1. Finshi umuntu afwile ukucita ilyo ashilatendeka ukukuula ing’anda?

TONTONKANYENI pa muntu uulefwaya ukukuula ing’anda. Aleshiba umusango wa ng’anda alefwaya ukukuula. Nomba bushe kuti aima fye apo pene no kuya mu kushita fimo ifilekabilwa no kutendeka ukukuula ing’anda yakwe? Awe. Kwaliba icacindama ico afwile ukucita ilyo ashilatendeka ukukuula. Alingile ukupenda indalama akapoosapo pa kuti akapwishe ing’anda yonse. Mulandu nshi alingile ukucitila ifi? Ni co afwile ukwishiba nga ca kuti nakwata indalama sha kupwishisha ukukuula. Nga aishiba bwino indalama shilekabilwa, kuti camwangukila ukupwisha ukukuula ing’anda yakwe.

2. Ukulingana ne fyaba pali Luka 14:27-30, finshi mulingile ukutontonkanyapo sana ilyo mushilabatishiwa?

² Bushe mulatontonkanya pa ku batishiwa pa mulandu wa kuti mwalitemwa Yehova kabili mulatasha pa fyo amucitila? Nga mulatontonkanyapo, ninshi ifyo mulingile ukucita fyalipalana ne fyo umuntu uulefwaya ukukuula ing’anda alingile ukucita. Cinshi twalandila ifi? Tontonkanyeni pa mashiwi Yesu alandile ayaba pali Luka 14:27-30. (Belengeni.) Yesu alelanda pa fyo cipilibula ukuba umusambi wakwe. Pa kuti tube abasambi bakwe, tufwile ukuitemenwa ukulipila “ishingapooswapo,” e kutila tufwile ukuitemenwa ukushipikisha amafya tukalakwata e lyo no kuipeelesha. (Luka 9:23-26; 12:51-53) Kanshi ilyo mushilabatishiwa mulingile ukutontonkanya sana pa fyo cikaba nga mwaba abasambi ba kwa Kristu. Nga mwacita ifi, mukaipekanya ukuba Umwina Kristu uwabatishiwa kabili mukatwalilila ukubombela Lesa ne cishinka.

3. Finshi twalasambilila muli cino cipande?

³ Bushe ukuba umusambi wa kwa Kristu uwabatishiwa kwalicindama ukucila amafya mukalashipikisha e lyo ne fintu ifyo mulingile ukuleka ukucita? Ee! Umuntu nga abatishiwa alapaalwa icine  cine pali ino nshita kabili na ku ntanshi akapaalwa nga nshi. Lekeni tulandeko pa mepusho yamo ayakuma ulubatisho. Ukulanda pali aya mepusho kwalamwafwa ukwasuka bwino icipusho ca kuti, “Bushe nimfikapo ukubatishiwa?”

4. (a) Bushe ukuipeela kwalola mwi? (b) Bushe ‘ukuikaana’ uko Baibolo yalandapo pali Mateo 16:24 kwalola mwi?

⁴ Bushe ukuipeela kwalola mwi? Ilyo mushilabatishiwa, mulingile ukuipeela. Pa kuipeela mulingile ukupepa kuli Yehova ukufuma pa nshi ya mutima no kumweba ukuti mulefwaya ukulamubombela umuyayaya. Nga mwaipeela kuli Lesa, ninshi ‘mwaikaana mwe bene.’ (Belengeni Mateo 16:24.) Kabili ninshi mwaba aba kwa Yehova. Ukuba abantu ba kwa Yehova lishuko ilikalamba. (Rom. 14:8) Nga mwaikaana ninshi mule-eba Yehova ukuti ukufuma nomba mwakulabika sana amano ku kumubombela ukucila ukubika sana amano ku kucita ifya kuisekesha. Nga mwaipeela ninshi mwalapa. Ninshi mwalaya Yehova ubulayo ubwacindama nga nshi. Yehova tatupatikisha ukulapa uyu mulapo. Lelo umuntu nga alapa, Yehova amwenekela ukufishapo umulapo wakwe.—Amalu. 116:12, 14.

5. Bushe ukuipeela kwapusana shani no kubatishiwa?

⁵ Bushe ukuipeela kwapusana shani no kubatishiwa? Umuntu aipeela ninshi ali fye eka, kabili takuli uwishiba ukuti naipeela kuli Yehova. Lelo ukubatishiwa kwena ni pa cintubwingi, pantu ilyo umuntu alebatishiwa abantu abengi balamonako, kabili ilingi line ulubatisho lubako pa kulongana kwa muputule nelyo ukwa citungu. Nga mwabatishiwa, ninshi mwalenga abantu baishiba ukuti mwali-ipeela kale kuli Yehova. * Kanshi ukubatishiwa e kulenga abantu baishiba ukuti mwalitemwa Yehova Lesa wenu no mutima wenu onse, no mweo wenu onse, no kutontonkanya kwenu konse, e lyo na maka yenu yonse, kabili ninshi mwalenga baishiba no kuti na musalapo ukulamubombela umuyayaya.—Marko 12:30.

6-7. Ukulingana ne lembo lya kwa 1 Petro 3:18-22, finshi fibili ifyalenga ulubatisho lube ulwacindama sana?

⁶ Bushe calicindama ukubatishiwa? Tontonkanyeni pa mashiwi yaba pali 1 Petro 3:18-22. (Belengeni.) Nga filya fine icibwato ico Noa apangile calengele abantu baishiba ukuti ali ne citetekelo, e fyo no lubatisho lulenga abantu baishiba ukuti mwali-ipeela kuli Yehova. Nomba bushe cine cine ukubatishiwa kwalicindama? Ee! Petro alilandile umulandu ulubatisho lwacindamina. Ica kubalilapo, alandile kuti, “e cilemupususha.” Ulubatisho kuti lwatupususha nga ca kutila tulacita ifilanga ukuti twalicetekela Yesu, kabili twalisumina ukuti alitufwilile, balimubuushishe no kuti pali ino nshita aba ku muulu “ku kwa ku kulyo kwa kwa Lesa.”

⁷ Ica bubili, ulubatisho lulenga twaba na “kampingu musuma.” Nga twaipeela kuli Lesa twabatishiwa no ku batishiwa, tulaba na bucibusa bwaibela na ena. Pa mulandu wa kuti tulalapila ukufuma pa nshi ya mutima kabili tulacetekela mwi lambo lya cilubula, Lesa alatwelela imembu. Kanshi kuti twakwata kampingu iisuma kuli Lesa.

8. Cinshi icikalamba icifwile ukumulenga ukusalapo ukubatishiwa?

⁸ Cinshi cilingile ukulenga mwasalapo ukubatishiwa? Apo mulasambilila Baibolo, mwalisambilila ifingi pali Yehova. Mwalishiba ifyo aba e lyo ne fyo acita ifintu. Mwalitemenwe sana ifyo mwasambilile pali ena kabili mwalimutemwa icine cine. Ukutemwa Yehova e cikalamba icifwile ukumulenga ukusalapo ukubatishiwa.

9. Bushe filya Baibolo ilanda pali Mateo 28:19, 20 ukuti tufwile ukubatishiwilwa mwi shina lya kwa Tata ne lya Mwana ne lya mupashi wa mushilo, fyalola mwi?

⁹ Na cimbi icacindama icifwile ukumulenga ukufwaya ukubatishiwa, cine ico mwasambilila mu Baibolo. Tontonkanyeni pa fyo Yesu alandile  ilyo alepeela abasambi bakwe ifunde lya kulenga abantu ukuba abasambi. (Belengeni Mateo 28:19, 20.) Atile umuntu uulebatishiwa afwile ukubatishiwilwa “mwi shina lya kwa Tata ne lya Mwana ne lya mupashi wa mushilo.” Ni mwi aya mashiwi yalola? Yalola mu kuti pa kubatishiwa, mufwile ukusumina no mutima wenu onse icine conse ico Baibolo ilanda pali Yehova, pa Mwana wakwe Yesu, e lyo na pa mupashi wa mushilo. Ici icine calikwata amaka kabili kuti camufika pa mutima. (Heb. 4:12) Lekeni tulandeko fimo pali ici icine icakwata amaka.

10-11. Cine nshi ico mwasambilila pali Tata kabili ico mwasumina?

¹⁰ Tontonkanyeni pa cine mwasambilile pali Tata. Mwalisambilile ukuti ‘ishina lyakwe ni Yehova,’ e “Wapulamo pano isonde ponse,” kabili e “Lesa wa cine” eka. (Amalu. 83:18; Esa. 37:16) E watubumbile, kabili “ukupususha kufuma kuli Yehova.” (Amalu. 3:8; 36:9) Alipekanya ukutulubula ku lubembu ne mfwa kabili alitupeela ne subilo lya kwisaikala umuyayaya. (Yoh. 17:3) Nga mwaipeela no kubatishiwa, abantu bakeshiba ukuti muli Nte ya kwa Yehova. (Esa. 43:10-12) Mukaba mu lupwa lwa mwi sonde lyonse ulwa ba bwananyina abatemwa ukwitilwa kwi shina lya kwa Lesa kabili abafwaya abantu bambi baishiba ili ishina.—Amalu. 86:12.

¹¹ Lishuko nga nshi ukwishiba ifyo Baibolo isambilisha pali Tata! Nga mwasumina ici icine icacindama, mukalafwaisha ukuipeela kuli Yehova no kubatishiwa.

12-13. Cine nshi ico mwasambilila pa Mwana kabili ico mwasumina?

¹² Finshi mwacitile ilyo mwasambilile icine pa Mwana? Yesu e wakonka pali Yehova ukucindama. Takwaba icibumbwa mu muulu na pano isonde icalingana na ena ukucindama. Yesu e cilubula cesu. Apeele ubumi bwakwe nge lambo pa mulandu wesu. Nga ca kuti tulecita ifilanga ukuti twalitetekela mu cilubula, ninshi imembu shesu shikalaelelwa, tukaba ifibusa fya kwa Lesa kabili tukaba no mweo wa muyayaya ku ntanshi. (Yoh. 3:16) Yesu e Shimapepo wesu Umukalamba. Afwaya ukutwafwa ukulanonkelamo mu cilubula kabili afwaya twaba sana ifibusa na Lesa. (Heb. 4:15; 7:24, 25) Apo e Mfumu ya Bufumu bwa kwa Lesa, e o Yehova akabomfya ukulenga ishina lyakwe ukucindikwa, ukupwisha ububifi bonse e lyo no kulenga abantu bakapaalwe umuyayaya muli Paradaise pano isonde. (Mat. 6:9, 10; Ukus. 11:15) Yesu e o tufwile ukulapashanya. (1 Pet. 2:21) Alecita ukufwaya kwa kwa Lesa ubumi bwakwe bonse, kanshi tufwile ukulamupashanya.—Yoh. 4:34.

¹³ Nga mwasumina ifyo Baibolo isambilisha pali Yesu mukamutemwa sana nga filya Wishi Yehova amutemwa, kabili mukalafwaya ukulacita ukufwaya kwa kwa Lesa ubumi bwenu bonse, nga fintu Yesu acitile. Ici cikalenga mukaipeele kuli Yehova no kubatishiwa.

14-15. Cine nshi ico mwasambilila pa mupashi wa mushilo kabili ico mwasumina?

¹⁴ Finshi mwailwike ilyo mwasambilile fye icine pa mupashi wa mushilo? Umupashi wa mushilo te muntu, lelo maka ayo Lesa abomfya. Yehova abomfeshe umupashi wa mushilo pa kutungulula abalembele Baibolo, kabili umupashi wa mushilo ulatwafwa ukumfwikisha ifyaba mu Baibolo no kulafikonka. (Yoh. 14:26; 2 Pet. 1:21) Yehova abomfya umupashi wakwe pa kutupeela “amaka yacila aya bantunse.” (2 Kor. 4:7) Umupashi wa mushilo ulatwafwa ilyo tulebila imbila nsuma, ulatwafwa ukucimfya amatunko, ulatwafwa nga twafuupuka, kabili ulatwafwa no kushipikisha amesho. Na kabili umupashi wa mushilo ulatwafwa ukuba ne mibele iisuma iyaba pa “fisabo fya mupashi.” (Gal. 5:22) Lesa alapeela umupashi wakwe kuli bonse abamucetekela kabili abamulomba.—Luka 11:13.

¹⁵ Ala tulaba ne nsansa nga nshi ukwishiba ukuti Yehova alapeela ababomfi bakwe umupashi wa mushilo uubafwa ukumubombela! Nga mwasumina icine ico mwasambilila pa mupashi  wa mushilo, mukalafwaisha ukuipeela kuli Lesa no kubatishiwa.

16. Finshi ifyo twasambilila ukufika pano?

¹⁶ Ukusalapo ukuipeela kuli Lesa no kubatishiwa cintu icacindama sana. Kanshi nga fintu tusambilile, mufwile ukuitemenwa ukushipikisha amafya mukalakwata kabili mufwile ukuipeelesha. Lelo mukapokelela amapaalo ayengi ukucila pa mafya mukalashipikisha e lyo na pa fyo mukalaipeelesha. Ulubatisho kuti lwalenga mwaisapusuka kabili kuti lwalenga mwaba na kampingu iisuma kuli Lesa. Icikalamba icifwile ukumulenga ukusalapo ukubatishiwa, kutemwa Yehova Lesa. Kabili mufwile ukusumina no mutima wenu onse icine ico mwasambilila pali Tata, pa Mwana, na pa mupashi wa mushilo. Ukulingana ne fyo twasambilila ukufika pano, kuti mwa-asuka shani icipusho ca kuti: “Bushe nimfikapo ukubatishiwa?”

17. Fintu nshi fimo ifyo umuntu afwile ukucita ilyo ashilabatishiwa?

¹⁷ Nga ca kutila mulemona ukuti namufikapo ukubatishiwa, te ca kutwishika ukuti kwaliba ifingi ifyo mwacita pa kuti mube cibusa musuma uwa kwa Yehova. * Pa mulandu wa kuti mulasambilila Baibolo lyonse, mwalishiba ifingi pali Yehova na pali Yesu. Kabili namukwata icitetekelo. (Heb. 11:6) Namucetekela umupwilapo amalayo ya kwa Yehova ayaba mu Baibolo, kabili namushininkisha ukuti ukucetekela mwi lambo lya cilubula ilya kwa Yesu e kukalenga mukalubuke ku lubembu ne mfwa. Namulapila ku membu shenu shonse, e kutila mwalyumfwile ububi pa fyabipa fyonse ifyo mwalecita, kabili mwalilomba Yehova ukuti amubelele uluse. Mwalyaluka pantu mwalilekelela fye ukucita ifyabipa ifyo mwalecita kale kabili mwalitendeka ukwikala ukulingana no kufwaya kwa kwa Lesa. (Imil. 3:19) Na kabili mulafwaisha ukulaebako abantu pa fyo mwasuminamo. Mwalifikilepo ukuba kasabankanya uushabatishiwa kabili mwalitendeka no kubombela pamo ne cilonganino umulimo wa kubila imbila nsuma. (Mat. 24:14) Ifi mwacita fyalilenga Yehova amutemwe sana. Mwalilenga umutima wa kwa Yehova ukusekelela.—Amapi. 27:11.

18. Finshi na fimbi ifyo mulingile ukucita ilyo mushilabatishiwa?

¹⁸ Kwaliba na fimbi ifyo mufwile ukucita ilyo mushilabatishiwa. Nga fintu tusambilile, mufwile ukuipeela kuli Lesa. Mufwile ukupepa kuli Lesa ukufuma pa nshi ya mutima ninshi muli fye mweka, kabili mufwile ukumulaya ukuti mwakulacita ukufwaya kwakwe ubumi bwenu bonse. (1 Pet. 4:2) Lyena kuti mwaeba kampanya we bumba lya baeluda ukuti mulefwaya ukubatishiwa. Kampanya akeba baeluda bamo abakalanshanya na imwe amepusho ya balefwaya ukubatishiwa. Tamufwile ukumfwa umwenso ukulanshanya nabo. Muleibukisha ukuti aba bamunyinefwe aba cikuuku balimwishiba kabili balimutemwa. Bakalanshanya na imwe amasambililo ya mu Baibolo aya kutendekelako ayo mwasambilila. Bakafwaya ukwishiba nga ca kuti  mwalyumfwikisha aya masambililo e lyo ne fyo ukuipeela no kubatishiwa fyacindama. Nga basanga ukuti nafikapo, bakamweba ukuti muli no kubatishiwa pa kulongana kwa muputule nelyo ukwa citungu ukukakonkapo.

19-20. Finshi ifyo mufwile ukucita pa numa ya kubatishiwa, kabili finshi ifyo mulingile ukulacita pa kuti mulefishapo ifyo mwalapile?

¹⁹ Finshi ifyo mufwile ukucita pa numa ya kubatishiwa? * Ibukisheni ukuti ukuipeela mulapo kabili Yehova enekela ukuti mukalafishapo ifyo mwalapile. Kanshi nga mwabatishiwa, mufwile ukulaikala ukulingana no kuipeela kwenu. Nomba finshi mwingacita pa kuti mulefishapo ifyo mwalapile?

²⁰ Mulebombela pamo ne cilonganino. Nga mwaba Umwina Kristu uwabatishiwa, mukaba mu lupwa lwa “ba bwananyina.” (1 Pet. 2:17) Bamunyinenwe na bankashi aba mu cilonganino bakaba ulupwa lwenu ulwa ku mupashi. Kanshi nga mulesangwa lyonse mu kulongana, mukakosha bucibusa bwenu na ba bwananyina. Mulebelenga Icebo ca kwa Lesa cila bushiku e lyo no kulatontonkanya sana pa fyo mulebelenga. (Amalu. 1:1, 2) Nga mwabelenga ifikomo fimo ifya mu Baibolo, mulekwatako inshita ya kutontonkanya pa fyo mwabelenga. Nga mulecita ifi, ifyo mulebelenga fikalamufika pa mutima. Mulepepa lyonse. (Mat. 26:41) Nga mulepepa ukufuma pa nshi ya mutima, bucibusa bwenu na Yehova bukakoselako. Na kabili “intanshi mulefwaya Ubufumu.” (Mat. 6:33) Kuti mwatangisha Ubufumu intanshi nga ca kuti mulemona umulimo wa kubila imbila nsuma ukuti e mulimo uwacindamisha mu bumi bwenu. Nga ca kuti mulebombako umulimo wa kubila imbila nsuma lyonse, icitetekelo cenu cikaba icakosa kabili kuti mwa-afwa abantu ukuba ne subilo lya kwisaikala umuyayaya.—1 Tim. 4:16.

21. Mukanonkelamo shani nga mwabatishiwa?

²¹ Ukusalapo ukuipeela kuli Yehova no kubatishiwa, e cintu icacindama sana ico mwingacita. Kwena mukalashipikisha amafya kabili mukalaipeelesha. Bushe ukuipeela no kubatishiwa fyalicindama ukucila amafya mukalashipikisha ne fyo mukalaipeelesha? Ee! Amafya yonse ayo mwingakwata pali ino nshita ya ‘pa kashita fye kabili yalyanguka.’ (2 Kor. 4:17) Nomba ukubatishiwa kukalenga mukabe ne nsansa pali ino nshita kabili kukalenga mukabe no “mweo wine wine” ku ntanshi. (1 Tim. 6:19) Kanshi mufwile ukutontonkanyapo sana no kupepelapo ilyo muleasuka icipusho ca kuti: “Bushe nimfikapo ukubatishiwa?”