1. Inn sak aa timmi pakhat nih a sak hlanah zeidah a tuah hmasa awk a si?

INN SAK aa timmi mi pakhat kha na mitthlam ah cuanter hmanh. Zeibantuk inn dah sak ka duh ti a ruahle cangka in thilri caw in inn kha a sa colh lai maw? A sa colh lai lo. A sak hlanah a biapi tukmi thil cheukhat a tuah a hau. Zeizat dah a dih lai ti kha a tuak hmasa a hau. Zeicah? Mah inn liim a si khawh nakhnga tangka a za in ka ngei maw ti kha a hngalh a hau. A dih hngami tangka kha ṭha tein a tuak hmasa ahcun inn kha ṭha tein a liim khawh lai.

2. Luka 14:27-30 ningin tipil na in hlanah zeidah ṭha tein na ruah awk a si?

² Jehovah na dawtnak le na sunsaknak nih tipil in awkah an forh maw? Cutin na si ahcun inn sak aa timmipa bantukin biakhiahnak na tuah ve a hau. Zeicah cutin kan chim khawh? Luka 14:27-30 ah kan hmuhmi Jesuh bia kha ruathmanh. (Rel.) Jesuh nih zultu siternak timi cu zei sullam dah a si ti kha a fianter. Jesuh zultu si kan duh ahcun “kan dih dingmi a um.” Mah cu zuamcawhnak le mah ca ṭhatnak hlawt awkah timhcia kan si a hau tinak a si. (Luka 9:23-26; 12:51-53) Cucaah tipil na in hlanah Khrih zultu ka hung si ahcun zei hna dah ka ton lai timi kong kha ṭha tein na ruah hmasa a hau. Cutin na ruah lawngah Khrihfa pakhat in Pathian kha zumhfek tein na biak khawh lai.

3. Hi capar ah zei kong dah kan i ruah hna lai?

³ Khrih zultu pakhat in tipil in cu a phu maw? A phu. Tipil innak nih atu le hmailei ah thluachuah tampi a kan hmuhter khawh. Tipil innak kong he aa tlaiin a biapimi biahalnak cheukhat kong kha i ruah hna hmanh u si. Cutin tuahnak nih “tipil in ding in timhcia ka si cang maw?” timi biahalnak a phi kha hngalh awkah an bawmh lai.

4. (a) Pumpeknak timi cu zeidah a si? (b) Matthai 16:24 ah a langhter bantukin mahle mah “i philh” timi nih zeidah a chim duhmi a si?

⁴ Pumpeknak timi cu zeidah a si? Tipil na in hlanah na pum naa pek hmasa a hau. Pumpeknak timi cu Jehovah sinah lungtak tein thlacam in ka nunchung dihlak na rian ka ṭuan lai i atu thawkin keimah duhnak si loin nangmah duhnak kha biapi bik ah ka chiah lai tiah na chimmi a si. Pathian sin pumpek timi cu mahle mah “i philh” kha a si. (Matthai 16:24 rel.) Atu cu Jehovah ta na si cang, mah cu tinvo sung taktak a si. (Rom 14:8) Atu thawk in nangmah duhnak si ti loin amah duhnak kha biapi ah ka chiah lai tiah Jehovah sinah chim. Pumpeknak timi cu Pathian sinah chiatser in bia naa kammi a si. Jehovah nih cu bantuk biakamnak tuah awkah hramhram in a kan hnek lo. Asinain biakamnak kan tuah tikah kan biakammi ningin tuah hna seh ti a kan duh.—Salm 116:12, 14.

5. Pumpeknak le tipil innak cu zeitindah aa thleidan?

⁵ Pumpeknak le tipil innak cu zeitindah aa thleidan? Pumpeknak timi cu nangmah le Jehovah kar ah a si. Tipil innak timi cu peng civui le pengkomh civui ti bantuk mi zapi hmaiah tuahmi a si. Tipil na in tikah Jehovah sinah kaa pumpe cang ti kha mi zapi hmai ah na langhter. * Cucaah tipil na inmi nih Jehovah kha lungthin dihlak, nunnak dihlak, ruahnak dihlak le thazaang dihlak in na dawt le a zungzal in amah biak dingmi biakhiahnak na tuah kha midang a hngalhter hna.—Mar. 12:30.

6-7. Tipil kan in awk a sinak a ruang pahnih cu 1 Peter 3:18-22 ningin zeidah an si?

⁶ Tipil in hi a herh taktak maw? 1 Peter 3:18-22 ah aa telmi bia hi ruathmanh. (Rel.) Tilawng cu Noah zumhnak a langhtertu thil a si bantukin tipil innak cu Jehovah sinah naa pumpeknak a langhtertu thil a si ve. Asinain tipil in cu a herh taktak maw? A herh. Tipil in a herhnak a ruang kha Peter nih a fianter. Pakhatnak ah, tipil innak nih “a kan khamh” khawh. Jesuh kan zumh kha kan tuahsernak in kan langhter, Jesuh cu kan caah a thi, van ah thawhter a si cang i atu cu “Pathian orhlei kam ah” a ṭhu cang ti kha kan zumh ahcun tipil innak nih a kan khamh khawh lai.

⁷ Pahnihnak ah, tipil innak nih “a ṭhami chiaṭha thleidannak lungthin” a kan ngeihter khawh. Pathian sinah kan pum kan i pek i tipil kan in tikah amah he a ṭhami pehtlaihnak kan hun ngei. Lungtak tein kan sualnak kan i ngaichih i tlanhnak man kha kan zumh ahcun kan sualnak kha ngaihthiam kan si lai. Cucaah Pathian hmaiah a ṭha mi chiaṭha thleidannak kan ngei kho.

8. Tipil in dingin biakhiahnak na tuahnak a ruang cu zeidah a si awk a si?

⁸ Tipil in awkah zei cungah hrambunh in dah bia na khiah awk a si? Baibal kha ṭha tein na hlathlai caah Jehovah kong, pumpak a sining le a phunglam hna kha na hun hngalh. Na hngalhmi kong nih na lung an suk tuk caah Jehovah kha na hun dawt tuk. Mah dawtnak cu tipil in dingin biakhiahnak na tuahnak a ruang a si awk a si.

9. Matthai 28:19, 20 ah a chimmi Pa le Fapa le thiang thlarau min in tipil in timi cu zei sullam dah a si?

⁹ Tipil in dingin biakhiahnak na tuahnak a dang a ruang pakhat cu Baibal kong biatak kha na hun zumh caah a si. Jesuh nih zultu siter dingin nawl a pek hna lioah zeidah a chim ti kha ruathmanh. (Matthai 28:19, 20 rel.) Jesuh nih “Pa le Fapa le thiang thlarau min” in tipil an in awk a si tiah a ti. Mah cu zei sullam dah a si? Jehovah, a Fapa Jesuh le thiang thlarau kong he aa tlaiin Baibal chimmi biatak  kong kha lungtak tein na zumh a hau. Mah biatak cu a ṭhawng tuk i na lungthin kha an suk khawh. (Heb. 4:12) A kong cheukhat kha i ruah hna hmanh u sih.

10-11. Kan Pa, Pathian kong he aa tlaiin zei biatak kong dah na zumh i na cohlan?

¹⁰ Kan Pa, Pathian kong he aa tlaimi a hmaanmi biatak kong kha ruat ṭhan hmanh: “A min cu Jehovah a si,” amah cu “vawleicung ah Cung Nung Bik” a si i a mah lawnglawng hi “a hmaanmi Pathian” a si. (Salm 83:18; Isa. 37:16) Cun Jehovah cu a kan Sertu le “khamhnak” a kan petu a si. (Salm 3:8; 36:9) Sualnak le thihnak sal sinak in khamh kan si nakhnga a kan timhpiak i zungzal nunnak ruahchannak zong a kan pek. (Johan 17:3) Naa pumpek i tipil na in tikah Jehovah Tehte pakhat na si kha na langhtermi a si. (Isaiah 43:10-12) Tipil na innak thawngin Pathian min auhnak tinvosung le midang sinah Pathian kong a chimtu vawleicung pumpi i chungkhar ah na hun i tel kho.—Salm 86:12.

¹¹ Kan Pa, Pathian kong he aa tlaiin Baibal nih a kan cawnpiakmi kong hngalhthiam cu tinvo sung taktak a si. Mah a sunglawi tukmi biatak kong na hun zumh tikah Jehovah sinah i pumpek awk le tipil in awkah an forh lai.

12-13. A Fapa kong he aa tlaiin zei biatak dah na zumh i na cohlan?

¹² Fapa kong he aa tlaiin biatak kong kha na hun hngalh tikah zeitindah na lehrulh? Jesuh cu van le vawlei ah a pahnihnak a biapi bikmi a si. A kan Tlanhtu zong a si. Kan caah lungtho tein a nunnak a pek. Tlanhnak man kan zumh kha kan tuahsernak in kan langhter ahcun kan sualnak ngaihthiam kan si kho. Cun Pathian he a ṭhami pehtlaihnak kan ngei kho i zungzal nunnak zong kan hmu kho. (Johan 3:16) Jesuh cu kan Tlangbawi Ngan a si. Tlanhnak man thawngin ṭhathnemhnak kan hmuh khawh nakhnga le Pathian he a ṭhami pehtlaihnak kan ngeih khawh nakhnga bawmh a kan duh. (Heb. 4:15; 7:24, 25) Pathian Pennak Siangpahrang a simi Jesuh hmangin Jehovah nih a min kha a thianter lai, cun ṭhatlonak vialte a donghter lai i Paradis ah zungzal thluachuah a kan pek lai. (Matt. 6:9, 10; Biat. 11:15) Jesuh nih kan caah zohchunhawk ṭha a chiah. (1 Pet. 2:21) Jesuh nih Pathian rianṭuannak caah a nunnak a hmannak thawngin kan caah zohchunh awk ṭha a chiah.—Johan 4:34.

¹³ A dawt tukmi a Fapa Jesuh kong he aa tlaiin Baibal chimmi kong kha na hngalh tikah Jesuh kha na hun dawt tuk. Mah dawtnak nih Jesuh bantukin na nunnak dihlak kha Pathian caah pek dingin an forh. A phichuak cu mah nih Jehovah sinah i pumpek ding le tipil in dingin aan forh.

14-15. Thiang thlarau kong he aa tlaiin zei biatak dah na zumh i na cohlan?

¹⁴ Thiang thlarau kong he aa tlaiin a hmaanmi biatak na hngalh tikah zeitindah na um? Thiang thlarau cu mi pakhat a si lo Pathian rianṭuan ṭhawnnak a si. Jehovah nih thiang thlarau hmangin Baibal kha a rak ṭialter hna. Baibal kan relmi kha kan hngalhthiam i kan nunnak ah kan hman khawh nakhnga thiang thlarau nih a kan bawmh. (Johan 14:26; 2 Pet. 1:21) Thiang thlarau thawngin Jehovah nih “thil ti khawhnak ṭhawnnak” a kan pek. (2 Kor. 4:7) Thawngṭha chim khawh awk, tukforhnak tei khawh awk, lungdonghnak tei khawh awk le harnak hna inkhawh awkah thiang thlarau nih thazaang a kan pek. Mah nih “thlarau nih a chuahtermi” ziaza hna kha ngeih awkah a kan bawmh. (Gal. 5:22) Pathian nih a mah a zummi hna le lungtak tein a sinah thla a cam mi hna cu thiang thlarau a pek hna.—Luka 11:13.

¹⁵ Jehovah a biami hna nih thiang thlarau i bochan khawh a si ti an hngalhmi cu zei tlukin dah hnemtu a si. Thiang thlarau kong he aa tlaiin a hmaanmi biatak na hun hngalh tikah  mah nih nangmah le nangmah Pathian sinah i pumpek in tipil in awkah an forh lai.

16. Atu kan i ruahmi ningin zeidah kan hngalh cang?

¹⁶ Pathian sinah i pumpek in tipil in dingin bia na khiahmi cu a biapi tukmi a si. Kan rak cawn cang bantukin, zuamcawhnak le mahca ṭhatnak hlawt awkah timhcia kan si a hau. Asinain thluachuah tampi kan hmu ṭhan lai. Tipil innak nih a kan khamh khawh i Pathian hmaiah a ṭhami chiaṭha thleidannak lungthin a kan ngeihter khawh. A bik in tipil in dingin biakhiahnak na tuahnak a ruang cu Jehovah Pathian na dawt caah a si awk a si. Pa, Fapa le thiang thlarau kong he aa tlaiin a hmaanmi biatak kha lungthin dihlak in na zumh a hau. Atu kan i ruahmi ningin “tipil in dingin timhcia ka si cang maw?” timi biahalnak hi zeitindah na leh lai.

17. Tipil na in hlanah zeidah na tuah a hau?

¹⁷ Tipil in dingin timhcia ka si cang tiah na ruah ahcun Jehovah he a ṭhami pehtlaihnak ngeih * awkah thil tampi na tuah cang tinak a si. Hmaan tein Baibal na hlathlai caah Jehovah le Jesuh kong kha tampi na hngalh cang. Na zumhnak zong a ṭhangcho chin. (Heb. 11:6) Cun Baibal chung i Jehovah biakam pawl kha na hun zumh chin. Mah lengah Jesuh tlanhnak man nih sualnak le thihnak sal sinak in aan khamh khawh ti zong na hun zumh. Na tuah sualmi palhnak ruangah naa ngaihchih i Jehovah sinah lungtak tein thla na cam. A hmasa i a ṭha lomi na nunning hlun kha na hlawt i na nunning kha na thlen. Cun Pathian duhmi lam ningin na nung. (Lam. 3:19) Na zumhnak kong kha midang sinah na chim. Mah tikah tipil a ing rih lomi thawngthanhtu pakhat in sining na tlinh i Khrihfabu he phungchim rianṭuannak ah naa hun i tel. (Matt. 24:14) Mah a herhmi thil hna na hun tuah tikah Jehovah cu na caah aa uangthar tuk. Mah lengah a lung zong na lawmhter.—Ptb. 27:11.

18. Tipil na in hlanah zeidah na tuah a hau rih?

¹⁸ Tipil na in hlanah na tuah dingmi thil cheukhat a um rih. A cunglei ah kan cawn cang bantukin Pathian sinah naa pumpek hmasa a hau. Lungtak tein thlacam le na nunnak kha amah duhnak tuahnak caah ka hman lai tiah bia naa kam a hau. (1 Pet. 4:2) Cun tipil in na duhnak kong kha Khrihfa upa phu i khuakhangtu kha hngalhter. Amah nih Khrihfa upa cheukhat he i ton dingin an timhtuahpiak lai. Anmah pawl he i ton ding kha ṭih hlah. Mah unaupa hna nih an in hngalh i an in dawt ti kha zum. Na hngalh ciami a hrampi Baibal cawnpiaknak hna kha an in chimh ṭhan lai. Mah cu Baibal cawnpiaknak hna kha hngalhthiam in pumpeknak le tipil innak cu zeitluk in dah a biapit ti kha hngal seh ti an in duh caah a si.  Khrihfa upa pawl nih tipil in dingin timhcia a si cang tiah an hna a tlak ahcun a ra laimi peng civui asiloah pengkomh civui ah tipil in khawh a si cang tiah thawng an in thanh lai.

19-20. Tipil na in hnuah zeidah na tuah a hau, cutin zeitindah na tuah khawh?

¹⁹ Tipil na in hnuah zeidah na tuah a hau? * Pumpeknak timi cu biakamnak na tuahmi a si i na biakam ningin tuah awk zongah Jehovah nih aa ruahchan. Cucaah tipil na in hnuah na biakamnak ningin na nun a hau. Zei ti lam in dah?

²⁰ Khrihfabu he naih tein um. Khrihfa pakhat in tipil na in cang caah ‘zumhnak leiin unau phu ah’ aa telmi na hung si cang. (1 Pet. 2:17) Khrihfabu i unau pawl cu thlaraulei na chungkhar bantuk an si. Hmaan tein i pumhnak thawngin unau pawl he i hawikomh deuh awkah i zuam. Baibal kha nifatin rel law ruat. (Salm 1:1, 2) Baibal na rel dih hnuah na relmi kong kha ṭha tein ruah awkah a caan pe. Mah lawngah na lung ah a lut kho lai. Cun “thlacam” zungzal. (Matt. 26:41) Lungtak tein thlacamnak nih Jehovah he aan naih ter lai. “Cun . . . Pathian Pennak kha hmasa bik ah chia.” (Matt. 6:33, NW) Na nunnak ah phungchim rian kha biapi bikah na chiah ahcun na zumhnak cu a fek chin lai i midang zong zungzal nunnak an hmuh nakhnga na bawmh khawh hna lai.—1 Tim. 4:16.

21. Tipil innak nih zei ṭhatnak dah aan hmuhter lai?

²¹ Jehovah sinah i pumpek le tipil in cu a biapi tukmi biakhiahnak a si. A dihmi a um lai ti cu a fiang ko. Asinain mah cu a phu maw? A phu ko. Hi vawlei ṭha lo ah kan ton dingmi ṭhatlonak vialte cu “caan tawite” lawng an si lai. (2 Kor. 4:17) Tipil na innak nih atu ah a ṭha deuhmi nunnak an hmuhter lengah hmailei ah “nunnak taktak” aan hmuhter lai. (1 Tim. 6:19) Cucaah “tipil In dingin timhcia ka si cang maw?” timi biahalnak kha thlacam buin ṭha tein ruat.