1. De emwi nọ khẹke ne ọmwa ru, ọ ke suẹn gha bọ owa?

GIA kha wẹẹ ọmwa hoo nọ bọ owa. Ọ vbe rẹn aro owa nọ khian bọ. Sokpan, ọ gha wa rhiọrre vbe ẹdẹ ọkpa, nọ wa suẹn gha dẹlẹ emwi nọ khian ya bọ nene owa, nọ wa vbe suẹn gha bọe vbobọvbobọ ra? Hiehie. Vbene ọ te suẹn gha ru ena hia, ọ mwẹ emwi kpataki nọ khẹke nọ ka ru. Ọ ghi ka tota roro ẹre, inu igho ne owa nii khian gbe, ọ ke mu uhunmwu daa re. Vbọzẹe? Nọ mieke na rẹn deghẹ igho nọ mwẹ gha sẹ ọre ya bọ nene owa fo. Ọ gha ru ẹre vberriọ, ẹi mwẹ ọ ma musọe.

2. Zẹvbe nọ rre ebe Luk 14:28-30, de emwi nọ khẹke ne u mu roro, u ke dinmwiamẹ?

² U sẹtin gha hoo ne u dinmwiamẹ, rhunmwuda ahoẹmwọmwa ne u mwẹ ne Jehova kevbe rhunmwuda ne u na gbọyẹmwẹ ye emwi ughughan nọ he ru nuẹn. Adeghẹ erriọ nọ, te u yevbe okpia nii nọ hoo nọ bọ owa. Vbọ ya ima kha vberriọ? Gia ziro yan ẹmwẹ ne Jesu tae vbe ebe Luk 14:28-30. (Tie ẹre.) Te Jesu ghaa guan kaẹn emwi ne ọmwa gha ru, ọ ke khian ọrhuanegbe ọghe irẹn. Ma ghaa hoo ne ima gha re ọrhuanegbe Jesu, te ima gha muegbe ne ima ya rri oya nọ lelẹe khian kevbe ne ima ya sẹ emwi eso ni te yẹẹ ima rae. (Luk 9:23-26; 12:51-53) Nọnaghiyerriọ, u ke dinmwiamẹ, ọ khẹke ne u ka muẹn roro emwi ni lelẹe khian. Ẹghẹ nii ẹre u khian na sẹtin si agbada vbe unu tae wẹẹ, u muegbe ne u ya dinmwiamẹ.

3. De emwi ne ima khian ziro yan vbe ako iruẹmwi na?

³ Ere rrọọ deghẹ ọmwa na dinmwiamẹ ra? Vbene ẹmwata, ere wa rrọọ! Idinmwiamẹ keghi kie ẹkpotọ ne ọmwa ya miẹn afiangbe nibun vbe obọ e Jehova vbe ẹghẹ na nia kevbe vbe odaro. Gia ziro yan inọta ne kpataki eso ni dekaẹn idinmwiamẹ. Ewanniẹn ọghe avbe inọta na gha ru iyobọ nuẹn ya rẹn deghẹ u muegbe ne u khian ya dinmwiamẹ.

4. (a) A gha wẹẹ ọmwa ya egbe fiohan ne Jehova, vbe a yae kha? (b) Zẹvbe nọ rre ebe Matiu 16:24, NW, de vbene ọmwa ya “mianmian enegbe ẹre” hẹ?

⁴ A gha wẹẹ ọmwa ya egbe fiohan ne Jehova, vbe a yae kha? Vbene ọmwa te dinmwiamẹ, ọ khẹke nọ ka ya egbe fiohan ne Jehova nẹ. Ọmwa gha khian ya egbe fiohan ne Jehova, ọ ghi tama e Jehova vbe erhunmwu wẹẹ, irẹn hoo ne irẹn ya ẹdagbọn irẹn hia gae vbe etẹbitẹ. Ọmwa gha ya egbe ẹre fiohan ne Osanobua nẹ, ọ ghi “mianmian enegbe ẹre.” (Tie Matiu 16:24, NW.) Ọ ghi do gha re ọghe Jehova. Ukpamuyọmọ nọ sẹ ọna i rrọọ! (Rom 14:8) Te ọmwa nii ghi tama e Jehova wẹẹ, ahoo ọghẹe ẹre irẹn khian ghi gha mu ye okaro, ẹi re ọghe enegbe irẹn. Eyan na ru vbe ẹdẹ na ya egbe fiohan ne Jehova i re eyan na ya rhẹghẹrẹ. E Jehova i kpikpi ọmwa ya ru eyan na. Sokpan a gha ghi ru ẹre nẹ, e Jehova hoo ne ima muẹn sẹ.—Psm 116:12, 14.

5. De alughaẹn nọ rre a ya egbe fiohan kevbe idinmwiamẹ?

⁵ De alughaẹn nọ rre a ya egbe fiohan kevbe idinmwiamẹ? Ọmwa ẹre ọ tobọre ya egbe ẹre fiohan ne Jehova, ẹi gia ru ne ọmwa, ẹi vbe re emwi na ru vbe idagbo. Sokpan idinmwiamẹ keghi re emwi na ru vbe idagbo; te aro emwa wa sọe. Asikoko nekherhe ra nọkhua ẹre emwa na mobọ dinmwiamẹ. U gha dinmwiamẹ, emwa ọvbehe ghi rẹn wẹẹ u ya egbuẹ fiohan ne Jehova nẹ. * Iran ghi vbe rẹn wẹẹ ekhọe ruẹ hia, orhiọn ruẹ hia, otọ ẹko ruẹ hia kevbe ẹtin ruẹ hia ẹre u ya hoẹmwẹ e Jehova, kevbe wẹẹ, u muegbe ne u ya ya ẹdagbọn ruẹ gae vbe etẹbitẹ.—Mak 12:30.

6-7. Zẹvbe nọ rre ebe 1 Pita 3:18-22, NW, vbọzẹe nọ na khẹke ne ima dinmwiamẹ?

⁶ Esa rrọọ ne ọmwa ya dinmwiamẹ ra? Gia ziro yan ẹmwẹ nọ rre ebe 1 Pita 3:18-22, NW. (Tie ẹre.) Okọ ne Noa kan rẹn kegha re osẹ nọ rhiẹre ma wẹẹ, ọ mwẹ amuẹtinyan. Erriọ ẹre idinmwiamẹ vbe ya so igiẹ yọ wẹẹ, u ya egbe fiohan ne Jehova nẹ. Sokpan, esa gele rrọọ na dinmwiamẹ ra? Esa wa rrọọ. Ukọ e Pita gi ima rẹn evbọzẹe nọ na khẹke ne ima dinmwiamẹ. Vbe okaro, ọ khare wẹẹ, idinmwiamẹ keghi ‘miẹn ima fan.’ Idinmwiamẹ gha sẹtin miẹn ima fan deghẹ ima na gha rhiẹre ma wẹẹ, ma mu ẹtin yan Jesu, ma ghi vbe ya ekhọe hia yayi wẹẹ, te Jesu do wu ne ima, a na vbe huẹn ọnrẹn kpaegbe gha rrie “oberhọmwa ọghe Osanobua vbe ẹrinmwi.”

⁷ Nogieva, idinmwiamẹ keghi ya ima mwẹ “ekhọe ọguọmwaziro nọhuanrẹn.” Ma gha ya egbe ima fiohan ne Jehova, ma na vbe dinmwiamẹ, ma ghi do gha gu e Jehova mwẹ asikẹgbe ne khuankhuankhuan. Rhunmwuda ne ima na ro iro fi uyinmwẹ werriẹ, ma na vbe mu ẹtin yan izọese adẹwerriegbe ọghe Jesu, te Osanobua ghi vbe ya orukhọ ọghe ima bọ ima. Ọna ẹre ọ ghi ya ima mwẹ ekhọe ọguọmwaziro nọhuanrẹn vbe odaro Osanobua.

8. De emwi nọ khẹke nọ gua ruẹ kpa ya dinmwiamẹ?

⁸ De emwi nọ khẹke nọ gua ruẹ kpa ya dinmwiamẹ? Ke obọ ne u ya suẹn gha ruẹ e Baibol, ẹi re avbiẹ emwi ẹre u he ruẹ vbekpae Jehova. Te u ghi rẹn avbe akpa ọghẹe kevbe vbene ọ ya ru emwi. Ena hia keghi mu ruẹ ekhọe sẹrriọ wẹẹ, te u ghi hoẹmwẹ e Jehova ẹsẹsẹmwẹse. Ahoẹmwọmwa ne u mwẹ ne Jehova ẹre ọ khẹke nọ gua ruẹ kpa ya dinmwiamẹ.

9. Vbe ebe Matiu 28:19, 20, NW, Jesu wẹẹ ne emwa ni khian dinmwiamẹ, ru vberriọ vbe eni ọghe Erha, Ọmọ kevbe ọghe orhiọn nọhuanrẹn. Vbọ ya ẹmwẹ na kha?

⁹ Emwi ọvbehe nọ gua ima kpa ya dinmwiamẹ ọre avbe imamwaemwi ọghe ẹmwata ni rre uwu e Baibol ne ima ghi do yayi. Gia ziro yan emwi ne Jesu tae, vbe ẹghẹ nọ ya waa ima iwinna ọghe na gha ya emwa khian erhuanegbe irẹn. (Tie Matiu 28:19, 20, NW.) Jesu khare wẹẹ, ne emwa ni khian dinmwiamẹ, ru vberriọ “vbe eni ọghe Erha, kevbe Ọmọ kevbe ọghe orhiọn  nọhuanrẹn.” Vbọ ya ẹmwẹ na kha? Ọna rhiema wẹẹ, te ima gha ya ekhọe hia miẹn ọnrẹn yi imamwaemwi ẹmwata ni rre uwu e Baibol nọ dekaan e Jehova, ovbi ẹre ighẹ Jesu kevbe orhiọn nọhuanrẹn. Te avbe imamwaemwi ọghe ẹmwata na wa gele ru ekpataki ne ima. (Hib 4:12) Gia guan kaẹn eso vbọ.

10-11. De imamwaemwi ọghe ẹmwata nọ dekaan e Jehova ne u he miẹn vbe Baibol?

¹⁰ Muẹn roro ẹghẹ okaro ne u ya ruẹ ẹmwata vbekpa Erha mwa nọ rre ẹrinmwi. U keghi do rẹn wẹẹ “eni ẹnrẹn” ọre “Jehova,” kevbe wẹẹ, irẹn “ọkpa ọre nọ yo sẹ, nọ mwẹ asẹ yan otagbọn hia.” U vbe do bẹghe ẹre wẹẹ, irẹn “ọkpa kẹkan ọre Osanobua.” (Psm 83:18, NW; Aiz 37:16) Irẹn ọre Ayi ọghomwa kevbe wẹẹ, “obọ e Jehova ẹre imiẹnfan ke rre.” (Psm 3:8, NW; 36:9) Ọ keghi ru emwamwa nọ ya miẹn ima fan vbe obọ orukhọ kevbe uwu, rhunmwuda ọni, te ima ghi vbe yaro yọ wẹẹ, ma gha sẹtin gha rrọọ vbe etẹbitẹ. (Jọn 17:3) U gha ya egbe fiohan ne Jehova, u na vbe dinmwiamẹ, ọ ghi do vẹ na rẹn wẹẹ, Osẹe Jehova ẹre u khin. (Aiz 43:10-12) U ghi do deba etẹn nikpia kevbe etẹn nikhuo ni koko ga e Jehova vbe uhunmwu otagbọn hia, ni ya eni ẹnrẹn waengbe, ni vbe ya eni ẹnrẹn wewe ma emwa ọvbehe.—Psm 86:12.

¹¹ Ukpamuyọmọ nọkhua ẹre nọ, ne ima na rẹn ẹmwata vbekpa Erha mwa nọ rre ẹrinmwi ighẹ e Jehova! U gha miẹn avbe ẹmwata na yi, u ghi do gha hoo ne u ya egbe fiohan ne Jehova kevbe ne u dinmwiamẹ.

12-13. De imamwaemwi ọghe ẹmwata nọ dekaẹn Jesu ne u he miẹn vbe Baibol?

¹² De vbene ọ ghaa ye ruẹ hẹ, vbe ẹghẹ ne u ya rẹn ẹmwata nọ rrọọ vbekpae Ovbi Osanobua ighẹ Jesu? U keghi do bẹghe ẹre wẹẹ, ke agbọn na ya sẹ ẹrinmwi, ukpogieva ẹre Jesu na zẹ. Irẹn ẹre ọ dẹ ima werriegbe. Ekhọe hia ẹre ọ ya ru ọna ne ima. Ma ghaa rhiẹre ma wẹẹ ima mu ẹtin yan izọese adẹwerriegbe ọghe Jesu, Osanobua gha ya orukhọ ọghe ima bọ ima, ma ghi vbe do gha re ọsiọre. Ẹghẹ nii, ẹkpotọ ghi kie ne ima ya gha mwẹ arrọọ ọghe etẹbitẹ. (Jọn 3:16) Jesu ọre Ogie Ohẹn ọghe ima. Ọ hoo ne ima miẹn ere vbe uwu nọ do wu ne ima kevbe ne ima gu Osanobua gha mwẹ asikẹgbe ne khuankhuankhuan. (Hib 4:15; 7:24, 25) Zẹvbe Ọba ọghe Arriọba Osanobua, e Jehova gha loo Jesu ya kpe eni ẹnrẹn huan. Jesu ẹre ọ khian vbe loo ya wabọ emwi dan hia rua. Obọ e Jesu ẹre ima khian vbe la miẹn afiangbe ọghe etẹbitẹ vbe agbọn ọghe Paradais nọ dee vbe odaro. (Mat 6:9, 10; Arhie 11:15) Igiemwi Jesu ẹre ima lele. (1 Pit 2:21) Ahoo ọghe Osanobua ẹre ọ mu ye okaro vbe arrọọ ọghẹe. Te ọ wa khẹke ne ima ya egbe taa re.—Jọn 4:34.

¹³ U gha miẹn ọnrẹn yi, ẹmwata ne Baibol maa ima re vbekpae Jesu, u ghi do hoẹmwẹ ọnrẹn ẹsẹsẹmwẹse. Ahoẹmwọmwa ne u mwẹ ne Jesu, ẹre ọ khian ghi gua ruẹ kpa ya mu ahoo ọghe Osanobua ye okaro, zẹvbe ne Jesu ru ẹre. Ẹghẹ nii, u ghi do gha hoo ne u ya egbuẹ fiohan ne Jehova, ne u vbe dinmwiamẹ.

14-15. De imamwaemwi ọghe ẹmwata nọ dekaẹn orhiọn nọhuanrẹn ne u he miẹn vbe Baibol?

¹⁴ Vbọ ghaa ye ruẹ hẹ, vbe ẹghẹ ne u ya rẹn ẹmwata ne Baibol maa ima re vbekpae orhiọn nọhuanrẹn? U na do bẹghe ẹre wẹẹ, orhiọn nọhuanrẹn i re ọmwa, sokpan ẹtin ne Osanobua loo ẹre nọ. Orhiọn nọhuanrẹn ẹre Osanobua loo ro ya dia emwa ni gbẹn e Baibol, orhiọn nọhuanrẹn ẹre ọ ru iyobọ ne ima ya rẹn ototọ emwi ne ima tie vbe Baibol, ẹre ọ vbe ru iyobọ ne ima ya gha rhie emwi ne ima ruẹ ye uyinmwẹ. (Jọn 14:26; 2 Pit 1:21) E Jehova keghi loo orhiọn nọhuanrẹn ya rhie “ẹtin nọ sẹ ehia” ne ima. (2 Kọr 4:7) Orhiọn nọhuanrẹn ẹre ọ rhie ẹtin ne ima, ne ima ya kporhu iyẹn nọ maan, ne ima ghẹ de ye edanmwẹ, ne ima ghẹ gha gbe ọsumẹ segbe vbe ima ghaa rre uwu ọlọghọmwa, ẹre ọ vbe ya ima mwẹ izinegbe vbe ima ghaa werriẹ aro daa ukpokpo. Orhiọn nọhuanrẹn vbe ru iyobọ ne ima  ya gha mwẹ avbe akpa ni khẹke Ivbiotu e Kristi. (Gal 5:22) Ma gha mu ẹtin yan Osanobua, ma na vbe rinmwiaẹn nọ rhie orhiọn nọhuanrẹn ne ima, ọ gha gele ru vberriọ.—Luk 11:13.

¹⁵ Ọ keghi fu ima ẹko rre ne ima na rẹn wẹẹ, e Jehova gha ya orhiọn nọhuanrẹn ọghẹe ru iyobọ ne ima, ne ima mieke na sẹtin gha gae. U gha miẹn ọnrẹn yi, ẹmwata ne Baibol maa ima re vbekpae orhiọn nọhuanrẹn, u ghi do gha hoo ne u ya egbe fiohan ne Osanobua, ne u vbe dinmwiamẹ.

16. De emwi ne ima he ziro yan vbe ako iruẹmwi na?

¹⁶ U gha ya egbe fiohan ne Jehova, u na vbe dinmwiamẹ, owẹ ne kpataki ẹre u zẹ. Zẹvbe ne ima ka ruẹ ọre sin, ma ghaa hoo ne ima gha re ọrhuanegbe Jesu, te ima gha muegbe ne ima ya rri oya nọ lelẹe khian kevbe ne ima ya sẹ emwi eso ni te yẹẹ ima rae. Sokpan afiangbe ne ima khian miẹn sẹ emwi hia ne ima khian sẹ rae. Idinmwiamẹ gha sẹtin miẹn ruẹ fan, ọ gha vbe sẹtin ya ruẹ gha mwẹ ekhọe ọguọmwaziro nọhuanrẹn vbe odaro Osanobua. Emwi kpataki nọ khẹke nọ gua ruẹ kpa ya dinmwiamẹ ọre ahoẹmwọmwa ne u mwẹ ne Jehova. Te ọ vbe khẹke ne u ya ekhọe hia miẹn ọnrẹn yi, imamwaemwi ọghe ẹmwata ne Baibol maa ruẹ re vbekpae Jehova, Jesu kevbe orhiọn nọhuanrẹn. Ugbẹnvbe ima ghi ziro yan ena hia nẹ, de ewanniẹn ne u gha rhie ye inọta na, “Mẹ muegbe ne I khian ya dinmwiamẹ ra?”

17. De emwi eso nọ khẹke ne ọmwa ru, ọ ke dinmwiamẹ?

¹⁷ Adeghẹ u na gha roro ẹre wẹẹ, u muegbe ne u khian ya dinmwiamẹ nẹ, ọni rhiema wẹẹ, ẹi re avbiẹ emwi ẹre u he ru ne u mieke na gha gu e Jehova mwẹ asikẹgbe ne khuankhuankhuan. * Rhunmwuda ne u na ruẹ e Baibol vbe ẹghẹ hia, te u ghi do rẹn e Jehova kevbe Jesu sayọ. Te amuẹtinyan ruẹ ghi vbe wegbe sayọ. (Hib 11:6) U mwẹ ilẹkẹtin wẹẹ, eyan ọghe Jehova hia ni rre uwu e Baibol gha mwẹ amusẹ, u vbe yayi wẹẹ, izọese adẹwerriegbe ọghe Jesu gha sẹtin miẹn ruẹ fan vbe obọ orukhọ kevbe uwu. Rhunmwuda ne orukhọ ne u ru vbe ẹghẹ nọ gberra na da ruẹ sẹ ugboloko, u keghi rinmwian e Jehova nọ yabọ ruẹ. Nia, u ro iro fi uyinmwẹ werriẹ nẹ, te u ghi vbe hia ne u gha ru emwi ni yẹẹ Osanobua. (Iwinna 3:19) Te ọ ghi vbe gbe ruẹ otiti ne u tama emwa ọvbehe emwi ne u yayi. Te uwẹ ghi vbe deba etẹn ni rre uwu iko kporhu zẹvbe ọtẹn nọ ya iyẹn wewe. (Mat 24:14) Te Jehova wa ya ruẹ hio rhunmwuda owẹ ne u zẹ na. Erriọ ẹko ẹre vbe ya sọyẹnmwẹ.—Itan 27:11.

18. De emwi eso nọ ye khẹke ne u ru, u ke dinmwiamẹ?

¹⁸ Vbene u te dinmwiamẹ, ọ ye mwẹ emwi eso nọ khẹke ne u ru. Zẹvbe ne ima ka tae sin, te ọ khẹke ne u ya egbuẹ fiohan ne Osanobua. U gha khian ru ọna, u ghi ya ekhọe hia na erhunmwu gie ẹre, u ghi tama rẹn wẹẹ, u muegbe ne u khian ya ya ẹdagbọn ruẹ gae. (1 Pit 4:2) Vbe iyeke ọni, u ghi gi ọsiemwiẹnro ọghe ẹbu ediọn nọ rre iko ruẹ rẹn wẹẹ, u hoo ne u dinmwiamẹ. Ọ ghi ru emwamwa ne ediọn eso gu ruẹ ziro. Ghẹ gi ohan  ediọn na gha mu ruẹ, rhunmwuda, iran hoẹmwẹ ruẹ. Te iran khian gu ruẹ ziro yan emwi eso ne u ka ruẹ nẹ vbe Baibol. Iran hoo na miẹn wẹẹ, u gele rẹn ototọ emwi na maa ruẹ re kevbe wẹẹ, u rẹn vbene a ya egbe fiohan kevbe idinmwiamẹ ru ekpataki sẹ hẹ. Iran gha bẹghe ẹre wẹẹ, u gele sẹ nọ gha dinmwiamẹ, iran ghi tama ruẹ wẹẹ u gha sẹtin dinmwiamẹ vbe asikoko nọ dee.

19-20. Vbọ khẹke ne u ru, vbe u gha dinmwiamẹ nẹ? De vbene u khian ya ru ọna hẹ?

¹⁹ Vbọ khẹke ne u ru, vbe u gha dinmwiamẹ nẹ? * Ghẹ mianmian wẹẹ eyan ne u ru vbe ẹdẹ ne u ya egbe fiohan gie Jehova i re eyan na ya rhẹghẹrẹ, e Jehova hoo ne u mu eyan nii sẹ. Nọnaghiyerriọ, u gha dinmwiamẹ nẹ, hia ne u mu eyan nii sẹ. De vbene u khian ya ru ọna hẹ?

²⁰ Ye gha gu etẹn ni rre uwu iko muobọ. U gha dinmwiamẹ nẹ, u ghi do deba etẹn nikpia kevbe etẹn nikhuo ni koko ga e Jehova vbe uhunmwu otagbọn hia. (1 Pit 2:17) Etẹn ni rre uwu iko ghi do yevbe ẹgbẹe ruẹ. U ghaa yo iko vbe ẹghẹ hia, uwẹ vbe iran ghi do gha gu obọ egbe sayọ. Gha tie Ẹmwẹ Osanobua vbe ẹdẹgbegbe, u ghi vbe gha ru erria yan rẹn. (Psm 1:1, 2) U gha tie ako eso vbe Baibol nẹ, u ghi zẹ ẹghẹ kọ ne u ya mu emwi ne u tiere roro nọ mieke na sẹ ruẹ ekhọe. U ghi vbe gha “na erhunmwu” vbe ẹghẹ hia. (Mat 26:41) U na gha ya ekhọe hia na erhunmwu gie Jehova, ọ gha ya ruẹ sikẹ ọre sayọ. Gha mu Arriọba Osanobua ye okaro vbe arrọọ ruẹ. (Mat 6:33) U gha sẹtin ru ọna deghẹ u na rhiegba ye iwinna ikporhu iyẹn nọ maan. U ghaa kporhu iyẹn nọ maan vbe ẹghẹ hia, ọ gha ya amuẹtinyan ruẹ wegbe sayọ, u ghi vbe sẹtin ru iyobọ ne emwa ọvbehe ya la odẹ nọ su rrie arrọọ ọghe etẹbitẹ.—1 Tim 4:16.

21. De vbene idinmwiamẹ khian ya ru iyobọ nuẹn hẹ?

²¹ Azẹ nọ ghi ru ekpataki sẹ ne u gha sẹtin ru vbe arrọọ ruẹ, ọre ne u ya egbe fiohan ne Jehova kevbe ne u dinmwiamẹ. Vbene ẹmwata, ne u mieke na sẹtin ru ọna, te u gha muegbe ne u ya rri oya nọ lelẹe khian kevbe ne u ya sẹ emwi eso ni te yẹẹ ruẹ rae. Ọrheyerriọ, afiangbe ne u gha miẹn, sẹ emwi hia ne u khian sẹ rae. Ọlọghọmwa ne u rhirhi werriẹ aro daa vbe agbọn Esu na keghi re nọ ye “kherhe” kevbe “nọ rhie gberra khian.” (2 Kọr 4:17) Sokpan, u gha dinmwiamẹ, u ghi gha mwẹ oghọghọ vbe arrọọ ruẹ, ẹkpotọ ghi vbe kie nuẹn ya gha mwẹ “arrọọ ọghe ẹmwata” vbe odaro. (1 Tim 6:19) Nọnaghiyerriọ, ọ khẹke ne u kakabọ muẹn roro, u ghi vbe muẹn ye erhunmwu ne u mieke na rẹn, deghẹ u gele muegbe nẹ, ne u khian ya dinmwiamẹ.