1. ?Man we i wantem wokem wan haos i mas mekem wanem fastaem?

TRAEM tingbaot wan man we i wantem wokem haos. Hem i save gud wanem kaen haos we hem i wantem. ?Olsem wanem? ?Bambae hem i resis i go long stoa blong pem ol samting nao i stat blong bildim haos? Nogat. I gat wan impoten samting we hem i mas mekem fastaem: kaontem praes blong haos ya. ?From wanem? From we hem i mas luk sipos mane blong hem i naf blong finisim. Sipos hem i kaontem praes fastaem, bambae hem i save finisim gud haos ya.

2. Folem Luk 14:27-30, ?yu mas tingting gud long wanem bifo we yu baptaes?

² From we yu lavem Jehova mo yu glad long evri samting we hem i mekem blong yu, ?yu stap tingting blong baptaes? Sipos yes, yu yu olsem man blong wokem haos. ?From wanem yumi talem olsem? Traem tingbaot ol tok blong Jisas long Luk 14:27-30. (Ridim.) Jisas i stap tokbaot samting we man i mas mekem blong kam disaepol blong hem. Hem i talem se yumi mas “kaontem praes,” hemia i min se yumi mas rere blong fesem hadtaem mo lego sam samting we yumi nomo i wantem. (Luk 9:23-26; 12:51-53) Taswe bifo we yu baptaes, yu mas tingting gud long ol samting we bambae yu fesem. Olsem nao, bambae yu rere blong gohed nomo blong mekem wok blong God afta we yu baptaes.

3. ?Long stadi ya, bambae yumi tokbaot wanem?

³ ?Olsem wanem? ?I gud blong traehad blong baptaes, sipos yu save kasem trabol mo hadtaem biaen? !Yes! Baptaes i openem doa blong kasem fulap blesing naoia mo long fiuja. Bambae yumi tokbaot sam impoten kwestin long saed blong  baptaes. Hemia bambae i halpem yu blong luksave sipos yu yu rere blong baptaes.

4. (1) ?Olsem wanem blong givim laef blong yu i go long Jehova? (2) Long Matiu 16:24, ?tok ya ‘blokem ol samting we yu nomo yu wantem,’ i minim wanem?

⁴ ?Givim laef long Jehova i minim wanem? Bifo we yu baptaes, yu mas givim laef blong yu i go long Jehova. Blong mekem olsem, yu prea wetem fulhat blong yu blong talem long Jehova se yu wantem yusum laef blong yu blong mekem wok blong hem, gogo i no save finis. Taem yu givim laef blong yu long God, yu ‘blokem ol samting we yu nomo yu wantem.’ (Ridim Matiu 16:24) Yu kam wan man blong Jehova, mo hemia wan bigfala blesing. (Rom 14:8) Yu talem long Jehova se, samting we i moa impoten, i blong mekem wok blong hem, be i no samting we yu nomo yu wantem. Hemia wan strong promes we yu mekem long God. Jehova i no fosem yumi blong mekem promes ya. Be taem yumi mekem, hem i wantem se yumi holem.—Sam 116:12, 14.

5. ?Olsem wanem promes blong givim laef long Jehova i joen wetem baptaes?

⁵ ?Olsem wanem promes blong givim laef long Jehova i joen wetem baptaes? Taem yu givim laef blong yu i go long Jehova, i no gat wan narafala man i save, yu mo Jehova nomo. Be taem yu baptaes, hemia i hapen long fored blong plante man, klosap oltaem long wan asembli. Baptaes i soemaot long olgeta se yu givim laef blong yu finis long Jehova. * Hemia from we yu lavem God blong yu Jehova long olgeta hat, laef, tingting, mo paoa blong yu, mo yu gat strong tingting blong mekem wok blong hem gogo i no save finis.—Mak 12:30.

6-7. Folem 1 Pita 3:18-22, ?wanem tufala impoten risen blong baptaes?

⁶ ?I impoten blong baptaes? Traem tingbaot ol tok blong 1 Pita 3:18-22. (Ridim.) Bigfala sip we Noa i wokem i soemaot se hem i gat bilif, mo long sem fasin, baptaes blong yu i soemaot se yu yu givim laef blong yu long Jehova. ?Be i impoten blong baptaes? Yes. Pita i talem from wanem i impoten. Fastaem hem i talem se baptaes i ‘sevem yumi.’ Baptaes i save sevem yumi sipos yumi stap soemaot se yumi bilif we Jisas i ded from yumi, i laef bakegen mo i go long heven, mo i “stap long raet saed blong God.”

⁷ Namba tu samting: Baptaes i mekem se ‘tingting we i stikim yumi, i klin.’ Taem yumi givim laef i go long God mo baptaes, yumi kam wan man blong hem. Hem i fogivim ol sin blong yumi, from we yumi tanem tingting blong yumi mo yumi bilif long ransom sakrefaes. Taswe tingting we i stikim yumi i klin.

8. ?Wanem i mas pulum yu blong baptaes?

⁸ ?Wanem i mas pulum yu blong baptaes? Taem yu stadi Baebol, yu lanem plante samting long saed blong Jehova, ol fasin blong hem, mo ol samting we hem i mekem. Samting we yu lanem i tajem hat blong yu mo i mekem se yu lavem hem. Lav ya nao i mas bigfala samting we i pulum yu blong baptaes.

9. ?Wanem mining blong Matiu 28:19, 20 se yu mas baptaes long nem blong Papa, Pikinini, mo tabu spirit?

⁹ Wan narafala samting we i pulum yu blong baptaes, hemia bilif we yu gat long trutok blong Baebol. Tingbaot taem ya we Jisas i talem long ol disaepol blong hem se oli mas prij. (Ridim Matiu 28:19, 20.) Hem i talem se oli mas baptaesem man “long nem blong Papa, mo long nem blong Pikinini, mo long nem blong tabu spirit.” ?Hemia i minim wanem? Yu mas bilif wetem fulhat blong yu long ol tijing blong Baebol long saed blong  Jehova, Pikinini blong hem Jisas, mo tabu spirit. Ol tijing ya oli gat bigfala paoa mo oli save tajem hat blong yu. (Hib. 4:12) Bambae yumi tokbaot sam long olgeta.

10-11. ?Wanem trutok long saed blong Papa we yu lanem finis mo yu bilif long hem?

¹⁰ Traem tingting bak long taem ya we yu lanem trutok long saed blong Papa. Yu lanem se ‘nem blong hem Jehova,’ hem i “Hae God blong olgeta ples long wol,” mo hem nomo i “tru God.” (Sam 83:18, NW; Aes. 37:16) Hem i wokem yumi, mo ‘paoa blong sevem man i blong hem nomo.’ (Sam 3:8; 36:9) Hem i mekem rod blong sevem yumi long sin mo ded, mo hem i givim janis long yumi blong laef olwe. (Jon 17:3) Taem yu givim laef long Jehova mo yu baptaes, yu kam wan Witnes blong hem. (Aes. 43:10-12) Yu yu joen long wan bigfala famle blong ol man blong God long fulwol, we oli glad blong holem nem blong hem mo talemaot long ol narafala.—Sam 86:12.

¹¹ !I gud tumas blong save samting we Baebol i tijim long saed blong Papa! Taem yu bilif long trutok ya, yu wantem tumas blong givim laef blong yu long Jehova mo baptaes.

12-13. ?Wanem trutok long saed blong Pikinini we yu lanem finis mo yu bilif long hem?

¹² ?Wanem tingting blong yu taem yu lanem trutok long saed blong Pikinini? Yu bin lanem se, Jisas i namba tu man we i hae moa long ol narafala long heven mo wol. Hem i givim laef blong hem olsem ransom blong pemaot yumi. Taem yumi soemaot long ol wok blong yumi se yumi bilif long ransom, God i save fogivim ol sin blong yumi, yumi save fren gud wetem hem, mo kasem laef we i no save finis. (Jon 3:16) Jisas i Hae Pris blong yumi. Hem i wantem givhan long yumi blong yumi kasem ol blesing blong ransom sakrefaes, mo yumi kam klosap long God. (Hib. 4:15; 7:24, 25) Hem i King blong Kingdom blong God, taswe Jehova bambae i yusum hem blong mekem nem blong hem i tabu, finisim ol rabis fasin, mo givim ol blesing blong olwe long Paradaes long fiuja. (Mat. 6:9, 10; Rev. 11:15) Jisas i soemaot eksampol long yumi. (1 Pita 2:21) Hem i yusum ful laef blong hem blong mekem samting we God i wantem.—Jon 4:34.

¹³ Taem yu bilif long samting we Baebol i tijim long saed blong Jisas, yu lavem hem. Lav ya i pulum yu blong yusum laef blong yu blong mekem samting we God i wantem, olsem Jisas. Taswe, yu wantem tumas blong givim laef blong yu long Jehova mo baptaes.

14-15. ?Wanem trutok long saed blong tabu spirit we yu lanem finis mo yu bilif long hem?

¹⁴ ?Wanem tingting blong yu taem yu lanem trutok long saed blong tabu spirit? Yu lanem se, tabu spirit i no wan man, be hem i paoa blong God. Jehova i yusum tabu spirit blong halpem ol man blong oli raetem Baebol, mo spirit ya i givhan long yumi blong yumi kasem save mo folem ol tok we yumi ridim long Baebol. (Jon 14:26; 2 Pita 1:21) Jehova i yusum tabu spirit blong givim ‘paoa we i bigwan bitim mak.’ (2 Kor. 4:7) Spirit ya i givim paoa long yumi blong talemaot gud nius, faet agensem ol nogud tingting we oli save pulum yumi, winim tingting we i foldaon, mo stanap strong long ol hadtaem. Paoa ya i halpem yumi blong yumi gat ol gudfala fasin we oli “frut” blong tabu spirit. (Gal. 5:22, futnot) God i glad nomo blong givim tabu spirit long olgeta we oli trastem hem mo oli askem wetem fulhat.—Luk 11:13.

¹⁵ !I gud tumas blong save se ol man blong Jehova oli save dipen long tabu spirit blong halpem olgeta blong mekem wok blong hem! Taem yu bilif long trutok long saed blong  tabu spirit, yu wantem tumas blong givim laef blong yu i go long God mo baptaes.

16. ?Yumi tokbaot wanem finis?

¹⁶ Taem yu givim laef blong yu long God mo baptaes, yu mekem wan desisen we i impoten tumas. Olsem yumi tokbaot finis, yu mas kaontem praes, i min se yu mas rere blong kasem hadtaem mo lego samting we yu nomo yu wantem. Be ol blesing we yu kasem oli bigwan moa i bitim ol hadtaem ya. Baptaes i save sevem yu, mo i mekem se tingting we i stikim yu i klin long fored blong God. Lav we yu gat long Jehova, hemia bigfala samting we i mas pulum yu blong baptaes. Mo tu, yu mas bilif wetem fulhat blong yu long trutok long saed blong Papa, Pikinini, mo tabu spirit. Taem yu tingbaot ol samting ya, wanem ansa blong yu long kwestin ya, “?Mi mi rere blong baptaes?”

17. ?Wanem sam samting we yu mas mekem bifo we yu baptaes?

¹⁷ Sipos yu ting se yu rere blong baptaes, i sua se yu mekem plante samting finis blong kam wan fren blong Jehova. * Yu lanem plante samting long saed blong Jehova mo Jisas long Baebol stadi blong yu. Bilif blong yu i kam strong. (Hib. 11:6) Yu trastem fulwan ol promes blong Jehova long Baebol, mo yu sua se bilif long sakrefaes blong Jisas i save sevem yu long sin mo ded. Yu tanem tingting mo yu sore tumas from ol rong we yu mekem, nao yu askem long Jehova blong i fogivim yu. Yu jenisim laef blong yu, i min se yu sakemaot ol rabis tingting mo fasin blong bifo, mo yu folem fasin we God i glad long hem. (Wok 3:19) Yu wantem tumas blong talemaot bilif blong yu long ol narafala. Yu naf blong kam wan pablisa we i no baptaes, mo yu stat blong prij wetem ol narafala long kongregesen. (Mat. 24:14) Jehova i tinghae long yu from ol samting ya we yu mekem, mo hem i glad tumas.—Prov. 27:11.

18. ?Wanem sam narafala samting we yu mas mekem bifo we yu baptaes?

¹⁸ Bifo we yu baptaes, i gat sam narafala samting we yu mas mekem. Olsem yumi tokbaot finis, yu mas givim laef blong yu i go long God. Prea long hem wetem fulhat blong yu, mo mekem promes long hem se bambae yu yusum ful laef blong yu blong mekem samting we hem i wantem. (1 Pita 4:2) Nao yu save talemaot long kodineta blong ol elda se yu wantem baptaes. Bambae hem i askem long sam elda blong oli toktok wetem yu. Yu no mas fraet long samting ya. Ol gudfala brata ya oli save yu finis mo oli lavem yu. Bambae oli mekem yu yu tingting bak long ol stamba tijing blong Baebol we yu lanem finis. Oli wantem meksua se yu kasem save gud long ol tijing ya, mo yu luksave se desisen ya blong givim laef long Jehova mo baptaes i impoten tumas. Sipos oli luk se yu naf blong  baptaes, bambae oli talem long yu se yu save baptaes long nekis asembli.

19-20. Afta we yu baptaes, ?yu mas mekem wanem, mo olsem wanem blong mekem samting ya?

¹⁹ Afta we yu baptaes, ?yu mas mekem wanem? * Yu mas tingbaot se Jehova i wantem we yu holem promes ya blong givim laef blong yu long hem. Taswe, yu mas folem. ?Olsem wanem blong mekem samting ya?

²⁰ Yu mas joen oltaem wetem kongregesen. Taem yu baptaes, yu joen long wan “bigfala famle blong ol brata.” (1 Pita 2:17, futnot) Ol brata mo sista long kongregesen oli olsem famle blong yu. Sipos yu go oltaem long miting, bambae yu fren gud wetem olgeta. Mo tu, yu mas ridim Tok blong God evri dei mo tingting dip long hem. (Sam 1:1, 2) Afta we yu ridim wan haf, i gud yu tekem taem blong tingting dip long hem. Nao ol tok ya bambae i tajem hat blong yu. Mo tu, yu mas “prea oltaem.” (Mat. 26:41) Prea we i kamaot long hat bambae i pulum yu yu kam klosap moa long Jehova. Mo tu, yu mas “gohed blong lukaot Kingdom . . . fastaem.” (Mat. 6:33) Hemia i min se yu mekem wok blong prij i kam wan impoten samting long laef blong yu. Sipos yu joen oltaem long wok blong prij, bambae bilif blong yu i stap strong, mo maet yu save givhan long sam narafala tu blong oli wokbaot long rod blong kasem laef we i no save finis.—1 Tim. 4:16.

21. ?Baptaes i openem rod blong yu kasem wanem?

²¹ Desisen blong givim laef blong yu long Jehova mo baptaes i moa impoten i bitim ol narafala desisen long laef blong yu. I tru se yu mas kaontem praes, ?be praes ya i bigwan tumas? !Nogat! Ol hadtaem we yu fesem long olfala wol ya “oli smol nomo, mo oli no save stap longtaem.” (2 Kor. 4:17) Baptaes bambae i openem rod blong laef blong yu i kamgud moa naoia, mo blong yu kasem “laef ya we i prapa wan” long fiuja. (1 Tim. 6:19) Plis, yu mas tingting gud mo prea blong faenem ansa blong kwestin ya, “?Mi mi rere blong baptaes?”