1. I wang’ nicaku giero ot ng’atini ucikere nitimo ang’o?

KEPAR nia ng’atu moko ubemito egier ot. Eng’eyo kit ot m’emito gierone. Nyo ebicing’iewo jamtic mi giedo ndhundhu man ebicaku giero otne? Ungo. I wang’ nicaku tic, kwayu elar etim lembe moko ma pire tek mandha: ecikere nitimo kwan mi sente ma giedo mi otne bicamu. Pirang’o? Pilembe pire tie tek nia eng’ei ka nyo sente m’etie ko romo daru giedo mi otne. Kan elar etimo kwan cuu, eno bikonye nidaru giedo mi ot pare ma ber.

2. Nimakere ku Luka 14:28-30, icikiri niparu cuu iwi lembang’o i wang’ limo batizo?

² Nyo mer m’imaru ko Yehova man foyofoc m’itie ko pi lembe m’etimo iri ucweli niparu nia ukwayu ilim batizo? Kan etie kumeno, ng’ei nia ibecimaku yub m’urombo ku pa ng’atu m’ubemito giero ot. Pirang’o wayero kumeno? I Luka 14:28-30 (som), Yesu uporo nibedo jalub pare ku giero ot. I giragora maeno, Yesu ubino weco iwi lembe ma ng’atini ucikere nitimo kara ebed jalub pare. Kara wabed julub pa Yesu, wacikara ‘nikwanu wel piny’ niwacu wacikara nibedo ayika niciro peko, man nitwonara ku lembe dupa. (Lk. 9:23-26; 12:51-53) Pieno, i wang’ nilimo batizo icikiri niparu cuu iwi lembe m’ibinweng’iri ko kan idoko jalub pa Kristu. Eno bikonyi kara imediri nigwoko bedoleng’ peri ni Mungu i ng’ei batizo.

3. I thiwiwec maeni wabiweco iwi lembang’o?

³ Nyo pire tie tek nia itwoniri ku lembe dupa man ibed ayika niciro peko pi nilimo batizo? Eyo! Kan ilimo batizo, ibinwang’u mugisa dupa tin eni, man i nindo m’ubino bende. I thiwiwec maeni wabing’io i penji moko ma pigi tek iwi batizo. Eno bikonyi nidwoko wang’ penji ma e: “Nyo atie ayika nilimo batizo?”

4. (a) Nithieriri ni Mungu utie nitimo ang’o? (b) Wec ma nia ‘nikweriri gijo’ ma nwang’ere i Matayo 16:24 thelembene utie ang’o?

⁴ Nithieriri ni Mungu utie nitimo ang’o? I wang’ limo batizo, icikiri nithiero kwo peri ni Mungu. Nithieriri ni Mungu utie nirwo i bang’e kud adundeni ceke man ning’olo ire i rwone nia ibitimo ire i kwo peri ceke. Kinde m’ithieriri ni Mungu eca nwang’u ‘ikweriri’ giri. (Som Matayo 16:24.) Niai m’ithieriri ni Yehova, dong’ itie dhanu pare; eno utie rwom ma yawe mbe. (Rum. 14:8) I rwo m’ithieriri ko ire, inyutho nia dong’ niai saa maeno, gin ma pire bibedo tek nisagu i kwo peri utie nitimo yeny pare kende. Thieriri peri utie lembang’ola ma pire tek m’itimo ni Mungu. Yehova diyowa adiya ngo nia watim ire lembang’ola moko. Ento ka wang’olo lembe moko ire, emito nia watim lembene.​—Zab. 116:12, 14.

5. Tung’ tung’ ma kani m’utie i kind thieriri ni Mungu ku batizo?

⁵ Tung’ tung’ ma kani m’utie i kind thieriri ni Mungu ku batizo? Ng’atini thierere ni Yehova en gire i rwo pare ma segi, man ng’atu mange mbe ma ng’eyo nia ebethierere ni Yehova. Ento batizo tie lembe ma timere i wang’ dhanu; wang’ ma pol julimo i coko ma dongo. Saa m’ibelimo batizo, nwang’u ibenyutho ni jumange nia idaru thieriri ni Yehova. * Pieno batizo m’ibelimo ketho jumange ging’eyo nia imaru Yehova Mungu peri kud adundeni ceke, ku ng’eyong’ec peri ceke, ku pidoii ceke, ku tegoni ceke, man nia ing’io nitimo ire nja ku nja.​—Mk. 12:30.

6-7. Nimakere ku 1 Petro 3:18-22, thelembe ario ma kani m’unyutho nia pire tie tek nilimo batizo?

⁶ Nyo andha pire tie tek nilimo batizo? Kenen wec moko ma nwang’ere i 1 Petro 3:18-22. (Som.) Calu ma avur unyutho ni jumange nia Noa utie ku yioyic, kumeno bende batizo peri nyutho nia idaru thieriri ni Yehova. Ento nyo andha pire tie tek nilimo batizo? Eyo. Jakwenda Petro unyutho thelembene moko. Mi kwong’o, eyero nia batizo ‘bodhojo.’ Batizo romo bodhowa ka watimo lembe m’unyutho nia wayio Yesu, wayio nia etho piwa, wayio nia ecer man kawoni “eni yo ku cing’ Mungu ma yor acwic.”

⁷ Mir ario, batizo ketho wabedo ku “pidocwiny ma ber.” Kinde ma wathierara ni Mungu man walimo batizo, nwang’u wacaku the winjiri ma segi kude. Calu ma wadaru yewo dubo mwa ku cwinywa ceke man wanyutho yioyic mwa i jamgony, Mungu weko dubone. Eno ketho wabedo ku pidocwiny ma ber i wang’e.

8. Thelembe ma kani ma pire tek m’ucikere nicweli nilimo batizo?

⁸ Thelembe ma kani ma pire tek m’ucikere nicweli nilimo batizo? Saa m’ibino ponjo Biblia, ituc ning’eyo nia Yehova tie ng’atu ma nenedi, man ing’eyo bende kite pare ma tung’ tung’. Lembe m’iponjo i wie umulo adundeni lee man ucweli nimare ku cwinyi ceke. Mer m’imaru ko Yehova re m’ucikere nibedo thelembe ma pire tek m’ubecweli nilimo batizo.

9. Nilimo batizo ku nying Wego, Wod, man tipo maleng’ ma Yesu uyero i Matayo 28:19, 20, thelembene tie ang’o?

⁹ Thelembe mange m’ubecweli nilimo batizo utie nia iponjo lemandha mi Biblia man iyio lemandhane. Kenen lembe moko ma Yesu uyero kinde m’eng’olo nia juketh dhanu udok julub. (Som Matayo 28:19, 20.) Yesu uyero nia jumii batizo  ni dhanu ‘ku nying Wego, ku Wod, man tipo maleng’.’ Wec maeno thelembene tie ang’o? Emito yero nia icikiri niyio kud adundeni ceke lemandha ma Biblia ubeponjo iwi Yehova, Wode ma Yesu, man tipo maleng’. Lemandha maeno gitie ku tego ma yawe mbe man giromo mulo adundeni lee. (Ebr. 4:12) Wakedwog iwi lemandhane moko.

10-11. Lemandha ma kani m’iponjo man iyio iwi Wego?

¹⁰ Kepar pi nindo m’iponjo lemandha ma e iwi Wego: iponjo nia ‘nyinge tie Yehova,’ etie “Ng’atu ma Malu Ngbir iwi ng’om ngung’,” man nia en kende re m’etie “Mungu mandha.” (Zab. 83:18; Yer. 10:10) Etie Jacwic mwa, man “both en e pa Yehava.” (Zab. 3:8; 36:9) Emaku yub pi nibodhowa kud i dubo man tho, bende emio iwa genogen mi kwo ma rondo ku rondo. (Yoh. 17:3) Thieriri peri man batizo m’ibilimo binyutho kamaleng’ nia idoko Jamulembe pa Yehova. (Isa. 43:10-12) Ibidoko bende acel m’i kind umego ku nyimego ma gibetimo ni Mungu i wang’ ng’om zoo, ma gitie ku mutoro nilwong’iri ku nyinge man ma gibenyutho nyingene ni jumange.​—Zab. 86:12.

¹¹ Etie iwa rwom ma lee ning’eyo lemandha ma Biblia ubeponjo iwi Wego! Kan iyio lemandha maeno, adundeni bicweli nithieriri ni Yehova man nilimo batizo.

12-13. Lemandha ma kani m’iponjo man iyio iwi Wod?

¹² Igam iwinjiri nenedi kinde m’iponjo lemandha m’ulubo e iwi Wod Mungu? Yesu utie ng’atu mir ario ma pire tek nisagu i polo kud i ng’om zoo. Ebino ayika nithiero kwo pare ni jamgony piwa. Ka wabetimo lembe m’ubenyutho nia watie ku yioyic i jamgony, Mungu weko dubo mwa, wabedo ku winjiri ma ceng’ini kude, man i nindo m’ubino, wabinwang’u kwo ma rondo ku rondo. (Yoh. 3:16) Yesu tie Jalam mwa ma dit. Ebemito ekonywa kara wanwang’ bero mi jamgony m’ethiero man wabed ku winjiri ma ceng’ini ku Mungu. (Ebr. 4:15; 7:24, 25) Calu Yesu tie Ubimo mi Ker pa Mungu, Yehova bitio kude pi nidwoko nyinge dok leng’, pi ninyotho jutimrac cen, man pi nimio mugisa ma rondo ku rondo ni dhanu ma bikwo i Paradiso. (Mat. 6:9, 10; Nyu. 11:15) Yesu utie iwa bende lapor m’ukwayu walubi. (1 Pet. 2:21) Etimo yeny pa Mungu i kwo pare zoo; eno tie lapor ma ber ma wacikara nilubo.​—Yoh. 4:34.

¹³ Kan iyio lembe ma Biblia ubeponjo iwi Yesu ma tie Wod Mungu, ibimare lee. Mer maeno bicweli nitimo yeny pa Mungu i kwo peri zoo, calu ma Yesu ugam utimo. Eno biketho ibinwang’u nia kwayu ithieriri ni Yehova man ilim batizo.

14-15. Lemandha ma kani m’iponjo man iyio iwi tipo maleng’?

¹⁴ Ibino ku paru ma kani kinde m’iponjo lemandha m’ulubo e iwi tipo maleng’? Tipo maleng’ utie ngo mungu, ento etie tego ma Mungu betio ko. Yehova utio ku tipo maleng’ pi nitelo wi dhanu m’ukiewo Biblia, man tipone konyowa bende kara wanyang’ i lembe ma wabesomo i Biblia man kara watii kugi. (Yoh. 14:26; 2 Pet. 1:21) Yehova tio ku tipo pare maleng’ pi nimio iwa “tego” m’usagu zoo. (2 Kor. 4:7) Tipo maleng’ mio iwa tego kara warwei lembanyong’a, kara wanyeg i dhug abidhe, kara wacir lembe ma copo turo cwinywa man wacir ragedo. Bende, tipo maleng’ konyowa kara waceg kite ma beco mi “nying’ tipo” i kwo mwa. (Gal. 5:22) Mungu tie ayika nimio tipo pare maleng’ ni dhanu ceke ma gigene man ma gibekwayu  tipo maleng’ne i bang’e ku cwinygi ceke.​—Lk. 11:13.

¹⁵ Wa jutic pa Yehova wang’eyo nia tipo maleng’ pa Mungu copo konyowa kara watim ire; eno tie lembe ma tielo cwinywa mi tuko ngo! Kinde m’iyio lemandha m’iponjo iwi tipo maleng’, eno bicweli nithieriri ni Mungu man nilimo batizo.

16. Nitundo kawoni, waneno lembang’o i ponji maeni?

¹⁶ Kinde m’ing’io nia kwayu ithier kwo peri ni Mungu man ilim batizo, ng’ei nia eno tie yub ma pire tek nisagu zoo. Calu ma waneno, icikiri nibedo ayika niciro peko man nitwoniri ku lembe dupa. Ento mugisa m’ibinwang’u usagu peko man lembe moko ci m’iromo twoniri ko. Batizo copo bodhi, man ecopo ketho ibedo ku pidocwiny ma ber i wang’ Mungu. Gin ma pire tek m’ucikere nicweli nilimo batizo utie mer m’imaru ko Yehova Mungu. Icikiri bende niyio kud adundeni ceke lemandha m’iponjo iwi Wego, Wod, man tipo maleng’. Kawoni ma dong’ ing’eyo lembe dupa iwi thieriri man batizo, kedwok wang’ penji ma e: “Nyo atie ayika nilimo batizo?”

17. Ubekwayu ng’atini utim lembe moko ma kani i wang’ nilimo batizo?

¹⁷ Kan ibenwang’u nia itie ayika nilimo batizo, eno nyutho nia idaru timo lembe dupa pi nitheyo mer ku Yehova. * Iponjo lembe ma tung’ tung’ iwi Yehova man iwi Yesu i saa mi ponji peri mi Biblia. Eno uketho icaku nyutho nia itie ku yioyic. (Ebr. 11:6) Itie ku genogen nia lembang’ola ceke ma nwang’ere i Biblia bitimere, man iyio m’umbe jiji nia lam ma Yesu uthiero romo bodhi kud i dubo man tho. Iyewo dubo peri ceke, niwacu can umondo i adundeni pi lembe ma reco ceke m’ibed itimo man ikwayu Yehova uwek dubo peri. Iloko kwo peri, niwacu iweko kura peri ma reco magwei, man icaku kwo kit kwo ma nyayu anyong’a i Mungu. (Tic. 3:19) Ibino kud ava mi koro pi yioyic peri ni jumange. Ipong’o lembe m’ukwayere pi nidoko jarwei ma fodi ulimo ngo, man icaku rweyo lembenyong’a kud umego ku nyimego mi cokiri. (Mat. 24:14) Anyong’a unego Yehova lee dit pi lembe maeno ma pigi tek m’itimo. M’umbe jiji, inyayu mutoro ma lee i adundene.​—Rie. 27:11.

18. Lembe mange ma kani m’ukwayu itim i wang’ nilimo batizo?

¹⁸ I wang’ limo batizo, lembe mange nuti m’ukwayu ilar itim. Calu ma waai waneno, icikiri nithieriri ni Mungu. Rwo i bang’e ku cwinyi ceke saa m’itie kendi, man i rwone, ng’ol ire nia ibitimo yeny pare i kwo peri ceke. (1 Pet. 4:2) I ng’eye nyuth ni jatel wi tic mi guriri mi judong cokiri nia ibemito limo batizo. Ebing’io judong cokiri moko  kara giwec kudi. Lworo weco kugi kud unegi. M’umbe jiji, umego maeno ging’eyi cuu man gimeri. Karacelo kugi, wubing’io i ponji moko mir ukungu mi Biblia ma judaru ponji ko. Lembakeca migi tie ning’eyo ka nyo inyang’ ma ber i ponji maeno, man ka nyo inyang’ nia thieriri man batizo utie ngo lembe mi tuko. Ka gin zoo dhoggi rombo nia iromo limo batizo, gibinyutho iri nia icopo limo i coko ma dit ma wubitimo.

19-20. I ng’ei batizo peri icikiri nitimo ang’o, man icopo timo kumeno nenedi?

¹⁹ I ng’ei limo batizo, icikiri nitimo ang’o? * Poi nia thieriri utie lembang’ola m’itimo ni Yehova man ebemito nia ipong’ lembang’olane. Pieno, i ng’ei batizo peri icikiri nipong’o lembe m’ing’olo saa m’ithieriri ire. Icopo timo nenedi?

²⁰ Dikiri i lembe ma tung’ tung’ mi cokiri peri. Calu m’idaru limo batizo, kawoni dong’ itie acel m’i kind umego ku nyimego mi wang’ ng’om zoo. (1 Pet. 2:17) Umego ku nyimego mi cokiri gitie jupewu mi tipo. Kan icidho nja i coko, mer m’i kindwu kugi bidoko tek. Som Biblia kubang’ ceng’ man nyam i lembe m’ibesomone. (Zab. 1:1, 2) I ng’ei somo thek moko mi buku moko mi Biblia, ting’ saa inyam cuu i lembe m’iai isomo. E lembe m’ibesomone bimulo adundeni. Bed ‘irwo’ wang’ ma pol. (Mat. 26:41) Kan iberwo kud adundeni ceke, ibicoro ceng’ini i vut Yehova. Mediri ‘niyenyo ma kwong’a Ker’ pa Mungu. (Mat. 6:33) Icopo nyutho nia ibeyenyo ma kwong’a Ker pa Mungu nwang’u ibeketho tic mi lembanyong’a i kabedo ma kwong’a i kwo peri. Tek iberweyo wang’ ma pol, yioyic peri bibedo tek man ibikonyo dhanu mange de kara gibed ku genogen mi kwo ma rondo ku rondo.​—1 Tim. 4:16.

21. Batizo peri bimio iri bero ma kani?

²¹ Ng’ei nia saa m’ibing’io nithieriri ni Yehova man nilimo batizo, nwang’u itimo ng’iong’ic ma pire tek nisagu zoo i kwo peri. I andha re bikwayu icir peko man itwoniri ku lembe dupa. Pirang’o bikwayu ibed ayika niciro peko maeno? Pilembe peko moko ci m’ibinweng’iri ko i ng’om maeni gitie ‘yot man gibikadhu akadha.’ (2 Kor. 4:17) Ento batizo peri bimio iri bero dupa: ibikwo ma ber tin eni man i nindo m’ubino ibinwang’u “kwo mandha.” (1 Tim. 6:19) Pieno, kan ecopre, kepar i lembe kilili mandha man rwo, e idwok wang’ penji ma e: “Nyo atie ayika nilimo batizo?”