JOKJI jetífaʼato nó, je chjota xi tʼatsʼe Biblia kotʼayason kʼoatso nga tsín tsakʼejna kjoaixi je rey Belsasar, xi bʼaxki̱ ya libro xi tsʼe Daniel (Dan. 5:1). Yaa tsakʼangini nga kʼoakitso nga tsín jme xi koansjaile je chjota arqueólogo xi bakó tsa ñaki tsakʼejna kjoaixi rey xi kʼoatsakʼin. Tonga kʼiaa nga nó 1854 tsaʼyale jokjoantjínni xi tʼatsʼe jebi.

Nga kui nó jebi, je chjota xi Gran Bretaña tsʼe xi John Taylor tsakʼin, kʼianga ki ya ʼnde jñani Ur tsakʼin nichxin kjoatse, jñani Irak ʼmi ndʼaibi. Ya jñani tíjna jngo xjáo xi nʼio jekji, nkjín la̱jao̱ koansjaile xi tela centímetro (4 pulgada) ndo. Kʼoa je la̱jao̱ jebi faʼaitʼa nga kʼoatsakʼinle je rey Nabonido kao tile xi majchínga, xi Belsasar tsakʼin nga tse nichxin katamale. Kʼoa je chjota xi kʼoakitso nga tsín tsakʼejna je Belsasar kʼiaani koanjinle nga tsakʼéjna kjoaixi chjota jebi.

Tonga je Biblia, ali tsa tokuijin xi tso nga tsakʼejna chjota jebi, kʼoati síkʼaxki̱ nga rey koan. Tjínkʼa je chjota xi kʼoati kitso nga tsín kʼoatjín jebi. Tobʼelañá, je chjotachjine xi kʼia tsakʼejna nga siglo 19 xi William Talbot tsakʼin, kʼoakitso nga tsín jme choa̱ tjín tsa je tsakatéxoma je Bel-sar-ussur [Belsasar].

Je kjoa jebi kʼiaa kisʼendajin nga koansjaisa je la̱jao̱ jñani faʼaitʼa nga je rey Nabonido, xi nʼaile koanni je Belsasar, nga nkjín nó nga tsín ya Babilonia tsakʼejna. ʼYáni xi tsakatéxoma ngajaole. Je Encyclopaedia Britannica itso: “Kʼianga xin naxinandá kikʼejna Nabonido, jé Belsasar tsakatéxoma ngajaole kʼoa me ngatsʼi chjotakjoajchánle nga je tsakánentsja”. Kui xi bakó jebi nga je Belsasar tsakatéxoma nga kui nichxin. Kuinga kʼoakitsoni je chjota arqueólogo xi Alan Millard ʼmi nga kixi tíjnani nga rey sʼin bʼaxki̱ je Belsasar ya libro xi tsʼe Daniel.

Ñá xi choʼndale Niná maa, ʼyañá nga tʼatsʼe Niná jaʼaini jmeni xi tso je libro xi tsʼe Daniel nga̱ yaa Biblia faʼaitʼa (2 Tim. 3:16).