TIPA dungu agarã, atikango na agu apai du rogo Ziazia Kekeapai yo aagumba gupai nga, gu bakindo nangia Beresasara i nafura tipa ko rogo gu buku nga ga Daniere aadunga ti ni te. (Dan. 5:1) I aidi kuti gipai re mbiko gupai nga, agu aboro nageteka kuru ahe sende yo aarengbanga ka yugo gu gopai nzunzu nga ko aima raka te. Ono tie, gu bipai re aima ariatihe rogo 1854. Tipagine?

Rogo gu garã re, gu boro ringara aNgirisi rimoko angia J. G. Taylor awisigi kura kuadikuadi rago rogo gu ringara naadu mbata nga Ura, nga gu du awere nga papara Iraq ku sudiyo. Rogo gu rago re, gu bawisigipai re abi dungu mekemeke a’akoro. Bagizo agu a’akoro re adu nga dagba bee 10, na kekeapai ti ni. Kekeapai sa dagba gu kekeapai yo naadu ti ni adu na kparakpee rogoho tipa gu ga aBabero bakindo nangia Nabonido raki ni gbangaha gbiati gu bambata wiriko rimoko angia Beresasara. Zavura ababisirapa apai aima ida kuti gupai nga: Gipai re nayugo gupai nga Beresasara adu kinaho ti ni.

Ono tie, Ziazia Kekeapai ayugongo kina gupai sa nga Beresasara adu kinaho ti ni te, ono si nayugo gupai ayugo a nga ko angia bakindo. Berewe a, ababisirapa apai aatikö atikö kutini. Ni kpiapai gu boro-birĩ-inohe nangia William Talbot ni boro ringara aNgirisi bara rogo gu garã nangia 1875 ake gupai nga kura aboro nape gupai nga “Beresasara azogorago kina ti gu bangisa regbo bako nangia Nabonido azogorago. Ono wiri gopai ho nayugo ho nga rengo du nangia gupai re te.”

Ono tie, gu kango re aima nyasa ho gu kekeapai naadu ti agu a’akoro re ayugu gupai ni nga ba Beresasara nangia Bakindo Nabonido araki kusayo ti Babera tipa agarã ti kura regbo sa. Ginipai namangi ti gu regbo ko aadunga ho ya? Encyclopaedia Britannica naya, “Ho Nabonido amere ni, ko afu mbatabakindo fu Beresasara gbiati bakere papara gako riivura.” Sidu, gure adu wa ka i ya Beresasara aamangasunge wa badia zogarago Babera yo ti gu regbo re. Sidu, gu bageteke kuru ahe sende yo kidu ni wene bawiriki afugo nangia Alan Millard ape gupai nga si arẽarẽ “gu Buku nga ga Daniere yambu Beresasara nga ‘bakindo.’”

Rengo ngaha nga, tipa ga Mbori amoyambu, gu bakere gopai nayugo gupai nga gu buku nga ga Daniere ima du ni gu buku rengbe boro ka kido kutini na si aye be ga Mbori toro kina rogo Ziazia Kekeapai yo nitihe.—2 Tim. 3:16.