1. Aha do na porlu ibahen sasada halak paima pajongjongkon rumah?

BAYANGKON ma dong sasahalak na sihol pajongjongkon sada rumah. Domma itontuhon ia rumah na sonaha do na laho ipajongjong. Tapi ai boi do ia mintor laho hu panglong mamboli barang ampa ugas-ugasni? Lang. Maningon ietong ia do lobei sadiha bahat duit na porlu hujai. Mase? Ase ibotoh ia ai sungkup do duitni atap lang. Anggo domma ibahen ia sonai, ujungni boi ma ia pajongjongkon rumah.

2. Domu bani Lukas 14:27-30, aha do na maningon ipingkirhon sasahalak paima ia ididi?

² Halani mangkaholongi Jahowa ampa mangkargai pambahenan-Ni do na mambahen ham sihol ididi? Anggo sonai, dos songon dalahi na pajongjong rumah, dong do homa na maningon ibahen ham. Mase sonai? Paruhurhon ma na ihatahon Jesus bani Lukas 14:27-30. (Basa.) Sanggah ai, Jesus sihol patorangkon aha do artini gabe susianni. Jadi anggo sihol hita mangirikkonsi, maningon ra do hita manaron hasunsahan ampa mambahen pengorbanan. (Luk. 9:23-26; 12:51-53) Halani ai, paima ididi ham anget ma pingkiri ai. Hasilni, dob ididi ham marusaha do ham ase boi totap setia mangidangi Naibata.

3. Aha do na laho iulas hita bani artikel on?

³ Ai maningon manaron hasunsahan janah mambahen pengorbanan do ase boi sasahalak ididi? Eak. Halani dobkonsi ididi, bahat do dapotsi pasu-pasu, age sonari ampa bani ari simagira. Ulas hita ma sungkun-sungkun na porlu ibotoh sasahalak na sihol ididi. Dob iulas hita ai, ibotoh ham ma holi balos ni sungkun-sungkun on, “Ai domma sirsir ahu ididi?”

4. (a) Aha do artini mangondoskon diri? (b) Songon na ipatugah bani Mateus 16:24, aha do artini iparnalang hita dirinta?

⁴ Aha do artini mangondoskon diri? Paima ididi, maningon mangondoskon diri do lobei ham hubani Jahowa marhitei tonggo. Humbani gok ni uhur, patugah ma hu Bani anggo ham sihol mangidangi-Si sadokah goluhmu. Sanggah ibahen ham sonai, artini domma iparnalang ham dirimu. Jesus mangkatahon bani susianni, “Barang ise na sihol mangihutkon ahu, maningon iparnalang ma dirini, iporsan ma tiang siksaanni, janah tongtong ma ihutkon ahu.” (Mat. 16:24, Terjemahan Dunia Baru) Jadi humbani ari ai, mangidangi Jahowa do na sipontingan bamu, sedo dirimu sandiri. Tontu sada hasangapon do ai. (Rom 14:8) Anggo domma mangondoskon diri ham, dos do ai ibahen ham janji na ponting bani Naibata. Hassi pe lang ipaksa Jahowa ham mambahen sisonai, tapi malas do uhur-Ni anggo itopati ham janjimu ai.​—Ps. 116:12, 14.

5. Aha do kaitanni mangondoskon diri bani Naibata pakon ididi?

⁵ Aha do kaitanni mangondoskon diri bani Naibata pakon ididi? Sanggah mangondoskon diri ham, pitah Jahowa do na mambotoh ai. Tapi sanggah ididi ham, bahat do halak na mangidah ai halani somalni bani kebaktian do adong pandidion. Gabe ibotoh sidea ma anggo ham domma mangondoskon diri bani Jahowa. * Ibotoh sidea ma homa anggo ham mangkaholongi Jahowa humbani gok ni uhur, gogoh, pingkiran, ampa hosahmu. Janah domma iputuskon ham laho mangidangi Jahowa sadokah goluhmu.​—Mrk. 12:30.

6-7. Domu bani 1 Petrus 3:18-22, aha do dua alasan na mambahen pandidion ai ponting?

⁶ Ai maningon ididi do hita? Pardiateihon ma na ihatahon bani 1 Petrus 3:18-22. (Basa.) Sapari, humbani parau na ipajongjong si Noak gabe ibotoh halak ma anggo ia porsaya bani Naibata. Sonai ma homa pandidion in. Sanggah ididi ham, gabe ibotoh halak ma anggo ham domma mangondoskon diri bani Jahowa. Tapi mase maningon ididi? Dong dua alasan na ipatugah apostel Petrus. Na parlobei, ai boi “paluahkon nasiam”. Hita boi maluah halani marhitei pandidion domma ipatuduh hita anggo hita porsaya bani Jesus, ia matei laho manobus hita, ia domma ipapuho hu surga, janah sonari “i siamun ni Naibata” do ia.

⁷ Na paduahon, anggo ididi hita gabe ‘borsih ma panggora ni uhurta’. Sanggah hita mangondoskon diri bani Jahowa janah ididi, gabe lambin orot ma parhasomananta pakon-Si. Halani domma mambahen hamubahon janah porsaya bani tobusan, gabe isasap Naibata ma dousanta. On ma na mambahen borsih panggora ni uhurta.

8. Mase ham sihol ididi?

⁸ Mase ham sihol ididi? Sanggah marlajar Bibel ham, tontu bahat do na ibotoh ham pasal Jahowa, paruhuran-Ni, ampa dalan-Ni. Ganupan ai mambahen ham lambin mangkaholongi Jahowa. On ma namin na gabe alasan na sipontingan na mambahen ham sihol ididi.

9. Songon na ipatugah bani Mateus 28:19, 20, aha do artini ididi hubagas goran ni Bapa, Anak, ampa tonduy na pansing?

⁹ Alasan na legan ai ma domma ibotoh ham hasintongan ni Bibel janah ihaporsayai ham do ai. Pardiateihon ma na ihatahon Jesus sanggah iparentahkon ia susianni laho mangurupi halak na legan ase gabe susianni homa. (Basa Mateus 28:19, 20.) Domu bani  na ihatahon Jesus, maningon ididi do sidea “hubagas goran ni Bapa, Anak, ampa tonduy na pansing”. Aha do artini ai? Humbani gok ni uhurmu maningon porsaya do ham bani ajaran ni Bibel pasal Jahowa, Jesus, ampa tonduy na pansing. Dob mambotoh ganupan ai, gabe malas tumang ma uhurmu. (Heb. 4:12) Ulas hita ma otik pasal ajaran ai.

10-11. Hasintongan aha do na iparlajari ampa na ihaporsayai ham pasal Jahowa?

¹⁰ Dingat ma use hasintongan na dob iparlajari ham pasal Naibata. “Jahowa” do goran-Ni, Ia do “Na Tang Sitimbulan i sab tanoh on”, anjaha sahalak-Si do “Naibata na sintong”. (Ps. 83:19; Jer. 10:10) Ia do Sitompa hita janah humbani “Jahowa do haluahon”. (Ps. 3:9; 36:10) Ipasirsir Ia do dalan hubanta ase boi maluah humbani dousa ampa hamatean. Janah ibere do pangarapan ase boi hita manggoluh sadokah ni dokahni. (Joh. 17:3) Sanggah mangondoskon diri ham bani Jahowa, on patuduhkon anggo ham sahalak Saksi Jahowa. (Jes. 43:10-12) Gabe sada kaluarga ma ham pakon ganup juakjuak-Ni i sab tanoh on. Megah do uhurta isobut gabe Saksi Jahowa janah ipatugah hita do ai bani halak na legan.​—Ps. 86:12.

¹¹ Tontu sada hasangapon na banggal do boi mambotoh hasintongan ni Bibel pasal Bapanta in. Halani porsaya ham bani hasintongan ai, gabe tarojur ma uhurmu laho mangondoskon diri bani Jahowa anjaha ididi.

12-13. Hasintongan aha do na iparlajari ampa na ihaporsayai ham pasal Jesus?

¹² Sonaha pangahapmu dobkonsi mambotoh hasintongan pasal Anak in? Dobkonsi Jahowa, Jesus do na sigijangan humbani sagala na adong. Ibere ia do hagoluhanni laho manobus hita. Ipatuduh hita do marhitei parlahounta anggo hita porsaya bani tobusan. Hasilni, gabe isasap ma dousanta, boi ma hita marhasoman pakon Naibata, janah mandapot hagoluhan sadokah ni dokahni. (Joh. 3:16) Jesus do Sintua ni Malimta. Sai iurupi ia do hita ase boi mandapot guna humbani tobusan, janah boi lambin orot bani Naibata. (Heb. 4:15; 7:24, 25) Halani ia do Raja bani Harajaon ni Naibata, igunahon Jahowa ma ia laho papansingkon goran-Ni, manasap hajahaton, ampa mambere pasu-pasu i Paradeiso. (Mat. 6:9, 10; Pangk. 11:15) Jesus do siusihan hubanta. (1 Ptr. 2:21) Sadokah goluhni, ihorjahon ia do harosuh ni Naibata ase boi homa hita mangkorjahon na sisonai.​—Joh. 4:34.

¹³ Halani porsaya ham bani hasintongan ai, gabe holong ma uhurmu bani Jesus. Gabe tarojur ma ham mangkorjahon harosuh ni Naibata songon na dob ibahen Jesus. Hasilni gabe sihol ma ham mangondoskon diri bani Jahowa janah ididi.

14-15. Hasintongan aha do na iparlajari ampa na ihaporsayai ham pasal tonduy na pansing?

¹⁴ Sonaha pandapotmu sanggah marlajar pasal tonduy na pansing? Sedo Naibata ai, tapi hagogohon atap kuasa ni Naibata do ai. Igunahon Jahowa do tonduy-Ni laho manogu-nogu panurat ni Bibel. Sanggah mambasa Bibel, iurupi tonduy na pansing do hita ase boi mangarusi isini janah mandalankon podahni ibagas goluhta. (Joh. 14:26; 2 Ptr. 1:21) Marhitei tonduy na pansing, ibere Jahowa do hubanta “hagogohon na sumurung”. (2 Kor. 4:7) Ipargogohi tonduy na pansing do hita laho marbarita janah totap mangkorjahon na sintong. Iurupi do hita sanggah maretek ni uhur anjaha totap toguh hassi pe bahat sitaronon. Iurupi do homa hita patuduhkon “buah ni tonduy”. (Gal. 5:22) Ibere Naibata do tonduy-Ni hubani ise pe na mangindo hu Bani.​—Luk. 11:13.

¹⁵ Tontu gabe ipatoguh ma uhurta halani  mambotoh iurupi tonduy na pansing do ganup juakjuak ni Naibata laho mangidangi-Si. Halani ai, gabe tarojur ma ham laho mangondoskon diri bani Naibata anjaha ididi.

16. Aha ma na dob iulas hita?

¹⁶ Jadi ponting tumang do ibahen ham haputusan laho mangondoskon diri bani Naibata anjaha ididi. Tapi, songon na dob iulas hita nongkan ai, maningon ra do homa ham manaron hasunsahan ampa mambahen pengorbanan. Hassi pe sonai, banggalan do holi pasu-pasu na laho ijalo ham marimbangkon pengorbanan na ibahen ham. Marhitei pandidion, boi ma ham ipaluah janah gabe borsih ma panggora ni uhurmu. Humbani gok ni uhurmu, maningon porsaya ma ham bani hasintongan na dob iparlajari ham pasal Bapa, Anak, ampa tonduy na pansing. Dob iulas hita ganupan ai, aha ma balosmu bani sungkun-sungkun on, “Ai domma sirsir ahu ididi?”

17. Aha do na porlu ibahen sasada halak paima ia ididi?

¹⁷ Anggo pangahapmu domma sirsir ham ididi, tontu domma bahat na ibahen ham ase boi marhasoman pakon Jahowa. * Halani tongtong iparlajari ham Bibel, gabe itanda ham ma Jahowa pakon Jesus, janah porsaya do ham bani sidea. (Heb. 11:6) Porsaya do homa ham bani ganup janji ni Naibata. Janah marhitei tobusan pos do uhurmu anggo ham boi maluah humbani dousa ampa hamatean. Domma ibahen ham hamubahon ni uhur, artini isolsoli ham do hasalahan na ongga ibahen ham, janah domma ipindo ham ase isasap Naibata hasalahanmu ai. Domma mulak ham, artini itadingkon ham do parlahou na masambor, janah marusaha do ham mangkorjahon harosuh ni Naibata. (Lah. 3:19) Ringgas do homa ham mansaritahon aha na iparlajari ham hubani halak na legan. Sonari domma dihut ham marbarita pakon sanina botou i kuria. (Mat. 24:14) Tontu megah anjaha malas do uhur ni Jahowa halani domma ihorjahon ham ganupan ai.​—Pod. 27:11.

18. Aha ope na porlu ibahen ham paima ididi?

¹⁸ Paima ididi, dong ope na porlu ibahen ham. Songon na dob iulas hita nongkan ai, maningon mangondoskon diri do ham bani Jahowa. Martonggo ma sahalakmu, janah humbani gok ni uhur patugah ma anggo ham sihol mangkorjahon harosuh-Ni. (1 Ptr. 4:2) Dob ai, patugah ma bani koordinator badan penatua anggo ham sihol ididi. Holi iatur ia ma panorangni pakon sintua na legan ase boi pajumpah pakon ham. Ulang mabiar ham pajumpah pakon sidea. Dingat ma, domma itanda sintua ai ham, janah holong do uhur ni sidea bamu. Holi iulas sidea ma ajaran dasar hun Bibel na dob iparlajari ham sadokah on. Sidea sihol mamastihon anggo ham domma mangarusi ajaran ai janah domma mambotoh mase ponting sasada halak mangondoskon  diri anjaha ididi. Anggo iahap sidea domma sosok ham ididi, ipatugah sidea ma holi anggo ham boi ididi bani kebaktian na laho roh.

19-20. Aha use na porlu bahenonmu dobkonsi ididi, janah sonaha carani?

¹⁹ Dob ididi ham, aha use na porlu bahenonmu? * Dingat ma sanggah ham mangondoskon diri, dos do ai ham domma marjanji bani Jahowa. Janah Ia sihol ase itopati ham janji ai. Jadi dob ididi ham, maningon idalankon ham ma janji ai sadokah goluhmu. Sonaha carani?

²⁰ Totap ma orot pakon sanina botou i kuria. Dob ididi, gabe “hasoman” ni ganup sanina botou ma ham. (1 Ptr. 2:17) Usih songon kaluargamu do sidea. Anggo tongtong roh ham hu partumpuan, lambin orot ma parhasomananmu pakon sidea. Dob ai, bai ganup ari basa anjaha rimangi ma isi ni Bibel. (Ps. 1:1, 2) Dob ibasa ham piga-piga ayat, gunahon ma panorang laho mamparimbagaskon ai ase hona bai uhurmu. ‘Totap ma martonggo.’ (1 Tes. 5:17) Tonggo humbani gok ni uhur boi mambahen ham lambin dohor bani Jahowa. “Parlobei ma pindahi . . . Harajaon ni Naibata.” (Mat. 6:33) Bahen ma ai na sipontingan ibagas goluhmu. Anggo tongtong ham marbarita, tontu lambin toguh ma haporsayaonmu. Dob ai, gabe boi ma iurupi ham halak na legan mandapot hagoluhan sadokah ni dokahni.​—1 Tim. 4:16.

21. Pasu-pasu aha ma na dapotmu dobkonsi ididi?

²¹ Sanggah mangondoskon diri ham bani Jahowa anjaha ididi, ai do haputusan na sidearan na ongga ibahen ham. Tongon sanggah mambahen haputusan ai ham, maningon ra do ham manaron hasunsahan. Tapi hasunsahan aha pe na iahapkon ham, pitah ‘sonari anjaha hampung do ai porsanon’. (2 Kor. 4:17) Hape dob ididi ham lambin martuah do goluhmu sonari. Anjaha bani ari simagira, dapotmu ma “goluh na sintong”. (1 Tim. 6:19) Halani ai, tonggohon ma janah anget ma pingkiri aha do balosmu bani sungkun-sungkun on, “Ai domma sirsir ahu ididi?”