AKGLHUWA kata, tiku lakputsananikgo Biblia wankgolh pi mapakgsina Belsasar, tiku litachuwinan kxlibro Daniel, ni xlikana xlama (Dan. 5:1). Chuna xwankgo xlakata arqueólogos nitu xtekgskgonit tuku nalimasiya pi uma mapakgsina xlikana xlama. Pero uma talakgpalilh kkata 1854. ¿Tuku xlakata?

Kʼuma kata, John Taylor chatum chixku tiku xalak Bretaña, makxtulh tuku xwi kxamakgan kachikin Ur, nema la uku tatakgsa ksur xla Irak. Anta, tekgsli akglhuwa cilindros xla arcilla nema max 10 centímetros (4 pulgadas) la xlilhman xwankgonit, kʼakgtum lanka torre. Anta wi tuku xtatsokgtawilanit ktachuwin xala makgasa, na wi tuku xtsokgwilikanit xpalakata xlatamat mapakgsina xalak Babilonia tiku xwanikan Nabonido chu xlakata xapuxku xkgawasa, Belsasar. Asta tiku lakputsananikgo Biblia wankgolh pi tuku tekgska limasiya pi Belsasar xlikana xlama.

Pero Biblia ni kajwatiya wan pi xlama, wata na lichuwinan pi mapakgsina xwanit. Tiku lakputsananikgo Biblia na wankgolh pi uma ni xlikana xwanit. Akgtum liʼakxilhtit, William Talbot científico inglés tiku latamalh ksiglo diecinueve tsokgwililh pi makgapitsi latamanin wankgo pi «Bel-sar-ussur [Belsasar] wa tiku xtawila xlakgxokgo xtlat, Nabonido. Pero ni anan tuku nalimasiya komo uma xlikana».

Uma taʼakglhuwit lakkaxlalh akxni akxilhka tuku xtatsokgtawilakgonit kʼatanu cilindros xla arcilla nema xlichuwinan pi mapakgsina Nabonido, xtlat Belsasar, akglhuwa kata xʼanit alakatanu kachikin. ¿Tiku mapakgsinalh akxni niti xwi? Encyclopaedia Britannica wan: «Akxni Nabonido xʼanit alakatanu país, lakgayawalh Belsasar xpumapakgsin chu ksoldados». Uma kilhtamaku Belsasar na chatum mapakgsina xlitaxtu. Wa xlakata, arqueólogo Alan Millard wa pi anta kxlibro Daniel lakgchan mapakgsina nalimapakuwikan Belsasar.

Xlikana pi xlakskujnin Dios, lipawankgo pi tuku lichuwinan xlibro Daniel xaxlikana chu wa xTachuwin Dios (2 Tim. 3:16).