1. Ев тикмәјә башламаздан өнҹә нә етмәк лазымдыр?

ӨЗҮНӘ ев тикмәк истәјән бир нәфәри тәсәввүр един. О, неҹә бир ев тикмәк истәдијини билир. Бәс нә етмәлидир, дәрһал лазым олан материаллары алыб еви тикмәјә башламалыдыр? Хејр. Тикинтијә башламаздан өнҹә о, ваҹиб бир иши ҝөрмәлидир — евин она нечәјә баша ҝәләҹәјини һесабламалыдыр. Чүнки еви тикиб гуртармаг үчүн әлиндә кифајәт гәдәр пулунун олуб-олмадығыны мүәјјән етмәлидир. Мәсрәфләри габагҹадан һесабласа, еви тикиб баша чатдыра биләҹәк.

2. Лука 14:27—30 ајәләринә әсасән, вәфтиз олунмаздан өнҹә нәләри јахшыҹа ҝөтүр-гој етмәлисиниз?

² Ола билсин, Јеһованы севдијиниз, Она миннәтдар олдуғунуз үчүн вәфтиз олмаг барәдә дүшүнүрсүнүз. Онда ев тикмәк истәјән һәмин адам кими, сиз дә мүәјјән шејләри ҝөтүр-гој етмәлисиниз. Нәјә ҝөрә? Ҝәлин Иса Мәсиһин Лука 14:27—30 ајәләриндә дедији сөзләрә диггәт јетирәк. (Ајәләри охујун.) Иса бу ајәләрдә онун шаҝирди олмағын нә демәк олдуғуну изаһ едир. Онун давамчысы олмаг үчүн биз «мәсрәфләри» гаршыламаға — чәтинликләрә дөзмәјә вә гурбанлар вермәјә һазыр олмалыјыг (Лука 9:23—26; 12:51—53). Одур ки, вәфтиз олунмаздан өнҹә Мәсиһин шаҝирди олмаға нәләрин дахил олдуғу барәдә јахшыҹа дүшүнмәлисиниз. Беләҹә, вәфтиз олундугдан сонра Јеһоваја хидмәтинизи сәдагәтлә давам етдирә биләҹәксиниз.

3. Бу мәгаләдә нәји арашдыраҹағыг?

³ Бәс Мәсиһин шаҝирди олмаг үчүн чәтинликләрә дөзмәјә, гурбанлар вермәјә дәјәр? Әлбәттә, дәјәр! Вәфтиз һәм инди, һәм дә ҝәләҹәкдә алаҹағыныз сонсуз немәтләрә гапы ачыр. Ҝәлин вәфтизлә бағлы бәзи ваҹиб суаллары нәзәрдән кечирәк. Бу, вәфтизә һазыр олуб-олмадығынызы мүәјјән етмәјә көмәк едәҹәк.

4. а) Һәсролунма нәдир? б) Мәтта 16:24 ајәсиндәки «өзүнү инкар» етмәк ифадәсинин мәнасы нәдир?

⁴ Һәсролунма нәдир? Вәфтиздән өнҹә һәср олунмалысыныз. Һәср олунан инсан Јеһоваја сәмими-гәлбдән дуа едәрәк өмүрбоју Она хидмәт едәҹәјини дејир. Јеһоваја һәср олунан заман сиз бир нөв өзүнүзү «инкар» едирсиниз. (Мәтта 16:24 ајәсини охујун.) Һәмин андан етибарән сиз Јеһоваја мәхсус олурсунуз. Бу исә бөјүк шәрәфдир (Ром. 14:8). Дуада билдирирсиниз ки, бундан сонра сизин үчүн ән өнәмлиси өз истәкләринизи һәјата кечирмәк јох, Она ибадәт етмәк олаҹаг. Һәсролунма Јеһова илә бағладығыныз әһддир. Јеһова бизи белә бир әһд вермәјә мәҹбур етмир. Амма бу әһди вермишиксә, она бағлы галмағымызы ҝөзләјир (Зәб. 116:12, 14).

5. Һәсролунма илә вәфтиз бир–бирилә неҹә бағлыдыр?

⁵ Һәсролунма илә вәфтиз бир–бирилә неҹә бағлыдыр? Һәјатынызы Јеһоваја һәср едәндә буну Јеһова илә сиздән башга һеч кәс билмир, сиз буну тәкликдә едирсиниз. Вәфтиз исә инсанларын гаршысында вә адәтән бөјүк топлантыларда иҹра олунур. Вәфтиз олунмагла ҝөстәрирсиниз ки, артыг өзүнүзү Јеһоваја һәср етмисиниз *. Беләҹә, һамы ачыг-ајдын ҝөрүр ки, Јеһованы бүтүн гәлбинизлә, бүтүн варлығынызла, бүтүн ағлынызла вә вар ҝүҹүнлә севирсиниз вә әбәдијјәт боју Она хидмәт етмәјә гәти гәрарлысыныз (Марк 12:30).

6, 7. 1 Бутрус 3:18—22 ајәләринә әсасән, һансы ики сәбәбә ҝөрә вәфтиз олунмаг мүтләгдир?

⁶ Вәфтиз олунмаг мүтләгдир? Ҝәлин 1 Бутрус 3:18—22 ајәләринә диггәт јетирәк. (Ајәләри охујун.) Неҹә ки ҝәми Нуһ пејғәмбәрин иман саһиби олдуғуну ҝөстәрирди, еләҹә дә, вәфтиз сизин Јеһоваја һәср олундуғунуза әјани сүбутдур. Бәс вәфтиз олунмаг мүтләгдир? Әлбәттә! Һәвари Бутрус вәфтизин ваҹиблијини изаһ етмишди. Әввәла, вәфтиз «хилас едир». Әҝәр биз Исаја, онун бизим уғрумузда өлдүјүнә, сонра ҝөјә галхдығына вә һал-һазырда Аллаһын сағында әјләшдијинә инандығымызы ҝөстәрән аддымлар атмышыгса, вәфтиз бизи хилас едә биләр.

⁷ Икинҹиси, вәфтиз олунмагла «тәмиз виҹдан»а саһиб олуруг. Өзүмүзү Јеһоваја һәср едиб вәфтиз олунанда Јеһова илә арамызда хүсуси мүнасибәтләр јараныр. Сәмими-гәлбдән төвбә етдијимизә вә фидјәјә иман ҝәтирдијимизә ҝөрә Јеһова ҝүнаһларымызы бағышлајыр. Бунун сајәсиндә Онун өнүндә тәмиз виҹдана саһиб олуруг.

8. Вәфтиз олунмаға тәшвиг едән әсас сәбәб нә олмалыдыр?

⁸ Вәфтиз олунмаға сизи нәләр тәшвиг етмәлидир? Мүгәддәс Китабы јахшы-јахшы арашдырмағыныз сајәсиндә Јеһова һагда, Онун хүсусијјәтләри вә јоллары һагда чох шеј өјрәнмисиниз. Өјрәндикләриниз көнлүнүзү охшајыб, Она севҝинизи артырыб. Сизи вәфтиз олунмаға тәшвиг едән әсас сәбәб мәһз Јеһоваја севҝи олмалыдыр.

9. Мәтта 28:19, 20 ајәләриндә дејилдији кими, «Ата, Оғул вә мүгәддәс руһ ады илә» вәфтиз олунмаг нә демәкдир?

⁹ Вәфтиз олунмаға сизи тәшвиг едән диҝәр сәбәб Мүгәддәс Китабдан өјрәниб иман ҝәтирдијиниз һәгигәтләрдир. Ҝәлин ҝөрәк Иса шаҝирд һазырламаг тапшырығыны верәндә нә демишди. (Мәтта 28:19, 20 ајәләрини охујун.) Исанын сөзләринә әсасән, «Ата, Оғул вә мүгәддәс руһ ады илә» вәфтиз олунмаг лазымдыр. Бу, нә  демәкдир? Сиз Јеһова, Иса Мәсиһ вә мүгәддәс руһла бағлы Мүгәддәс Китаб һәгигәтләринә бүтүн үрәјинизлә инанмалысыныз. Бу һәгигәтләр бөјүк гүввәјә маликдир вә үрәјинизин дәринлијинә ишләјә биләр (Ибр. 4:12). Ҝәлин бунлардан бәзиләринә бахаг.

10, 11. Сәмави Атамыз барәдә һансы һәгигәтләри өјрәниб иман ҝәтирмисиниз?

¹⁰ Сәмави Атамыз барәдә өјрәндијиниз һәгигәтләри јадыныза салын. Өјрәнмишдиниз ки, Онун «ады Јеһова»дыр, дүнјада тәк О, уҹадыр, «дүнјадакы бүтүн сәлтәнәтләрин Аллаһы тәк» Одур (Зәб. 83:18; Әшј. 37:16). Бизим Јараданымыздыр, гуртулуш Ондадыр (Зәб. 3:8; 36:9). Бизи ҝүнаһ вә өлүмүн әсарәтиндән азад етмәк үчүн тәдбир ҝөрүб, бизә әбәди һәјат үмиди вериб (Јәһ. 17:3). Һәср олунуб вәфтиз олунмағыныз Јеһованын Шаһиди олдуғунузу ҝөстәрәҹәк (Әшј. 43:10—12). Сиз Аллаһын адыны дашымагдан гүрур дујан вә бу ады башгаларына бәјан едән үмумдүнја аиләнин бир һиссәси олаҹагсыныз (Зәб. 86:12).

¹¹ Мүгәддәс Китабда Јеһова барәдә јазыланлары анламаг бөјүк хошбәхтликдир! Бу дәјәрли һәгигәтләрә иман ҝәтирәндә үрәјиниздә өзүнүзү Јеһоваја һәср едиб вәфтиз олунмаг истәји ојанаҹаг.

12, 13. Оғул һагда һансы һәгигәтләри өјрәниб иман ҝәтирмисиниз?

¹² Оғул һагда нөвбәти һәгигәтләри өјрәнәндә һансы һиссләри кечирмишдиниз? Өјрәнмисиниз ки, Иса Јеһовадан сонра икинҹи гүдрәтли варлыгдыр. О, өзүнү биздән өтрү фидјә вериб. Фидјәјә иман ҝәтирдијимизи әмәлдә ҝөстәрсәк, ҝүнаһларымыз бағышланаҹаг, Аллаһа даһа јахын олаҹағыг вә әбәди һәјат газанаҹағыг (Јәһ. 3:16). Иса Баш каһинимиздир. О, фидјәдән фајдаланмағымыз вә Аллаһла сых мүнасибәтләрә саһиб олмағымыз үчүн бизә көмәк етмәк истәјир (Ибр. 4:15; 7:24, 25). Иса Мәсиһ Аллаһын Падшаһлығынын Падшаһыдыр. Јеһова мәһз Онун васитәсилә Өз адыны уҹалдаҹаг, пислијә сон гојаҹаг вә тезликлә јерүзү Ҹәннәтдә бизә түкәнмәз немәтләр бәхш едәҹәк (Мәт. 6:9, 10; Вәһј 11:15). О бизим үчүн нүмунәдир (1 Бут. 2:21). Иса һәјатыны Јеһованын ирадәсини јеринә јетирмәјә һәср етмәкдә бизә ҝөзәл өрнәкдир (Јәһ. 4:34).

¹³ Мүгәддәс Китабдан Аллаһын әзиз оғлу Иса Мәсиһ барәдә һәгигәтләри өјрәниб иман ҝәтирәндә она мәһәббәтиниз јараныр. Бу мәһәббәт сизи онун кими Аллаһын ирадәсини јеринә јетирмәк үчүн јашамаға тәшвиг едир. Бу да сиздә өзүнүзү Јеһоваја һәср едиб вәфтиз олунмаг истәји јарадыр.

14, 15. Мүгәддәс руһ һагда һансы һәгигәтләри өјрәниб иман ҝәтирмисиниз?

¹⁴ Мүгәддәс руһ һагда нөвбәти һәгигәтләри өјрәнәндә һансы һиссләри кечирмишдиниз? Өјрәнмишдиниз ки, мүгәддәс руһ руһани варлыг дејил, Аллаһын фәал гүввәсидир. Јеһова мүгәддәс руһдан Өз Кәламыны јаздырмаг үчүн истифадә едиб вә бу руһ орада јазыланлары баша дүшүб әмәл етмәјә көмәк едир (Јәһ. 14:26; 2 Бут. 1:21). Мүгәддәс руһун васитәсилә Јеһова бизә «инсан ҝүҹүндән үстүн олан ҝүҹ» верир (2 Кор. 4:7). Бу руһ бизә хош хәбәри тәблиғ етмәјә, нәфсимизә үстүн ҝәлмәјә, руһ дүшкүнлүјү илә мүбаризә апармаға вә сынаглара таб ҝәтирмәјә ҝүҹ верир. Һәмчинин руһун бәһрәсинә дахил олан ҝөзәл хүсусијјәтләри тәзаһүр етдирмәјә көмәк едир (Гал. 5:22). Јеһова Өз мүгәддәс руһуну Она етибар едәнләрә вә бу руһу сәмими-гәлбдән диләјәнләрә сәхавәтлә верир (Лука 11:13).

 ¹⁵ Бәли, Јеһованын хидмәтчиси кими хидмәтдә мүгәддәс руһун көмәјинә архалана биләрик. Буну билмәк бизә гол-ганад верир! Мүгәддәс руһ һаггында һәгигәтләри гәбул едәндә өзүнүзү Јеһоваја һәср едиб вәфтиз олунмаг истәјәҹәксиниз.

16. Арашдырдығымыз мәгамлардан нә өјрәндиниз?

¹⁶ Өзүнүзү Јеһоваја һәср едиб вәфтиз олунмаг гәрарына ҝәләндә һәјатынызын ән ваҹиб аддымыны атмыш олурсунуз. Бу мәгаләдән өјрәндиниз ки, «мәсрәфләри» гаршыламаға, јәни чәтинликләрә дөзмәјә вә гурбанлар вермәјә һазыр олмалысыныз. Лакин алаҹағыныз немәтләр верәҹәјиниз гурбанлардан гат-гат артыг олаҹаг. Вәфтиз сајәсиндә һәјатынызы хилас едә вә Јеһованын гаршысында тәмиз виҹдана саһиб ола биләрсиниз. Сизи вәфтиз олунмаг гәрарыны вермәјә тәшвиг едән башлыҹа сәбәб Јеһова Аллаһа олан мәһәббәтиниз олмалыдыр. Һәмчинин Ата, Оғул вә мүгәддәс руһ һаггында өјрәндијиниз һәгигәтләрә бүтүн гәлбинизлә инанмалысыныз. Арашдырдығымыз мәгамлары нәзәрә алараг, нә дејәрдиниз, вәфтиз олунмаға һазырсыныз?

17. Вәфтизә апаран бәзи аддымлар һансылардыр?

¹⁷ Вәфтиз олунмаға һазыр олдуғунузу дүшүнүрсүнүзсә, демәли, Јеһова илә јахшы мүнасибәтләрә саһиб олмаг үчүн мүәјјән аддымлар атмысыныз *. Мүнтәзәм олараг Мүгәддәс Китаб дәрсләри алдығыныз үчүн Јеһова вә Иса Мәсиһ һаггында чох шеј өјрәнмисиниз. Өјрәндикләринизә иман ҝәтирмисиниз (Ибр. 11:6). Јеһованын вәдләринә тамамилә етибар едирсиниз вә Иса Мәсиһин фидјә гурбанлығына иман ҝәтирмәјин сизи ҝүнаһ вә өлүмдән гуртара биләҹәјинә инанырсыныз. Ҝүнаһларыныза ҝөрә төвбә етмисиниз, јол вердијиниз сәһвләрә ҝөрә үрәкдән пешмансыныз вә Јеһовадан әфв диләмисиниз. Һәјатынызда дәјишикликләр етмисиниз; пис һәјат тәрзинизи бүсбүтүн ҝеридә гојуб Аллаһы разы салан тәрздә јашамаға башламысыныз (Һәв. 3:19). Бөјүк һәвәслә етигадынызы башгалары илә бөлүшмәјә чалышырсыныз. Вәфтиз олунмамыш тәблиғчи кими јығынҹагла әмәкдашлыг едирсиниз (Мәт. 24:14). Бу мүһүм аддымлары атдығыныз үчүн Јеһова сизинлә гүрур дујур. Сиз Онун гәлбини севиндирмисиниз! (Мәс. 27:11).

18. Вәфтиз олунмаздан өнҹә даһа һансы аддымлары атмалысыныз?

¹⁸ Вәфтиз олунмаздан өнҹә атмалы олдуғунуз башга аддымлар да вар. Өјрәндијиниз кими, өзүнүзү Јеһоваја һәср етмәлисиниз. Тәкликдә Она сәмими-гәлбдән дуа едиб сөз верин ки, бундан сонра һәјатынызы Онун ирадәсини јеринә јетирмәјә һәср едәҹәксиниз (1 Бут. 4:2). Даһа сонра ағсаггаллар шурасынын координаторуна јахынлашыб вәфтиз олунмаг истәдијинизи билдирин. О, диҝәр ағсаггаллардан хаһиш едәҹәк  ки, сизинлә сөһбәт етсинләр. Нараһат олмајын, о гардашлар артыг сизи таныјыр вә севирләр. Онлар сизинлә Мүгәддәс Китабын әсас тәлимләрини мүзакирә едәҹәкләр. Гардашлар мүәјјән етмәк истәјирләр ки, сиз бу тәлимләри, еләҹә дә һәсролунманын вә вәфтизин ваҹиблијини баша дүшүрсүнүз, ја јох. Әҝәр онлар сизи вәфтизә һазыр билсәләр, нөвбәти топлантыда вәфтиз олуна биләҹәјинизи дејәҹәкләр.

19, 20. Вәфтиздән сонра нә етмәлисиниз вә буну неҹә едә биләрсиниз?

¹⁹ Вәфтиздән сонра нә етмәлисиниз? * Унутмајын ки, һәсролунма Јеһова илә бағладығыныз әһддир вә Јеһова бу әһдә садиг галмағынызы ҝөзләјир. Одур ки, вәфтиздән сонра да әһдинизә ујғун јашамалысыныз. Бу, нә демәкдир?

²⁰ Јығынҹагла әмәкдашлыг един. Вәфтиз олунмагла сиз үмумдүнја «гардашлығы»н бир һиссәси олурсунуз (1 Бут. 2:17). Јығынҹагдакы баҹы-гардашлар сизин руһани аиләниздир. Јығынҹаглара мүнтәзәм ҝәлмәк диндашларынызла мүнасибәтләринизи мөһкәмләндирәҹәк. Аллаһын Кәламыны һәр ҝүн мүталиә едиб дәринлијинә варын (Зәб. 1:1, 2). Охудуғунуз парчанын мәнасы үзәриндә дүшүнмәјә вахт ајырын. Онда охудугларыныз үрәјинизә тәсир едәҹәк. «Даима дуа един» (Мәт. 26:41). Сәмими дуаларыныз сизи Јеһоваја даһа да јахынлашдыраҹаг. «Падшаһлығы... һәр шејдән үстүн тутун» (Мәт. 6:33). Буну тәблиғ ишини һәјатынызда биринҹи јерә гојмагла ҝөстәрә биләрсиниз. Мүнтәзәм тәблиғ етмәјин сајәсиндә иманыныз мөһкәм галаҹаг вә башгаларына да әбәди һәјата апаран јолда јеримәјә көмәк едә биләҹәксиниз (1 Тим. 4:16).

21. Вәфтиз олунмаг гаршынызда һансы имканлары ачыр?

²¹ Өзүнүзү Јеһоваја һәср едиб вәфтиз олунмаг гәрарыныз һәјатда вердијиниз ән ваҹиб гәрардыр. Дүздүр, мүәјјән гурбанлар вермәли олаҹагсыныз. Бәс ҝөрәсән буна дәјәр? Әлбәттә! Бу дүнјада үзләшдијиниз истәнилән чәтинликләр «гысамүддәтли вә јүнҝүл»дүр (2 Кор. 4:17). Вәфтиз олунмагла исә сиз һәм инди мәналы һәјат сүрәҹәк, һәм дә ҝәләҹәкдә әсл һәјата говушаҹагсыныз (1 Тим. 6:19). Одур ки, дуа едиб бу суал үзәриндә јахшыҹа дүшүнүн: «Вәфтиз олунмаға һазырам?»