JOARENLANK säden eenje Jelieede, daut et dän Kjennich Belsazar goanich jeef, wua daut Buak Daniel von räd (Dan. 5:1). Dee säden daut, wäajen de Jeschichtsforscha nuscht finjen kunnen, waut bewees, daut Belsazar werkjlich mol jeläft haud. Oba aune 1854 endad sikj daut. Wuarom?

Aune 1854 unjasocht John George Taylor, een Rejierungsbeaumta von Enjlaunt, de ieeschtemmasche Staut Ur, waut vondoag dän Dach em Sieden von Irak es. Doa funk hee en eenen grooten Torm eenje hoade Leembieta, wua ieeschtemmasche Latren nenjedrekjt wieren. Jieda eent von dee es 10 Zentimeeta (ojjefäa 4 Zoll) lank. Opp eent es een Jebäd bowen, wua doano jefroacht woat, daut de babelonischa Kjennich Nabonid un sien elsta Sän Belsazar lang läwen muchten. Nu musten mau rajcht dee, waut doa ieescht nich aun jleewden, toostonen, daut Belsazar werkjlich jeläft haud.

Oba de Schreft sajcht nich bloos daut Belsazar jeläft haft. Dee sajcht uk, daut dee een Kjennich wia. Un daut jeef wada eenje Jelieede, waut daut beduaden. Biejlikj schreef de Forscha William Talbot von Enjlaunt ojjefäa aune 1875, daut eenje säden, daut “Bel-sar-ussur [Belsazar] met sienen Voda Nabonid toop rejieren deed. Oba fa daut jeft et äwahaupt kjeenen Bewies”.

Dise Sach wort oppem kloaren jebrocht, aus se aundre Leembieta unjasochten, wua bowen jeschräwen wia, daut de Kjennich Nabonid, waut Belsazar sien Voda wia, mol joarenlank nich en Babel wia. Wäa rejieed dan to dee Tiet? De Encyclopaedia Britannica sajcht: “Aus Nabonid veleet, äwajeef hee Belsazar dän Troon un stald am äwa de mieeschte von siene Soldoten aun.” No daut no wia Belsazar en dise Tiet werkjlich eent von de babelonische Kjennichs. Doawäajen sajcht de Jeschichtsforscha Alan Millard, waut sikj fein met Sproaken vesteit, daut et paussent es, daut daut Buak Daniel Belsazar eenen “Kjennich” nant.

Oba waut es fa Gott siene Deena de jratsta Bewies, daut daut Buak Daniel von Gott enjejäft un opp to veloten es? Daut es daut, waut de Schreft sajcht (2. Tim. 3:16).