FURU yari langa, sabiman di e krutu Bijbel ben feni taki Kownu Belsasar di kari na ini a buku Danièl no ben e libi trutru (Dan. 5:1). Wan heri pisi ten den ben e denki so fu di sabiman no ben feni nowan buweisi di ben sori taki a ben e libi trutru. Ma sani kenki na ini 1854. Fa dati du kon?

Na ini a yari dati J. G. Taylor, wan sabiman fu Ingrisikondre, ben go ondrosuku sani na a zuidsei pisi fu Irak, pe na owruten foto Ur ben de. Drape a feni wan tu pisi ston fu klèidoti na ini wan bigi toren. Den pisi klèidoti disi ben langa 10 centimeter èn sani ben skrifi na den tapu. Tapu wan fu den ston disi sma ben skrifi wan begi. Na ini a begi disi den ben aksi den gado fu den efu Kownu Nabonidus nanga en moro owru manpikin Belsasar ben kan libi langa. Srefi den sabiman di e krutu Bijbel no ben man strei moro: Den sani disi e sori taki Belsasar ben e libi trutru.

Ma Bijbel no e taki nomo dati Belsasar ben libi trutru. A e sori tu taki a ben de wan kownu. Den sabiman no ben wani bribi a sani disi tu. Fu eksempre, na a pisi ten fu a yari 1875 na Ingrisi sabiman William Talbot skrifi taki son sma ben taki dati „Bel-sar-usur [Belsasar] ben e tiri na a srefi ten leki en papa Nabonidus. Ma nowan buweisi de taki disi de so.”

Ma baka dati sma feni tra pisi ston fu klèidoti pe ben skrifi taki son leisi Kownu Nabonidus, a papa fu Belsasar, no ben de na ini a mamafoto wan tu yari langa. Suma ben e tiri te a no ben de? Na Encyclopaedia Britannica e taki dati „te Nabonidus no ben de na ini a kondre a ben meki Belsasar tiri a kondre èn a moro bigi pisi fu a legre”. Sobun, te Nabonidus no ben de, Belsasar ben e tiri Babilon na ini a presi fu en papa. Wan tra sabiman di nen Alan Millard taki dati a fiti taki „a buku Danièl e kari Belsasar ’kownu’”.

Anbegiman fu Yehovah e bribi na ini a buku Danièl èn den e si en leki wan buku di kon fu Gado fu di a de wan pisi fu Bijbel èn fu di furu tra Bijbel buku e taki fu a profeiti Danièl.​—2 Tim. 3:16.