ເຈົ້າຮູ້ບໍ?
ບູຮານຄະດີສະແດງໃຫ້ເຫັນແນວໃດວ່າເບນຊາດຊາເຣເຄີຍມີຊີວິດຢູ່ແທ້ແລະເປັນກະສັດຂອງບາບີໂລນ?
ເປັນເວລາຫຼາຍປີທີ່ນັກວິຈານຄຳພີໄບເບິນບອກວ່າກະສັດເບນຊາດຊາເຣທີ່ເວົ້າເຖິງໃນປຶ້ມດານຽນບໍ່ມີຊີວິດຢູ່ແທ້. (ດາ. 5:1) ພວກເຂົາຄິດແບບນັ້ນຍ້ອນນັກບູຮານຄະດີບໍ່ໄດ້ຄົ້ນພົບຫຼັກຖານທີ່ສະແດງວ່າເບນຊາດຊາເຣເຄີຍມີຊີວິດຢູ່ແທ້ ແຕ່ເມື່ອຮອດປີ 1854 ທຸກຢ່າງກໍປ່ຽນໄປ. ຍ້ອນຫຍັງ?
ໃນປີ 1854 ກົງສູນຂອງອັງກິດຄົນໜຶ່ງທີ່ຊື່ ຈອນ ຈອດສ໌ ເທເລີໄດ້ຄົ້ນພົບຊາກຫັກພັງຢູ່ໃນເມືອງອູຣບູຮານ ເຊິ່ງປັດຈຸບັນແມ່ນຢູ່ທາງພາກໃຕ້ຂອງປະເທດອີຣັກ. ຢູ່ບ່ອນນັ້ນລາວໄດ້ພົບກະບອກດິນໜຽວຫຼາຍອັນໃນຫໍຄອຍໃຫຍ່ແຫ່ງໜຶ່ງ. ກະບອກດິນໜຽວແຕ່ລະອັນຍາວປະມານ 10 ຊັງຕີແມັດ ແລະຖືກແກະສະຫຼັກດ້ວຍອັກສອນຮູບຫຼິ້ມ. ໃນກະບອກດິນໜຽວອັນໜຶ່ງມີການບັນທຶກອັກສອນຮູບຫຼິ້ມກ່ຽວກັບຄຳອະທິດຖານຂໍໃຫ້ກະສັດນະໂບໄນດັດແລະເບນຊາດຊາເຣລູກຊາຍກົກຂອງລາວມີອາຍຸຍືນຍາວ. ນັກວິຈານຄຳພີໄບເບິນຕ້ອງຍອມຮັບວ່າ: ການຄົ້ນພົບນີ້ພິສູດໃຫ້ເຫັນວ່າ ເບນຊາດຊາເຣມີຊີວິດຢູ່ແທ້.
ຍັງບໍ່ພໍເທົ່ານັ້ນ ຄຳພີໄບເບິນບໍ່ໄດ້ພຽງແຕ່ບອກວ່າເບນຊາດຊາເຣມີຊີວິດຢູ່ແທ້ ແຕ່ຍັງບອກວ່າລາວເປັນກະສັດນຳ. ເຖິງຢ່າງໃດກໍຕາມ ນັກວິຈານຄຳພີໄບເບິນຫຼາຍຄົນກໍຍັງສົງໄສເລື່ອງນີ້ ເຊັ່ນ: ໃນສະຕະວັດທີ 19 ນັກວິທະຍາສາດຄົນອັງກິດທີ່ຊື່ ວິນລຽມ ທໍບັອດຂຽນວ່າ ບາງຄົນບອກວ່າ: “ເບນ-ຊາ-ອຸດສ໌ເຊີ [ເບນຊາດຊາເຣ] ປົກຄອງຮ່ວມກັບນະໂບໄນດັດທີ່ເປັນພໍ່ຂອງລາວ. ແຕ່ເລື່ອງນີ້ບໍ່ມີຫຼັກຖານແມ່ນແຕ່ໜ້ອຍດຽວ.”
ເຖິງຢ່າງໃດກໍຕາມ ຂໍ້ຂັດແຍ່ງນີ້ກໍຖືກແກ້ໄຂແລ້ວເພາະກະບອກດິນໜຽວໂຕອື່ນໆເຮັດໃຫ້ຮູ້ວ່າກະສັດນະໂບໄນດັດທີ່ເປັນພໍ່ຂອງເບນຊາດຊາເຣບໍ່ໄດ້ຢູ່ໃນເມືອງຫຼວງເປັນເວລາຫຼາຍປີ. ແລ້ວເກີດຫຍັງຂຶ້ນຕອນທີ່ລາວບໍ່ຢູ່? ສາລານຸກົມ ບຣິແທນນິກາ ບອກວ່າ: “ຕອນທີ່ນະໂບໄນດັດບໍ່ຢູ່ ລາວໄດ້ຝາກບັນລັງແລະກອງທັບສ່ວນສຳຄັນໄວ້ກັບເບນຊາດຊາເຣ.” ດັ່ງນັ້ນ ເບນຊາດຊາເຣຈຶ່ງປົກຄອງບາບີໂລນຮ່ວມກັບພໍ່ຂອງລາວໃນໄລຍະນັ້ນ. ອາລັນ ມິນລາດເຊິ່ງເປັນນັກບູຮານຄະດີແລະນັກວິຊາການດ້ານພາສາບອກວ່າ ເປັນເລື່ອງທີ່ເໝາະສົມທີ່ “ປຶ້ມດານຽນຈະເອີ້ນເບນຊາດຊາເຣວ່າ ‘ກະສັດ.’”
ແຕ່ສຳລັບຜູ້ຮັບໃຊ້ຂອງພະເຈົ້າແລ້ວ ສິ່ງທີ່ພິສູດວ່າປຶ້ມດານຽນເຊື່ອຖືໄດ້ແລະໄດ້ຮັບການດົນໃຈຈາກພະເຈົ້າກໍຄືຂໍ້ພິສູດໃນຄຳພີໄບເບິນ.—2 ຕມ. 3:16
