1. ¿Chuqui yom miʼ mel juntiquil lac piʼʌl cheʼ maxto i teche i mel jumpʼejl otot?

ÑAʼTANCU juntiquil wiñic yom bʌ i mel (pʌt) jumpʼejl otot yujilix bʌ bajcheʼ yilal yom miʼ mel. Pero ¿muʼ ba caj i majlel i mʌn ti ora jiñi muʼ bʌ caj i cʼʌn i mi caj i tech i waʼchocon? Maʼañic. Ñaxan, an chuqui ñuc bʌ i cʼʌjñibal yom miʼ mel (chaʼlen): Yom miʼ qʼuel jaypʼejl i tojol mi caj i loqʼuel. ¿Chucoch? Come yom miʼ qʼuel mi mucʼʌch i caj i jastiyel i taqʼuin. Mi cheʼʌch miʼ mel, mucʼʌch caj i mejlel i waʼchocon i yotot.

2. Cheʼ bajcheʼ miʼ yʌl Lucas 14:28-30, ¿chuqui yom maʼ ñaxan ñaʼtan cheʼ bʌ muʼto i cajel a chʼʌm jaʼ?

² ¿Woli (choncol) baʼ i ñijcañet jiñi a cʼuxbiya ti Jehová yicʼot cheʼ maʼ qʼuel ti ñuc chuqui melbil i chaʼan ti a tojlel chaʼan maʼ ñaʼtan a chaʼlen chʼʌm jaʼ? Mi cheʼʌchi, lajalet bajcheʼ jiñi wiñic yom bʌ i mel i yotot. ¿Chucoch cheʼ mi la cʌl? Ñaʼtancu jiñi i tʼan Jesús muʼ bʌ lac taj ti Lucas 14:28-30 (pejcan). Miʼ taj ti tʼan bajcheʼ yom juntiquil xcʌntʼan i chaʼan: Miʼ jacʼ i ñusan wocol tac yicʼot miʼ cʌy chuqui tac miʼ mulan (Lc. 9:23-26; 12:51-53). Jin chaʼan, cheʼ bʌ muʼto caj a chʼʌm jaʼ, yom maʼ wen ñaʼtan pejtelel chuqui mi caj a ñusan cheʼ maʼ sujtel ti xcʌntʼan i chaʼan Cristo. Cheʼ bajcheʼ ili, chajpʌbilet mi caj a wajñel chaʼan xucʼul maʼ bej melben i yeʼtel (troñel) Dios cheʼ bʌ tsaʼix a chaʼle chʼʌmʌ jaʼ.

3. ¿Chuqui mi caj lac tsajin ti ili estudio?

³ Cheʼ maʼ ñaʼtan pejtelel chuqui mi caj a ñusan cheʼ maʼ chʼʌm jaʼ, ¿añʌch baʼ i cʼʌjñibal chaʼan maʼ mel? ¡Ancu! Jiñi chʼʌm jaʼ mi caj i yʌqʼueñet cabʌl bendición ili ora yicʼot ti talto bʌ qʼuin. Ti ili estudio, mi caj laj qʼuel chaʼpʼejl uxpʼejl cʼajtiya tac chaʼan jiñi chʼʌmjaʼ. Ili mi caj i coltañet a ñaʼtan mi chajpʌbiletix chaʼan maʼ mel.

4. a) ¿Chuqui yom i yʌl cheʼ mi la cʌcʼ lac bʌ ti Jehová? b) ¿Chuqui yom i yʌl cheʼ mi laj cʌy chuqui bajñel la com lac mel bajcheʼ miʼ yʌl Mateo 16:24, TNM?

⁴ ¿Chuqui yom i yʌl cheʼ maʼ wʌcʼ a bʌ ti Dios? Jiñʌch yom bʌ maʼ ñaxan mel chaʼan miʼ mejlel a chʼʌm jaʼ. Maʼ suben Jehová ti jumpʼejl oración chaʼan ti jumpʼejl a pusicʼal mi caj a cʼʌn a cuxtʌlel chaʼan maʼ melben i yeʼtel tiʼ pejtelel ora (pejcan Mateo 16:24, TNM). * Ti jiñi jach bʌ ora, jiñʌch ñuc bʌ a majtan cheʼ mi caj a wajñel tiʼ tojlel Jehová (Ro. 14:8). Cheʼ bʌ maʼ wʌqʼuen a cuxtʌlel Jehová, woli (yʌquel) a suben chaʼan ti jumpʼejl a pusicʼal mi caj a melben i yeʼtel, i maʼañic mi caj a mel chuqui bajñel a wom. Jehová maʼañic miʼ xicʼonla chaʼan mi la cʌl iliyi. Pero cheʼ mi lac suben chaʼan mi caj la cʌqʼuen laj cuxtʌlel, miʼ pijtan chaʼan mi lac tsʼʌctesan (Sal. 116:12, 14).

5. ¿Chucoch mach lajalic cheʼ mi la cʌcʼ lac bʌ ti Dios yicʼot jiñi chʼʌmjaʼ?

⁵ ¿Chucoch mach lajalic cheʼ maʼ wʌcʼ a bʌ ti Dios yicʼot cheʼ maʼ chaʼlen chʼʌm jaʼ? Cheʼ mi la cʌcʼ lac bʌ ti Jehová, ti lac bajñelil jach mi lac mel, i mach yujilic yambʌlob. Pero jiñi chʼʌmjaʼ, jiñʌch muʼ bʌ lac mel tiʼ tojlel cabʌl wiñicob xʼixicob (quixtañujob), iliyi miʼ mejlel ti colem tempa bʌ tac. Cheʼ maʼ chʼʌm jaʼ, jiñʌch baqui maʼ pʌsben yambʌlob chaʼan tsaʼix a wʌqʼue a cuxtʌlel Jehová. * Yom i yʌl, maʼ pʌsben jiñi yambʌlob chaʼan maʼ cʼuxbin tiʼ pejtelel a pusicʼal, a cuxtʌlel, a ñaʼtʌbal yicʼot a pʼʌtʌlel, i chaʼan mi caj a melben i yeʼtel tiʼ pejtelel ora (Mr. 12:30).

6, 7. Cheʼ bajcheʼ miʼ yʌl 1 Pedro 3:21, ¿chuqui chaʼchajp ñuc bʌ i cʼʌjñibal chaʼan mi lac chʼʌm jaʼ?

⁶ ¿Añʌch ba i cʼʌjñibal cheʼ maʼ chaʼlen chʼʌm jaʼ? Cheʼ bajcheʼ jiñi arca tsiʼ pʌsʌ chaʼan añʌch i ñopoñel (chʼujbiya) Noé, cheʼ maʼ chʼʌm jaʼ maʼ pʌs chaʼan tsaʼix a wʌqʼue a cuxtʌlel Jehová (1 P. 3:18-20, TNM). Pero ¿ñucʌch baʼ i cʼʌjñibal chaʼan maʼ mel iliyi? Cheʼʌchi, i jiñi Pedro tiʼ tsictesa chucoch (Pejcan 1 Pedro 3:21). Ñaxam bʌ, tsiʼ yʌlʌ: «Mi laj coltʌntel». Jiñi chʼʌmjaʼ miʼ mejlel i coltañonla cheʼ mi lac pʌs ti lac melbal chaʼan mucʼʌch lac ñop Jesús yicʼot chaʼan tsaʼ chʌmi (sajti) ti lac tojlel, chaʼan tsaʼ chaʼ cuxtʌyi, yicʼot chaʼan wʌle bʌ ora yaʼix an «tiʼ ñoj Dios» (1 P. 3:22).

⁷ I chaʼpʼejlel, jiñi chʼʌmjaʼ miʼ yʌcʼ chaʼan «miʼ pʌsonla ti sʌc tiʼ wut Dios cheʼ ñʌchʼʌl lac pusicʼal». Cheʼ mi la cʌcʼ lac bʌ ti Dios yicʼot cheʼ mi lac chʼʌm jaʼ, mi lac sujtel tiʼ yamigo. Come tsaʼix laj cʌyʌ lac mul yicʼot an lac ñopoñel chaʼan i tojol laj coltʌntel, Dios miʼ ñusʌbeñonla lac mul. Cheʼ bajcheʼ iliyi, mi caj lac ñusan lac bʌ chaʼan sʌc miʼ yajñel laj conciencia ti Dios.

8. ¿Baqui yom chucul cheʼ maʼ ñaʼtan chʼʌm jaʼ?

⁸ ¿Baqui yom chucul cheʼ maʼ ñaʼtan chʼʌm jaʼ? Tsajibil a chaʼan jiñi Biblia, jin chaʼan cabʌl chuqui cʌmbil a chaʼan tiʼ tojlel Jehová, bajcheʼ yilal i melbal yicʼot bajcheʼ yilal miʼ chaʼlen pensar. Cʼotem ti a pusicʼal pejtelel iliyi i miʼ ñijcañet chaʼan maʼ wen cʼuxbin. Cheʼ maʼ ñaʼtan chʼʌm jaʼ yomʌch yaʼ chucul ti a cʼuxbiya muʼ bʌ a wubin tiʼ tojlel Jehová.

9. ¿Chuqui yom i yʌl cheʼ mi lac chʼʌm jaʼ tiʼ cʼabaʼ lac Tat, tiʼ cʼabaʼ i Yalobil yicʼot tiʼ cʼabaʼ chʼujul bʌ espíritu, cheʼ bajcheʼ miʼ yʌl Mateo 28:19, 20?

⁹ Cheʼ maʼ ñaʼtan chʼʌm jaʼ yaʼʌch chucul jaʼel ti jiñi cʌntesʌntel tac tsaʼ bʌ a cʌñʌ ti Biblia yicʼot tsaʼ bʌ a ñopo. Ñaʼtan tsaʼ bʌ i yʌlʌ Jesús cheʼ tsiʼ yʌcʼʌ jiñi mandar chaʼan mi lac sutqʼuin ti xcʌntʼan yambʌlob (pejcan Mateo 28:19, 20). Cheʼ bajcheʼ tsiʼ yʌlʌ, jiñi muʼ bʌ i chʼʌmob jaʼ yom miʼ melob «tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu». Ili yom i yʌl  chaʼan yom mi lac ñop pejtelel muʼ bʌ i cʌntesañonla jiñi Biblia tiʼ tojlel Jehová, i Yalobil, Jesús, yicʼot jiñi chʼujul bʌ i yespíritu. Ili cʌntesʌntel tac cabʌlʌch i pʼʌtʌlel yicʼot miʼ mejlel i ñijcan lac pusicʼal (He. 4:12). Laʼ laj cʼajtesan chaʼpʼejl uxpʼejl.

10, 11. ¿Baqui bʌ i sujmlel tac tiʼ tojlel lac Tat an a cʌñʌ yicʼot an a ñopo?

¹⁰ ¿Cʼajal baʼ chaʼan cheʼ bʌ tsaʼ cʌñʌ jiñi i sujmlel tac tiʼ tojlel lac Tat? I cʼabaʼ jiñʌch Jehová, jiñʌch ‹jiñi Cʼax ñuc bʌ tiʼ pejtelel Pañimil› yicʼot jiñʌch jiñi «isujm bʌ» Dios (Sal. 83:18, TNM; Jer. 10:10). Jiñʌch tsaʼ bʌ i meleyonla yicʼot yaʼʌch baqui «chʼoyol laj coltʌntel» (Sal. 3:8; 36:9). Cheʼ jaʼel, an i chajpa chaʼan miʼ coltañonla loqʼuel ti mulil yicʼot ti chʌmel, yicʼot an i yʌqʼueyonla jiñi lac pijtaya chaʼan mi lac chumtʌl tiʼ pejtelel ora (Jn. 17:3). Cheʼ maʼ wʌcʼ a bʌ ti Jehová yicʼot cheʼ maʼ chʼʌm jaʼ, maʼ pʌsben yambʌlob chaʼan i testigojetix Jehová (Is. 43:10-12). Mi caj a wochel ti jumpʼejl familia muʼ bʌ i chʼujutesañob Jehová, miʼ qʼuelbeñob ti ñuc i cʼabaʼ yicʼot miʼ yʌcʼob ti cʌjñel (Sal. 86:12).

¹¹ Wen ñucʌch cheʼ mi lac chʼʌmben i sujm muʼ bʌ i cʌntesañonla jiñi Biblia tiʼ tojlel lac Tat. Cheʼ maʼ wen qʼuel ti ñuc jiñi i sujmlel, mi caj i ñijcañet chaʼan maʼ wʌcʼ a bʌ ti Jehová yicʼot chaʼan maʼ chʼʌm jaʼ.

12, 13. ¿Baqui bʌ i sujmlel tac tiʼ tojlel i Yalobil Dios an a cʌñʌ yicʼot an a ñopo?

¹² ¿Bajcheʼ yubil tsaʼ wubi a bʌ cheʼ tsaʼ cʼoti a cʌmben i sujmlel tiʼ tojlel i Yalobil Dios? Jesús jiñʌch i chaʼticlel wen ñuc bʌ ti panchan yicʼot ti pañimil. Jiñʌch laj Caj coltaya come ti jumpʼejl i pusicʼal tsiʼ yʌcʼʌ i cuxtʌlel chaʼan miʼ coltañonla. Cheʼ mi lac pʌs ti lac melbal chaʼan añʌch lac ñopoñel chaʼan jiñi i tojol laj coltʌntel, miʼ mejlel i ñusʌntel lac mul, lac sujtel tiʼ yamigo Dios yicʼot lac taj laj cuxtʌlel mach bʌ añic miʼ jilel (Jn. 3:16). Jesús jiñʌch jiñi Ñuc bʌ Motomaj lac chaʼan jaʼel come yom i coltañonla chaʼan mi lac tajben i wenlel jiñi i tojol laj coltʌntel yicʼot chaʼan mi lac ñumen sujtel tiʼ yamigo Jehová (He. 4:15; 7:24, 25). Come jiñʌch jiñi Rey tiʼ Yumʌntel Dios, Jehová mi caj i cʼʌn chaʼan miʼ sʌqʼuesan i cʼabaʼ, miʼ jisan jontolil yicʼot miʼ yʌqʼueñonla bendición tac tiʼ pejtelel ora yaʼ ti Paraíso (Mt. 6:9, 10; Ap. 11:15). Cheʼ jaʼel, Jesús jiñʌch jiñi wem bʌ ejemplo lac chaʼan (1 P. 2:21). Tsiʼ cʼʌñʌ i cuxtʌlel chaʼan miʼ mel chuqui yom Dios i cheʼʌch tsiʼ pʌsbeyonla chaʼan yom mi lac lajiben i melbal (Jn. 4:34).

¹³ Cheʼ bʌ maʼ ñop chuqui miʼ cʌntesañonla jiñi Biblia tiʼ tojlel Jesús, mi caj i cʼotel a cʼuxbin jiñi i Yalobil Jehová. Jiñi cʼuxbiya mi caj i ñijcañet chaʼan maʼ cʼʌn a cuxtʌlel chaʼan maʼ mel chuqui yom Dios, cheʼ bajcheʼ tsiʼ mele Jesús. I cheʼ jiñi, mi caj a mulan a wʌcʼ a bʌ ti Jehová yicʼot a chʼʌm jaʼ.

14, 15. ¿Baqui bʌ i sujmlel tac chaʼan jiñi chʼujul bʌ i yespíritu Dios an a cʌñʌ yicʼot an a ñopo?

¹⁴ ¿Chuqui tsaʼ ñaʼta cheʼ bʌ tsaʼ cʌñʌ jiñi i sujmlel chaʼan jiñi chʼujul bʌ i yespíritu Dios? Mach juntiquilic quixtañu, jiñʌch i pʼʌtʌlel Dios. Jehová tsiʼ cʼʌñʌ chaʼan miʼ tojʼesañob jiñi tsaʼ bʌ i tsʼijbuyob jiñi Biblia, i jiñi chʼujul bʌ espíritu miʼ coltañonla lac chʼʌmben i sujm yicʼot bajcheʼ mi laj cʼʌn ti laj cuxtʌlel muʼ bʌ lac pejcan (Jn. 14:26; 2 P. 1:21). Ti jiñi chʼujul bʌ i yespíritu, Jehová miʼ yʌqʼueñonla «jini ñuc bʌ lac pʼʌtʌlel» (2 Co. 4:7). Jiñi chʼujul bʌ espíritu miʼ yʌqʼueñonla lac pʼʌtʌlel chaʼan mi lac sub jiñi wen tʼan, chaʼan maʼañic mi lac yajlel ti mulil, mi lac ñusan jiñi lac chʼijiyemlel yicʼot laj cuch jiñi wocol tac. Cheʼ jaʼel, miʼ coltañonla lac pʌs jiñi utsʼatax bʌ lac melbal tac ochem bʌ ti jiñi «i yʌcʼbal jiñi Espíritu» (Gá. 5:22). Dios miʼ yʌqʼuen chʼujul bʌ i yespíritu jiñi muʼ bʌ i ñopob tiʼ tojlel yicʼot muʼ bʌ i cʼajtibeñob (Lc. 11:13).

 ¹⁵ Miʼ ñuqʼuesan lac pusicʼal cheʼ la cujil chaʼan jiñi muʼ bʌ i chʼujutesañob Jehová, miʼ mejlel i ñopob chaʼan jiñi chʼujul bʌ i yespíritu miʼ mejlel i coltañob chaʼan miʼ melbeñob i yeʼtel. Cheʼ bʌ maʼ ñop jiñi i sujmlel chaʼan jiñi chʼujul bʌ espíritu, mi caj i ñijcañet chaʼan maʼ wʌcʼ a bʌ ti Dios yicʼot chaʼan maʼ chʼʌm jaʼ.

16. ¿Chuqui tsaʼix bʌ ujti lac tsajin?

¹⁶ Cheʼ maʼ wʌcʼ a bʌ ti Dios yicʼot cheʼ maʼ chʼʌm jaʼ wen ñuc i cʼʌjñibal. Cheʼ bajcheʼ tsaʼix laj cʌñʌ, ti jumpʼejl a pusicʼal yom maʼ jacʼ a ñusan jiñi wocol tac. Pero jiñi i wenlel muʼ bʌ lac taj ñumen cabʌl bajcheʼ jiñi wocol tac muʼ bʌ lac ñusan o chuqui tac mi lac bajñel mulan lac mel. Jiñi chʼʌmjaʼ miʼ mejlel i coltañonla yicʼot chaʼan sʌc miʼ yajñel jiñi laj conciencia tiʼ tojlel Dios. Cheʼ maʼ ñaʼtan a chʼʌm jaʼ yaʼʌch yom chucul ti jiñi cʼuxbiya am bʌ a chaʼan tiʼ tojlel Jehová. Cheʼ jaʼel, yom maʼ ñop ti jumpʼejl a pusicʼal jiñi i sujmlel tac tiʼ tojlel lac Tat, i Yalobil yicʼot jiñi chʼujul bʌ i yespíritu. Tiʼ pejtelel jiñi tsaʼix bʌ lac tsaji, ¿muʼ baʼ wʌl chaʼan chajpʌbiletix chaʼan maʼ chʼʌm jaʼ?

17. ¿Chuqui tac yom maʼ mel chaʼan maʼ cʼotel a chʼʌm jaʼ?

¹⁷ Mi chajpʌbiletix maʼ wubin chaʼan maʼ chaʼlen chʼʌm jaʼ, miʼ mejlel lac ñaʼtan chaʼan añix chuqui tac melbil a chaʼan chaʼan maʼ sujtel tiʼ yamigo Jehová. * Come tsajibil a chaʼan jiñi Biblia, cabʌl chuqui an a cʌñʌ tiʼ tojlel Jehová yicʼot tiʼ tojlel Jesús, i tsaʼ cʼoti a ñop (He. 11:6). Maʼ wen ñop chuqui albil i chaʼan Jehová yaʼ ti Biblia, i maʼ ñop chaʼan jiñi i cuxtʌlel tsaʼ bʌ i yʌcʼʌ Jesús miʼ mejlel i coltañet loqʼuel ti jiñi mulil yicʼot chʌmel. Tsaʼix a cʌyʌ a mul, yom i yʌl, chaʼan wem cʼux maʼ wubin pejtelel chuqui tsaʼ mele yicʼot tsaʼix a cʼajtibe Jehová chaʼan miʼ ñusʌbeñet. Tsaʼix a ‹sutqʼui a bʌ› ti jiñi a cuxtʌlel, yom i yʌl, chaʼan tsaʼix a cʌyʌ jiñi muʼ bʌ a mel ti ñaxan i tsaʼix a teche a mel muʼ bʌ i mulan Dios (Hch. 3:19). Maʼ wubin chaʼan a wom a suben jiñi yambʌ quixtañujob chuqui ñopol a chaʼan. Tsaʼix a tsʼʌctesa chuqui miʼ cʼajtintel chaʼan maʼ wochel bajcheʼ xsubtʼan i woliyetix ti subtʼan yicʼot jiñi congregación (Mt. 24:14). Wen tijicña miʼ yubin i bʌ Jehová ti a tojlel cheʼ tsaʼix a mele pejtelel jiñi ñuc tac bʌ i cʼʌjñibal (Pr. 27:11).

18. ¿Chuqui yambʌ yom maʼ mel cheʼ muʼto caj a chʼʌm jaʼ?

¹⁸ Cheʼ muʼto i cajel a chaʼlen chʼʌm jaʼ añixto chuqui yom maʼ mel. Cheʼ bajcheʼ tsaʼ laj qʼuele, yom maʼ wʌcʼ a bʌ ti Dios, yom i yʌl, chaʼan maʼ melben jumpʼejl oración ti a bajñelil i ti jumpʼejl a pusicʼal maʼ suben chaʼan tiʼ pejtelel ora mi caj a cʼʌn a cuxtʌlel chaʼan maʼ melben i yeʼtel (1 P. 4:2). Ti wiʼil, suben jiñi coordinador i chaʼan ancianojob chaʼan a womix a chʼʌm jaʼ. Jin mi caj i suben chaʼtiquil uxtiquil ancianojob chaʼan miʼ tempañob i bʌ a wicʼot. Mach a cʼojoʼtan, jiñi hermanojob i cʌñʌyetobix yicʼot miʼ cʼuxbiñetob. Mi caj laʼ tem qʼuel chuqui tac tsaʼix bʌ  a cʌñʌ ti Biblia chaʼan miʼ ñaʼtañob mi mucʼʌch a chʼʌmben i sujm yicʼot chaʼan mi ñucʌch maʼ qʼuel cheʼ maʼ wʌcʼ a bʌ ti Dios yicʼot cheʼ maʼ chʼʌm jaʼ. Mi tsaʼ cʼoti i qʼuelob chaʼan chajpʌbiletix, mi caj i subeñetob chaʼan mejlix a chʼʌm jaʼ ti jiñi colem tempa bʌ muʼ bʌ caj i yujtel.

19, 20. ¿Chuqui yom maʼ mel cheʼ bʌ tsaʼix a chʼʌmʌ jaʼ, i chuqui mi caj i coltañet?

¹⁹ ¿Chuqui yom maʼ mel cheʼ tsaʼix a chʼʌmʌ jaʼ? * Cʼajtesan chaʼan cheʼ tsaʼ wʌcʼʌ a bʌ ti Dios tsaʼ wʌqʼue a tʼan i miʼ pijtan chaʼan maʼ tsʼʌctesan. Jin chaʼan, cheʼ bʌ tsaʼix a chʼʌmʌ jaʼ, yomʌch maʼ chumtan cheʼ bajcheʼ tsaʼ wʌcʼʌ a bʌ ti Dios. ¿Chuqui mi caj i coltañet?

²⁰ Lʌcʼʌl yom maʼ wajñel ti a congregación. Cheʼ maʼ chʼʌm jaʼ, mi caj a wochel ti jiñi junmojt hermanojob (1 P. 2:17). Jiñi añoʼ bʌ ti congregación jiñʌch a familia tiʼ chaʼañoʼ bʌ Dios. Mi ti bele ora maʼ wajñel ti tempa bʌ tac, mi caj i ñumen sujtelob ti a wamigojob. Pejcan ti jujumpʼejl qʼuin jiñi Biblia yicʼot wen ñaʼtan (Sal. 1:1, 2). Ili yom i yʌl chaʼan cheʼ bʌ tsaʼix ujti a pejcan jumpʼejl texto, yom maʼ wʌqʼuen i yorajlel chaʼan maʼ wen ñaʼtan tsaʼ bʌ a pejca. Cheʼ bajcheʼ jiñi, mi caj i cʼotel ti a pusicʼal. Cheʼ jaʼel, yom maʼ mel iliyi: «Chʌn chaʼlenla oración» (1 Ts. 5:17). Jiñi oración tac loqʼuem bʌ ti a pusicʼal, mi caj i ñumen lʌcʼtesañet ti Jehová. Yicʼot chʌn sajcan ti ñaxan «i yumʌntel Dios» (Mt. 6:33). ¿Bajcheʼ? Jiñʌch cheʼ ñaxan mi a wʌcʼ ti a cuxtʌlel tiʼ subol jiñi wen tʼan. Mi ti bele ora maʼ loqʼuel ti subtʼan, pʼʌtʌl mi caj i yajñel jiñi a ñopoñel yicʼot tajol mi caj a coltan yambʌlob chaʼan miʼ yochelob ti jiñi bij baʼ mi lac taj jiñi cuxtʌlel mach bʌ añic miʼ jilel (1 Ti. 4:16).

21. ¿Chuqui mi caj i yʌqʼueñet a taj cheʼ maʼ chaʼlen chʼʌm jaʼ?

²¹ Cheʼ maʼ ñaʼtan a wʌcʼ a bʌ ti Jehová yicʼot cheʼ maʼ chʼʌm jaʼ jiñʌch ñumen ñuc bʌ i cʼʌjñibal maʼ mel ti a cuxtʌlel. I sujmʌch chaʼan añʌch chuqui tac mi caj lac ñusan. Pero miʼ mejlel a ñop chaʼan añʌch i cʼʌjñibal. Jiñi wocol tac muʼ bʌ a ñusan ila ti pañimil (mulawil), «sejb» yicʼot «poj jumucʼ jach miʼ ñumel» (2 Co. 4:17). Pero come tsaʼ chʼʌmʌ jaʼ, mi caj a taj a tijicñʌyel ti a cuxtʌlel ili ora yicʼot a taj a «cuxtʌlel mach bʌ yujilic jilel» ti talto bʌ qʼuin (1 Ti. 6:19). Jin chaʼan, wen ñaʼtan, melben oración Jehová yicʼot jacʼʌ ili cʼajtiya: «¿Chajpʌbiloñix ba chaʼan mic chʼʌm jaʼ?».