1. Janïr utap lurkasajja ¿kunsa mä jaqejj amuytʼasiñapa?

 MÄ JAQES utap lurasiñ munkaspa ukham amuytʼañäni. Uka jaqejja, kunjam utsa muni uk sumwa amuyi. Ukampis ¿jankʼakit materialanak alasin uta lurañ qalltaspa? Janiwa. Janïr qalltkasajja, uta lurañajj qhawqha gastönisa ukwa nayraqat amuytʼasiñapa. ¿Kunatsa? Qhawqha qollqes munasini uk sum amuytʼasakiw utap lurañ tukuyaspa.

2. Lucas 14:27-30 textorjamajja, ¿janïr bautisaskasajj kuna toqetsa sum amuytʼasiñama?

² ¿Jehová Diosar wal munasitamata ukhamarak jupar yuspäratamatti bautisasiñ munta? Ukhamächi ukhajja, ut lurasiñ munki uka jaqjamarakiw mä wakiskir amtar puriñampïskta. ¿Kunatsa ukham sistanjja? Jesusajj kuntï Lucas 14:27-30 (liytʼañataki) texton siskäna uka arunakat amuytʼañäni. Ukanjja discipulopäñajj kunjamasa, qhawqha “gastotakisa” ukwa qhanañchäna. Discipulonakajj kuna jan waltʼäwinakansa uñjasipjjani kuna sacrificionak lurañas wakisini ukwa amuytʼasipjjañapa, ukanakajj “gastompi” sasiwa (Luc. 9:23-26; 12:51-53). Ukhamajj janïr bautisaskasajja Criston discipulopäñajj kunjamasa ukwa sum amuytʼasiñama. Ukhamatakwa bautisaskäta uka qhepat jan jitheqtas Diosar serviskakïta.

3. ¿Kunsa aka yatichäwin qhanañchaskañäni?

³ Criston discipulopäñajj qhawqha “gastotakisa” uk yatisajja, ¿bautisasiñajj wakisipuniti? Jïsa wakisiwa. Bautisasiñajja, jichhasa jutïrinsa walja bendicionanak katoqañatakiw yanaptʼätam. Aka yatichäwinjja, bautismo toqet mä qhawqha jisktʼanakaruw qhanañchaskañäni. Ukaw bautisasiñatakejj wakichtʼatätati janicha uk amuyasiñatak yanaptʼätam.

4. 1) ¿Kunjamasa Diosaru vidas katuyasiñajja? 2) Mateo 16:24 textorjamajja, ¿kunjamsa maynejj jupa pachpat armtʼasispa?

⁴ ¿Kunjamas Diosaru vidas katuyasiñajja? Bautisasiñatakejja, Diosaruw vidam katuyasiñama. Ukatakejja, taqe chuymaw mä oración lurañama, ukanjja ‘wiñayatakiw jumar servïma’ sasaw Diosar sañama. Kunapachatï maynejj Diosar vidap katuyasjje ukhajja, jupa pachpat armtʼasjjewa (Mateo 16:24 liytʼañataki). Ukat aksarojj Jehová Diosankjjewa, ukajj wali kusiskañawa (Rom. 14:8). Diosar vidam katuyasisajja, ‘Jumar serviñaw taqe kunat sipansa nayrankani, janiw nayatak jakjjäti’ sasaw jupar sasktajja. Ukham arsusajja, Diosar mä jachʼa promeswa lurasktajja. Cheqas Jehová Diosajj janiw uk lurañamatak obligktamti, ukampis uka arsutam phoqañamwa Diosajj muni (Sal. 116:12, 14).

5. ¿Diosaru vidas katuyasiñampi bautisasiñampejj kunansa mayj mayjajja?

⁵ ¿Diosaru vidas katuyasiñampi bautisasiñampejj kunansa jan pachpäki? Diosar vidam katuyasta ukjja janiw khitis yatkiti, jumampi Jehová Diosampikiw yatisipjjta. Ukampis bautisaskta ukjja taqeniw uñjapjje. Jilapartejj jachʼa tantachäwinakanwa bautisasiñajj utji. Bautisasisajja, Jehová Diosar vidam katuyasitamwa taqenir uñachtʼaytajja. * Mä arunjja, Jehová Diosar taqe chuymampi, taqe almampi, taqe amuyumpi taqe chʼamampi munasitama, jupar wiñayatak serviñ amtatamwa uñachtʼaytajja (Mar. 12:30).

6, 7. Kunjamtï 1 Pedro 3:18-22 textojj siskejja, ¿kuna pä razonatsa bautisasiñajj wakisipuni?

⁶ ¿Bautisasiñajj wakisipuniti? Kuntï 1 Pedro 3:18-22 (liytʼañataki) textojj siski uka toqet amuytʼañäni. Noé chachan Diosar confiyatapajja, arca luratapanwa uñjasïna. Ukhamarakiw Diosaru vidam katuyasitamajj bautisasitaman uñjasi. Ukampis ¿bautisasiñajj wakisipuniti? Jïsa wakisiwa. Kunatsa wakisi uk apóstol Pedrow qhanañchäna. Maya, “bautismo taypiw [...] salvatäsipktajja” sasaw säna. ¿Kunjamsa bautismojj salvistaspa? Jesusajj jiwas laykuw jiwawayi, jaktasin alajjpacharuw sarjjarakïna, jichhajja ‘Diosan kupëjjapar qontʼatäjjewa’, taqe ukanakar creyiñäni ukhamarak Jesusar confiyatas luratanakasamp uñachtʼayañäni ukhaw bautismojj salvasiñar apistani.

⁷ Paya, bautismojj ‘suma conciencianïñatakiw’ yanaptʼistu. Diosaru vidas katuyasisa bautisastan ukhajja, Jehová Diosan amigopäñwa qallttanjja. Niyakejjay taqe chuyma arrepentisstanjja ukhamarak Jesusan jiwas layku jiwatapar confiystanjja, Diosajj juchanakasat perdonistuwa. Ukatwa Dios nayraqatan suma conciencianïsna.

8. ¿Kunatsa bautisasiñ amtañama?

⁸ ¿Kunatsa bautisasiñ amtañama? Bibliat sum yatjjatasajja, Jehová Diosajj kunjam chuymanisa, kunjamsa taqe kuns luri ukwa jupat yateqtajja. Ukanak yatiñajj chuymaruw purtʼtam, ukatwa Jehová Diosar taqe chuym munasiñ qallttajja. Cheqansa Jehová Diosar munasitamatwa bautisasiñ amtañama.

9. Mateo 28:19, 20 textorjamajja, ¿Awkina, Yoqana, espíritu santon sutipjjaru bautisasiñajj kamsañsa muni?

⁹ Biblian yatichäwinakapar creyitamatwa bautisasiñamaraki. Jesusajja ‘jaqenakaru nayan discipulojar tukuyapjjam’ siskäna uka toqet amuytʼañäni (Mateo 28:19, 20 liytʼañataki). Jesusajj akham sänwa: “Bautisapjjam Awkina, Yoqana, espíritu santon sutipjjaru” sasa. ¿Uka arunakajj kamsañsa muni? Kuntï Bibliajj Jehová Diosatsa, Yoqapatsa, espíritu  santotsa yatichki ukarojj taqe chuymaw creyiñama. Uka yatichäwinakajj wali chʼamaniwa, chuymar purtʼkirirakiwa (Heb. 4:12). Ukanakat mä qhawqha uñjañäni.

10, 11. ¿Alajjpachankir Awkisat kuna cheqa yatichäwinaksa yateqawayta?

¹⁰ ¿Alajjpachankir Awkisat kunapachas aka cheqa yatichäwinak yateqawayta uk amttati? Jupajj Jehová satawa, jupakiw ‘taqe aka oraqpachjjar apnaqer Jachʼa Diosajja’, jupakirakiw “cheqpach Diosajja” (Sal. 83:18, TNM; Jer. 10:10). Jupaw taqe kun Lurirejja, juparakiw ‘qhespiyistu’ (Sal. 3:8; Apoc. 4:11). Ukhamarusa, kunatï juchampit jiwañampit salvatäñasatakejj wakiski ukwa lurawayi, juparakiw ‘wiñay jakañ churapjjäma’ sasajj sistu (Juan 17:3). Juparu vidam katuyasisin bautisasisajja, Jehová Diosan Testigopätamwa taqenir uñachtʼayäta (Is. 43:10-12). Ukham lurasajja, Diosar serviri jaqenak taypinkjjätawa. Jupanakajj wali kusisitaw Diosan sutip apapjje, yaqhanakarus uka sutit yatiyapjjaraki (Sal. 86:12).

¹¹ Kuntï Bibliajj alajjpachankir Awkit yatichki uk yatiñajj wali kusiskañawa. Uka cheqa yatichäwinakar creyitamaw Jehová Diosaru vidam katuyasiñataki ukhamarak bautisasiñatak yanaptʼätam.

12, 13. ¿Diosan Yoqapat kuna cheqa yatichäwinaksa yateqawayta?

¹² ¿Diosan Yoqapat aka cheqa yatichäwinak yateqasajj kunjamas jikjjatasiyäta? Jesusajja, taqenit sipansa wali jilïriwa, Jehová Diosakiw jupat sipansa jukʼamp jilïrejja. Jesusajj Qhespiyirisawa, jupajj taqe chuymaw jiwasar salvañatak jiwäna. Jiwasatï Jesusan jiwatapar creyitas luratanakasampi uñachtʼayañäni ukhajja, Diosajj juchanakas perdonistaniwa, Diosan amigopäñäniwa, wiñay jakañsa katoqarakiñäniwa (Juan 3:16). Ukhamarusa Jesusajj Jachʼa Jilïr Sacerdotesawa, jupajj Jehová Diosampi sum apasiñasatakisa jiwatapat bendicionanak katoqañasatakisa wal yanaptʼañ munistu (Heb. 4:15; 7:24, 25). Niyakejjay Jesusajj Diosan Reinopan Reyipächejja, Jehová Diosajj jupampiw sutip jachʼañchayani, jan walinaksa chhaqtayani, jupampiw jaqenakarojj Paraison wiñayatak bendisiyarakini (Mat. 6:9, 10; Apoc. 11:15). Janiw ukakïkiti, Jesusajj jiwasatakejj wali yateqaskayawa (1 Ped. 2:21). Jupatakejj Diosan munañap lurañaw nayrankäna, ukhamatwa kunjamsa Diosar serviñasa uk yatichawayistu (Juan 4:34).

¹³ Kuntï Bibliajj Jesusat yatichki ukar creyïta ukhajja, jukʼampiw Diosan Yoqapar munasïta. Uka munasiñaw Jehová Diosan munañap lurañatak Jesusarjam chʼamañchätam. Ukhamatwa Jehová Diosaru vidam katuyasiñsa bautisasiñsa munäta.

14, 15. ¿Espíritu santot kuna cheqa yatichäwinaksa yateqawayta?

¹⁴ ¿Espíritu santot aka cheqa yatichäwinak yateqasajj kunsa amuyirïta? Espíritu santojj janiw mä diosäkiti, jan ukasti Diosan chʼamapawa. Jehová Diosajj espíritu santopampiw Biblia qellqerinakar yanaptʼäna, uka espíritu santorakiw Biblia sum entiendiñatakisa yateqktan ukarjam sarnaqañatakisa yanaptʼistu (Juan 14:26; 2 Ped. 1:21). Uka espíritu taypirakiw Jehová Diosajj “jaqen chʼamapat jilankki uka chʼama” churistu (2 Cor. 4:7). Uka espirituw suma yatiyäwinak predicañatakisa, tentacionanakar jan purtʼasiñatakisa, llakimpi jan aynachtʼañatakisa, yantʼanakan aguantañatakis yanaptʼistu. Ukhamarakiw suma jaqëñatak yanaptʼistu, ukham chuymanïñajj ‘espíritu santon achup’ taypinkiwa (Gál. 5:22). Khitinakatï Diosar confiyapki ukhamaraki espíritu santop mayipki  ukanakarojja taqe chuymaw Diosajj espiritup churi (Luc. 11:13).

¹⁵ Khitinakatï Jehová Diosar servipki ukanakajja, espíritu santow Diosar serviñatak yanaptʼitani sasaw confiyapjjaspa. Espíritu santojj kunasa uk sum amuyäta ukhajja Jehová Diosar vidam katuyasiña bautisasiñwa munäta.

16. ¿Kunsa akakamajj yateqaniwaytanjja?

¹⁶ Jehová Diosar vidas katuyasiñasa, bautisasiñasa wali wakiskiriwa. Kunjamtï yateqktanjja, Jesusan discipulopäñatakejj qhawqha “gastos” munasini uk amuyañasawa. Ukampis kuna jan waltʼäwinakat sipansa, kuna sacrificionak lurañat sipansa bendicionanakaw jukʼamp utji. Sañäni, bautismojj salvasiñaruw apistani, Dios nayraqatansa suma conciencianïñäniwa. Ukhamajj Jehová Diosar munasitamatwa bautisasiñ amtañama. Kuntï Awkitsa, Yoqatsa, espíritu santotsa yateqkta ukanakar taqe chuymaw creyiñamaraki. Kunanaktï jichhakam yateqktan ukarjamajja, ¿bautisasiñatak wakichtʼatäjjtati?

17. ¿Kuna mayitanaksa bautisasiñatakejj phoqañama?

¹⁷ Jumatï bautisasiñatak wakichtʼatäjjatam amuyasstajja, kunanak lurañatï Jehová Diosan suma amigopäñatak wakiski ukanak phoqjjpachätawa. * Sañäni, Bibliat sapa kuti yatjjatasajja, Jehová Diosatsa Jesusatsa sum yatjjtajja, ukhamatwa jupanakar confiyjjaraktajja (Heb. 11:6). Ukhamarakiw Biblian qellqatäki uka promesanakar confiyjjta. Jesusajj juchampit jiwañampit salvañataki jiwawayki ukarus taqe chuymaw confiyjjaraktajja. Juchanakamatsa taqe chuymaw arrepentisjjtajja, mä arunjja jan walinak nayrajj lurkayäta ukanakat arrepentisisajj Jehová Diosat perdón mayisjjtawa. Nayra jakäwimatsa Diosaruw ‘kuttʼjjtajja’, mä arunjja kunjamtï nayrajj jakkayäta ukanak apanukusajja, kunatï Diosar kusisiyki ukanakwa lurjjtajja (Hech. 3:19). Kunanakarutï jichhajj creyjjta ukanaksa wal mayninakar yatiyañ muntajja. Jan bautisat publicadorjam predicañatakis mayitanak phoqjjtawa, congregacionampis predikir mistjjaraktawa (Mat. 24:14). Taqe ukanak lurañatak chʼamachasitamatjja Jehová Diosajj wal kusisi (Prov. 27:11).

18. ¿Janïr bautisaskasajj kunanakampsa lurañama?

¹⁸ Janïr bautisaskasajj yaqha mayitanakampwa phoqañama. Kunjamtï yatjjataniwayktanjja, Diosaruw vidam katuyjjañama, mä arunjja Diosaruw mä oracionan jakʼachasiñama, ukanjja ‘juman munañamwa phoqäjja’ sasaw Diosar taqe chuyma mä promesa lurañama (1 Ped. 4:2). Ukjjarojja, jilïr irpirinakan sarayiriparu, mä arunjja coordinador del cuerpo de ancianos jilataruw ‘bautisasiñ munta’ sasajj jakʼachasiñama. Jupaw yaqhep  jilïr irpirinakarojj jumampi tantachtʼasipjjañapatak mayini. Ukampis jan llakisimti, jupanakajj jumar sum uñtʼjjapjjtamjja, munasipjjaraktamwa. Jupanakaw Biblian yatichäwinakap toqetjja jumamp mä repaso lurapjjani, ukhamatwa cheqa yatichäwinak sumti amuyaskta, Diosar vidam katuyasiñatsa bautisasiñatsa sumti amuyaskta ukanak yatipjjani. Bautisasiñatak wakichtʼatäjjatam amuyapjjani ukhajja, jutkani uka jachʼa tantachäwin bautisasiñamatakiw yatiyjjapjjätam.

19, 20. ¿Bautisasjjasajj kunsa lurañama, kunanakas ukatak yanaptʼätamjja?

¹⁹ Bautisasjjasajj ¿kunsa lurañama? * Amtañäni, Diosar vidam katuyaskta ukhajj mä promesa lurtajja, Jehová Diosajj uka promesam phoqañamwa muni. Ukatwa bautisasjjasajj arsutam phoqañatak chʼamachasiñama. ¿Kunas ukatak yanaptʼätamjja?

²⁰ Congregacionatjja janiw jitheqtañamäkiti. Bautisasjjäta ukhajja, taqpach jilat kullakanakaw ‘creyente masinakamäjjapjjani’ (1 Ped. 2:17). Jupanakajj familiamäpkaspas ukhamäniwa. Tantachäwinakar jan faltasis saräta ukhajja, jupanakamp wal yatthaptäta. Sapüruw Biblia liyiñamaraki, liykta uka toqet lupʼiñatakis tiemp apstʼasiñamawa (Sal. 1:1, 2). Mä arunjja, Biblia liytʼasajj ukjjatwa pienstʼañama, ukhamatwa uka arunakajj chuymar purtʼätam. Ukatjja, kuntï Jesusajj siskäna ukwa lurañamaraki, jupajj akham sänwa: “Oracionsa jan jaytas lurasipkakim” sasa (Mat. 26:41). Taqe chuyma orasiñajj Jehová Diosaruw jukʼamp jakʼachasiyätam. Ukhamarusa “nayraqatajj Diosan Reinopa” thaqaskakiñamawa (Mat. 6:33). ¿Kunjamsa uk lurasma? Vidamanjja predicañaw nayrankañapa. Jumatï sapa kuti predikir sarätajja, jukʼampiw Diosar confiyäta, inas yaqheparojj wiñay jakañar apiri thakir mantapjjañapatak yanaptʼarakchïta (1 Tim. 4:16).

21. ¿Bautisasisajj kuna bendicionsa katoqäta?

²¹ Jehová Diosar vidam katuyasiñasa bautisasiñasa taqe kunat sipansa wali wakiskiriwa. Kunjamtï siskayätanjja, inas “gastonak” lurañajj wakischini, ukampis bautisasitamajj janiw inamayäkaniti. Akapachan “tʼaqesiñajj mä qhawqha tiempotakikiwa, janirakiw kunäkisa” (2 Cor. 4:17). Jumatï bautisasïtajja, wali kusisitaw jakasïta, jutïrinsa ‘cheqpach jakañwa’ katoqarakïta (1 Tim. 6:19). Ukhamasti sum amuytʼasim, Jehová Diosar yanap mayisim, ukatjja akham sasin jisktʼasirakim: “¿Bautisasiñatak wakichtʼatäjjti?” sasa.