1. Nemene la nyine troa pane kuca hnene la atr ka ajane troa acili uma?

 PANE mekune jë la atr ka ajane troa acili uma. Atre hë angeic la pengöne uma hnei angeic hna ajan. Ngo hapeu, tro kö angeic a canga itöne la itre jiane huliwa? Ohea. Qëmekene troa nyiqaan, loi e tro angeic a pane atre la thupen. Pine nemen? Loi e tro angeic a pane wang ka hape, ijije jë kö la manie, matre afenesine la uma. Maine tro angeic a pane lapa mekune la thupen, tro hë angeice lai a acile la uma.

2. Thenge la hna qaja ngöne Luka 14:27-30, nemene la nyine tro sa pane mekun qëmekene troa xomi bapataiso?

² Hapeu, hnene kö la ihnim me hni ne ole së koi Iehova, matre easa xomi bapataiso? Maine eje hi, loi e tro sa tune la atr ka ajane troa acili uma. Pine nemen? Hanawang la itre trengewekë i Iesu ngöne Luka 14:27-30. (E jë.) Iesu a qaja la pengöne la atre drei nyidrë. Maine easa ajane troa xötrethenge Iesu, loi e tro sa kapa la “thupen,” ene la troa xomihnine la itre jol me nue la itre xaa aja së. (Luka 9:23-26; 12:51-53) Qëmekene troa xomi bapataiso, loi e troa pane mekune hnyawa la pengöne la atre drei Keriso. Tro hë sa ketre Keresiano ka catre nyihlue i Iehova.

3. Nemene la hne së hna troa ce wang ngöne la tane mekun celë?

³ Hapeu, hetre eloine kö la troa atre drei Keriso? Eje hi! Maine tro sa xomi bapataiso, tro hë sa kapa la itre manathith enehila me elany. Tro sa ce wang la itre hnying ka nyipiewekë göi bapataiso. E cili, tro sa atreine sa la hnying celë, “Hapeu, ijijinge hë troa xomi bapataiso?”

4. (a) Nemene la aliene la troa sa xepu? (b) Nemene la aliene la kola hape, troa sipu “xele” së kö ngöne Mataio 16:24?

⁴ Nemene la aliene la troa sa xepu? Qëmekene troa xomi bapataiso, nyipiewekë troa pane sa xepu koi Iehova. Kolo lai a hape, troa thithi qa kuhu hni së, me qaja la aja së troa nyihlue i Akötresie utihë epine palua. Ketre, easë fe a sipu “xele” së kö. (E jë la Mataio 16:24.) Iehova la atrekë ewekëne la mele së. Drei la ketre manathith ka tru! (Rom. 14:8) Nyipiewekë koi së troa nyihlue i Iehova hune la troa kuca la itre sipu aja së. Ame la easa sa xepu, easa sisinyi koi Akötresie. Tha Iehova kö a musinë së. Ngo maine tro sa sisinyi koi Nyidrë, Nyidrëti a ajane tro sa metrötrëne la hna sisiny.—Sal. 116:12, 14.

5. Nemene la eisapengönene la troa sa xepu me xomi bapataiso?

⁵ Nemene la eisapengönene la troa sa xepu me xomi bapataiso? Ame la easa sa xepu, easë hmekuje hi me Iehova. Ngo ame la easa xomi bapataiso, easa amamane kowe la nöjei atr ngöne la itre asabele katru maine asabele ne sirkoskripsio. Kola mama kowe la itre xan laka, ase hë së sa xepu koi Iehova. * Easa amamane koi angatr laka, easa hnimi Iehova hnene la hni së, me mele së, me trengecatre së ka pexej. Easa troa nyihlue i Iehova utihë epine palua.—Mar. 12:30.

6-7. Thenge la hna qaja ngöne 1 Peteru 3:18-22, pine nemene matre ka nyipiewekë troa xomi bapataiso?

⁶ Ka nyipiewekë kö troa xomi bapataiso? Pane mekune jë la hna qaja ngöne 1 Peteru 3:18-22. (E jë.) Kola mama la lapaune i Noa qa ngöne la hnei nyidrëti hna xupe la aka. Ketre tune mina fe, ame la easa xomi bapataiso, easa amamane laka, hne së hna sa xepu koi Iehova. Ngo ka nyipiewekë kö troa xomi bapataiso? Eje hi. Hnei Peteru hna qaja la kepin. Ame la hnapan, kola “amele” së. Ame la easa xomi bapataiso, kola amele së ke, hne së hna catre amamane la lapaune së koi Iesu. Ketre, xecie koi së laka hnei Iesu Keriso hna meci pi së, nge hna amele nyidrëti hmaca. Nyidrëti hë ngöne la “götrane maca i Akötresie.”

⁷ Ame la hnaaluen, maine tro sa xomi bapataiso, tro hë sa hetrenyi la “mekuthetheu ka loi.” Ame la easa sa xepu koi Iehova me xomi bapataiso, ketrepengöne hë la aqane imelekeu së me Iehova. Easa ietra me lapaune kowe la thupene mele i Iesu. Nge Iehova Akötresie a nue la itre ngazo së. E cili, tro ha lolo la mekuthetheu së xajawa i Nyidrë.

8. Nemene la ka nyitrepene la mekuna së troa xomi bapataiso?

⁸ Nemene la ka nyitrepene la mekuna së troa xomi bapataiso? Ame la easa inine la Tusi Hmitrötr, ke, easa atrepengöi Iehova hnyawa, tune la itre thiina me aqane ujë i Nyidrë. Celë hi lai ka akeukawane la hni së me acatrene la ihnimi së koi Nyidrë. Eje hi, ihnimi së koi Iehova la ka troa upi së troa xomi bapataiso.

9. Nemene la aliene la hna qaja ngöne Mataio 28:19, 20, lo kola hape, troa bapataiso ngöne la ëje i Kaka, me ngöne la ëje ne la Nekön, memine la uati hmitrötr?

⁹ Ketre, easa mekun troa xomi bapataiso, pine laka, hne së hna inine la nyipici e hnine la Tusi Hmitrötr me mejiune kow. Hanawange la hna amekötin hnei Iesu lo nyidrëti a qaja ka hape, troa inine la itre atr. (E jë la Mataio 28:19, 20.) Ame koi Iesu, hnëqa ne la itre ka bapataiso troa kuca lai, “ngöne la ëje i Kaka, me ngöne la ëje ne la Nekön, memine la uati hmitrötr.” Nemene la  aliene lai? Loi e tro sa catre lapaune kowe la itre nyipici e hnine la Tusi Hmitrötr, göi Iehova me Iesu Nekö i Nyidrë me uati hmitrötr. Itre nyipici lai ka hetre menen me ka troa ketr la hni së. (Heb. 4:12) Tro sa pane ce wange la itre nyipici cili.

10-11. Nemene la itre nyipici hne së hna inin me kapa göi Iehova?

¹⁰ Loi e tro sa mekune lo easa xötrei atre la itre nyipici göne la Keme së, tune la “ëje i Nyidrë, Iehova,” ka “xupe la hnengödrai memine la fen,” nge Nyidrëti hmekuje hi la “Akötresie.” (Sal. 83:18; Is. 37:16) Eje hi, Iehova la Atre Xupi së nge “thei Iehova la iamele.” (Sal. 3:8; 36:9) Ketre, hetre hnei Nyidrëti hna kuca matre troa thepe së qa ngöne la ngazo me mec. (Ioane 17:3) Ame la easa sa xepu me bapataiso, tre, easa hi lai a amamane laka, ketre atre anyipici Iehova hë së. (Is. 43:10-12) Easa sine la lapa ka cahae i Iehova e cailo fen, nge easa cilëgölin me qaja la ëje i Nyidrë koi nöjei atr.—Sal. 86:12.

¹¹ Drei la ketre manathithi ka tru la troa trotrohnine la itre ini qaathei Iehova e hnine la Tusi Hmitrötr! Eje hi, ame la easa kapa la itre nyipici cili, kola ha cia e kuhu hni së la aja troa sa xepu koi Iehova me xomi bapataiso.

12-13. Nemene la itre nyipici hne së hna inin me kapa göi Iesu?

¹² Nemene la thangane koi së, ngöne la easa atre la itre nyipici göi Iesu? Iesu la hnaaluene ka sisitria ngöne la fen asë me e koho hnengödrai. Hnei Iesu hna huujëne la mele i nyidrë thatraqai së. Nge hnei nyidrëti hna nue xecie la mele i nyidrë. Celë hi matre, loi e tro sa amamane ngöne la aqane ujë së laka, easa lapaune kowe la thupene mel. E cili, tro ha nue la itre ngazo së me nyi sinee i Akötresie me hetrenyi la mel ka tha ase palua kö. (Ioane 3:16) Eje hi, Iesu la Atre Huuj Ka Tru, nge nyidrëti a ajane tro sa kapa la itre eloine qa ngöne la thupen mel. Iesu a ajane tro sa acatrene la aqane imelekeu së me Iehova Akötresie. (Heb. 4:15; 7:24, 25) Iesu la Joxu ne la Baselaia i Iehova. Hna aijijë nyidrëti hnei Iehova troa ahmitrötrëne la ëje i Nyidrë, me apatrene la itre atr ka ngazo. Easenyi hë matre tro sa kapa la itre manathithi ka epine palua ngöne la Paradraiso. (Mat. 6:9, 10; Hna ama. 11:15) Celë hi matre, loi e tro sa xötrethenge la tulu i Iesu. (1 Pet. 2:21) Hnei nyidrëti hna nue la mele i nyidrë, matre troa kuca la aja i Akötresie.—Ioane 4:34.

¹³ Eje hi, ame la easa kapa la itre ini e hnine la Tusi Hmitrötr göi Iesu, easë hi lai a amamane la ihnimi së kowe la Nekö hnimina i Akötresie. Ihnimi la ka upi së troa nue la mele së me kuca la aja i Iehova, tui Iesu. Easë hë e cili a sa xepu koi Iehova me xomi bapataiso.

14-15. Nemene la itre nyipici hne së hna inin me kapa göne la uati hmitrötr?

¹⁴ Nemene la thangane koi së, ngöne la easa atre la itre nyipici göne la uati hmitrötr? Eje hi, tha ketre atr kö la uati hmitrötr, ngo trengecatr me mene i Iehova. Hnei Iehova hna nunuëne la uati hmitrötre i Nyidrë, matre troa iujine la itre ka cinyihane la Tusi Hmitrötr. Hna xatua angatre fe matre troa trotrohnine me trongëne la Itre Hna Cinyihan. (Ioane 14:26; 2 Pet. 1:21) Jëne la uati hmitrötre i Iehova, Nyidrëti a hamëne la “men atraqatr.” (2 Kor. 4:7) Ketre, jëne la mene i Nyidrë, easa catre cainöjëne la maca ka loi, me atreine cile kowe la itre itupath, me xomihnine la nöjei pengöne jol. Eje fe a xatua së troa eënyine la itre thiina ka lolo ne la “wene ne la ua.” (Gal. 5:22) Tha Iehova kö a cipane la uati hmitrötre i Nyidrë. Nyidrëti a hamëne kowe la itre ka lapaun me itre ka sipo iele Nyidrë.—Luka 11:13.

 ¹⁵ Eje hi, easa madrine troa atre laka, ijije hi tro la itre hlue i Iehova a mejiune kowe la uati hmitrötr, matre xatua angatr troa catre nyihlue i Nyidrë! Maine tro sa kapa la itre nyipici göne la uati hmitrötr, tro hë sa ajane troa sa xepu me nue la mele së koi Akötresie me xomi bapataiso.

16. Nemene la itre ini hne së hna ce wang?

¹⁶ Nyipici laka, ketre mekun ka tru hne së hna axeciëne ngöne la easa sa xepu koi Iehova me xomi bapataiso. Ngo tune lo hne së hna ce wang, hetre jole hne së hna troa cile kow. Ame pe, nyimutre la itre manathithi ka tru catre kö, hne së hna troa kapa e thupen. Ame la easa xomi bapataiso, ke kola amele së. Lolo la mekuthetheu së xajawa i Iehova. Ketre, ihnimi së koi Iehova Akötresie la ka upi së troa xomi bapataiso. Loi e tro fe a catre mejiun me lapaune kowe la itre nyipici hne së hna inine göi Iehova, me Iesu, me uati hmitrötr. Thupene la hne së hna atre la itre nyipici cili, nemene la aqane troa sa la hnying, hna hape, “Hapeu, ijijinge hë troa xomi bapataiso?”

17. Nemene la nyine troa kuca qëmekene troa xomi bapataiso?

¹⁷ Maine easa mekun troa xomi bapataiso ke, hetre ewekë hë hne së hna kuca matre troa lolo la aqane imelekeu së me Iehova. * Easa atrepengöi Iehova hnyawa me Iesu pine laka, hne së palahi hna inine la Tusi Hmitrötr. Celë hi matre, kola kökötre la lapaune së. (Heb. 11:6) Ketre, xecie koi së laka, troa eatre la itre hna thingehnaeane hnei Iehova e hnine la Tusi Hmitrötr. Nge atre hnyawa hi së laka, maine tro sa lapaune kowe la thupene mel, tro ha nuamele së qa ngöne la ngazo me mec. Ngacama easë palahi a hace pine la itre ngazo së ekö, ngo nyipiewekë tro sa ietra. Easa sipo iele Iehova troa köletrije la itre ngazo së. Easa saze la mele së me nuetrije la itre huliwa ka sis matre troa mele thenge la aja i Iehova. (Itre hu. 3:19) Easë fe a ajane troa qaja koi itre xan la lapaune së, matre easë fe hë a hane cainöj. (Mat. 24:14) Eje hi, atraqatre la madrine Iehova kowe la itre trengecatre hne së hna nue.—Ite edomë 27:11.

18. Nemene la ketre nyine tro sa kuca qëmekene troa xomi bapataiso?

¹⁸ Qëmekene tro sa xomi bapataiso, hetre itre xaa nyine tro sa kuca. Hne së hna ce wang laka, loi e troa sa xepu koi Iehova. Eje hi, loi e tro sa easenyi koi Iehova ngöne la thith, me qaja koi Nyidrëti ka hape, easë hë a troa nue la mele së ka pexeje koi Nyidrë. (1 Pet. 4:2) Thupene lai, easa qaja kowe la kordinatör ne la lapa ne la itre qatre thup ka hape, easa ajan troa xomi bapataiso. Tro hë nyidrëti a upe la lue qatre thup troa wai së. Tha tro pi kö sa xou, pine laka, itre qatre thup hi lai ka atrepengö  së hnyawa nge ka hnimi së. Tro angatr a ce wang hmaca me easë la itre ini qa hnine la Tusi Hmitrötr. Angatre hi a ajane troa atre laka, trotrohnine hnyawa ha së la itre ini cili, memine la enyipiewekëne la troa sa xepu me xomi bapataiso. Maine öhne hi angatr laka, ijiji easë hë, tro hë angatre lai a thuemacanyi së, ka hape, easë hë a troa xomi bapataiso ngöne la ketre asabele.

19-20. Thupene la easa xomi bapataiso nemene la nyine troa kuca, nge nemene la aqane tro sa kuca?

¹⁹ Thupene la hne së hna xomi bapataiso, nemen la nyine tro sa kuca? * Tha tro kö sa thëthëhmine laka, hne së hna sisinyi koi Iehova, nge Nyidrëti a ajane tro sa metrötrëne lai. Celë hi matre, thupene la easa bapataiso, loi e tro sa mele thenge la hna sisiny. Tune kaa?

²⁰ Loi e tro sa catre qale kowe la ekalesia së. Pine laka, ketre Keresiano së, easë fe a hane sine la “lapa ne la itre trejin asë.” (1 Pet. 2:17) Celë hi matre, ame la itre trejin e hnine la ekalesia, tre, itre atrene la hnepe lapa së ngöne la götrane u. Maine tro sa catre sine la itre icasikeu, tro hë sa acatrene la aqane imelekeu së me angatr. Loi e tro palahi sa e me lapa mekun la itre Trengewekë i Akötresie o drai. (Sal. 1:1, 2) Thupene la hne së hna e la itre meken tus, loi e tro sa xomi ijin matre troa pane lapa mekun itre ej. Tro hë lai a ketr la hni së. Ketre, “catre jë thith.” (Mat. 26:41) Maine tro sa catre thith, tro ha acatrene la aqane imelekeu së me Iehova. Loi e tro fe sa “thele panëne. . . la Baselaia.” (Mat. 6:33) Ijije hi tro sa amë panëne la huliwa ne cainöj ngöne la mele së. Maine tro palahi sa catre cainöj tro ha acatrene la lapaune së, nge tro hë sa xatuane la itre xan troa hane trongëne la gojenyi ne mel ka tha ase palua kö.—1 Tim. 4:16.

21. Nemene la manathith hne së hna kapa qa ngöne la hna xomi bapataiso?

²¹ Nyipici laka, ketre mekun ka sisitria la easa troa sa xepu me xomi bapataiso, nge ka hetre thupen. Ngo drei la ketre manathithi ka tru, nge nyine loi koi së! Ame la itre itupath me akötr ne la fen celë, tre, “tha cile palua kö nge ka hmaloi hi” troa thu. (2 Kor. 4:17) Ngo ame la easa xomi bapataiso, tre, kola eatrongë së enehila kowe la mele ka loi me kowe la “nyipi mel” elany. (1 Tim. 6:19) Celë hi matre, loi e tro sa lapa mekun hnyawa me thith, matre troa atreine sa la hnyinge celë, “Hapeu, ijijinge hë troa xomi bapataiso?”