FOR plenty years, some people no gree say King Belshazzar wey Bible talk about for the book of Daniel really exist. (Dan. 5:1) They no believe because they no see anything to prove say Belshazzar really live. But for 1854, their believe change. Why?

For that year, one British ambassador wey e name na J. G. Taylor go do research for one old city wey the name na Ur, and the city don scatter. Today them de call that place southern Iraq. For there, for one big house e see some things wey they use clay make. Each one of the things fit long reach four inches (10 cm), and they write things for their body. They use the style of writing wey them de use that time write-am. One of the things wey they write na prayer for King Nabonidus the king of Babylon and e first son Belshazzar, say make they live long. This thing wey they see really prove say Belshazzar really live.

But Bible no only talk say Belshazzar live, e still talk say e rule as king. Some people still doubt this one. For example, around the year 1875 the English science man wey e name na William Talbot write say some people talk say “Bel-sar-ussur [Belshazzar] rule for the same time with e papa Nabonidus. But anything no dey to prove this one.”

But they clear the confusion when they see other writings for the things wey they use clay make. This writing show say King Nabonidus, the papa of Belshazzar no stay for Babylon for some years. So wetin happen when e no dey? One book wey them de call Encyclopaedia Britannica talk say: “When Nabonidus no dey, e give power to Belshazzar to rule and control the army.” So Belshazzar rule for Babylon that time with e papa. Na this one make the science man and language professor wey e name na Alan Millard talk say, Bible dey right when e call “Belshazzar ‘king’ for the book of Daniel.”

For servants of God, Bible get the proof to show say they fit trust the book of Daniel and na God use e holy spirit direct make they write this book.—2 Tim. 3:16.