1. Txini enfwanyela okosa muttu ahinatti oroma omaga numba?

KAMUBUWELE muttu ongana omaga numba. Iyene oziwa mukalelo wa numbaya enfuniye omaga. Iyene agahivenya bahi omagaga s’ohiroma otanalela dhofuneyadha? Nne. Ahinatti oroma omaga, onogilati wi—apime dhiniyena wila aziwe muttengo onanongiye mpaka opuliha numba yotene. Sabwaya? Sabwani iyene onofanyeelela oziwa akala okana kobiri yowakwanela wi apulihena numbaya. Akala onopima na mutanene muttengoya, onohagalala oziwa wi onele opuliha mabasaye omaga numba.

2. Mowiwanana na Luka 14:27-30, txini enfwanyeliwe otanalela na malago ohinatti obatiziwa?

² Omukwela vina omutamaalela wawo Yehova onele wuttukulela oziwa txini enfuneya vina entapulela obatizo. Dhahene, weyo onofwanyela ottukula ttarho yakakene ya muttu oddule onfuna omaga numba yaye. Ninlogela nni dhahene? Katanalela mazu a Yezu ali va Luka 14:27-30. (Kengesa.) Yezu walogile mazu aba wila anonihedhemo txini entapulela okala namafwara waye. Ninga anamafwara aye, ninorumeela wi ‘opima’ muttengoya oniwanana na—matxinjo vina makattamiho angumanihuna. (Lk. 9:23-26; 12:51-53) Nona ohinatti obatiziwa, enofuneya opima na malago txini eniwanana na okala namafwara wa Kristu. Dhahene onele okala womala nawale wi omulabele Mulugu wororomeleyene ninga Mukristu wobatiziwa.

3. Txini enasekeserhihu mwari mwa mutoma obu?

³ Wila obatiziwe ninga namafwara wa Kristu enofuneya ovilela makattamiho? Mohaganyedha enofuneya! Obatiziwa onowufugulela musuwo onufwanyiha mareliho—ovanene vina musogorho. Nsunzo ntti ninele osekeserha mavuzo amakamaka  mwaha wa obatiziwa. Okosa dhawene, enela wukamihedha wakula nivuzo ntti, “Ddimala ovisasanyedha wi ddibatiziwe?”

4. (a) Oviperheka txini? (b) Txini entapulela ‘ovikodda’ wamwinya ologiwe va Mateu 16:24?

⁴ OviperhekaTxini? Ohinatti obatiziwa, onofwanyela oviperheka. Ogaviperhekaga, weyo ononfiyedha Yehova munlobeloni omwaddelaga wi egumi yawo onfuna omulabelena iyene na mukalakala. Oganperhekela Mulugu egumi yawo, weyo ‘onovikodda’ wamwinya. (Kengesa Mateu 16:24.) Oromana venevo weyo onokana gari enddimuwa ya omukalelawo Yehova. (Rom. 14:8) Weyo onomwaddela Yehova, wi oromana venevo onfuna omulabelege iyene ottiya ovihagalaliha wamwinya. Oviperheka nipikirhelo—nattima ninimukosela weyo Mulugu. Yehova kannimagelela okosa nipikirhelo ntti. Mbwenye nigamala ompikirhela, iyene onjedhela wi nakwanihe yogana yehu.—Masal. 116:12, 14.

5. Oviperheka oniwanana dhavi na obatiziwa?

⁵ Oviperheka oniwanana dhavi na obatiziwa? Oviperheka nlobelo ninkosiwa moviteyani; muttuya onimukosela Yehova bahi. Obatiziwa onkosiwa vanamwinjini, attu otene awonaga, masaka mena onkosiwa va mutugumanoni wa murudda vina wa ttattamwa. Weyo ogadhowa obatiziwa, onolagiha vamentoni va attu otene wi omala omperhekela Yehova egumi yawo. * Ogabatiziwa attu ena anele oziwa wi weyo onomukwela Yehova Mulugu wawo na murima wotene, na thontho yawo yotene, na guru dhawo dhotene vina ohigana omulabela namukalakala.—Mk. 12:30.

6-7. Mowiwanana na 1 Pedro 3:18-22, dhilobo gani bili dhinoniha wi obatiziwa kofuneya?

⁶ Jofuneya-wene obatiziwa? Katanalela mazu ali va 1 Pedro 3:18-22. (Kengesa.) Dhahene ninga pangaya woniha nroromelo na Nowé, obatiziwa wawo onowoniha wi omala oviperheka wa Yehova. Mbwenye jofuneya-wene obatiziwa? Ndde jofuneya. Pedro onotapulelamo sabwaya. Vamaromo, obatiziwa ‘onowuvuna.’ Obatiziwa onanivune, nigattukula ttarho dhamakamaka dhinoniha wi ninomuroromela Yezu vina ninoziwa wi iyene onikwela, odhowa wirimu wenewo “oliye vamodha na Mulugu.”

⁷ Yanawili, obatiziwa ononikamihedha okana ‘mubuwelo wotxena.’ Nigaviperheka wa Mulugu nanda nibatiziwa, ninoroma okana mandano avawoka na iyene. Sabwa yotxinuwa vina ororomela mukutto wa yobolo, Mulugu onolevelela dhottega dhehu. Dhahene ninowodha okana mubuwelo wotxena vamentoni vaye.

8. Ttarho gani yoroma enottukulele ogana obatiziwa?

⁸ Ttarho gani dhinfwanyeliwe ofara akala onogana obatiziwa? Munsunzoni mwawo na Bibilia, ohisunza dhilobo dhinjidhene mwaha wa Yehova—ekalelo yaye vina esile dhinubuweliye. Musunzeliwe dhilobo esi murima wawo ohuttukulela omukwela venjene. Omukwela wawo Yehova jilobo yoroma enottukulele ogana obatiziwa.

9. Ninga munlogela Mateu 28:19, 20, txini entapulela obatiziwa na nzina na Baba, na Mwana, na muya wokoddela?

⁹ Sabwa yosunza vina orumela ebaribari ya mBibiliani weyo onogana obatiziwa. Koona ejile elogile Yezu avahaga nikokomezo na wakosa anamafwara. (Kengesa Mateu 28:19, 20.) Mowiwanana na Yezu, anamafwara aye anofwanyela obatiziwa ‘na nzina na Baba, na Mwana, na muya wokoddela.’ Eji entapulela  eni? Weyo onofwanyela orumela na murima wawo wotene ebaribari ya mBibiliani mwaha wa Yehova; Mwanaye Yezu; vina muya wokoddela. Ebaribari eji ekana guru enddimuwa vina enowodha oddiginya murima wawo. (Aheb. 4:12) Ndoweni nisunze vang’onovi mwaha wa makani aba.

10-11. Ebaribari gani mwaha wa Baba esunzile weyo vina enrumeeliwe?

¹⁰ Kobuwela vang’onovi vasunzile weyo ebaribari eji mwaha wa Baba: ‘Nzina naye ddi Yehova,’ iyene ddili “Namadhulu-dhulu mwilaboni mwetemwene” vina ‘ddi Mulugu mmodha bahi webaribari.’ (Masal. 83:18; Iza. 37:16) Iyene ddi Muttanddi wehu,vina ‘onnivuna ddi Yehova.’ (Masal. 3:8; 36:9) Ohikosa masasanyedho wila anobole muttegani onnitotela okwa vina onivaha njedhelo na egumi yohimala. (Jo. 17:3) Oviperheka vina obatiziwa wawo onowuzinddiyeliha ninga Munamoona wa Yehova. (Iza. 43:10-12) Weyo onele okosa mpaddi wa anamudhi ali orugunuwa elabo yotene, animwebedha attukulaga nzina na Mulugu wawa vina analaleya attu ena.—Masal. 86:12.

¹¹ Gari enddimuwa ononelamo esile dhinsunziha Bibilia mwaha wa Babihu! Mwaha wa orumela ebaribari eji yattima murima wawo ohuttukulela omperhekela Yehova egumi yawo vina ofuna obatiziwa.

12-13. Ebaribari gani mwaha wa Mwana Mulugu esunzile weyo vina enrumeeliwe?

¹² Wonilemo dhavi musunzeliwe ebaribari mwaha wa Mwana Mulugu? Yezu ddi muttu wanawili vina wamakamaka mwilaboni wetene. Iyene ddi Moboleli wehu. Na ovilevela oniperhekela egumi yaye. Nigalagiha na merelo ehu wila ninororomela mukutto wa yobolo, dhottega dhehu dhinoleveleliwa, ninokana mandano ofiyedheya na Mulugu vina ninowakela egumi yohimala. (Jo. 3:16) Yezu ddi Namakutta wehu Munddimuwa. Iyene onfuna wi nipurelemo mukutto waye vina nikaane mandano oliba na Mulugu. (Aheb. 4:15; 7:24, 25) Ninga Mwene wa Omwene wa Mulugu, Yehova onele omulabihedha wi attittimihe nzina naye, agomihe obure wotene vina adhena mareliho amukalakala Mparaizu. (Mt. 6:9, 10; Ovuh. 11:15) Yezu ddi yotagiha yehu. (1 Ped. 2:21) Mwa olabihedha egumi yaye wi akwanihedhe efunelo ya Mulugu, iyene ohinittiyedha yotagiha enfwanyelihu ofwara.—Jo. 4:34.

¹³ Ogarumeela ejile ensunziha Bibilia mwaha wa Yezu, onele omukwela Mwana wokweleya wa Mulugu. Okwela oku onela wukosiha wakwaniha efunelo ya Mulugu dhahene ninga mukoseli Yezu. Omamalelowa onele omperhekela Yehova egumi yawo wi obatiziwe.

14-15. Ebaribari gani mwaha wa muya wokoddela esunzile weyo vina enrumeeliwe?

¹⁴ Woonilemo dhavi musunzile weyo vina murumeleliwe ebaribari mwaha wa muya wokoddela? Muya wokoddela kahiyo muttu, guru ya Mulugu. Yehova ohaweddiha anamaleba Bibilia alabihedhaga muya waye wokoddela, muya wakakene ononikamihedha ononelamo vina ovirihamo esile dhinsunzihu. (Jo. 14:26; 2 Ped. 1:21) Na muya waye wokoddela, Yehova ononivaha ‘owodha onddimuwa.’ (2 Kor. 4:7) Muya wokoddela ononivaha guru dholaleyana miselu dhapama, owanana dhoweha vina ovilela makattamiho annobaniha. Ononikamihedha vina olagiha mikalelo dhapama ‘dhinbala muya.’ (Gal. 5:22) Mulugu onowavaha muya wokoddela abale animukuluvela vina animukumbirha na murima wotene.—Lk. 11:13.

¹⁵ Ninopangarhazeya oziwa wi emeleli a Yehova onowakela muya wokoddela onakamihedha omulabela Mulugu na mukalelo worumeeleya! Ogarumela ebaribari esunzile weyo  mwaha wa muya wokoddela, onele ofuna oviperhekela Mulugu wila obatiziwe.

16. Mpaka veneva txini esekeserhihu?

¹⁶ Ottukula ttarho ya omperhekela Mulugu egumi yawo vina obatiziwa yosakula yattima vaddiddi. Ninga musunzelihu, ninorumeela wi opima muttengoya oniwanana na—matxinjo vina makattamiho angumanihuna. Mbwenye marelihoya anfuniwe wakela anela okwaranya guru enakosiwe. Obatiziwa onowodha wuvuna vina okana mubuwelo wotxena vamentoni va Mulugu. Omukwela wawo Yehova Mulugu elobo yoroma enawuttukulele ogana obatiziwa. Onofwanyela okuluvela na murima wawo wotene ebaribari esunzile weyo mwaha wa Baba, Mwana vina muya wokoddela. Mpaka veneva nimala osekeserha dhilobo dhinji, nona ogakulile dhavi nivuzo ntti, “Ddimala ovisasanyedha wila ddibatiziwe?”

17. Ttarho gani dhina dhinimuttukulela muttu obatiziwa?

¹⁷ Akala weyo oli womala nawale wi obatiziwe, mohaganyedha ohiroma ofwara ttarho dhinawukamihedhe okana mandano apama na Yehova. * Nsunzo nawo na Bibilia nihukamihedha omuziwa Yehova vina Yezu mwawakwana-mwene. Oziwa dhilobo esi dhihunuwiha nroromelo nawo. (Aheb. 11:6) Onokuluvela mapikirelo a Yehova ali mBibiliani vina onorumela wi dhottega dhawo dhinele oleveleliwa mwaha wa mukutto wa Yezu. Weyo omala otxinuwa dhottega dhawo onokubanya vaddiddi sabwa ya dhoddawa dhakosiwe mundduni vina okumbirha nlevelelo wa Yehova. Osaddula vina ohinyanyala mweddelo wawo ddabuno ohiroma okalawo mowiwanana na magano a Mulugu. (Mer. 3:19) Onowawaddela attu ena esile dhinrumeeliwe. Weyo ohirumelihiwa mmulogoni ninga namalaleya wohibatiziwa vina ohiroma odhowa mmabasani olaleya vamodha na mulogoya. (Mt. 24:14) Yehova ohukamihedha ottukula ttarho dhamakamaka. Weyo onottabiha vaddiddi murima wa Yehova.—Gano 27:11.

18. Txini enfwanyeliwe okosa ohinatti obatiziwa?

¹⁸ Ohinatti obatiziwa dhikalawo dhilobo dhina dhing’onovi dhinfwanyeliwe oziwa. Ninga musunzelihu mundduni, onofwanyela omperhekela Mulugu egumi yawo. Bulivo weka, kakosa nlobelo ompikirhelaga Yehova wi onele olabihedha egumi yawo okosaga efunelo yaye. (1 Ped. 4:2) Ogamala omwaddele musogorheli wa nikuru na anddimuwa a mmulogoni wi onofuna obatiziwa. Iyene onele waloba anddimuwa ena a mmulogoni wi atugumane na weyo. Mbwenye kuwove ogumana nawene. Kobuwela wi abali aba okweleya ahuziwa vina anowukwela. Awene anela osekeserha vamodha na weyo masunzo oroma a mBibiliani abuwene asunzile weyo. Anfuna akaane ebaribari yawi weyo onononelamo masunzoya vina onoziwa ejile entapulela  oviperheka na obatiziwa. Agaziwa wi oli womala nawale, anela wuwaddela wi onele obatiziwa matugumano a murudda obe a ttattamwa anaddamela.

19-20. Txini enfwanyeliwe okosa ogamala obatiziwa, nanda onakose dhavi?

¹⁹ Txini enfwanyeliwe okosa ogamala obatiziwa? * Kudduwale wi oviperheka nipikirhelo ninkosiwe vina Yehova onjedhela wi weyo wakwanihe epikireliwe. Ogamala obatiziwa, onofwanyela ovirihamo empikireliwe Yehova. Onawodhe wakwaniha dhavi?

²⁰ Okale ofiyedheya na mulogo. Ogabatiziwa ninga Mukristu onoroma okosa mpaddi wa ‘anamudhi a mmulogoni.’ (1 Ped. 2:17) Abali na arogora a mmulogoni anokosa mpaddi wa anamudhi omuyani. Woona matugumano otene enele wukamihedha okala wofiyedheya na abali. Wengesege vina otanaalelege Mazu a Mulugu malabo otene. (Masal. 1:1, 2) Ogamala wengesa versu dha mBibiliani, onofanyeela okana mudhidhi wila otanaalele esile dhinengesiwe. Dhahene mazuya anela ovolowa mmirimani mwawo. ‘Olobelegevi.’ (Mt. 26:41) Olobela na murima wotene onele wukamihedha onfiyedha Yehova. ‘Tamela voroma Omwene wa Mulugu.’ (Mt. 6:33) Onofwanyela okosa mabasa olaleya ninga elobo yamakamaka mwigumini mwawo. Ogadhowaga mudhidhi wotene mmabasani olaleya, onele wunuwiha nroromelo nawo, vina onele wakamihedha ena wedda mudilani enfwanyiha egumi yohimala.—1 Tim. 4:16.

21. Obatiziwa wawo onawufugulele dila ya okana eni?

²¹ Ogana oviperheka wa Yehova nanda obatiziwa yosakula yamakamaka ehifwanyeliwe oyelela. Ebaribari wi vahikala muttengo munddimuwene. Nanda japama opitxela muttengoya? Ndde! Makattamiho angumanana iyo mwilaboni mpuno “kahiyo elo.” (2 Kor. 4:17) Mbwenyi obatiziwa wawo onele wufugulela dila ya okana egumi yowagalaliha ovanene vina musogorho mpo “egumi yohimala.” (1 Tim. 6:19) Nona, kobuwela pama vina olobele wila oziwe yowakula ya nivuzo ntti, “Ddimala ovisasanyedha wi ddibatiziwe?”