1. Nji txani atxi m’thu a fanelako kumaha na a si se khata kuaka nyumba?

ALAKANYA ngu m’thu wu a lavako kuaka nyumba. Ene wa ti ziva to a lava kuaka nyumba yo zumbisa kutxani. Ina a nga so tekela kukhukha e ya xavetela so aka ngu sona? Ahim-him. Kukhata, ku ni ti ti lavako e ti maha, i ku kubalela wotshe mtengo wu wu lavekako. Ngu kutxani? Nguko ti lava e ziva to male yi na enela kuheta nyumba kani. A txi balela kwati mtengo wa kona, a nga thuka e sikota kuheta nyumba yakwe.

2. Ngu kuya ngu Luka 14:28-30, u fanete u alakanyisisa ngu txani na u si se bhabhatiswa?

² Ina lirando lako ngu Jehovha ni kubonga kwako ngu ti a nga kumahela ti ku mahile u lava kubhabhatiswa? I di toneto, txisungo txako txa fana ni txa wule wo lava kuaka nyumba. Ngu kutxani? Jesu a fananisile ku va mgondiswa wakwe ni kuaka nyumba nga ha hi nga ti wonako ngu kona ka mapswi akwe ka Luka 14:28-30. (Yi lere.) Jesu a ti txhamusela ti to ku va mgondiswa wakwe ti womba txani. Ti to hi va vagondiswa va Jesu, ti lava hi tumela “mtengo” awu wu lavekako, i ku sikarato ni silo simwani asi ti lavako u si leka. (Luka 9:23-26; 12:51-53) Se, na u si se bhabhatiswa ti lava u alakanya kwati ngu totshe ati ti patekako. Ngu kona u nga vako u di tilulamisete kusimama u thumela Txizimu u di bhabhatisilwe.

3. Hi na bhula ngu txani ka msungo wuwa?

³ Ina ta fanela ku hi karateka ni kuleka timwani ngu mhaka yo lava kubhabhatiswa? Ina! Phela kubhabhatiswa ti kutulela makatekwa a mangi ngutu, konkuwa ni mbimo yi yi tako. Konkuwa he bhule ngu siwotiso sa lisima mayelano ni bhabhatiso. Eto ti na kuvhuna kuxamula txiwotiso txiya: “Ina ni tiemisete kubhabhatiswa?”

4. a) Nji txani kutiningetela? b) Ti womba txani ‘kutileka’ aku ku nga wombwa ka Matewu 16:24?

⁴ Nji txani kutiningetela? Na u si se bhabhatiswa, ti lava u tiningetela. Kutiningetela, ngu maha mkombelo ka Jehovha ngu mbilu yotshe, u mu gela ti to awe u na mthumela kala kupinduka. U txi tiningetela ka Txizimu, wo ‘tileka’ upune. “Se konaho Jesu a to khene ka vagondiswa vakwe: “Ngako m’thu a txi lava ku ni londisela, a na ti leke apune, e rwala phande yakwe ya xanisa se e ni londisela.” (Matewu 16:24, NM) Konkuwa se u ni lungelo ya hombe, i ku yo lumba Jehovha. (Var. 14:8) Awe u gela Jehovha to kukhukhela konkuwa, txa lisima ngutu kwako i na va kumaha ati ene a ti lavako, i si nga ku timahela tako. Txisungo txako, njixambanyo, i ku txithembiso txa lisima atxi u mahelako Txizimu. Jehovha kha hi sinzisi ti to hi maha txithembiso txonetxo. Kambe hi txi za hi maha, a lava to hi txi hetisisa.—Mas. 116:12, 14.

5. Kutiningetela ti yelanisa kutxani ni bhabhatiso?

⁵ Kutiningetela ti yelanisa kutxani ni bhabhatiso? Kutiningetela i mhaka ya txihunja, njako ni Jehovha dwe. Bhabhatiso nja ha kubasani; yi mahelwa hagari ka vathu vamwani, ngu mtolovelo ka mtshangano wa txigava mwendo wa m’ganga. U txi bhabhatiswa, u kombisa to se u tiningetete ka Jehovha. * Ngu toneto, bhabhatiso yi maha to vamwani ve tiziva to awe u randa Jehovha ngu mbilu yako yotshe, moya wako, mapimo ni mtamo wako ni ti to awe u tiemisete kuthumela Jehovha kala kupinduka.—Marku 12:30.

6-7. Ngu kuya ngu 1 Pedro 3:18, 21, 22, ngu sihi sivangelo simbidi asi si kombisako ku to sunga kubhabhatiswa?

⁶ Ina ngu ditshuri to laveka kubhabhatiswa? Wona mapswi aya ma ku ka 1 Pedro 3:18, 21, 22. (Yi lere.) Ngalava yi ti maha to vathu ve wona likholo la Nowa, ngu toneto, bhabhatiso yako yi maha ti to vamwani ve ti wona to u tiningetete ka Jehovha. Kambe, ina to sunga kubhabhatiswa? Ta sunga. Mpostoli Pedro a wombile txivangelo txa kona. Txo khata, ya ‘mi hanyisa.’ Bhabhatiso yi nga hi hanyisa ngako hi txi teka mazambo aya ma lavekako ti to hi kombisa to athu hi ni likholo ka Jesu ni ku ha tumela to a hi fete, a wusilwe e ya nzumani, ni ku konkuwa a “txineneni ka Txizimu.”

⁷ Txa wumbidi, bhabhatiso yi maha to hi ‘xolwa livhalo mwendo hi va ni livhalo la linene.’ Ngako hi txi tiningetela ka Jehovha ni kubhabhatiswa, hi khata wuxaka wo sawuleka ni nene. Aku se hi nga tisola ni kuva ni likholo ka m’tirulo, Jehovha wa divalela sionho sathu. Ngu toneto hi nga mana livhalo la linene masoni kwakwe.

8. Ngu txihi txivangelo atxi txi fanelako ku kumaha u lava kubhabhatiswa?

⁸ Ngu txihi txivangelo atxi txi fanelako ku kumaha u lava kubhabhatiswa? Ka gondo yako ya Bhiblia, u gondile to tala ngu Jehovha, wuthu wakwe ni tinzila takwe. Ati u nga ti gonda ngu ngene ti gwesile mbilu yako, ti kumaha u m’randa ngutu. Se, lirando lako ngu Jehovha li fanete i va txivangelo txako txo khata txo lava kubhabhatiswa.

9. Matewu 28:19, 20 yi womba to vathu va fanete ve bhabhatiswa ngu ditina da Tate ni da Mwanana ni da Moya wo Sawuleka. Toneto ti womba txani?

⁹ Ditshuri da mu ka Bhiblia njimwani txivangelo txa txisungo txako txo bhabhatiswa. Wona ati Jesu a nga womba mbimo yi a nga  ninga vagondiswa vakwe mthumo wo maha vagondiswa. (Lera Matewu 28:19, 20.) Ngu kuya ngu Jesu, vathu va fanete ve bhabhatiswa “ngu ditina da Tate ni da Mwanana ni da Moya wo Sawuleka.” Ti womba txani toneto? Ti womba to u fanete u kholwa ngu mbilu yako yotshe ka ti Bhiblia yi ti gondisako ngu Jehovha; Mwanana wakwe Jesu; ni moya wo sawuleka. Tigondo toneto ta ditshuri ti ni mtamo, se ti nga gwesa mbilu yako. (Vaheb. 4:12) He wusete timwani ta kona.

10-11. Ngu tihi tigondo ta ditshuri mayelano ni Tate ati u nga ti gonda ni ku ti kholwa?

¹⁰ Alakanya mbimo yi u nga gonda ditshuri mayelano ni Tate. U zivile to ‘Ditina dakwe i Jehovha,’ ene i “Nyatxitimwi ha mafuni kotshe,” ni ku ngene ekha i ku “Txizimu mwendo Txizimu txa ditshuri.” (Mas. 83:18, NM; Isaya 37:16) Ngene M’vangi wathu, ni ‘muhanyisi wathu.’ (Mas. 3:8; 36:9) Ene a mahile malulamiselo yo hi khulula ka txionho ni lifo ni ku a hi ningile themba ya wutomi wo mbi guma. (Joh. 17:3) Kutiningetela kwako ni kubhabhatiswa ti na kombisa ti to awe u Fakazi ya Jehovha. (Isaya 43:10-12) U na maha txiro txa mwaya wa ha mafuni kotshe wa vakhozeli va Jehovha ava va tsakako ngu kudhanwa ngu ditina da Txizimu ni ku di zivisa ka vamwani.—Mas. 86:12.

¹¹ Kupfisisa ati Bhiblia yi ti gondisako ngu Tate, i lungelo ya hombe! Mbimo yi u kholwako tigondo toneto ta ditshuri, mbilu yako yi kumaha u lava kutiningetela ka Jehovha ni kubhabhatiswa.

12-13. Ngu dihi ditshuri da Bhiblia mayelano ni Mwanana adi u nga di kholwa?

¹² Mbimo yi u nga gonda ditshuri mayelano ni Mwanana, u ti pfisile kutxani? Ngu txikombiso, Jesu a londisela Jehovha ngu wuhombe ka wuako wotshe. Ngene M’tiruli. Ngu ku ti dhunda a ningete wutomi wakwe ngu mhaka yathu. Ngako mahanyelo athu ma txi kombisa ti to ha kholwa ka m’tirulo, sionho sathu si nga divalelwa, hi maha vangana va Jehovha, hi tshumela hi mana wutomi wo mbi guma. (Joh. 3:16) Jesu ngene Mphaxeli wa Hombe. Ene a lava ku hi vhuna hi wuyelwa ngu m’tirulo ni ku va ni wungana wa wunene ni Jehovha. (Vaheb. 4:15; 7:24, 25) Kota Mkoma wa Mfumo wa Txizimu, Jehovha a na thumisa ene kasi kubasisa ditina Dakwe, e gumisa wubihi, ni ku tisa makatekwa a mbimo yotshe ka Paradhise yi yi tako. (Mat. 6:9, 10; Mtu. 11:15) Jesu ngene txikombiso txathu. (1 Pedro 2:21) Ene a hi vekete txikombiso txo ningetela wutomi wakwe ti to e maha kudhunda ka Txizimu.—Joh. 4:34.

¹³ Mbimo yi u kholwako ka tigondo ta Bhiblia mayelano ni Jesu, u khata kuranda Mwanana wa Txizimu wo dhundeka. Lirando lonelo li maha ti to u maha kudhunda ka Txizimu wutomi wako wotshe, nga ti Jesu a nga maha. Ngu toneto, u kurumetekile kutiningetela ka Jehovha ni kubhabhatiswa.

14-15. Ngu tihi tigondo ta ditshuri mayelano ni moya wo sawuleka ati u nga ti gonda ni ku ti kholwa?

¹⁴ Mbimo yi u nga gonda ditshuri mayelano ni moya wo sawuleka, u ti pfisile kutxani? Ngu txikombiso, moya wo sawuleka hi nga m’thu, kambe mtamo wa Txizimu. Jehovha a thumisile wona ti to kubhalwa Bhiblia, ni ku wona wu hi vhuna kupfisisa ni kuthumisa ati hi ti gondako mu ka Bhiblia. (Joh. 14:26; 2 Pedro 1:21) Ngu kuthumisa moya wo sawuleka, Jehovha a hi ninga “mtamo wa hombe.” (2 Vak. 4:7) Moya wo sawuleka wu hi ninga mtamo wo txhumayela mahungu a manene, hi lwa ni siduko, hi lwa ni dikhodho, ni kuxula sikarato. Wu tshumela wu hi vhuna kukombisa tifanelo ati ti wumbako “mihando ya  moya.” (Vag. 5:22) Txizimu txi ninga moya wo sawuleka ava va wu kombelako na va txi txi themba.—Luka 11:13.

¹⁵ Ta thavelela ni kutsanisa kuziva to hi nga themba moya wo sawuleka ti to wu hi vhuna hi kota kuthumela Txizimu! Ngako u txi kholwa tigondo ati u ti gondako mayelano ni moya wo sawuleka, ti na kumaha u lava ku tiningetela ka Jehovha ni kubhabhatiswa.

16. Ngu tihi ati se hi nga tigonda kala hawa?

¹⁶ Txisungo txo tiningetela ni kubhabhatiswa hi nga txo sakana. Nga ha hi nga gonda ngu kona, ti lava u tiemisela kutumela mtengo awu wu lavekako, i ku sikarato ni silo simwani asi ti lavako u si leka. Kambe makatekwa a kona u na ma tanda ni kubala. Bhabhatiso yi nga kuhanyisa, ni ku kuninga livhalo la linene ka Txizimu. Txivangelo txo khata txo bhabhatiswa ku fanete i va kuranda Jehovha Txizimu. Ti lava u kholwa ka totshe tigondo ta ditshuri mayelano ni Tate, Mwanana, ni moya wo sawuleka. Aku se hi nga gonda totshelele tiya, u nga xamulisa kutxani txiwotiso txiya: “Ina ni tiemisete kubhabhatiswa?”

17. Ngu yahi mazambo aya u nga ma tekako na u si se bhabhatiswa?

¹⁷ Idi ti to u tiemisete kubhabhatiswa, kha ti kanakanisi ti to se u tekile mazambo o kari ti to u aka wungana ni Jehovha. * Ka gondo yako ya Bhiblia, u gondile to tala ngu Jehovha ni Jesu. Se u vite ni likholo. (Vaheb. 11:6) Wa si themba ngutu sithembiso sa Jehovha asi si ku ka Bhiblia, ni ku wa tsaniseka ti to likholo lako ka digandelo da Jesu di nga kuhanyisa ka txionho ni lifo. U ti sote ka sionho sako; wa ti laya ngutu ngu to biha ati u nga khala kumaha, se u kombete divalelo ka Jehovha. U hundukile; i ku ti to u tshuralete mahanyelo ako o biha a kale se u hanya ngu nzila ayi yi tsakisako Txizimu. (Mith. 3:19) U tsakela kugela vamwani ati u ti kholwako. U tumeletwe ku va muhuweleli wo mbi bhabhatiswa ni ku u khatile kutxhumayela kumweko ni dibanza. (Mat. 24:14) Jehovha wa tsaka ngu ku u nga teka mazambo onewo. U tsakisile mbilu yakwe.—Mav. 27:11.

18. Ngu tihi timwani ati ti lavako u maha na u si se bhabhatiswa?

¹⁸ Na u si se bhabhatiswa, ku ni to kari ati u fanelako ku ti maha. Nga ha hi nga gonda ngu kona, u fanete u tiningetela ka Txizimu. U maha mkombelo wekha, u thembisa Jehovha kumaha kudhunda kwakwe wutomi wako wotshe. (1 Pedro 4:2) Gwita u gela mwanathu awu i ku mtshanganisi wa mmidi wa madhota to u lava kubhabhatiswa. Ene a na kombela madhota o kari to me bhula ni nawe. U nga  thave, hi nga mabhulo o karata. Vanathu vonevo va kuziva ni ku va kudhunda. Va na wuseta kumweko ni nawe tigondo ta makhato ta Bhiblia ati u nga gonda. Va na lava kuwona to ngu ditshuri wa ti pfisisa tigondo toneto ni ku wa li wona lisima lo bhabhatiswa. Va txi wona to se u lungekile, va na kugela to u na bhabhatiswa ka mtshangano wu wu londiselako wa txigava mwendo wa m’ganga.

19-20. Nji txani txi no lava u txi maha msana ko bhabhatiswa, ni ku u nga mahisa kutxani toneto?

¹⁹ Nji txani txi no lava u txi maha msana ko bhabhatiswa? * U nga divali ti to kutiningetela njixambanyo, se Jehovha a lava hi txi hetisisa. Se, msana ko bhabhatiswa ti lava u hanya ngu ti u nga thembisa. Hi nga mahisa kutxani toneto?

²⁰ U nga hambani ni dibanza dako. Aku se u nga bhabhatiswa, se u txiro txa “sengeletano ya vanathu.” (1 Pedro 2:17, NM) Vanathu dibanzani i mwaya wako wa moya. U txi ya mitshanganoni mbimo yotshe u na tsanisa wuxaka wako ni vanathu. Lera Bhiblia ni kualakanyisisa ditshiku ni ditshiku. (Mas. 1:1, 2) U txi lera txienge txo kari txa Bhiblia, ema u alakanyisisa ngu ti u nga lera. Eto ti na gwesa mbilu yako. “Simama kukhongelani.” (Rom 12:12) Mikombelo yako yo huma mbiluni yi na kutshuketisa ka Jehovha. ‘Kukhata, lava Mfumo wa Txizimu.’ (Mat. 6:33) U nga mahisa kutxani toneto? Teka mthumo wo txhumayela i di wona i ku wa lisima ka wutomi wako. U txi maneka mbimo yotshe ka mthumo wo txhumayela, u na tsanisa likholo lako, ni ku u na vhuna vamwani ve bela ka nzila ya wutomi wo mbi guma.—1 Tim. 4:16.

21. Bhabhatiso yako yi na kutulela txani?

²¹ Txisungo txo tiningetela ka Jehovha ni kubhabhatiswa ngu txona txa lisima ngutu ka wutomi wako wotshe. Phela ti pata kuleka to kari. Kambe ina u nga ti laya? Nadha! Txikarato txihi ni txihi u nga wonisanako natxo ka mafu awa, nja “mbimwanyana ya yidotho.” (2 Vak. 4:17) Kuhambana ni toneto, bhabhatiso yako yi na kutulela tinzila to u mana litsako la hombe ka wutomi konkuwa ni “wutomi wa ditshuri” ka mbimo yi yi tako. (1 Tim. 6:19) Ngu toneto, hi kombela u alakanyisisa kwati ni kumaha mkombelo mayelano ni xamulo yako ka txiwotiso txiya: “Ina ni tiemisete kubhabhatiswa?”