋ nda finya ndɔ. Le hei, mi Alaŋ Miladi o ndoo tuau nyɔɔŋ lɛŋ nduyɛ mbo pɛɛku a sɔɔŋ maŋgalaŋ okɔɔ tau wo dimi maa, “te yau Daaniɛɛ wo dimi pɛ maa ‘masaa’ Bɛtisiasa wa ni, mɛɛ o bindu le.”

Le buɛiyaa Mɛlɛkaa, nyɛ tosa ma laalaŋ maa sɔɔŋ cho o yau Daaniɛɛ wo niŋndoŋ cho tonya nduyɛ maa Diom Mɛlɛkaa o cho ni wo cho Baabuiyo pila ni.​—2 Timo. 3:​16.