1. Mutu yoze unazange kutunga zuwo, yika atamba kulinga chitangu?

ACHINYONGA hali mutu yoze unazange kutunga zuwo. Iye kananyingika mutapu wa zuwo lize anazange kutunga. Shina iye malanda yuma chamulanjila ni kuputuka kutunga zuwo? Ka. Shimbu kanda achilanda yuma, katamba kunyingika ndando ya zuwo lize anazange kutunga. Mumu liaka? Mumu chino muchimukwasa kunyingika nyi mbongo jize ali najo mujikumbana. Kulianga kulilulieka kanawa, muchimukwasa kutunga zuwo lienyi ni kulihwisa.

2. Kulita ni Luka 14:27-30, yika watamba kulinga shimbu kanda achikupapachisa?

² Shina zango lie ni usakwililo we hali Yehova, yinakunyongesa hanga akupapachise? Nyi chenacho, ni yena watamba kulinga yize lunga yoze unazange kutunga zuwo atamba kulinga. Mumu liaka tunambe chocho? Tala maliji a Yesu, waze ali ha Luka 14:27-30. (Tanga.) Hano, Yesu te kanasolola yize mutu atamba kulinga mba apwe kambaji kenyi. Nyi unazange kupwa kambaji kenyi, watamba kutayiza kwalula “ndando,” che Kwamba, kutayiza kwalumuna yimwe ku mwono we ni kunyongonona mu yipikalo. (Luka 9:23-26; 12:51-53) Kashika, shimbu kanda achikupapachisa, watamba kunyonga kanawa ha chikuma chino, mba uhase kulilulieka hanga ukalakalile Zambi ni ushishiko weswe ngwe mukwa-Kristu wa kupapachisa.

3. Yika mutushimutwina ha mutwe uno?

³ Yika muyuka hakupwa kambaji wa Kristu? Tala yize muyuka! Upapachiso wa kwazulu pito lia yiwape yinji, haliapwila ni kulutwe lia matangwa. Chitangu tutalenu yimwe yihula yilemu chinji hakutwala ku upapachiso. Yino muyikukwasa kukumbulula chihula chino, “Hinalilulieka hanga angupapachise?”

4. (a) Kulihana kuli Yehova yika chinalumbunuka? (b) Kulita ni Mateu 16:24, kulituna yena mwene yika chinalumbunuka?

⁴ Kulihana yika chinalumbunuka? Shimbu kanda achikupapachisa, watamba kulihana. Kulihana kuli Yehova, chinalumbunuka kulemba ni mbunge yeswe kuli Iye ni kumulweza ngwo, wahana mwono we mu moko jenyi hanga umulingile ku miaka yeswe. Muze unalihane kuli Zambi, ‘unalituna yena mwene.’ (Tanga Mateu 16:24.) Haliapwila yena uli wamabala wa Yehova, chili chiwape chinene. (Roma 14:8) Unamulweze ngwo kuputuka musono, chuma chilemu ku mwono we chili kulinga upale wenyi, hi wa yena mwene ko. Kulihana che, chili chilakenyo chilemu ku meso ja Zambi. Yehova keshi kutushinjila hanga tumulakenye. Alioze, muze twakumulakenya, iye kakushimbwila hanga tumanunune chilakenyo chacho.—Samu 116:12, 14.

5. Kulisa chika chili ha kulihana ni upapachiso?

⁵ Kuchi kulihana chinalise ni upapachiso? Muze mulihana kuli Yehova mutu niumwe kechi kuchinyingika, Yehova wika mwe wakunyingika. Alioze, upapachiso wakupwa ha mbunga, kulutwe lia atu akwo, wakulingiwa ha kukunguluka cha mbonge hanji cha mambonge. Muze makupapachisa, atu eswe manyingika ngwo, walihana kuli Yehova. * Muze makupapachisa musolola kuli atu ngwo, wakuzanga Yehova Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe, nawa ngwo, unazange kumulingila ku miaka yeswe.—Marku 12:30.

6-7. Kulita ni 1 Petulu 3:18-22, yitela yika yaali atamba kutupapachishila?

⁶ Shina upapachiso uli ulemu? Tala maliji ali ha 1 Petulu 3:18-22. (Tanga.) Chizechene ngwe ulungu wasolwele ngwo Noa kali ni ufulielo muli Zambi, upapachiso newo wakusolola kuli atu ngwo, yena walihana kuli Yehova. Shina katamba lume kukupapachisa? Ewa. Petulu kanasolola yitela yaali. Chitangu, upapachiso, ‘unanulamwina.’ Upapachiso muuhasa kutulamwina nyi mutusolola mu yitanga ngwo, tunafuliela muli Yesu ni kutayiza ngwetu, iye kafwile mumu lia yetu, nawa kamuhindwishile yaya mu maliliu, haliapwila kali “ku kwoko lia chindume lia Zambi.”

⁷ Chamuchaali, upapachiso wakutukwasa hanga tupwe ni “mbunge yipema.” Muze twakuhana mwono wetu kuli Zambi ni kutupapachisa, twakupwa masepa jenyi. Ha mukunda wa kulikonyeka chetu ni ufulielo wetu ha ukuule, Zambi kakutukonekena ku shili yetu. Kashika, mutuhasa kupwa ni mbunge yipema ku meso jenyi.

8. Yika muyikukwasa mba akupapachise?

⁸ Yika muyikukwasa mba akupapachise? Mu longeso lia Mbimbiliya, wakulilongesa chinji hakutwala kuli Yehova, utu wenyi, ni yitanga yenyi. Yize wakulilongesa hakutwala kuli Iye, yakukwata ku mbunge ni kukukwasa hanga umuzange chinji. Zango lie kuli Yehova, lie liatamba kukukwasa mba akupapachise.

9. Yika chinalumbunuka kupapachisa mu jina lia Tata, ni lia Mwana, ni lia spiritu yisandu, ngwe chize anambe ha Mateu 28:19, 20?

⁹ Chikuma chikwo muchikukwasa mba akupapachise, chili umwenemwene wa mu Mbimbiliya uze wakulilongesa. Tala yize Yesu ambile muze ahanyine shimbi ya kutayisa tumbaji. (Tanga Mateu 28:19, 20.) Kulita ni Yesu, atu waze akupapachise katamba kuchilinga ‘mu jina lia Tata, ni lia Mwana, ni lia spiritu yisandu.’ Yika chino chinalumbunuka? Chinalumbunuka ngwo, watamba kufuliela ni mbunge yeswe ha umwenemwene wa mu Mbimbiliya  hakutwala kuli Yehova, hali Mwanenyi Yesu ni spiritu yisandu. Umwenemwene uno, uli ni ndundo jinji, muuhasa kukwata ku mbunge ye. (Hepre. 4:12) Tutalenu umwenemwene wacho.

10-11. Umwenemwene uka hakutwala kuli Tata, uze unakalilongesa ni kuutayiza?

¹⁰ Achinyonga muze walilongesele umwenemwene hakutwala kuli Tata. Muze wanyingikine ngwo, jina lienyi “Yehova,” iye “mwe Chitunda Helu lia hashi heswe,” nawa ngwo iye wika mwe “Zambi [wamwenemwene].” (Samu 83:18; Iza. 37:16) Iye mwe Sakatanga wetu, nawa “ulamwino wapwa wa kuli Yehova.” (Samu 3:8; 36:9) Iye hanahana uhashi wa kutukula ku shili ni kufwa, nawa kanalakenya kutwaha mwono wa mutolo. (Yoa. 17:3) Kulihana ni upapachiso, ye muyisolola ngwo, uli Chela cha Yehova. (Iza. 43:10-12) Muupwa mukachi ka mandumbu a hashi heswe waze akuwahilila ha kuvuluka jina lia Zambi ni kuliambujola kuli atu.—Samu 86:12.

¹¹ Chili chiwape chinene kunyingika yize Mbimbiliya yakulongesa hakutwala kuli Tata! Muze mutayiza umwenemwene uno, mbunge ye muyikushinjila hanga ulihane kuli Yehova ni kukupapachisa.

12-13. Umwenemwene uka hakutwala kuli Mwana uze unakalilongesa ni kuutayiza?

¹² Kuchi wevwile muze walilongesele umwenemwene hakutwala kuli Mwana? Yesu kali mutu wamuchaali mulemu mu malilu ni hashi. Iye mwe Watukulile. Kahanyine mwono wenyi hali yetu. Muze mutusolola mu yitanga ngwo tunafuliela ha ukuule, shili yetu mahasa kuyikonekena, mutupwa ni usepa upema ni Zambi, nawa mutukazuka mwono wa mutolo. (Yoa. 3:16) Yesu kali Sasendote wetu wa Lutwe. Kanazange kutukwasa hanga tuyuke ha ukuule ni kupwa ni usepa upema ni Zambi. (Hepre. 4:15; 7:24, 25) Iye kali Mwanangana mu Wanangana wa Zambi, kashika, Yehova mamutuma hanga apwise jina Lienyi lisandu, ni kuneha yiwape ya mutolo mu Paraisu. (Mateu 6:9, 10; Uso. 11:15) Yesu kali chilweza chetu. (1 Petu. 2:21) Kahichikile chilweza hali yetu ha chize mutuhana mwono wetu hanga tulinge upale wa Zambi.—Yoa. 4:34.

¹³ Muze mutayiza yize Mbimbiliya yakulongesa hakutwala kuli Yesu, muzanga Mwana yono, akuzanga chinji kuli Zambi. Zango liacho mulikukwasa kuhana mwono we hanga ulinge upale wa Zambi, ngwe chize Yesu alingile. Nyi walinga chino, muupwa ni tachi ja kulihana kuli Yehova ni kukupapachisa.

14-15. Umwenemwene uka hiunalilongesa hakutwala ku spiritu yisandu ni kuutayiza?

¹⁴ Kuchi wevwile muze walilongesele umwenemwene hakutwala ku spiritu yisandu? Spiritu yisandu hi mutu ko, yili tachi ja Zambi. Yehova kazachishile spiritu yenyi yisandu hanga yikwase atu asonekene Mbimbiliya, chikwo nawa spiritu yino ye yakutukwasa hanga tunyingike yize twakutanga mu Mbimbiliya ni kuyikaula. (Yoa. 14:26; 2 Petu. 1:21) Yehova kakutwaha “kuhiana cha tachi” kupalikila mu spiritu yenyi yisandu. (2 Kori. 4:7) Spiritu yisandu yakutwaha tachi hanga twambujole sango jipema ja Wanangana, tukumbe yeseko, ni kunyongonona ni hamu lieswe. Yakutukwasa nawa hanga tusolole yitanga yipema yize yinalinga chihanda mukachi ka “mihuko ya spiritu.” (Ngala. 5:22) Zambi kakuhana spiritu yenyi yisandu kuli atu waze akujikijila muli iye ni kumwitayo.—Luka 11:13.

¹⁵ Kunyingika ngwo, tuvumbi twa Yehova mahasa kufuliela ha spiritu yisandu hanga yakwase anunge ni kumuwayila, chakutakamisa chinji! Muze mutayiza umwenemwene uze walilongesa hakutwala ku spiritu yisandu, muchikukwasa hanga ulihane kuli Zambi ni kukupapachisa.

16. Yika twalilongesa ndo haliapwila?

 ¹⁶ Nyi unanyongo kulihana kuli Zambi ni kukupapachisa, unalingi kanawa. Ngwe chize twalilongesa, unanyingika ngwo hi chashiko kuchilinga. Alioze yiwape yinji muzuka. Upapachiso muuhasa kukulamwina, ni kukupwisa ni mbunge yitoma ku meso ja Zambi. Nyonga lia kukupapachisa, liatamba kukatuka chitangu ha zango lie kuli Yehova Zambi. Watamba nawa kufuliela ni mbunge ye yeswe ha umwenemwene uze unakalilongesa hakutwala kuli Tata, Mwana ni spiritu yisandu. Muze hitwahitulula umwenemwene uno, kuchi muhasa kukumbulula chihula chino, “Hiwalilulieka hanga akupapachise?”

17. Yuma yika mutu atamba kulinga shimbu kanda achimupapachisa?

¹⁷ Nyi unalivu ngwe hiwalilulieka hanga akupapachise, che kwamba, hiunalingi yuma yino hanga ukolese usepa we ni Yehova. * Longeso lie lia Mbimbiliya, liakukwasa kunyingika kanawa Yehova ni Yesu. Nawa hiwapwa ni ufulielo. (Hepre. 11:6) Wakufuliela ni mbunge yeswe ha yilakenyo ya Yehova yize yili mu Mbimbiliya, nawa uli ni shindakenyo ngwo, ufulielo we ha chitapo cha Yesu, muuhasa kukulamwina ku shili ni kufwa. Hiunalikonyeka ku shili ye; wakwivwa chinyengo ha upi uze wapwile ni kulinga, nawa hiunete kuli Yehova hanga akukonekene. Hiunalumuna yitanga ye; hiuneche yitanga yipi, haliapwila unatwama kulita ni chize Zambi akuzanga. (Yili. 3:19) Wakwambulwila akwenu hakutwala ku ufulielo we. Hiunapu mukwa-kwambujola yoze kanda achipapachisa, nawa wakwambujola hamwika ni mandumbu a mu chikungulwila chenu. (Mateu 24:14) Yehova kanawahilila hali yena, ha kukwata chiyulo chino. Wakumwivwisa chiseke chinji ku mbunge.—Yishi. 27:11.

18. Yika nawa watamba kulinga shimbu kanda achikupapachisa?

¹⁸ Muze kanda achikupapachisa, kuli yuma yikwo yize watamba kulinga. Ngwe chize twalilongesa ku uputukilo wa longeso lino, watamba kulihana kuli Zambi. Kundama kuli iye mu yilemba, mulakenye ngwo, unahana mwono we kuli iye hanga ulinge upale wenyi. (1 Petu. 4:2) Muze hiwalinga chino, mba mulweza kasongo wa makulwana a mu chikungulwila ngwo, unazange hanga akupapachise. Iye matuma amwe makulwana hanga ahanjike ni yena. Kanda wivwa woma wakuliwanano. Kwamba pundu, mandumbu wano a zango kanakunyingika kanawa, kakukuzanga chinji. O mahitulula ni yena amwe malongeso a mu Mbimbiliya waze hiunalilongesa. Masa shindakenyo ngwo, malongeso jacho kanakulumbunuka,  nawa ngwo yena hiunanyingika ulemu wa kulihana che ni upapachiso. Nyi makulwana mamona ngwo hiwalilulieka, makulweza ngwo mahasa kukupapachisa ha kukunguluka cha mbonge hanji cha mambonge muchisulako.

19-20. Yika watamba kulinga muze makupapachisa, nawa kuchi muhasa kuchilinga?

¹⁹ Muze hakupapachisa, yika watamba kulinga? * Iwuluka ngwe kulihana chacho chili chilakenyo, nawa Yehova kanashimbwila hanga uchimanunune. Kashika, muze hakupapachisa, watamba kutwama kulita ni chikakenyo chacho. Kuchi muhasa kuchilinga?

²⁰ Chitangu, likate ni mandumbu a mu chikungulwila chenu. Muze makupapachisa, muupwa mukachi ka “mandumbu” a hashi heswe. (1 Petu. 2:17) Mandumbu a mu chikungulwila kali asoko je a ku ufulielo. Muze muuya ku kukunguluka poso jeswe, mukolesa usepa we ni mandumbu. Chamuchaali, tanga Liji lia Zambi matangwa eswe ni kupukuna. (Samu 1:1, 2) Muze muhwisa kutanga yimwe yisoneko mu Mbimbiliya, chiza mashimbu hanga unyonge chinji ha yize watanga. Nyi mulinga chocho, maliji a mu yisoneko yacho makukwata ku mbunge. Chamuchitatu, ‘lemba’ mashimbu eswe. (Mateu 26:41) Kulemba ni mbunge yeswe muchikukwasa hanga ukundame kuli Yehova. Chamuchiwana, ‘lianga kufupa wanangana.’ (Mateu 6:33) Muhasa kuchilinga ha kusa mulimo wa kwambujola ha chihela chitangu ku mwono we. Nyi muwambujola matangwa eswe, mukolesa ufulielo we, nawa mukwasa akwenu hanga apwe ni kutalatala cha mwono wa mutolo.—1 Timo. 4:16.

21. Upapachiso we muukukwasa kupwa ni yika?

²¹ Chiyulo cha kulihana kuli Yehova, ni kukupapachisa, chili chilemu chinji ku mwono we. Kwamba pundu, twatamba kusa tachi jinji. Shina watamba lume kukwata chiyulo chacho? Ewa! Lamba lieswe lize mupwa nalio ha matangwa wano, lili “lia kashimbu . . . kakepekepe.” (2 Kori. 4:17) Nyi makupapachisa, muwahilila chinji ku mwono we musono, nawa mukapwa ni “mwono wamwenemwene” kulutwe lia matangwa. (1 Timo. 6:19) Kashika, nyonga kanawa, nawa lemba hakutwala ha kumbululo lia chihula chino: “Hiwalilulieka Hanga Akupapachise?”