1. Mɔgɔ ka ɲi ka mun lo kɛ fɔlɔ ka sɔrɔ ka boonlɔ daminɛ?

MIIRI mɔgɔ dɔ koo la min y’a latigɛ ka boon lɔ. A b’a lɔn a b’a fɛ ka boon sugu min lɔ. A mako be minan minw na, yala a bena sin ka taga u san ani ka lɔli daminɛ wa? Ayi dɛ! A ka ɲi ka koo kɔrɔtanin dɔ kɛ fɔlɔ. A ka ɲi ka jatiminɛ kɛ o boon lɔsɔngɔ koo la. Mun na do? Sabu a ka ɲi k’a lɔn ni wari b’a fɛ k’o boon lɔ k’a ban. N’a kɔnna ka jatiminɛ kɛ koɲuman o boon lɔsɔngɔ koo la, a ka teli k’a lɔ k’a ban.

2. Ka kɛɲɛ ni Luka 14:27-30 ka fɔta ye, i ka ɲi ka jatiminɛ kɛ koɲuman mun lo koo la fɔlɔ ka sɔrɔ ka batize?

² I be Jehova kanu ani i b’a waleɲuman lɔn cogo min na, yala o b’i lasun ka miiri batɛmu koo la wa? N’o lo, i be komi cɛɛ min y’a latigɛ ka boon lɔ. Mun na an b’o fɔ? A filɛ Yezu ye min fɔ Luka 14:27-30 kɔnɔ. (A kalan.) Yezu tun b’a ɲɛfɔra le an ka ɲi ka min kɛ walisa ka kɛ ale ka kalandenw ye. An ka ɲi ka sɔn ka gwɛlɛyaw muɲu ani k’an yɛrɛ jɛn fɛɛn dɔw la (Luka 9:23-26; 12:51-53). O la, ka kɔn i ka batɛmu ɲɛ, i ka ɲi ka jatiminɛ kɛ koɲuman k’a filɛ a kɔrɔ ye min ye tigitigi ka kɛ Yezu ka kalanden ye. N’i y’o kɛ, i bena i yɛrɛ labɛn koɲuman walisa ka to ka Jehova sago kɛ kantigiya la i batizenin kɔ.

3. An bena mun lo lajɛ barokun nin na?

³ Yala kuun b’a la i ka gwɛlɛyaw muɲu ani k’i yɛrɛ jɛn fɛɛn dɔw la walisa ka kɛ Yezu ka kalanden ye wa? Siga t’a la, kuun b’o la! Batɛmu ye sababu ye ka duga caaman sɔrɔ bi ani sini ma. An ka ɲiningali kɔrɔtanin dɔw lajɛ batɛmu koo la. O la, i bena se ka ɲiningali nin jaabi: “N’ labɛnnin lo batɛmu kama wa?”

4. a) Yɛrɛkundili ye mun lo ye? b) Ka kɛɲɛ ni Matiyo 16:24 ye, ka ‘ban i yɛrɛ la,’ o kɔrɔ ko di?

⁴ Yɛrɛkundili ye mun lo ye? I ka ɲi k’i yɛrɛkun di Jehova ma ka sɔrɔ ka batize. K’i yɛrɛkun di Jehova ma, o kɔrɔ ko i b’a deli n’i dusu bɛɛ ye ani i b’a fɔ a ye ko i bena a sago kɛ fɔɔ abada. N’i y’i yɛrɛkun di Ala ma, i tɛ ‘miiri i yɛrɛ ka nafa la [i be ‘ban i yɛrɛ la,’ NW ].’ (Matiyo 16:24 kalan). O wagati la, i be kɛ Jehova ta ye. O ye nɛɛmaba ye dɛ! (Ɔrɔm. 14:8). I b’a fɔ a ye ko k’a ta o loon ma, a sago kɛli lo bena kɛ i ɲɛnako fɔlɔ ye, i yɛrɛ sago tɛ. Yɛrɛkundili ye layidu lo ye i be min ta Ala ye. O layidu kɔrɔtanin lo kosɔbɛ. Jehova t’an waajibiya k’o layidu ta. Nka n’an y’a ta, a b’a fɛ an k’a dafa.—Zab. 116:12, 14.

5. Jɛn juman be yɛrɛkundili ni batɛmu cɛ?

⁵ Jɛn juman be yɛrɛkundili ni batɛmu cɛ? Yɛrɛkundili be kɛ ele ni Jehova dɔrɔn lo cɛ, mɔgɔ tɛ bɔ o kala ma. Nka, batɛmu be kɛ jama ɲɛɛ na. A ka teli ka kɛ lajɛnbaw lo la. N’i ye batɛmu ta, i b’a yira tɔɔw la ko i y’i yɛrɛkun di Jehova ma ka ban. * I b’a yira u la ko i be Jehova kanu n’i dusu, i niin, i hakili n’i barika bɛɛ ye ani ko i cɛsirinin lo k’a sago kɛ fɔɔ abada!—Mariki 12:30.

6-7. Ka kɛɲɛ ni 1 Piyɛri 3:18-22 ka fɔta ye, kuun fila jumanw lo kama batɛmu kɔrɔtanin lo?

⁶ A kɔrɔtanin lo tiɲɛn na i ka batize wa? A filɛ min fɔra 1 Piyɛri 3:18-22 * kɔnɔ. (A kalan.) Nuhun ka kurun tun b’a yira mɔgɔw la ko a limaniyanin lo Ala la. O cogo kelen na, i ka batɛmu b’a yira ka gwɛ mɔgɔw la ko i y’i yɛrɛkun di Jehova ma. Nka, yala a kɔrɔtanin lo tiɲɛn na i ka batize wa? Ɔnhɔn, a kɔrɔtanin lo. Piyɛri y’a ɲɛfɔ fɛɛn min kama o kɔrɔtanin lo. A fɔlɔ, batɛmu b’i “kisi.” Batɛmu be se k’an kisi, n’an b’a yira an ka kɛwalew fɛ ko an limaniyanin lo Yezu la, an lanin b’a la ko a sara an kosɔn, ko a lakununa ka taga sankolo la ani ko sisan, a be “Ala kinibolo fɛ.”

⁷ A filanan, n’an batizera an be kɛ ni “dusukun ɲuman” ye. N’an y’an yɛrɛkun di Ala ma ani ka batize, an b’a daminɛ ka jɛnɲɔgɔnya kɛrɛnkɛrɛnnin kɛ n’a ye. Komi an nimisara an ka jurumuw na sɔbɛ la ani an limaniyanin lo kunmabɔsara koo la, Ala b’an ka jurumuw yafa. O la, an be se ka kɛ ni dusukun ɲuman ye a ɲɛɛ kɔrɔ.

8. Koo jɔnjɔn juman lo ka ɲi k’i lasun ka batize?

⁸ Mun lo ka ɲi k’i lasun ka batize? I y’i sɔbɛ don i ka bibulukalan na minkɛ, i ye koo caaman lɔn Jehova koo la. I y’a ka jogow n’a ka kokɛcogow lɔn. O lɔnniya y’i dusukun sɔrɔ ani o y’i lasun ka Jehova kanu kosɔbɛ. Koo jɔnjɔn min ka ɲi k’i lasun ka batize, o ye Jehova kanuya lo ye.

9. Ka batize Faa, ni Dencɛ ni Nii Senuman tɔgɔ la i ko a fɔra Matiyo 28:19, 20 kɔnɔ cogo min na, o kɔrɔ ko di?

⁹ Koo wɛrɛ min ka ɲi k’i lasun ka batize, o ye ko i sɔnna Bibulu ka tiɲɛn kalanw na. A filɛ Yezu ye min fɔ tuma min na a ko an ka mɔgɔw kɛ ale ka kalandenw ye (Matiyo 28:19, 20 kalan). A y’a yira ko minw be batize, u ka ɲi k’o kɛ “Faa, ni Dencɛ ni Nii Senuman tɔgɔ la.” O kɔrɔ ko Bibulu be min fɔ Jehova, a Dencɛ Yezu ani hakili senu koo la, i ka ɲi ka la o la n’i dusu bɛɛ  ye. Barika b’o tiɲɛn kalanw na ani u be se k’i dusukun sɔrɔ kosɔbɛ (Eburuw 4:12). An k’u dɔw lajɛ.

10-11. I sɔnna tiɲɛn kalan jumanw lo ma Faa Ala koo la?

¹⁰ Miiri k’a filɛ, tuma min na i ye tiɲɛn kalan nunu faamu Faa Ala koo la: A “tɔgɔ ko Jehova,” a ye “Kɔrɔtalenba ye dugukolo bɛɛ kun na” ani ale “kelenpe le ye [tiɲɛn] Ala ye.” (Zab. 83:19, Bible senuma 1961 ; Ezayi 37:16). Ale lo y’an Danbaga ye ani an ka “kisili be bɔ [ale] lo fɛ.” (Zab. 3:9; 36:10). A ye labɛn kɛ walisa k’an kisi ka bɔ jurumu ni saya la ani a ye ɲɛnamaya banbali jigiya di an ma (Zan 17:3). N’i y’i yɛrɛkun di Jehova ma ani ka batize, o bena a yira ko i kɛra Jehova Seere dɔ ye (Ezayi 43:10-12). I bena kɛ Jehova batobagaw cɛma, olu minw be duniɲa kuru bɛɛ kɔnɔ. U ninsɔn ka di sabu Ala tɔgɔ lara u kan ani a ka di u ye ka Ala tɔgɔ kofɔ tɔɔw ye.—Zab. 86:12.

¹¹ Nɛɛmaba lo k’a faamu Bibulu be min fɔ Faa Ala koo la! N’i sɔnna o kalan nafamanw ma, i dusukun bena i lasun k’i yɛrɛkun di Jehova ma ani ka batize.

12-13. I sɔnna tiɲɛn kalan jumanw lo la Ala Dencɛ koo la?

¹² Duniɲa kuru bɛɛ kɔnɔ, ka Jehova niin bɔ a la, Yezu lo lɔyɔrɔ ka bon. Yezu sɔnna k’a niin di k’a kɛ kunmabɔsara ye an kosɔn. Tuma min na i y’o tiɲɛn kalanw faamu Ala Dencɛ koo la, o ye mun lo kɛ i la? An k’a yira an ka kɛwalew fɛ ko an limaniyanin lo kunmabɔsara koo la. O la, Ala bena an ka jurumuw yafa, an bena kɛ a teriw ye ani an bena ɲɛnamaya banbali sɔrɔ (Zan 3:16). Yezu y’an ka sarakalasebagaw Kuntigiba ye. A b’a fɛ k’an dɛmɛ an ka nafa sɔrɔ kunmabɔsara la ani an ka jɛnɲɔgɔnya teriman kɛ ni Ala ye (Eburuw 4:15; 7:24, 25). Ale lo be Ala ka Masaya kun na. O kama, Jehova bena tɛmɛ ale lo fɛ k’a tɔgɔ saniya, ka juguya ban ani ka duga banbaliw lase an ma alijɛnɛ kɔnɔ (Mat. 6:9, 10; Yir. 11:15). An ka ɲi ka Yezu ladegi (1 Piyɛri 2:21). A y’a ka ɲɛnamaya bɛɛ kɛ Ala sago kɛli la. Ɲɛyirali ɲuman lo an fɛ.—Zan 4:34.

¹³ Yezu ye Ala Dencɛ kanulen ye. Bibulu be min fɔ a koo la, n’i sɔnna o ma, o b’a to a koo be diya i ye. O kanuya b’i lasun k’i ka ɲɛnamaya bɛɛ kɛ Ala sago kɛli la i ko Yezu. A laban, i bena a ɲini k’i yɛrɛkun di Jehova ma ani ka batize.

14-15. I sɔnna tiɲɛn kalan jumanw lo ma hakili senu koo la?

¹⁴ Hakili senu tɛ mɔgɔ ye, nka Ala ka fanga lo a be baara kɛ ni min ye. Jehova tɛmɛna hakili senu lo fɛ ka Bibulu sɛbɛbagaw ɲɛminɛ. Hakili senu fana lo b’an dɛmɛ ka Bibulu ka kalanw faamu ani k’u sira tagama (Zan 14:26; 2 Piyɛri 1:21). Hakili senu barika la, Jehova be “sebagaya kabakoman” di an ma (2 Kor. 4:7). Hakili senu barika la fana, an be fanga sɔrɔ ka kibaro diiman fɔ, ka see sɔrɔ kɔrɔbɔli ni farifaga kan ani ka gwɛlɛyaw muɲu. Jogo ɲuman minw kofɔra Galatikaw 5:22 kɔnɔ, hakili senu b’an dɛmɛ ka kɛ n’u ye fana. Minw lanin lo Ala la ani u be hakili senu deli a fɛ n’u dusu bɛɛ ye, a b’a di olu ma (Luka 11:13). Tuma min na i y’o tiɲɛn kalanw faamu hakili senu koo la, o ye mun lo kɛ i la?

¹⁵ An ninsɔn ka di yɛrɛ le k’a lɔn ko Jehova be hakili senu di a sagokɛlaw ma walisa k’u dɛmɛ u k’a sago kɛ! I ye tiɲɛn kalan minw faamu hakili senu koo la, n’i sɔnna o ma, o bena i lasun i k’i yɛrɛkun di Ala ma ani ka batize.

16. An ye mun lo ye kabi barokun nin daminɛ na?

 ¹⁶ K’i yɛrɛkun di Jehova ma ani ka batize, o ye desizɔnba lo ye. I ko an y’a ye cogo min na, walisa k’o kɛ, i ka ɲi ka sɔn ka gwɛlɛyaw muɲu ani k’i yɛrɛ jɛn fɛɛn dɔw la. Nka, o gwɛlɛyaw tɛ bɛrɛ ye n’i y’u suma n’i ka dugaw ye. Batɛmu b’i kisi ani a b’a to i be kɛ ni dusukun ɲuman ye Ala ɲɛɛ kɔrɔ. Koo jɔnjɔn min ka ɲi k’i lasun ka batize, o y’i ka kanuya lo ye Jehova Ala koo la. I ye tiɲɛn kalan minw faamu Faa, Dencɛ ani hakili senu koo la, i ka ɲi ka la u la n’i dusu bɛɛ ye fana. Sisan, i bena ɲiningali nin jaabi cogo di: “N’ labɛnnin lo batɛmu kama wa?”

17. Mɔgɔ ka ɲi ka koo minw kɛ ka sɔrɔ ka batize, u la dɔw ye jumanw ye?

¹⁷ N’i b’a jati ko i labɛnnin lo ka batize, o kɔrɔ ko i ye koo caaman kɛ ka ban walisa ka jɛnɲɔgɔnya ɲuman kɛ ni Jehova ye. * I be bibulukalan kɛ tuma o tuma minkɛ, o y’a to i ye koo caaman lɔn Jehova ni Yezu koo la ani i limaniyara u la (Eburuw 11:6). Jehova ka layidu minw be sɔrɔ Bibulu kɔnɔ, i lanin b’u la kosɔbɛ. I lanin b’a la fana ko Yezu ka kunmabɔra be se k’i kisi ka bɔ jurumu ni saya la. I nimisara i ka jurumuw na. O kɔrɔ, i ye koo jugu minw bɛɛ kɛ, i dusu kasira kosɔbɛ u kosɔn ani i ye Jehova deli a ka yafa i ma. I segira Ala ma, o kɔrɔ, i tun be koo jugu minw kɛ, i y’u dabila pewu ani i y’a daminɛ ka ɲɛnamaya kɛ ka kɛɲɛ ni Ala sago ye (Kɛw. 3:19). A ka di i ye k’i ka limaniya kofɔ tɔɔw ye. O kama, i ye saratiw dafa ka kɛ weleweledala ye min ma batize fɔlɔ ani i y’a daminɛ ka waajuli kɛ ni kafo ye (Mat. 24:14). Jehova dusu ka di i kɔrɔ sabu i y’o koo kɔrɔtaninw kɛ. I y’a dusu diya yɛrɛ le!—Talenw 27:11.

18. I ka ɲi ka koo wɛrɛ jumanw lo kɛ ka sɔrɔ ka batize?

¹⁸ Koo wɛrɛw be yen i ka ɲi ka minw kɛ ka sɔrɔ ka batize. I ko an y’a ye ka tɛmɛ cogo min na, i ka ɲi k’i yɛrɛkun di Ala ma. A deli i kelen n’i kelen n’i dusu bɛɛ ye. O delili la, layidu ta a ye ko i bena i ka ɲɛnamaya bɛɛ kɛ a sago kɛli la (1 Piyɛri 4:2). O kɔ, a fɔ i ka kafo ka diinan mɔgɔkɔrɔw jɛnkulu ka koow labɛnbaga ye ko i b’a fɛ ka batize. A bena a ɲini diinan mɔgɔkɔrɔ dɔw fɛ u ka baro kɛ n’i ye. Kana siran. A to i hakili la k’o balima kanulenw b’i lɔn ani u b’i kanu. I ye Bibulu ka kalan jɔnjɔn minw ye i ka bibulukalan na, u bena baro kɛ n’i ye olu lo koo la. U b’a fɛ ka la a la ko i b’o kalanw faamu ani ko i b’a lɔn ko yɛrɛkundili ni batɛmu kɔrɔtanin kosɔbɛ. N’u y’a ye ko i labɛnnin lo batɛmu kama, u bena a fɔ i ye ko i be se ka batize lajɛnba nata la.

19-20. I ka ɲi ka mun lo kɛ i batizenin kɔ? I be se k’o kɛ cogo di do?

¹⁹ I ka ɲi ka mun lo kɛ i batizenin kɔ? * A to i hakili la ko yɛrɛkundili ye layidu lo ye ani ko n’i y’o layidu ta, Jehova b’a fɛ i k’a dafa. O la, i batizenin kɔ, i ka ɲi ka to ka ɲɛnamaya kɛ ka kɛɲɛ n’o layidu ye. I be se k’o kɛ cogo di do?

²⁰ I magwɛrɛnin ka to i ka kafomɔgɔw la. I batizenin kɔ, an balima minw be duniɲa kuru bɛɛ kɔnɔ, i be kɛ olu dɔ ye (1 Piyɛri 2:17). I ka kafodenw be komi i somɔgɔw. N’i be to ka taga lajɛnw na, i bena i ka jɛnɲɔgɔnya sabati n’u ye. To ka Ala ka Kuma kalan ani ka miiri a kan loon o loon (Zab. 1:1, 2). N’i ye Bibulu yɔrɔ dɔ kalan, wagati ta ka miiri a kan koɲuman. O la, i ye min kalan, o bena i dusukun sɔrɔ. To ka “Ala daali.” (Mat. 26:41). N’i b’o kɛ n’i dusu bɛɛ ye, i bena i magwɛrɛ a la kosɔbɛ. Ka fara o kan, to ka “Ala ka masaya . . . ɲini fɔlɔ.” (Mat. 6:33). I be se k’o kɛ n’i be waajuli baara kɛ i ɲɛnako fɔlɔ ye. N’i be waajuli kɛ tuma o tuma, o bena i ka limaniya barika bonya. I bena se ka tɔɔw dɛmɛ fana u ka ɲɛnamaya banbali jigiya sɔrɔ.—1 Tim. 4:16.

21. I bena mun lo sɔrɔ i ka batɛmu sababu la?

²¹ I ka desizɔnw bɛɛ la belebeleba ye k’a latigɛ k’i yɛrɛkun di Jehova ma ani ka batize. Tiɲɛn lo ko i ka ɲi ka sɔn ka gwɛlɛyaw muɲu ani ka sɔn k’i yɛrɛ jɛn fɛɛn dɔw la. Nka, yala kuun b’a la i k’o kɛ wa? Siga t’a la, kuun b’o la! I mana tɔɔrɔ o tɔɔrɔ sɔrɔ duniɲa nin kɔnɔ, o bena kɛ “waati dɔɔni tɔɔrɔ” ye ani “o te foyi ye” n’i y’o suma ni hɛɛrɛ ye min b’i kɔnɔna (2 Kor. 4:17). I ka batɛmu bena kɛ sababu ye i be ninsɔndiya sɔrɔ kabini sisan ani ka “ɲanamanya sɔbɛ” sɔrɔ sini ma (1 Tim. 6:19, Biblu Ala ta Kuma). O la, an b’i jija, i ka miiri koɲuman ani ka delili kɛ ɲiningali nin koo la: “N’ labɛnnin lo batɛmu kama wa?”