FA TANATINI-TAO maro ty mpikinokino Baiboly ro nivola hoe tsy nisy Belsazara Mpanjaka, azy resahy amy bokini-Daniela ao iny. (Dan. 5:1) Nieritseritsy ho zay rozy satria mbo tsy nahita porofo mihintsy ty mpikaroky ambany tany hoe nisy vatany ie. Fe niova zay tamy 1854. Nanino?

Tamy tao io, le nisy solontena britaniky kaihy hoe John Taylor nandiniky ty sisa tavela tamy tanàni-Ora taloha, amy faritsy antimoni-Irak henanizao. Nisy tanimanga maromaro nihitany tanatini-tilikambo bevata raiky. Folo santimetatsy eo ty halavani-raha rey, le nahità soratsy atao ho fantsiky io. Nisy vavaky mba hahalava velo ani-Nabonida Mpanjakani-Babylona noho Belsazara anakilahiny ty raiky amy tanimanga rey. Ndre mpikinokino rey le voatery naneky hoe: Io ty porofo mampiseho fa nisy vatany Belsazara.

Fe tsy mivola avao ty Baiboly hoe nisy vatany Belsazara, fa resahiny koa hoe nimpanjaka ie. Mbo tsy ta haneky ani-zay koa mpikinokino reo. Tamy tao 1875 mbany, ohatsy, le nanoratsy ty mpahay siansy raiky kaihy hoe William Talbot fa “niaraky niasa tamy Nabonida babany Bel-sar-ussur [Belsazara]. Fe tsy misy porofo manamarina ani-zay ndre raiky.”

Fe nirava aly hevitsy zay lafa nisy tanimanga raiky nahità soratsy manambara hoe nandeha lavitsy ani-renivohitsini-Babylona Nabonida Mpanjaka, babani-Belsazara, tanatini-tao maromaro. Ino ty niseho lafa tsy teo ie? Mivola ty Bokim-pahaia Britannica hoe: “Lafa tan-tany hafa any Nabonida, le napetrany tamy Belsazara ty fandaisa noho ty tampany bevata amy ty maramilany.” Midika raha zay fa nanday fanjakà ta Babylona tao vatany Belsazara tanatini-fotoa io. Zay ro nahavy ani-Alan Millard, mpikaroky sady manam-pahaiza mikasiky fivolana hanambara hoe mety soa laha “kaihini-Bokini-Daniela hoe ‘mpanjaka’ Belsazara.”

Mazava ho azy fa amy mpanompo-Ndranahary, le amy Baiboly ao avao ro ahità ty tena porofo hoe azo atokisa noho baka amy Ndranahary ty bokini-Daniela.—2 Tim. 3:16.