1. Cosa debe hace el un persona antes principia planta casa?

IMAGINA que tiene un persona que ya decidi planta casa. Sabe le si cosa clase de casa le quierre planta. Anda ba le dayun cumpra materiales y principia planta? Gendeh. Antes le principia, tiene le un importante cosa que necesita hace​—carcula si cuanto cantidad le gasta. Porque? Cay necesita le sabe si tiene ba le bastante sen para hace acaba con el casa. Si carcula le adelantao con el gastos, grande el posibilidad que puede le acaba planta con el de suyu nuevo casa.

2. Asegun na Lucas 14:27-30, cosa tu debe pensa enbuenamente antes contigo bautiza?

² El de tuyu amor y apresacion ba para con Jehova ya manda move contigo para pensa que bautiza? Si ansina, necesita tu hace un decision que semejante con aquel gente quien quierre planta casa. Porque se kita puede habla? Considera con el cosa ya habla si Jesus na Lucas 14:27-30. (Le.) Si Jesus ta discuti acerca si cosa quierre decir que queda de suyu dicipulo. Para queda de suyu siguidores, debe kita preparao y conforme acepta con “el maga gastos” que envuelto​—el maga dificultad y maga sacrificio. (Luc. 9:23-26; 12:51-53) Poreso, antes contigo bautiza, necesita tu pensa enbuenamente con el maga cosas que envuelto. Si hace tu se, mas preparao tu para continua sirvi fiel con Dios como un bautizao Cristiano.

3. Cosa kita considera na este articulo?

³ Tiene ba beneficio si bautiza kita y queda dicipulo del Cristo maskin pa na manada dificultad? Si! El bautismo ta guia para na manada maga bendicion​—ahora y na futuro. Considera kita con el cuanto importante pregunta acerca na bautismo. Puede  este ayuda contigo para contesta con el pregunta, “Preparao ya ba yo na bautismo?”

4. (a) Cosa el dedicacion? (b) Cosa quierre decir que “olvida” con el mismo cuerpo, como cosa ya menciona na Mateo 16:24?

⁴ Cosa el dedicacion? Antes contigo bautiza, debe tu hace dedicacion. Para hace se, necesita tu atraca con Jehova por medio na sincero rezo y habla con ele que hay usa tu con el de tuyu vida para sirvi con ele hasta para cuando. Si dedica tu con el de tuyu vida con Dios, ta “olvida” tu con el de tuyu mismo cuerpo. (Le con el Mateo 16:24.) Si Jehova ya el dueño del de tuyu vida y un grande privilegio este. (Roma 14:8) Ta habla tu con ele que principia ese dia, hay man focus tu na servicio con ele y gendeh na de tuyu mismo cuerpo. El de tuyu dedicacion amo un serioso promesa que ya hace tu con Dios. Gendeh ta forza kanaton si Jehova para hace con ese promesa. Pero si hace kita se, ta expecta le que cumpli kita con ese.​—Sal. 116:12, 14.

5. Na cosa manera el dedicacion conectao na bautismo?

⁵ Na cosa manera el dedicacion conectao na bautismo? Ta hace tu con el de tuyu dedicacion na privado y entre lang este contigo y con Jehova. Ta hace con el bautismo adelante del otro maga gente y mas mucho, ta hace con ese na asemblea o na convencion. Si bautiza contigo, ta dale tu mira con otro que ya dedica ya tu con el de tuyu vida con Jehova. * Poreso, el de tuyu bautismo ta manda sabe con otro que ta ama tu con Dios Jehova con todo el de tuyu corazon, alma, pensamiento y fuerza. Ta dale tambien tu mira que determinao tu sirvi con ele hasta para cuando.​—Mar. 12:30.

6-7. Asegun na 1 Pedro 3:18-22, cosa el dos razon si porque necesita bautiza el un persona?

⁶ Necesita ba gayot bautiza el un persona? Considera con el cosa ta habla na 1 Pedro 3:18-22. (Le.) Igual si paquemodo el arca un claro prueba del fe de Noe, el de tuyu bautismo amo un claro evidencia del de tuyu dedicacion con Jehova. Pero, necesita ba gayot que bautiza el un persona? Si. Ya habla si Pedro el razon si porque. Una, el bautismo “ta salva [contigo].” El bautismo puede salva kanaton si dale kita mira por medio na diaton maga accion que tiene kita fe con Jesus y ta creé que ya muri le para kanaton, que ya resucita con ele para na cielo y “na mano derecha del Dios” ya le ahora.

⁷ Ika-dos, si bautiza kita, hay tiene kita “un conciencia limpio.” Si dedica kita el diaton vida con Dios y bautiza, ta principia kita tiene un especial relacion con ele. Cay sincero kita ya arripinti y tiene kita fe na rescate, el Dios ta perdona con el diaton maga pecado. Poreso, puede kita tiene un limpio conciencia adelante con ele.

8. Cosa debe el razon si porque tu decidi bautiza?

⁸ Cosa debe el razon si porque tu decidi bautiza? Como resulta del de tuyu estudiada del Biblia, manada tu cosa ya puede aprende acerca con Jehova​—el de suyu personalidad y si paquemodo le ta hace maga cosas. El cosa tu ya aprende acerca con ele ya tiene efecto na de tuyu corazon y ya manda este move contigo para ama gayot con ele. El de tuyu amor para con Jehova amo debe el razon si porque tu decidi bautiza.

9. Cosa quierre decir que bautiza na nombre del Tata y del Anak y del sagrao espiritu, como cosa ta habla na Mateo 28:19, 20?

⁹ El de tuyu decision que bautiza yan base tambien na maga verdad na Biblia que ya acepta tu. Considera con el cosa ya habla si  Jesus cuando ya dale le con el mandamiento que hace maga dicipulo. (Le con el Mateo 28:19, 20.) Asegun con Jesus, aquellos quien bautiza debe hace con ese “na Nombre del Tata y del Anak y del [sagrao espiritu].” Cosa este quierre decir? Debe con todo corazon tu creé con el verdad na Biblia acerca con Jehova, con el de suyu Anak que si Jesus y con el sagrao espiritu. Este maga verdad puede gayot tiene efecto na de tuyu corazon. (Heb. 4:12) Considera kita con el cuanto de este.

10-11. Cosa maga verdad acerca con el Tata el ya puede tu aprende y ya acepta?

¹⁰ Pensa con el tiempo cuando ya puede tu aprende este maga verdad acerca con el Tata: Tiene le “el nombre Jehova,” ele “el Bien Alto na entero mundo” y ele solamente “el verdadero Dios.” (Sal. 83:18; Isa. 37:16) Si Jehova el diaton Creador y ele “el salvacion.” (Sal. 3:8; 36:9) Ya hace le manera para salva kanaton na pecado y muerte y ya dale kanaton el esperanza que vivi hasta para cuando. (Juan 17:3) El de tuyu dedicacion y bautismo hay identifica contigo como uno del maga Testigo de Jehova. (Isa. 43:10-12) Hay queda tu parte del familia na entero mundo quien proud lleva con el nombre del Dios y manda sabe con ese con otro.​—Sal. 86:12.

¹¹ Que bien grande privilegio que puede entende con el cosa ta enseña el Biblia acerca con el Tata! Si acepta tu con este precioso maga verdad, manda este move con el de tuyu corazon para dedica de tuyu vida con Jehova y bautiza.

12-13. Cosa maga verdad acerca con el Anak el ya puede tu aprende y ya acepta?

¹² Cosa el de tuyu reaccion cuando ya puede tu aprende con el siguiente verdad acerca con el Anak? Si Jesus el ika-dos que bien importante persona na universo. Ya conforma le dale de suyu vida como un rescate para kanaton. Si dale kita mira con el diaton fe na rescate por medio na diaton maga accion, hay perdona con el diaton maga pecado, hay tiene kita buen amistad con Dios y obtene kita vida hasta para cuando. (Juan 3:16) Si Jesus el diaton Alto Sacerdote. Quierre le ayuda kanaton para beneficia kita na rescate y tiene cerca relacion con Dios. (Heb. 4:15; 7:24, 25) Cay ele el Rey del Reino del Dios, si Jehova hay usa con ele para santifica con el De Suyu nombre, quita con el maldad y lleva manada bendicion na venedero Paraiso. (Mat. 6:9, 10; Rev. 11:15) Buen ejemplo si Jesus que debe kita imita. (1 Ped. 2:21) Ya usa le con el de suyu vida para hace con el voluntad del Dios.​—Juan 4:34.

¹³ Cuando ya acepta tu con el cosa ta enseña el Biblia acerca con Jesus, ya aprende tu ama con el Anak del Dios. Ese amor hay manda move contigo para usa con el de tuyu vida na hacida del voluntad del Dios, como cosa ya hace si Jesus. Como resulta, motiva se contigo para dedica de tuyu vida con Jehova y bautiza.

14-15. Cosa verdad acerca con el sagrao espiritu el ya puede tu aprende y ya acepta?

¹⁴ Cosa tu ya pensa cuando ya puede tu aprende con el siguiente verdad acerca con el sagrao espiritu? Gendeh este un persona, sino el activo fuerza del Dios. Si Jehova ya usa con el sagrao espiritu para guia con el maga persona para escribi con el Biblia y este espiritu ta ayuda kanaton para entende y aplica con el cosa kita ta puede le aqui. (Juan 14:26; 2 Ped. 1:21) Por medio na de suyu espiritu, si Jehova ta dale kanaton “grande poder.” (2 Cor. 4:7) Este espiritu ta dale kanaton fuerza para predica con el buen noticia, resisti con el tentacion, ayuda kanaton si tan luya kita y aguanta na maga probanza. Ta ayuda este kanaton para demonstra con el maga bonito calidad que “fruta del Espiritu.” (Gal. 5:22) El Dios  preparao dale el de suyu sagrao espiritu con aquellos quien ta confia y sincero ta pidi este con ele.​—Luc. 11:13.

¹⁵ Ta dale gayot comforta que el maga siervo de Jehova puede confia con el de suyu sagrao espiritu para ayuda kanila continua sirvi con Dios! Si acepta tu con el verdad que ya puede tu aprende acerca con el sagrao espiritu, manda este move contigo para dedica con el de tuyu mismo cuerpo con Dios y bautiza.

16. Cosa kita ya aprende na diaton discusion?

¹⁶ Bien importante el de tuyu decision que dedica con el de tuyu vida con Dios y bautiza. Como cosa kita ya aprende, debe preparao tu acepta con el cosas que envuelto​—el maga dificultad y maga sacrificio. Pero el maga bendicion que hay ricibi tu mas pa que con el cosa tu sacrificia. Por medio na bautismo, puede tu salva y tiene limpio conciencia adelante con Dios. Amor para con Dios Jehova debe el razon si porque tu decidi bautiza. Debe tambien tu creé con todo corazon con el cosa tu ya aprende acerca con el Tata, el Anak y el sagrao espiritu. Despues considera con el cosa kita ya discuti, paquemodo tu contesta con el pregunta, “Preparao ya ba yo na bautismo?”

17. Cosa el cuanto cosas que necesita hace antes bautiza con el un persona?

¹⁷ Si ta sinti tu que preparao ya tu na bautismo, asigurao que ya hace ya tu manera para tiene buen relacion con Jehova. * Como resulta del de tuyu regular estudiada del Biblia, manada ya tu cosa sabe acerca con Jehova y con Jesus. Tiene ya tu fe. (Heb. 11:6) Ta confia gayot tu con el maga promesa de Jehova na Biblia y convincido tu que el de tuyu fe na rescate de Jesus puede salva contigo na pecado y muerte. Ya arripinti ya tu con el maga pecado que ya puede tu hace y ya pidi perdon con Jehova. Ya cambia ya tu, gendeh mas ta hace con el maga cosas que gendeh bueno y ya principia hace si cosa ta hace alegre con Dios. (Act. 3:19) Alegre tu habla con otro si cosa tu ta creé. Ya queda tu cualificao para queda unbaptized publisher y ya principia sigui predica na congregacion. (Mat. 24:14) Proud si Jehova contigo cay ya hace tu este maga importante cosas. Ya hace tu bien alegre con el de suyu corazon.​—Prov. 27:11.

18. Cosa pa tu necesita hace antes contigo bautiza?

¹⁸ Antes contigo bautiza, tiene pa otro cosa que necesita tu hace. Como cosa kita ya aprende enante, debe tu dedica de tuyu vida con Dios. Reza con ele con todo corazon y promete con ele que usa tu con el de tuyu vida para hace con el de suyu voluntad. (1 Ped. 4:2) Despues, manda sabe con el coordinator del grupo del maga anciano que quierre ya tu bautiza. Pidi le con el cuanto anciano que man cuento contigo. No tiene miedo kanila. Asigurao, este maga amable hermano conoce ya  y ta ama contigo. Man repaso sila contigo con el cuanto importante enseñanza na Biblia que ya aprende tu. Quierre sila asigura que ya entende tu con ese y sabe tu si paquemodo de importante el dedicacion y bautismo. Si uyun sila que preparao ya tu, habla sila contigo que puede ya tu bautiza na siguiente asemblea o convencion.

19-20. Cosa tu necesita hace despues del de tuyu bautismo y paquemodo tu hace con ese?

¹⁹ Despues bautiza contigo, cosa tu necesita hace? * Acorda que el dedicacion amo un promesa y si Jehova ta expecta que cumpli tu con ese. Poreso, despues del de tuyu bautismo, necesita tu cumpli con el promesa que ya hace tu. Paquemodo tu hace con ese?

²⁰ Esta cerca na de ustedes congregacion. Como un bautizao Cristiano, parte ya tu del maga hermano y hermana na entero mundo. (1 Ped. 2:17) El maga hermano y hermana na congregacion amo el de tuyu espiritual familia. Mas queda fuerte el de ustedes amistad si regular tu atende na maga miting. Le con el Palabra del Dios y medita con ese cada dia. (Sal. 1:1, 2) Despues le con el cuanto porcion del Biblia, dale tiempo para medita con el cosa tu ya le. Si hace tu se, hay alcanza este na de tuyu corazon. Continua “reza.” (Mat. 26:41) El de tuyu sincero rezo hay hace contigo mas cerca con Jehova. “Busca . . . una el disuyo Reino.” (Mat. 6:33) Puede tu se hace si hace tu prioridad na de tuyu vida el predicacion. Si regular tu sale na ministerio, el de tuyu fe hay continua queda fuerte y puede tu ayuda con otro para tiene el esperanza que vivi hasta para cuando.​—1 Tim. 4:16.

21. Cosa el resulta del de tuyu bautismo?

²¹ El de tuyu decision que dedica de tuyu vida con Jehova y bautiza amo el de con todo importante decision que hay hace tu. Deverasan, tiene este maga sacrificio que envuelto. Pero, tiene ba este beneficio? Si! “Liviano y temporario” lang el maga probanza que puede tu enfrenta na este daan mundo. (2 Cor. 4:17) Pero el de tuyu bautismo hay resulta na mas alegre vida ahora y “deverasan Vida” na futuro. (1 Tim. 6:19) Poreso, pensa enbuenamente y reza acerca con el de tuyu contestacion na pregunta, “Preparao ya ba yo na bautismo?”