1. Weh wahn persn shuda du bifoa dehn staat tu bil wahn hows?

IMAJIN dat wahn persn disaid fi bil wahn hows. Ih don noa weh kaina hows ih waahn bil. Yu tink ih shuda goh ahn bai som a di ting dehn weh ih need rait away ahn staat tu bil? No. Bifoa ih du dat, dehn ga sohnting els weh ih need fi du. Ih need fi kalkyulayt humoch di hows wahn kaas ahn. Wai? Bikaaz ih need fi noa if ih ga inof moni fi finish di hows. If ih tek ih taim ahn kalkyulayt di kaas bifoa ih staat tu bil, ih wahn moa stan di chaans fi finish di hows.

2. Akaadn tu Look 14:27-30, weh yu shuda tek yu taim fi tink bowt bifoa yu geh baptaiz?

² Yoo di tink bowt geh baptaiz? Weh kaaz yoo fi waahn geh baptaiz? Yu tink da bikaaz yu lov Jehoava ahn yu tankful fi aal weh ih du fi yu? If yu di tink bowt geh baptaiz yu need fi mek wahn disizhan jos laik di man weh waahn bil wahn hows. Wai wi seh dat? Noatis Jeezas werdz da Look 14:27-30. (Reed.) Jeezas mi-di taak bowt weh ih meen fi bee wahn disaipl. Fi bee wahn disaipl, wi need fi bee wilin fi aksep “humoch ih wahn kaas.” Dat meenz wi wahn fays chalenjiz ahn wi wahn haftu sakrifais sertn tingz. (Look 9:23-26; 12:51-53) Soh bifoa yu geh baptaiz, yu need fi reeli tink bowt weh aal yu gwehn chroo if yu kohn fi bee wahn disaipl a Krais. Den yu wahn bee moa pripyaa fi stay faytful eena yu servis tu Gaad az wahn baptaiz Kristyan.

3. Weh wi wahn diskos eena dis aatikl?

³ Yu tink ih wert di haad taimz yu wahn haftu goh chroo ahn di tingz yu wahn haftu giv op fi bee wahn baptaiz disaipl a Krais? Af koars ih wert it! Sombadi weh  geh baptaiz wahn geh wahn lata blesinz now an eena di fyoocha. Mek wi diskos sohn impoatant kweschanz bowt baptizm. Yu ansaz tu dehnya kweschanz wahn help yu fi figa owt if yu redi fi geh baptaiz er nat.

4. (a) Wat da dedikayshan? (b) Laik weh menshan da Machyu 16:24, weh ih meen fi “stap goh afta weh unu waahn fi fi unu oanself”?

⁴ Wat da dedikayshan? Bifoa yu ku geh baptaiz, yu haftu mek wahn dedikayshan tu Jehoava. Wen yu dedikayt yuself tu Jehoava, yu pray tu ahn fahn yu haat ahn tel ahn dat yu waahn yooz yu laif fi serv ahn fareva. Wen yu dedikayt yuself tu Gaad, yu stap goh afta weh yoo waahn fi yu oanself. (Reed Machyu 16:24.) Now, yu bilangz tu Jehoava. Dat da wahn grayt privilij! (Roam. 14:8) Yu tel Jehoava dat fahn now aan, di moas impoatant ting fi yoo wahn bee fi serv hihn, noh fi pleez yuself. Dedikayshan da wahn seeryos pramis weh yu mek tu Jehoava. Jehoava noh foas wi fi mek da pramis. Bot wen wi doo mek da pramis, hihn ekspek wi fi kip it.—Ps. 116:12, 14.

5. Wat da di difrens bitween yu dedikayshan ahn yu baptizm?

⁵ Wat da di difrens bitween yu dedikayshan ahn yu baptizm? Wen yu dedikayt yuself tu Jehoava, nobadi els noa eksep yoo ahn Jehoava. Bot wen yu geh baptaiz, ih naamali tek plays fronta ada peepl, yoozhwali da wahn asembli er da wahn kanvenshan. Wen yu geh baptaiz, yu shoa adaz dat yu don dedikayt yuself tu Jehoava. * Soh yu baptizm mek adaz noa dat yu lov Jehoava yu Gaad wid yu hoal haat, wid yu hoal soal, wid yu hoal main, ahn wid yu hoal schrent, ahn dat yu mek op yu main fi serv ahn fareva.—Maak 12:30.

6-7. Akaadn tu 1 Peeta 3:21, wat da too reezn wai wi need fi geh baptaiz?

⁶ Ih reeli nesiseri fi mek wi geh baptaiz? Di aak mi shoa peepl dat Noawa mi ga fayt eena Gaad. Sayhn way soh, yu baptizm shoa peepl dat yu don dedikayt yuself tu Jehoava. (1 Peeta 3:18-20) Bot yu tink baptizm reeli nesiseri? Yes ih nesiseri. Peeta mi koment pahn di reezn wai. (Reed 1 Peeta 3:21, NW.) * Fers, ih di “sayv unu.” Baptizm ku sayv wi if wi shoa bai wi akshanz dat wi ga fayt eena Jeezas ahn bileev dat hihn ded fi wi, dat ih mi geh rezorek tu hevn, ahn dat now ih “di sidong pahn di rait han said a Gaad.”—1 Peeta 3:22

⁷ Sekant, if wi baptaiz wi geh “wahn gud kanshans.” Wen wi dedikayt wiself tu Gaad ahn geh baptaiz, wi staat tu ga wahn speshal rilayshanship wid ahn. Bikaaz wi reeli ripentant ahn wi ga fayt eena di ransom, Gaad fergiv wi a wi sin dehn. Soh wi ku ga wahn gud kanshans fronta hihn.

8. Weh shuda bee fi yoo reezn fi geh baptaiz?

⁸ Weh shuda bee fi yoo reezn fi geh baptaiz? Bikaaz yu kyaafuli stodi di Baibl, yu laan bowt Jehoava, weh hihn stan laik, ahn how hihn du tingz. Weh yu laan bowt hihn mi toch yu haat ahn mek yu staat tu lov ahn moa ahn moa. Yu lov fi Jehoava fi bee di moas impoatant reezn wai yu disaid fi geh baptaiz.

9. Weh ih meen fi geh baptaiz eena di naym a di Faada, di Son, ahn di hoali spirit, laik weh Machyu 28:19, 20 menshan?

 ⁹ Wahn nada reezn wai yu disaid fi geh baptaiz da dat yu laan weh di Baibl teech ahn now yu bileev weh ih seh. Kansida weh Jeezas mi seh wen ih mi gi di koman fi goh ahn chrayn peepl fi bee ih disaiplz. (Reed Machyu 28:19, 20.) Akaadn tu Jeezas, di wan dehn weh geh baptaiz need fi geh baptaiz ‘eena di naym a di Faada, di Son, ahn di hoali spirit.’ Weh dat meen? Ih meen dat yu mos bileev di chroot fahn di Baibl bowt Jehoava; ih Son, Jeezas; ahn di hoali spirit wid aala yu haat. Dehnya chroot powaful ahn dehn ku moov wi tu akshan. (Heeb. 4:12) Mek wi diskos som a dehn.

10-11. Wat da sohn Baibl teechin weh yu mi laan an aksep bowt di Faada?

¹⁰ Tink bak tu wen yu mi fers laan dehnya chroot bowt di Faada: Ih “naym da Jehoava,” hihn da “di Moas Hai oava aal di ert,” ahn hihn da “di onli chroo Gaad.” (Ps. 83:18; Isa. 37:16) Hihn da wi Kriyayta, ahn “salvayshan bilangz tu Jehoava.” (Ps. 3:8; 36:9) Hihn mek araynjment fi sayv wi fahn sin ahn det, an ih gi wi di hoap fi liv fareva. (Jan 17:3) Yu dedikayshan ahn baptizm wahn shoa dat yoo da wan a Jehoava Witnisiz. (Isa. 43:10-12) Yu wahn bee paat a wahn big spirichwal famili weh prowd fi bayr Gaad naym ahn fi mek adaz noa da naym.—Ps. 86:12.

¹¹ Da wahn grayt aana fi andastan weh di Baibl teech wi bowt di Faada! Wen yu kohn fi bileev dehnya Baibl teechinz, yu haat wahn moov yu fi dedikayt yuself tu Jehoava ahn geh baptaiz.

12-13. Wat da sohn chroot bowt di Son weh yoo mi laan an aksep?

¹² How yoo mi feel wen yu laan dehnya chroot bowt di Son? Jeezas da di sekant moas impoatant persn eena di yoonivers. Hihn mi wilin fi giv op ih laif az wahn ransom fi wi. Wen wi shoa bai wi akshanz dat wi ga fayt eena di ransom, wi ku geh fergivnis fi wi sin dehn, wi ku ga wahn rilayshanship wid Gaad, ahn wi ku liv fareva. (Jan 3:16) Jeezas da wi Hai Prees. Hihn waahn help wi fi benifit fahn di ransom ahn help wi fi ga wahn kloas rilayshanship wid Gaad. (Heeb. 4:15; 7:24, 25) Bikaaz hihn da di King a Gaad Kingdom, Jehoava wahn yooz ahn fi sangtifai fi Hihn naym, fi bring wahn en tu wikidnis, ahn fi bring evalastin blesinz eena di Paradais weh wahn kohn. (Mach. 6:9, 10; Rev. 11:15) Jeezas da di egzampl weh wi fi fala. (1 Peet. 2:21) Hihn yooz ih laif fi du weh Gaad waahn, an eena da way ih set wahn egzampl fi wi tu.—Jan 4:34.

¹³ Wen yu aksep weh di Baibl teech bowt Jeezas, yu wahn kohn fi lov Gaad Son. Da lov moov wi fi yooz wi laif fi du weh Jehoava waahn wi du, jos laik how Jeezas mi du. Dat da weh kaaz yu fi feel laik yu need fi dedikayt yu laif tu Jehoava ahn geh baptaiz.

14-15. Wat da sohn Baibl teechinz bowt di hoali spirit weh yu mi laan an aksep?

¹⁴ Weh yoo mi tink wen yu mi laan dehnya chroot bowt di hoali spirit? Ih da noh wahn persn, bot da Gaad powaful enerji. Jehoava yooz di hoali spirit fi dairek di man dehn weh rait di Baibl fi mek dehn noa weh fi rait een deh. Jehoava aalso yooz ih hoali spirit fi help wi fi andastan weh wi reed eena di Baibl ahn fi yooz weh wi laan eena wi laif. (Jan 14:26; 2 Peet. 1:21) Jehoava gi wi “di reel grayt powa” chroo ih hoali spirit. (2 Kor. 4:7) Di spirit gi wi di schrent fi preech di gud nyooz,  fait temtayshan, deel wid diskorijment, ahn bayr op anda chraiyalz. Ih help wi fi shoa di byootiful kwalitiz weh mek op di froot weh di spirit bayr. (Gal. 5:22) Gaad hapi fi giv ih hoali spirit tu enibadi weh aks ahn far it ahn weh chros eena hihn.—Look 11:13.

¹⁵ Ih soh komfertin fi noa dat Jehoava servants ku pen pahn di hoali spirit fi help dehn fi serv Gaad! Wen yu aksep di chroot weh yu laan bowt di hoali spirit, yu wahn waahn dedikayt yu laif tu Gaad ahn geh baptaiz.

16. Weh wi laan soh faar eena wi diskoshan?

¹⁶ Yu disizhan fi dedikayt yuself tu Gaad ahn geh baptaiz veri impoatant. Az wi mi laan, yu need fi bee wilin fi aksep di kaas. Dat meenz yu wahn fays chalenjiz ahn yu wahn haftu sakrifais sertn tingz. Bot di blesinz weh yu wahn get faar grayta dan di sakrifais dehn weh yu wahn mek. Baptizm ku sayv yu, an ih ku alow yu fi ga wahn gud kanshans fronta Gaad. Lov fi Jehoava Gaad need fi bee di mayn reezn wai yu disaid fi geh baptaiz. Yu need fi aalso bileev di chroot weh yu laan bowt di Faada, di Son, ahn di hoali spirit wid aala yu haat. Afta yu tink bowt weh wi don diskos soh faar, how yoo wuda ansa dis kweschan: “Ai redi fi geh baptaiz?”

17. Wat da som a di tingz weh sombadi need fi du bifoa dehn geh baptaiz?

¹⁷ If yu feel laik yu redi fi geh baptaiz, yu praabli don du wahn lata tingz fi bil wahn gud rilayshanship wid Jehoava. * Bikaaz a yu regyula stodi a di Baibl yu geh fi noa wahn lat bowt Jehoava ahn Jeezas. Yu ga fayt. (Heeb. 11:6) Yu kompleetli chros eena Jehoava pramis dehn weh deh eena di Baibl, ahn yu bileev dat Jeezas sakrifais ku sayv yu fahn sin ahn det. Yu feel reeli sari fi di sin dehn weh yu komit ahn yu don aks Jehoava fi fergiv yu. Yu rijek di bad way how yu yoostu liv ahn yu staat tu liv eena wahn way weh pleez Gaad. (Aks 3:19) Yu eega fi tel adaz bowt weh yu bileev. Yu kwalifai fi bee wahn poblisha ahn yu don staat goh preech wid di kangrigayshan. (Mach. 24:14) If yu du dehnya nesiseri tingz, yu mek Jehoava reeli hapi, an ih prowd a yu.—Prov. 27:11.

18. Wat els wi need fi du bifoa wi ku geh baptaiz?

¹⁸ Bifoa yu ku geh baptaiz, wahn fyoo moa tingz deh weh yu need fi du. Az wi laan erliya, yu need fi dedikayt yuself tu Gaad. Pray tu ahn fahn yu haat wen yu deh bai yuself, ahn pramis ahn dat yu wahn yooz yu laif fi du weh hihn waahn. (1 Peet. 4:2) Den mek di koardinayta a di badi a eldaz noa dat yu waahn  geh baptaiz. Hihn wahn aks sohn eldaz fi meet wid yu. Noh frayd fi meet wid dehn. Memba dat dehnya bradaz kain, ahn dehn don noa yu ahn dehn lov yu. Dehn gwehn oava wid yu sohn baysik Baibl teechinz weh yu mi don laan. Dehn waahn mek shoar dat yu andastan dehndeh teechin ahn dat yu noa how impoatant dedikayshan ahn baptizm. If dehn agree dat yu kwalifai, dehn wahn mek yu noa dat yu ku geh baptaiz da di neks asembli er kanvenshan.

19-20. Weh yu wahn need fi du afta yu geh baptaiz, ahn how yu ku du dat?

¹⁹ Afta yu geh baptaiz, weh yu wahn need fi du? * Memba dat dedikayshan da wahn pramis ahn dat Jehoava ekspek yu fi kip da pramis. Soh afta yu geh baptaiz, yu haftu liv op tu yu dedikayshan. How yu ku du dat?

²⁰ Kip kloas tu yu kangrigayshan. Az wahn baptaiz Kristyan, now yu da paat a wi big spirichwal famili weh inklood aala di bradaz ahn sistaz eena di kangrigayshan. (1 Peet. 2:17) If yu goh da di meetinz regyula, yu frenship wid dehn wahn geh schranga. Reed ahn meditayt pahn Gaad Werd evri day. (Ps. 1:1, 2) Afta yu reed wahn paat a di Baibl, tek yu taim ahn tink bowt weh yu reed. Den di werdz wahn reech yu haat. Neva stap pray. (Mach. 26:41) Wen yu pray fahn yu haat ih wahn help yu fi jraa kloasa tu Jehoava. “Weh unu fi aym fa fos, da fi bee paat a di kingdom a hevn.” (Mach. 6:33) Yu ku du dat if yu mek di preechin werk di moas impoatant ting eena yu laif. Wen yu goh preech regyula, yu wahn kip yu fayt schrang, ahn yu mait help adaz fi get pahn di road weh leed tu evalastin laif.—1 Tim. 4:16.

21. Weh yu baptizm wahn alow yu fi ga?

²¹ Di disizhan fi dedikayt yu laif tu Jehoava ahn geh baptaiz da di moas impoatant disizhan weh yu wahn eva mek. Da chroo, ih wahn kaas yu sohnting. Bot ih wert it! Eni prablemz weh yu mait fays eena dis werl “da noh notn” ahn da onli fi wahn “shaat taim.” (2 Kor. 4:17) Bot yu baptizm wahn alow yu fi ga wahn beta laif now ahn di “chroo chroo laif” weh wahn soon kohn. (1 Tim. 6:19) Soh pleez, tink reeli gud ahn pray bowt yu ansa tu dis kweschan: “Ai redi fi geh baptaiz?”