1. Ngo ma myero ngat moni otim ma peya ocako gero ot?

GO KONG ni ngat moni mito gero ot. En ngeyo kodi ot ma en mito gerone kikome. Tika omyero en ocit i dukan, owil jami ma mitte, ci ocak gedo cutcut? Pe. Ma en peya ocako gedo, tye gin mo ma pire tek ma myero kong otim​—kwano wel lim ma mitte. Pingo? Pien en myero onge ka etye ki lim muromo me tyeko ot meno. Ka kong en okwano wel lim ma mitte con, ci bitwero bedo ki kero me tyeko ode manyen-ni.

2. Ma lubbe ki Luka 14:28-30, ngo ma omyero watam iye matut ma peya wanongo batija?

² Tika marri pi Jehovah ki pwoc pi jami ma en otimo piri dong otugo cwinyi me tamo pi nongo batija? Ka tye kit meno, ci nongo ikemme ki moko tam ma rom ki pa laco ma mito gero ot. Pingo watwero wacone kit meno? Yecu oporo tute ma mitte me bedo lapwonnyene ki gero ot, kit ma watwero neno kwede ki i lokke ma tye i Luka 14:28-30. (Kwan) Yecu onongo tye ka nyamo gin ma bedo lapwonnyene kwako. Wek wabed lulub kore, omyero wabed atera me “kwano wel lim ma mitte,” ma en aye ariya ma wabikato ki iye ki jami mogo ma omyero wajalgi. (Luka 9:23-26; 12:51-53) Pi meno, ma peya inongo batija, myero kong itam matut i kom jami ducu ma bedo lapwonnye pa Yecu kwako. Ci ibibedo ma iyubbe me medde ki tic pi Lubanga ki gen macalo Lakricitayo ma onongo batija.

3. Gin ango ma wabinyamo i pwony man?

³ Tika doko lapwonnye pa Kricito ma onongo batija konye tye ka kiporo ki jami ma omyero ijalgi woko? Ngene kene ni tye! Batija yabo doggola me nongo mot mapol​—i kare-ni ki i kare me anyim. Kong dong wanyamu lapeny  mogo ma pigi tego madok i kom batija. Timo meno bikonyi me gamo lapeny man ni, “Tika atye atera me nongo batija?”

4. (a) Ngo ma dyere obedo? (b) Tyen lokke ngo me “kwerre” kekeni kit ma kitito kwede i Matayo 16:24?

⁴ Ngo ma dyere obedo? Ma peya inongo batija, myero kong idyere. Ka itye ka dyere bot Jehovah, ilego bote ki cwinyi ducu kun ititte ni ibimiyo kwoni me tic pire pi naka. Ka idyere bot Lubanga, ci nongo ‘ikwere’ kekeni. Yecu otito bot lupwonnyene ni: “Ka ce dano mo mito lubo kora, myero okwong kwerre kekene, ka ocak tingo yatte, olub kwede kora.” (Matayo 16:24, NW) Man weko idoko dano pa Jehovah, ma obedo twon mot madit adada. (Rom. 14:8) Nongo itye ka wacce ni cakke i cawa meno cito kwede anyim, ibiketo cwinyi i tic pire ento pe me yomo cwinyi kekeni. Dyereni obedo kwonge​—nyo cikke bot Lubanga. Jehovah pe diyowa me kwonge bote. Ento ka dong wakwonge, en mito ni wacobi.​—Jab. 116:12, 14.

5. Apokapoka ango ma tye i kin dyere ki batija?

⁵ I yo ango ma dyere kubbe kwede ki batija? Pe tye ngat mo ma ngeyo ka idyero kwoni pien timme i kin in ki Jehovah keken. Batija obedo gin ma timme i nyim lwak, pol kare i gure me adwol nyo gure madit. I cawa me batijani, inyuto bot jo mukene ni in dong ityeko dyero kwoni bot Jehovah. * Pi meno, batijani nyuto bot jo mukene ni imaro Lubanga Jehovah ki cwinyi ducu, kwoni ducu, tammi ducu, ki tekoni ducu dok imoko tammi me tic pire nakanaka.​—Mar. 12:30.

6-7. Ma lubbe ki 1 Petero 3:20-22, tyen lok aryo mene ma oweko batija pire tek?

⁶ Batija tika mitte? Tam kong i kom lok ma tye i 1 Petero 3:20-22. (Kwan.) Kit macalo yeya onongo nyuto ki dano ni Nua tye ki niye, batijani bene nyuto bot dano ni dong ityeko dyero kwoni bot Jehovah. Ento tika ada batija pire tek? Eyo pire tek. Petero otito tyen lok mumiyo man pire tek. Mukwongo, batija tye ka “larowu.” Batija twero larowa ka wanyuto ki i ticwa ni watye ki niye i kom Yecu, waye bene ni en oto piwa, kicere me kwo i polo, dok kombeddi en tye “i kabedo me deyo i nget Lubanga tung acuc.”

⁷ Me aryo, batija weko wabedo ma ‘cwinywa leng.’ Ka wadyere bot Lubanga dok wanongo batija, wacako bedo ki wat macok kwede. Kit macalo nongo wangut i kom balwa ki cwiny me ada dok wanyuto niye i kom ginkok, Lubanga timiwa kica pi balwa. Pi meno, watwero bedo ma cwinywa pe pidowa i nyimme.

8. Ngo ma myero obed tyen lok ma pire tek loyo ma weko inongo batija?

⁸ Ngo ma myero otug cwinyi me moko tammi me nongo batija? Macalo adwogi me kwanni me Baibul, ipwonyo jami mapol i kom Jehovah​—kite kacel ki yo ma en timo kwede ki jami. Gin ma ipwonyo i kome ogudo cwinyi dok otugo mitini me marre. Marri pi Jehovah aye myero obed tyen lok ma pire tek loyo ma weko inongo batija.

9. Tyen lokke ngo me nongo batija i nying Won ki Wod ki cwiny maleng, kit ma kitito kwede i Matayo 28:19, 20?

⁹ Tyen lok mukene ma weko imoko tammi me nongo batija aye ni ipwonyo dok iye gin ma Baibul pwonyo. Nen kong gin ma Yecu owaco i kare ma omiyo cik ni walok dano gudok lulub kore. (Kwan  Matayo 28:19, 20.) Ma lubbe ki lok pa Yecu, jo ma ginongo batija omyero gutim man “i nying Won ki Wod ki cwiny maleng.” Man tyen lokke ngo? Myero iye ki cwinyi ducu lok ada me Baibul madok i kom Jehovah; Wode Yecu; ki cwiny maleng. Lok ada magi tye ki teko dok twero gudo cwinyi i yo matut. (Ibru 4:12) Kong dong wanyamu mogo i kingi.

10-11. Lok ada mene madok i kom Won ma ipwonyo dok ijolo?

¹⁰ Tam kong kare ma icako pwonyo lok ada magi i kom Won: Nyinge ‘Jehovah,’ en “aye Ngat Mamalo Twal ma loyo wi lobo-ni ducu” dok en kene “aye Lubanga me ada.” (Jab. 83:18; Jer. 10:10) En aye Lacwecwa, dok “lar a ki bot Rwot [Jehovah].” (Jab. 3:8; 36:9) En oketo yub me larowa ki i bal ki to dok omiyo botwa gen me nongo kwo ma pe tum. (Jon 17:3) Dyereni ki batijani binyuto ni itye ngat acel i kin Lucaden pa Jehovah. (Ic. 43:10-12) Ibibedo i kin luworo ma ginonge i twok lobo-ni ducu dok gitye ki awaka pien kilwongogi ki nying Lubanga kun bene giweko nyinge ngene bot jo mukene.​—Jab. 86:12.

¹¹ Pud dong obedo twon deyo madit me niang gin ma Baibul pwonyo i kom Won! Ka iye lok ada ma pigi tego magi, ci bitugo cwinyi me dyero kwoni bot Jehovah kun inongo batija.

12-13. Lok ada mene madok i kom Wod ma ipwonyo dok ijolo?

¹² Iwinyo nining i kare ma ipwonyo lok ada magi madok i kom Wod? Yecu aye ngat me aryone ma pire tek loyo i polo ki lobo. En omiyo kwone macalo ginkok piwa labongo dic mo. Ka wanyuto ki ticwa ni watye ki niye i kom ginkok, ci kitwero timiwa kica pi balwa, waromo dongo wat macok ki Lubanga, dok wanongo kwo ma pe tum. (Jon 3:16) Yecu aye Lalamdogwa Madit. En mito konyowa me nongo adwogi maber ki i ginkok wek wabed ki wat macok ki Lubanga. (Ibru 4:15; 7:24, 25) Macalo Kabaka me Ker pa Lubanga, Jehovah bitic kwede me lonyo Nyinge, juko tim maraco, ki dok kelo mot ma birii nakanaka i Paradic. (Mat. 6:9, 10; Yabo 11:15) Yecu aye lanen ma omyero walubi. (1 Pet. 2:21) En otiyo ki kwone me cobo miti pa Lubanga dok i yo meno owekiwa lanen me aluba.​—Jon 4:34.

¹³ Ka ijolo lok ada ma Baibul pwonyo i kom Yecu, ci ibicako maro Wod pa Lubanga ma pire tek man. Mar meno tugo cwinyi me tic ki kwoni me timo miti pa Lubanga, kit ma Yecu otimo kwede. Macalo adwogine, ibiwinyo ni myero idyer kwoni bot Jehovah dok inong batija.

14-15. Lok ada mene i kom cwiny maleng ma ipwonyo dok ijolo?

¹⁴ Ngo ma itamo i kare ma ipwonyo lok ada magi madok i kom cwiny maleng? Cwiny maleng pe obedo lubanga, ento obedo teko ma Lubanga tiyo kwede me cobo ticce. Jehovah otiyo ki cwiny maleng me tiro co ma gucoyo Baibul, dok cwiny maleng konyowa me niang ki me keto i tic gin ma wakwano ki i Baibul. (Jon 14:26; 2 Pet. 1:21) Jehovah miniwa “tek madwong me twero” kun tiyo ki cwiny mere maleng. (2 Kor. 4:7) Cwiny maleng miniwa teko me tito kwena maber, me lweny ki atematema, me loyo turcwiny, ki me kanyo peko. Konyowa bene me nyuto kit mogo mabeco ma tye i kin “nyig ma nyak pi cwiny maleng.” (Gal. 5:22) Lubanga miyo cwiny mere maleng bot jo ma gigene dok gilego pire.​—Luka 11:13.

 ¹⁵ Pud dong kweyo cwinywa ya me ngeyo ni luwor Jehovah gitwero jenge i kom cwiny maleng me konyogi me tic pi Lubanga! Ka iye lok ada madok i kom cwiny maleng, man bitugo cwinyi me dyere bot Lubanga ki nongo batija.

16. Ngo ma dong wapwonyo ki i nyamo lokwa man?

¹⁶ Ka imoko tammi me dyere bot Lubanga ki nongo batija, nongo itye ka kwanyo yo ma pire tek adada. Kit ma wapwonyo kwede, myero ibed atera me jalle ki jolo ariya ma itwero rwatte kwede i wot man. Ento mot ma ibinongo pol ma loyo jami ma ijalo. Batija twero lari, dok weko ibedo ma cwinyi pe pidi i nyim Lubanga. Tyen lok ma pire tek loyo ma weko imoko tammi me nongo batija aye marri pi Lubanga Jehovah. Omyero bene iye ki cwinyi ducu lok ada ma ipwonyo i kom Won, Wod, ki cwiny maleng. I nge tamo i kom gin ma dong wanyamo, itwero gamo lapeny man nining, “Tika atye atera me nongo batija?”

17. Jami ma pigi tego ango ma myero ngat moni otim ma peya onongo batija?

¹⁷ Ka iwinyo calo itye atera me nongo batija, ci labongo akalakala mo dong itimo jami mogo me mako wat ki Jehovah. * Ingeyo jami mapol madok i kom Jehovah ki Yecu pien ibedo ka kwano Baibul kare ki kare. Idongo bene niyeni. (Ibru 11:6) Itye ki gen matek i kom cikke pa Jehovah ma nonge i Baibul, dok itye ki gen ni niyeni i kom ginkok pa Yecu twero lari ki i bal ki to. Ityeko ngut i kom balli; ma te lokke ni iwinyo marac pi bal ma itimogi yam con, dok ipenyo Jehovah ni otimmi kica. Iloko kwoni; ma te lokke ni iweko jami maraco ma yam itimo dok icako kwo i yo ma yomo cwiny Lubanga. (Tic 3:19) Itye ki mit kom me tito pi niyeni bot jo mukene. Idoko latit kwena ma peya onongo batija dok icako tito kwena kacel ki kacokke. (Mat. 24:14) Jehovah tye ki awaka i komi pi timo jami ma pigi tego magi. Iweko cwinye yom adada.​—Car. 27:11.

18. Ngo mukene ma myero itim ma peya inongo batija?

¹⁸ Ma peya inongo batija, tye jami mukene ma bene mitte ni itim. Kit ma wapwonyo kwede con, myero idyere bot Lubanga. Leg bote ki cwinyi ducu i cawa ma nongo itye keni, kun icikke bote ni ibitic ki kwoni me timo mitine. (1 Pet. 4:2) I nge meno wek lakub kin luelda onge ni imito nongo batija. En bipenyo luelda mogo me bedo piny kwedi. Pe ibed ki lworo mo me rwatte kwedgi. Omegiwa ma lukica magi gingeyi dok gimari.  Gibinyamo kwedi pwony mogo ma pigi tego me Baibul ma dong ipwonyogi. Gimito moko ni iniang pwony magi dok ni ingeyo pingo dyere ki nongo batija pire tek. Ka guye ni itye atera, ci gibimini ngec ni itwero nongo batija i gure me adwol nyo gure madit.

19-20. Ngo ma myero itim i nge nongo batija, dok itwero timo meno nining?

¹⁹ I nge nongo batija, ngo ma myero itim? * Wi myero opo ni dyere obedo kwonge ma Jehovah mito ni icobbi. Dong i nge batijani, mitte ni igwok kwongeni. Itwero timo meno nining?

²⁰ Bed cok ki jo me kacokke. Ka idoko Lakricitayo ma onongo batija, ci nongo dong itye i kin ‘utmege’ ma ginonge i twok lobo-ni ducu. (1 Pet. 2:17) Omege ki lumege me kacokke gitye calo jo me otti i yo me cwiny. Ka icito i cokke kare ki kare, ci ibijingo wat i kinwu bedo matek. Kwan Lok pa Lubanga nino ki nino kun ilwodo. (Jab. 1:1, 2) I nge kwano gin mo ki i Baibul, kwany kare me tam matut i kom lok ma ikwano. Ci lok meno bigudo cwinyi. ‘Leg kare ducu.’ (Mat. 26:41) Lega ma ilego ki cwinyi ducu bikonyi me nyiko cok ki Jehovah. ‘Medde ki keto pi Kerre obed mukwongo.’ (Mat. 6:33) Itwero timo meno ki weko tic me pwony bedo gin ma pire tek adada i kwoni. Nywako i tic me pwony kare ki kare biweko niyeni bedo matek, dok itwero konyo jo mukene me cako wot i yo ma terogi i kwo.​—1 Tem. 4:16.

21. Batijani biyabi yo me timo ngo?

²¹ Tam ma imoko me dyero kwoni bot Jehovah ki nongo batija aye tam ma pud dong pire tek loyo ma ibimokone. Tye lok ada gire ni mitte ni wajal jami mogo. Ento tika mot ma ibinongo pol loyo jami ma ijalo? Eyo! Kit ariya mo keken ma ibikato ki iye i lobo man “bedo pi kare manok mo keken.” (2 Kor. 4:17) Ento batijani bikonyi me bedo ki yomcwiny i kwoni i kare-ni wa i “kwo ma en aye kwo kikome” ma bibino i anyim. (1 Tem. 6:19) Pi meno, tam matek dok ilegi i kom lagammi pi lapeny man, “Tika atye atera me nongo batija?”