1. Ka lunbei ladügüni aban gürigia lubaragiñe lagumeserun ábunaguagüda aban muna?

SAMINA humá busén lan aban wügüri lábunagun aban muna ani subudi laali ida liña lan labusenrúnu. Lídiba funa san lau lóufudagun agañeihei tumegegun muna lun lagumeseruni ábunaguni? Uá. Lubaragiñe lagumeserun anihein aban katei súdiniti le lunbei ladügüni: lañuurun asaminara átiribei lan lagastarun lidan tábunawagun muna. Ka uagu? Ladüga mégeiti lan lachoururuni anhein lóustaruba lubéi seinsu lun tabunún. Ítararügübei gayara lan libihin tabunún.

2. Según Lúkasi 14:28-30, kaba uagu hañuura asaminara lubaragiñe habadiseirun?

² Wéiriti san ínsiñeni luma eteingiruni le hasandirubei luagu Heowá darí lun hasaminaruña lan lun habadiseirun? Anhein ítara liña lubéi, genegeguati hikesi luma wügüri le busenbei lábunaguagüdün aban muna. Ka uagu wariñagei? Samina humá luagu le lariñagubei Hesusu lidan Lúkasi 14:28-30 (aliiha huméi). Ayanuhati luagu le mini lubéi aban wamá lani disipulu. Anhein busén wabéi wafalarun Hesusu, lunti aranseñu wamá lun wawandun somu lénrengunga o wadügün somu sákürifisiu (Luk. 9:23-26; 12:51-53). Ligíati, lubaragiñe habadiseirun, lunti hañuurun asaminara luagu sun le lanügübei lafalarúniwa Kristu. Ítara luba aranseñutima humá lun hasigirun eseriwida lun Bungiu lau úaraguni lárigiñe habadiseirun.

3. Kaba wakutiha lidan arütíkulu le?

³ Lau sun le lunbei gabarounwa lan lubá badisei, huuti funa san lun labadiseirun aban gürigia? Anha! Adügati badisei lun heresibirun saragu abiniruni dandu guentó kei ámuñegü. Lidan arütíkulu le, wakutihaba fiu álügüdahani súdiniti luáguti badisei. Líderagubadün le asubudirei anhein aranseedün lubéi lun habadiseirun.

4. a) Ka san mini lan ederegeraguni unguaü? b) Ka mini lubéi míchugun hali lan gürigia ugundani lúniwagua, kei lariñawagún lidan Matéu 16:24?

⁴ Ka san mini lubéi ederegeraguni unguaü? Ligía aban katei le ladügübei aban gürigia lubaragiñe labadiseirun. Ederegeraguni unguaü ligía furíei le ladügübei aban gürigia tídangiñe sun lanigi lun Heowá le ñein lubéi lariñaga layusurubei lan libagari lun súnwandan lun leseriwidun lun. Dan le lederegeragun gürigia lungua lun Heowá aba lígiruni le hínsiñebei lun. Ariñagati Hesusu houn lani disipulugu: “Le busenti lafalarunina, bulieiléi káteiñein lan, awandaléi sun luwuyeri asufuriruni le lunbei liabin lun nuéigiñe keisi lanügüni aban wügüri luágabun, falalana” (Mat. 16:24, TNM). Lúmagiñe oura ligía, lánihali Heowá gürigia ligía (Rom. 14:8). Lau lederegeragun gürigia lungua lun Heowá, lariñaguña lun lúmagiñe lan weyu ligía lun lubaruaguóun le lan súdinibei lun lidan libagari leseriwidun lun Heowá mama lun líchugun ugundani lúniwagua. Ederegeraguni unguaü ligía aban füramasei le ladügübei gürigia lun Bungiu. Mafosu lumutiwa Heowá adügei füramase le. Gama lumoun, dan le adüga wamaali agurabati lun wagunfuliruni (Sal. 116:12, 14).

5. Ida liña amu lan ederegeraguni unguaü lumoun badisei?

⁵ Ida liña amu lan ederegeraguni unguaü lumoun badisei? Dan le ladügüni gürigia furíei lánina ederegeraguni unguaü lábugua ladügei, ligíarügüñein asubudirei, lani lira luma Heowá. Ánheinti badisei, hagibugiñe amu gürigia ladügǘwa, liibe-agei dan lidan adamurini. Lau habadiseirun harufuduñein houn gürigia derege humaali lan hibagari lun Heowá. * Lidan amu dimurei, harufuduñein hínsiñe lan Bungiu hun tídangiñe sun hanigi, huani, hisaminan luma lau here, ani aranseedün lan lun heseriwidun lun lun súnwandan (Mar. 12:30).

6, 7. Según 1 Féduru 3:18-22, ka bián katei súdinibei lun labadiseirun aban gürigia?

⁶ Súdiniti san badisei? Samina humá luagu dimurei le lídanbei 1 Féduru 3:18, 19, TNM *, 20-22 (aliiha huméi). Ítara kei arufuda tan meha árüka furangu afiñe lan meha Noé, arufuda lumuti giñe habadiseirun deregeguaadün lan hungua lun Heowá. Gama lumoun, súdiniti san lun habadiseirun? Anha, afuranguagüda lumuti Féduru ka lan uagu. Furumiñe ariñagati: “Le ídangiñebei wanügǘwa lun wasalbarun”. Gayaraati lesefuruniwa badisei ánhawa arufuda lau le wadügübei afiñe wamá luagu Hesusu, hilá lan wawagu, sará lan lídangiñe óunweni, mudei lan sielun, ani anihein lan “ñun luéigiñe lóunwenren Bungiu guentó”.

⁷ Le libiaman, adügati badisei lun ‘harumañu tan wanigi’. Dan le wederegeragun woungua lun Bungiu ani badisei wagía, aba wagumeserun aban umadaguaü espechaliti luma. Kei asakürihaadiwa lan tídangiñe sun wanigi ani afiñe wagía luagu esefuruni, ligía feruduna lubalin Bungiu wafigoun. Ligíati gayara lubéi wasandiragun woungua lau aban saminaü darangilati ligibugiñe.

8. Kaba lébuna busén humá habadiseirun?

⁸ Kaba lébuna busén humá lun habadiseirun? Seremei lun lubuidun haturiahan furendeihadün saragu luagu Heowá, luagu ligaburi luma luagu ligaburi ladügüni katei. Sun burí katei le chülüti tidoun hanigi ani adügaali lun hínsiñe lan Heowá hun saragu. Súdiniti lun ínsiñeni lan le hasandirubei luagu Heowá lébuna busén humá habadiseirun.

9. Ka mini lubéi habadiseirun lidan liri Úguchili, liri Irahü, luma liri sífiri sandu según lariñaguni Matéu 28:19, 20?

 ⁹ Le giñe lébubei habadiseirun, ladüga arufudahani le tídanbei Bíbülia le furendei humaalibei ani anha huguya lun. Samina humá luagu le lariñagubei Hesusu dan le líchugunbalin gumadi lun hadügǘn disipulugu (aliiha huméi Matéu 28:19, 20). Según dimurei le lariñagubei, ha lúnbaña habadiseirun lunti hadügüni ‘lidan liri Úguchili, liri Irahü, luma liri sífiri sandu’. Mini lan le hafiñerun tídangiñe sun hanigi luagu le tarufudahabei Bíbülia luagu Heowá, luagu Hesusu, le Liráü, luma luagu sífiri sandu. Gabafuti inarüni burí le ani gayaraati lachülürün lidoun tilulin-agei anigi (Ebü. 4:12). Akutiha wamá fiu.

10, 11. Ka inarüni luáguti Bungiu Úguchili furendei humaalibei ani anha huguya lun?

¹⁰ Haritagua humagili san dan le hafurendeirubalin inarüni luagu Bungiu Úguchili? Heowá líribei ani ligía “Íñugutimabei ligibuagu sun ubóu!” (Sal. 83:18; Her. 10:10). Ligía Adügübaliwa ligía giñe “esefuhabei” (Sal. 3:8; 36:9). Lanwoun lira, adüga laali le mégeiwabei lun lesefuruniwa lídangiñe figóu luma óunweni, adüga ligía lun hemenigi wamá lun wawinwandun lun súnwandan (Huan 17:3). Lau hederegeragun houngua lun Bungiu, badisei huguya, harufudubei hagibugiñe saragu gürigia aban humá gefentiña luagu Heowá (Isa. 43:10-12). Hádanbadün iduheñu lídangiñetiña sun ubóu ha áhuduragubaña lun Heowá, barǘ haméi liri lau pantaü ani subudigüda haméi houn amu (Sal. 86:12).

¹¹ Aban lubuidun chansi gunfurandawa lan le tarufudahabei Bíbülia luagu Bungiu Úguchili. Danme le hánharun lun inarüni gebegiti le, tínchahabadün hanigi lun hederegeragun hungua lun Heowá luma lun habadiseirun.

12, 13. Ka inarüni luáguti Liráü Bungiu furendei humaalibei ani anha huguya lun?

¹² Ida liña meha san hasandiragun hungua dan le hafurendeirubalin inarüni burí le luagu Liráü Bungiu? Hesusu ligía libiamanbei gürigia le súdinitimabei lidan sun ubóu. Ligía wesefuragülebei, aranseñu liña meha lun líchuguni libagari wawagu. Dan le warufuduni lau le wadügübei afiñe wamá luagu lebegi esefuruni, gayaraabei wibihin lun ferudunawa lan wafigoun, gamadagua wamá luma Bungiu luma lun wibihin ibagari magumuchaditi (Huan 3:16). Hesusu giñe Wafadiribei le Íñutimabei, ladüga busenti líderaguniwa lun wibihin buiti lídangiñe lebegi esefuruni luma lun buidu lan wamadagua luma Heowá (Ebü. 4:15; 7:24, 25). Kei ligía lan Urúeibei lidan Larúeihan Bungiu, layusurubei Heowá lun larumadahani liri, lagumuchun lau wuribani luma lun lanügün abiniruni lun súnwandan lidan paraísu ámuñegü (Mat. 6:9, 10; Aruf. 11:15). Lanwoun lira, Hesusu ligía wánibei hénpulu (1 Fe. 2:21). Ruti aban hénpulu woun lun wáyeihani lau layusuruni libagari adügei lugundan Bungiu (Huan 4:34).

¹³ Danme le hánharun lun le tarufudahabei Bíbülia luagu Hesusu, ábame línsiñedun Hesusu le Liráü Heowá hun. Línchahabadün ínsiñeni le ayusurei hibagari lun hadügüni lugundan Bungiu, ítara kei Hesusu. Ábameti ladügün lira lun busén humá hederegeragun hungua lun Heowá luma lun habadiseirun.

14, 15. Ka inarüni luáguti sífiri sandu furendei humaalibei ani anha huguya lun?

¹⁴ Ka hasaminarubei dan le hafurendeirunbalin inarüni burí le luagu sífiri sandu? Mama aban gürigia sífiri sandu, aban erei lúmagiñeti Bungiu. Yusu lumuti Heowá lun ladundehaniña wügüriña abürüdoun Bíbülia ani yusu lumuti giñe lun líderaguniwa gunfurandei luma afalarei le waliihabei tidan (Huan 14:26; 2 Fe. 1:21). Lau lídehan lani Bungiu sífiri sandu líchigei Heowá “óunwenbu ubafu le wawagubei” (2 Ko. 4:7). Ruti sífiri sandu erei woun lun wapurichihani uganu buiti, wadisedun luéi óuchawaguni, lun mígiraguagüdün wamá woungua lun maguraasuni luma lun wawandun lénrengunga. Íderagua lumutiwa giñe arufudei lubuidun “igaburi le líchugubei [s]ífiri” (Gal. 5:22).  Ru lumuti Bungiu lani sífiri sandu houn sun ha afiñebaña luagu ani amuriaha haméi luma lau sun hanarün (Luk. 11:13).

¹⁵ Wéiriti dǘgüdaguaü le wasandirubei lau wasubudiruni gayara lan hafiñerun ha áhuduragubaña lun Heowá líderagubaña lan sífiri sandu eseriwida lun Bungiu. Danme le hánharun lun inarüni le furendei humaalibei luagu sífiri sandu, línchahabadün lira lun hederegeruni hibagari lun Bungiu luma lun habadiseirun.

16. Ka akutiha wamaalibei darí guentó?

¹⁶ Aban katei súdiniti lederegeragun gürigia lungua lun Bungiu ani badisei ligía. Kei warihini, lunti aranseñu wamá lun wagagibudagun luma somu lénrengunga. Lau sun lira, gíbetimati buiti le lunbei libihíniwa sügǘ lau furumiñeguarügü lénrengunga o sákürifisiu le lunbei hadügüni. Gayaraati lesefurunün badisei luma lun ladügün lun buidu lan hisaminan ligibugiñe Bungiu. Ínsiñeni luagu Heowá ligía furumiñeti katei le lunbei línchahanün lun habadiseirun. Lunti giñe hafiñerun tídangiñe sun hanigi luagu inarüni burí le furendei humaalibei luagu Bungiu Úguchili, luagu Liráü luma luagu sífiri sandu. Lau sun le akutiha wamaalibei darí guentó, hariñaguña hamuga san aranseedün lan lun habadiseirun?

17. Ka fiu katei mégeiwabei lun gayara lan labadiseirun aban gürigia?

¹⁷ Anhein genege lubéi hun luagu aranseedün lan lun habadiseirun, chóuruti adügaadün lan saragu katei súdiniti lun hadügün aban lubuidun umadaguaü luma Bungiu. * Seremei lun haturiahanu Bíbülia súnwandan, furendeihadün saragu katei luagu Heowá luma luagu Hesusu, ani afiñeedün hawagu (Ebü. 11:6). Afiñetün sunsuinagubei luagu füramasei le ladügübei Heowá le wadarirubei tidan Bíbülia, ani chouru humuti gayara lan hesefurun lídangiñe figóu luma óunweni lau hafiñerun luagu sákürifisiu le ladügübei Hesusu. Asakürihaadün lídangiñe hifigoun, le mini lubéi le, asakürihaadün lan tídangiñe sun hanigi lau afigouhaadün lan ani amuriahaadün luma Bungiu lun feruduna lanün. Sansi humaali hibagari, ígira humaali sunsuinagubei binadu hibagari ani guentó hadügüñein le aubei lagundaara Bungiu (Adü. 3:19). Sanditün aban lanarime ayumahani lun hayanuhan houn amu luagu hafiñen. Gayara hali hapurichihan luma damuriguaü lau sun mabadiseirungidün lan (Mat. 24:14). Pántati Heowá hau ani gúndaati lau hadügüni katei súdiniti burí le (Ari. 27:11).

18. Ka amu katei lunbei hadügüni lubaragiñe habadiseirun?

¹⁸ Lubaragiñe habadiseirun lunti hadügün fiu katei. Kei buga warihini mosu hederegeragun hungua lun Bungiu, mini lan le hadügün aban furíei hábuguarügü lun tídangiñe sun hanigi le ñein lunbei füramase humá lun hayusurubei lan hibagari lun hadügüni lugundan (1 Fe. 4:2). Lárigiñe, ariñaga humá lun íbiri le arihibei lau hawadigimari  wéiyaaña lidan afiñeni busén humá habadiseirun. Lamuriahaba hamá fiu wéiyaaña lun hóundaragun huma. Ani madiherida humá, subuditün houn íbirigu ha ani hínsiñetün houn. Hakutihabei huma arufudahani le tídanbei Bíbülia le furendei humaalibei lun harihini anhein gunfuranda hubalin arufudahani méiniti le tídangiñeti Bíbülia lun hachoururuni gunfuranda humani ani subudi humani súdini lan lederegeragun gürigia lungua lun Bungiu ani badisei ligía. Anhein hariha luagu aranseedün lan, hariñagubei hun gayara lan habadiseirun lidan leweñegua adamurini.

19, 20. Ka lunbei hadügüni lárigiñe habadiseirún ani kaba íderaguaün?

¹⁹ Lárigiñe habadiseirun, ka lunbei hadügüni? * Aritagua huméi füramasehaadün lan hederegeragun hungua lun Heowá, ani agurabati lun hagunfulirubei lan. Ligíati lárigiñe habadiseirun, lunti hagunfulirun lau le füramase hubéi. Kaba íderaguaün?

²⁰ Yarafañu humá lun damuriguaü le ñein hubéi. Danme le habadiseirún ábame hádangiñe humá ‘iduheñu’ ha lídanbaña sun ubóu (1 Fe. 2:17). Ítara haba lílana damuriguaü hun kei iduheñu lúmagiñetiña Bungiu. Ánhadün abasiha súnwandan lidoun adamuridaguni, buídutimabei humadagua hama. Aliiha humóun Bíbülia sagü weyu ani sagá humá dan lun hararamagun asaminara luagu le haliihabei (Sal. 1:1, 2). Mini lan le, lárigiñe lan haliihan somu fánreinti, lunti hasagarun dan lun hararamagun asaminara luagu le haliihabei. Ítara luba lachülürün le tariñagubei Bíbülia tidoun hanigi. Lunti giñe hadügüni le lariñagubei Hesusu, furíei humá súnwandan (Mat. 26:41). Líderagubadün furíei le hadügübei tídangiñe sun hanigi lúntima hayarafadun lun Heowá. Ani “áluaha huméi larúeihan [...] Bungiu furumiñe” (Mat. 6:33). Ida? Lau híchuguni apurichihani furumiñe lidan hibagari. Ánhadün apurichiha súnwandan, léreduba hafiñen ani híderaguba amu éibuga lidan üma le lánina ibagari magumuchaditi (1 Tim. 4:16).

21. Kaba hibiha lau habadiseirun?

²¹ Lederegeragun gürigia lungua lun Heowá luma lun labadiseirun ligíatima katei le súdinitimabei lun ladügüni. Inarüni lunti lan aranseñu lan gürigia lun lawandun lénrengunga. Lau sun lira, barüti buiti woun. Le wasufurirubei lidan binadu ubóu le “mahürüti ani fureseti lásügürün” (2 Ko. 4:17). Ánheinti dan le labadiseirun gürigia, gúndaatimabei libagari guentó ani libihuba “ibagari magumuchaditi” ámuñegü (1 Tim. 6:19). Ligíati, samina huméi buidu, furíei humá lun Heowá ani óunaba huméi álügüdahani le: “Aranseedina san lun nabadiseirun?”.