1. Snonkaku oso imbe ḇyawes rum ido, rosai fandun fa ifrur ya?

KWARAPAN snonkaku oso imbe ḇyawes rum ḇe i. Ifawi kwar moḇsa na ifrur rum ḇyedi fa isnai rai. Inja, na rya ḇeri ḇe toko fa kyoḇes roiḇebor na fa ḇyukiḇawes rum anya ke? Na oroḇa. Roi oso isya fandun fa ifrur na resari, isoine kyain fa kyarkor kumpan fyandun na fa ḇyukiḇawes rum ani. Kukro? Insamaido ifawi mnis kumpan ḇyena nasrow kwar ke roḇaim fa ḇyukiḇawes rum ani isof ibro. Kyor mnis kaku ḇepon ido, insape na ḇyawes rum ḇyedi ya fa ibro.

2. Imnis ḇefas ro Lukas 14:27-30, rosai fandun fa kwara pyum na resari fyor ḇebaptis ḇaim?

² Snar waswar Yahwe ma ḇesyowi roi ifrur kwar ḇe Au na, imbude kwara fa wakḇebaptis. Ḇape, fyor ḇebaptis ḇaim, rosai fandun fa wafrur ḇepon ya? Imnis ra snon ḇeḇawes rum anya, fandun fa kwain kwara resari. Snaro? Mam kada Yesus wos ḇyena neḇefas ro Lukas 14:27-30. (Wasya.) Ro mnuk anya, Yesus isya ikofen rosai fandun fa kofrur na insama kakḇe manfamyan ḇe Yesus i. Fandun fa kofasos ko snar nari kosmai samswen ma kofrur rosai monda fa kofarmyan ḇe i. (Luk. 9:23-26; 12:51-53) Inja fyor ḇebaptis ḇaim, fandun fa kwara pyum roi nane resari. Rarirya fyor ḇebaptis kwar, na wafarmyan souser ḇe Allah isof papupes.

3. Rosai nari kawos ro farkarkor ine?

³ Ḇebaptis ḇe Kristus manfamyan ḇyedi ima roi ḇepyan ḇa. Mboi, na wasmai barakas nabor ro kirine ma ras ḇarpon iyama. Ro farkarkor ine, na kawos fakfuken ḇeḇeso ḇefandun kaku ḇekur ḇaḇebaptis ya. Roi kwara na nari nafnoḇek Au fa kwarem fakfuken ine: ”Yafasos kwar fa yakḇebaptis ke?”

4. (a) Rosai na wafrur fa buk kenem Bedi ḇe Yahwe? (b) Rosai knam ro wos ”fyamyun mankundi” ḇefas ro Matius 16:24?

⁴ Rosai na wafrur fa buk kenem Bedi ḇe Yahwe? Fyor ḇebaptis ḇaim, fandun fa ḇenadi wakofen kuker kakaku ḇe Yahwe I snar wamarisen buk kenem Bedi fa wafarmyan ḇe I isof fyoro-fyoro. Fafisu buk kenem Bedi faro Yahwe I ido, Ausya wafamyun mankundaw. (Wasya Matius 16:24.) Wakofenḇair ḇe I, nari wafrur marisen Bena ḇa, mboi wafrur ḇepon marisen Ḇyena. Kirinema Yahwe iso ḇena Au, ima syowi ḇeba kaku. (Rm. 14:8) Wakofen ḇe Yahwe fa buk kenem Bedi ima asas wafrur ḇe Allah. Yahwe idif ko ḇa fa kofrur asas anya. Ḇape, kokofen kwar ido, Yahwe imarisen kofrur raris roi kokofen na.​—Mz. 116:12, 14.

5. Rosai ḇeḇese ro buk kenem Bedi ḇe Yahwe ma ḇebaptis?

⁵ Rosai ḇeḇese ro buk kenem Bedi ḇe Yahwe ma ḇebaptis? Fafisu buk kenem Bedi ḇe Yahwe, Au ma Yahwe monda ḇefawi ya. Mboi snonkaku ḇese na smam fyor ḇebaptis ro munara kebaktian. Ro ras ḇebaptis, wafasnai ro ḇarpon snonkaku sya snar fasos kwar fa wafarmyan ḇe Yahwe I. * Inja fafisu anya, snonkaku ḇesesya na sifawi waswar Yahwe I kuker snembri, kenem, kakara, ma samambraḇ Bena ḇesiper fa wafarmyan be I isof fyoro-fyoro.​—Mrk. 12:30.

6-7. Imnis ḇefas ro 1 Petrus 3:18-22, rosai roi risuru ḇefrur fa ḇaḇebaptis ima fyandun kaku?

⁶ Ḇaḇebaptis ima roi ḇefandun kaku ke? Kwarapan wos ḇero 1 Petrus 3:18-22. (Wasya.) Nuh fyasnai kakyar ḇyedi kuker ifrur wai ḇeba. Rarirya kako, fyor ḇebaptis fasnaiḇair buk kenem Bedi kwar faro Yahwe I. Mboi ḇaḇebaptis ima roi ḇefandun kaku ke? Imboḇae. Petrus doḇe ine roi ḇefandun kaku. Bepon ya, doḇe ḇaḇebaptis ’fyaspar ko’. Ḇaḇebaptis na fyaspar ko rofyor kosewar fa kofasnai kakyar faro Yesus I, kokyar imarwarek ko kwar, Yahwe ḇyawes I ḇe nanki kwar ma fafisu ine ’kyain ro Allah ḇar raku Ḇyedi’.

⁷ Ḇesuru ya, fyor koḇebaptis kona ”sneuser ḇesren”. Fafisu koḇuk kenem koḇena ḇe Allah ma koḇebaptis, ine randak ro ḇaḇebati koḇena kuker I. Kukro kombror kaku kwar ma kokyar faro farsarser fasaspar ya, Allah byuk ampun faro sasar koḇena. Inja nafrur fa kona sneuser ḇesren ro barpon Yahwe I.

8. Rosai ḇedif kaku Au fa wakḇebaptis?

⁸ Rosai ḇedif kaku Au fa wakḇebaptis? Wafarkor pyum Refo ya kwar ido, na wafawi mnis kaku Yahwe, marisen ma kakara Ḇyena. Roi wafarkor ḇekur Yahwe ine nsun kaku ro snembri ma nadif Au fa waswar syadi I. Inja, saswar faro Yahwe iso roi ḇedif kaku Au wun snemuk fa ḇebaptis.

9. Matius 28:19, 20 doḇe snonkaku oso na sebaptis i ro snonsnon Kma ya ma Rumkun ya ma rur ḇesren. Rosai knam ya?

⁹ Roi ḇese wer ḇedif Au fa wun snemuk fa ḇebaptis iso snaro wafawi kwar ma wakyar faro rosai Refo fyarkor na. Kwarapan rosai Yesus ikofen fyor ḇyuk parenta fa kofarkor snonkaku sya fa sḇemanfamyan. (Wasya Matius 28:19, 20.) Yesus ikofen snonkaku ḇemarisen ḇebaptis sya fandun fa sḇeḇebaptis ro ’snonsnon Kma ya ma Rumkun ya ma rur ḇesren ya’. Rosai knam ro Yesus wos ḇyedine? Fandun fa wakyar kuker sne  ḇesiper snar rosai Refo fyarkor ḇekur Yahwe, Yesus i, ma rur ḇesren nama kakaku nairi. Kakaku nane nakenem ma na nsun kaku ro sne Bedi. (Ibr. 4:12) Rwama komam roi ḇeḇeso.

10-11. Kakaku rosai ḇekur Kma koḇedi ro nanki wafarkor ma wakyar kwar na?

¹⁰ Waswarepen fafisu wafawi kakaku ḇekur Kma koḇedi ro nanki nane: Iso ’ḇena snosnon Yahwe’, ima ”Ḇekaki Syadi ro supswan ḇesiper”, ma derer monda ”Allah ḇekaku”. (Mz. 83:18; Yes. 37:16) Ima Manḇedaw ma Manfaspar koḇedi. (Mz. 3:8; 36:9) Yahwe fyasos roi oso kwar ḇeko insama fyaspar ko bur sasar ma marmar, ma ḇyuk ḇe ko kankenem fyoro ro ras naiwama. (Yoh. 17:3) Fafisu buk kenem Bedi faro Yahwe ma ḇebaptis kwar, fasnaiḇair Auma Saksi Yahwe disau. (Yes. 43:10-12) Na ḇeoser kuker kawasa ḇesyom faro Yahwe ro supswan ine besiper, ḇena syowi ḇeba fa sun Allah snonsnon Ḇyedi ma sikofenḇair na ḇe snonkaku ḇese.​—Mz. 86:12.

¹¹ Kokofen kasumasa kaku snar kofawi rosai Refo fyarkor ḇekur Allah Yahwe I. Inema syowi beba kaku nairi! Fyor wakyar faro kakaku wafarkor anya, sne Bedi nadif Au fa buk kankenem Bena ḇe Yahwe ma wakḇebaptis.

12-13. Rosai kakaku ḇekur Rumkun ya wafarkor ma wakyar kwar na?

¹² Moḇsa ḇaḇir rai fafisu wafawi roi ḇekaku Refo fyarkor ḇekur Rumkun ya? Yesus iso ḇesuru ḇena papoik ro farsyos ḇeba ine. Imarisen ḇyuk kenem byedi fa imarwarek ko. Kofasnai ro roi kofrur na snar kokyar faro farsarser fasaspar ya ido, na kosmai ampun ro sasar koḇena, koḇebati kuker Allah  I, ma kosmai kankenem fyoro ya. (Yoh. 3:16) Yesus ima Imam Ḇeba koḇediri. Imarisen ifnoḇek ko fa kosmai fainda ro farsarser fasaspar ya ma kofanam kaku kuker Yahwe I. (Ibr. 4:15; 7:24, 25) Yesus iso raja ro Karajan Allah. Yahwe nari ḇye Yesus i fa fyasren snonsnon Ḇyedi, ipyos roi ḇebarḇor na, ma dun barakas ḇekain fyoro ro Firdaus ḇerama ya. (Mat. 6:9, 10; Why. 11:15) Yesus fyasnai nyan ḇepyum fandun fa koso na. (1 Ptr. 2:21) Yesus ḇyuk kenem Ḇyedi fa ifrur Allah marisen Ḇyena, ma ine nyan ḇepyum fa koso na.​—Yoh. 4:34.

¹³ Fafisu wakyar faro kakaku Refo fyarkor ḇekur Yesus i, na wakswar Rumkun Allah iswar kaku ine. Saswar na nadif Au fa buk kenem Bedi fa wafrur Allah marisen Ḇyena imnis ra Yesus i. Naiso ḇedif Au fa buk kenem Bedi ḇe Yahwe ma ḇebaptis.

14-15. Rosai kakaku ḇekur rur ḇesren wafawi ma wakyar kwar na?

¹⁴ Moḇsa ḇaḇir rai fafisu wafawi roi ḇekaku Refo fyarkor ḇekur rur ḇesren ya? Ima mankun rur risyaba, mboi papoik ro Allah I. Yahwe ḇyuk rur ḇesren ya fa fyarkin manḇefas Refo sya. (2 Ptr. 1:21) Rur ḇesren nafnoḇek ko kako fa kofawi mnis roi kowasya na ma kofrur na ro kenem koḇena. (Yoh. 14:26) Roro rur besren Yahwe ḇyuk ḇe ko samambraḇ ḇeba syadi. (2 Kor. 4:7) Rur ḇesren ifnoḇek ko fa kosambraḇ koḇaryas ankinem ḇepyum, kopampum farawrowes na, kosmai sneprei, ma komkuepen ro kandera ḇekur ko na. Rur ḇesren nafnoḇek ko kako fa kofasnai rari-rari ḇepyum isoine ’rur ḇesren bon ḇyena’. (Gal. 5:22) Allah imarisen ḇyuk rur ḇesren Ḇyedi faro snonkaku ḇekyar faro I ma ḇeyor faro I kuker sne ḇesiper.​—Luk. 11:13.

 ¹⁵ Kosmai sneprei kaku snar kofawi ḇesyom faro Yahwe I sya bisa sikyar rur ḇesren na nafnoḇek si fa sifarmyan ḇe I kuker soasuser! Fyor wakyar kakaku ḇekur rur ḇesren ya, nari nadif Au fa buk kenem Bedi ḇe Allah ma ḇebaptis.

16. Rosai monda kofarkor kwar na?

¹⁶ Rofyor buk kenem Bedi fa farmyan ḇe Allah ma ḇebaptis, Ausya wafrur roi ḇefandun kaku. Imnis kawos kwar, fandun fa wafasos faro samswen nari ḇekur Au na. Mboi barakas wasmai na nabor syadi ro rosai wafrur kwar na. Ḇebaptis ido, na wasmai fasaspar ma nwa sneuser ḇesren ro Allah ḇarpon Ḇyedi. Roi ḇefnai kaku wun snemuk fa ḇebaptis iso snar waswar faro Allah Yahwe I. Au kako fandun fa wakyar kuker sne ḇesiper kakaku wafarkor kwar ḇekur Kma ya, Rumkun ya, ma rur ḇesren. Kawos roi nane kam kwar, inja moḇsa na kwarem fakfuken ine: ”Yafasos kwar fa yakḇebaptis ke?”

17. Fyor ḇebaptis ḇaim, rosai monda fandun fa wafrur ya?

¹⁷ Rofyor kwara fasos kwar fa ḇebaptis ido, ine kyurfasnai wafrur roi ḇeḇeso kwar fa ḇebati fanam kuker Yahwe I. * Wafarkor myaren Refo ya, inja wafawi nabor kwar Yahwe ma Yesus su. Nwa kakyar ḇesambraḇ kwar. (Ibr. 11:6) Wakyar kaku faro Yahwe asas Ḇyedi ḇero Refo, ma wakyar Yesus marmar ḇyedi fyaspar Au ro sasar ma marmar ya. Wambror ro sasar Bena, wafafko kaku faro roi wafrur kwar na, ma wor Yahwe I fa ḇyuk ampun ḇe Au. Wabur kenem ḇekwar Bena kwar, wamewer wafrur roi ḇepyum ḇa na wer, ma wakenem raris Allah marisen Ḇyena. (Kis. 3:19) Wamarisen wakofenḇair roi wakyar na ḇe snonkaku ḇese. Wasrow kwar fa wakḇe manḇaryas ḇebaptis ḇaim ma wakso ro ḇaḇeḇaryas sidang fyasos kwar na. (Mat. 24:14) Yahwe imarisen kaku myam wafrur roi ḇefandun nane kwar. Wafrur sne Ḇyedi iryaḇ kaku.​—Ams. 27:11.

18. Rosai wer fandun fa wafrur ya fyor ḇebaptis ḇaim?

¹⁸ Ḇebaptis ḇaim, roi ono naisya fandun fa wafrur na. Insanja kofarkor kwar, fandun fa buk kenem Bedi faro Allah. Wakofenḇair ḇe Yahwe I ro nadi wamarisen buk kenem Bedi fa wafrur marisen Ḇyena. (1 Ptr. 4:2) Ramnai, na wakofenḇair ḇe koordinator badan penatua snar wamarisen fa ḇebaptis. Nari dor penatua ḇeḇeso fa sisrow Au. Wamkak awer si kukro naek ḇesawarwar ansya sifawi pyum Au kwar ma siswar Au. Nari sawawos kuker Au fa mkomam kaḇer roi  wafarkor ḇepon kwar ro Refo na. Imbe smam mnis wafawi pyum farkarkor anna kwar ma wafawi snar buk kenem Bedi faro Yahwe ma ḇebaptis ima roi ḇefarfnak risyaḇa. Rofyor smam mboi wafasos kwar, nari sikofen ḇe Au fa ḇebaptis ro munara kebaktian ḇerama ya.

19-20. Rosai fandun fa wafrur rofyor ḇebaptis kwar, ma moḇsa na wafrur na rai?

¹⁹ Rosai fandun fa wafrur rofyor ḇebaptis kwar? * Waswarepen pdef asas wakofen kwar ḇe Yahwe I na buk kenem Bedi faro I ma imarisen fa wafrur na rarirya. Inja, fyor ḇebaptis kwar, fasnaiḇair kaku buk kenem Bedi ḇe Yahwe I kwar. Moḇsa na wafrur na rai?

²⁰ Fanam pdef kuker sidang. Ḇebaptis kwar ido, wakḇeoser kuker naek srar ro supswan ḇesiper. (1 Ptr. 2:17) Naek srar ro sidang simnis ra kina Besi. Inja, waso pdef ro fananjur nafrur fa wafanam syadi kuker si. Fandun fa wawasya Refo ras ḇe ras ma kwarauser na. (Mz. 1:1, 2) Fyor wawasya Refo kwar, buk swaf fa kwarauser kaku na. Rarirya, wos anna nsun kaku ro snembri. Oso wer ido, ’ḇenadi ḇesya kwar’. (Mat. 26:41) Ḇenadi kuker kakaku ḇe Yahwe insama fanam syadi ḇe I. Ma ’swewar bepon Allah Karajan Ḇyedi’. (Mat. 6:33) Wafrur na kuker mam fararur ḇaḇeḇaryas ḇe roi ḇepon kaku ro kankenem Bedi. Waḇaryas myaren ido, na kakyar Bedi syambraḇ, ma wafnoḇek snonkaku ḇesesya kako fa saksmai kankenem fyoro.​—1 Tim. 4:16.

21. Ḇebaptis kwar ido, rosai nari wasmai ro kenem Bedi?

²¹ Snemuk wun fa buk kenem Bedi faro Yahwe ma ḇebaptis ima roi ḇefandun kaku wafrur ro kankenem Bedi. Kakuḇae na wasmai samswen mboi barakas wasmai na nabor syadi. Samswen rosai monda ḇekur Au na nama ’nakain fyoroḇa’. (2 Kor. 4:17) Imbape, fyor ḇebaptis kwar nari wakenem pyum syadi ro kirine ma ro ras naiwama wasmai ”kankenem ḇekakuya”. (1 Tim. 6:19) Inja, kwara pyum resari ma ḇenadi insama wakkarem fakfuken ine: ”Yafasos kwar fa yakḇebaptis ke?”