1. Nso ke owo akpanam mbemiso ọtọn̄ọde ndibọp ufọk?

DA NTE ke owo oyom ndibọp ufọk. Enye ọfiọk utọ ufọk emi enye oyomde ndibọp. Ndi enye ayadaha inikiet inikiet ekedep n̄kpọutom ọtọn̄ọ ndibọp ufọk? Idinamke. Enyene akpan n̄kpọ emi anade enye anam kan̄a—ana enye etie abat m̀mê ufọk oro edikpa imọ okụk ifan̄. Ntak-a? Sia ana enye ọfiọk m̀mê imọ imenyene okụk ekem ndibọp ufọk oro n̄kụre. Edieke enye etịn̄de enyịn etie adian ibat mbemiso ọtọn̄ọde utom oro, enye ekeme ndibọp ufọk oro n̄kụre.

2. Nte ikụtde ke Luke 14:27-30, nso ke ana afo ada ini etie ekere mbemiso anade baptism?

² Ndi ndima Jehovah ye se enye anamde ọnọ fi anam fi oyom ndina baptism? Ekpedi ntre, oyom anam ukem se owo emi oyomde ndibọp ufọk akpanamde. Nso inam idọhọ ntre? Fiak kere se Jesus eketịn̄de ke Luke 14:27-30. (Kot.) Jesus ekeneme se ndidi mbet esie ọwọrọde. Edieke iyomde ndidi mbet Jesus, ana inyịme “se iditakde” nnyịn—oro edi, inyịme ndiyọ mme mfịna inyụn̄ isana ndusụk n̄kpọ iyak. (Luke 9:23-26; 12:51-53) Ntre mbemiso anade baptism, ana enen̄ede etie ekere kpukpru se afo edisobode ama edi mbet Jesus. Oro ayanam fi etịm eben̄e idem ndika iso n̄kpono Jehovah ama ana baptism.

3. Nso ke idineme ke ibuotikọ emi?

³ Ndi ufọn osụk odu ndinyịme ndiyọ mme mfịna nnyụn̄ nsana ndusụk n̄kpọ nyak man owo ana baptism akabade edi mbet Christ? Ih, odu! Owo emi anade baptism eyenyene ediwak edidiọn̄ idahaemi ye ke ini iso. Ẹyak ineme ndusụk akpan mbụme emi ẹban̄ade baptism. Oro ayan̄wam fi ọbọrọ mbụme enye emi, “Ndi mmeben̄e idem ndina baptism?”

4. (a) Ndiyak idem nnọ Abasi ọwọrọ nso? (b) Owo ndikan̄ idemesie nte Matthew 16:24 ọdọhọde ọwọrọ nso?

⁴ Nso ke ndiyak idem nnọ Abasi ọwọrọ? Ana ayak idemfo ọnọ Jehovah mbemiso anade baptism. Ndiyak idemfo nnọ Jehovah edi ndibọn̄ akam ofụri esịt ndọhọ enye ke iyom ndida ofụri uwem imọ nnam n̄kpọ esie ke nsinsi. Ama ayak idemfo ọnọ Abasi, ọwọrọ ‘amakan̄’ idemfo. (Kot Matthew 16:24.) Jehovah edinyene fi idahaoro, ata n̄kpọ ukpono edi oro. (Rome 14:8) Ama ayak idemfo ọnọ Jehovah, ọwọrọ afo ọdọhọ ke tọn̄ọde ke emi ke ndinam n̄kpọ esie edidi akpa n̄kpọ ke uwem imọ, idịghe se imọ imade. Ke ini ayakde idem ọnọ Abasi, en̄wọn̄ọ ke anam oro ọnọ enye. Jehovah inyịkke-nyịk nnyịn in̄wọn̄ọ utọ un̄wọn̄ọ oro. Edi ima in̄wọn̄ọ, enye esiyom nnyịn inam se ikọn̄wọn̄ọde.—Ps. 116:12, 14.

5. Didie ke ndiyak idem nnọ Abasi okpụhọde ye ndina baptism?

⁵ Didie ke ndiyak idem nnọ Abasi okpụhọde ye ndina baptism? Ke ini ayakde idemfo ọnọ Jehovah, afo ye enye kpọt ẹdiọn̄ọ. Edi baptism idịghe ntre; mbon en̄wen ẹsikụt ini inade baptism sia esiwak ndidi ke mbono circuit m̀mê ke akamba mbono. Ama ana baptism, afo owụt mbon en̄wen ke ima iyak idem imọ inọ Jehovah. * Ntre baptism emi afo anade anam mbon en̄wen ẹdiọn̄ọ ke afo amama Jehovah Abasi ke ofụri esịt fo, ofụri ukpọn̄ fo, ofụri ekikere fo, ye ke ofụri ukeme fo, onyụn̄ owụt ke afo emebiere ndinam n̄kpọ esie ke nsinsi.—Mark 12:30.

6-7. Akpa Peter 3:18-22 owụt ke nso idi ntak iba emi anamde baptism edi akpan n̄kpọ?

⁶ Ndi enen̄ede oyom ana baptism? Kere se idude ke 1 Peter 3:18-22. (Kot.) Ukem nte ubom emi Noah ọkọkọn̄de akanamde ẹdiọn̄ọ ke enye ọbuọt idem ye Jehovah, afo ndina baptism owụt ke ama ayak idemfo ọnọ Jehovah. Edi ndi enen̄ede oyom ana baptism? Ih, oyom. Peter etịn̄ se inamde edi ntre. Akpa, baptism ke ‘ẹda ẹnyan̄a fi.’ Baptism ekeme ndinam ẹnyan̄a nnyịn edieke inamde mme n̄kpọ emi ẹwụtde ke imọbuọt idem ye Jesus. Emi esịne ndinịm ke enye ama akpa ọnọ nnyịn, ke ẹma ẹnam enye eset aka heaven, ke enye onyụn̄ odu “ke ubọk nnasia Abasi.”

⁷ Ọyọhọ iba, baptism anam nnyịn inyene “eti ubieresịt.” Ima iyak idem inọ Abasi inyụn̄ ina baptism, imesinen̄ede ikpere enye. Abasi esifen idiọkn̄kpọ nnyịn ke ntak emi inen̄erede ikabade esịt inyụn̄ ibuọtde idem ke ufak. Emi anam ikeme ndinyene eti ubieresịt ke enyịn esie.

8. Nso idi ata akpan ntak emi akpanamde fi ebiere ndina baptism?

⁸ Nso ye nso ikpanam fi ebiere ndina baptism? Afo nditịn̄ enyịn n̄kpep Bible anam fi ọdiọn̄ọ ediwak n̄kpọ aban̄a Jehovah, ọdiọn̄ọ utọ owo emi enye edide, ye nte enye esinamde n̄kpọ. Se afo ekpepde aban̄a enye anam esịt enem fi onyụn̄ anam fi enen̄ede ama enye. Ana ima emi afo amade Jehovah edi ata akpan ntak emi anamde fi ebiere ndina baptism.

9. Nso ke ọwọrọ ndina baptism ke enyịn̄ Ete ye Eyen ye edisana spirit nte Matthew 28:19, 20 ọdọhọde?

⁹ Ntak efen emi anamde fi ebiere ndina baptism edi ke ọmọfiọk se Bible ekpepde onyụn̄ enịm se afo ekpepde oro. Kere se Jesus eketịn̄de ini enye ọkọnọde  ewụhọ ete ẹnam mme owo ẹdi mbet imọ. (Kot Matthew 28:19, 20.) Jesus ọkọdọhọ ke ana mbon emi ẹdinade baptism ẹna “ke enyịn̄ Ete ye Eyen ye edisana spirit.” Nso ke oro ọkọwọrọ? Ana enịm ke ofụri esịt fo se Bible ekpepde aban̄a Jehovah, Jesus Eyen esie, ye edisana spirit. Mme akpanikọ emi Bible ekpepde mi ẹnyene odudu etieti, ẹnyụn̄ ẹkeme ndinen̄ede ntụk fi. (Heb. 4:12) Ẹyak idụn̄ọde ndusụk mmọ ise.

10-11. Nso akpanikọ ke afo ekpep onyụn̄ enịm aban̄a Ete?

¹⁰ Ti ini emi afo ekebemde iso ekpep mme akpanikọ emi ẹtienede mi aban̄a Ete: ‘Enyịn̄ esie edi Jehovah,’ enye edi “Ata Edikon̄ ke ofụri isọn̄,” enye ikpọn̄ onyụn̄ edi “ata Abasi.” (Ps. 83:18; Isa. 37:16) Jehovah edi Andibot nnyịn, ‘edinyan̄a onyụn̄ enyene enye.’ (Ps. 3:8; 36:9) Enye ama anam ndutịm man ẹnyan̄a nnyịn ẹsio ke idiọkn̄kpọ ye n̄kpa onyụn̄ ọnọ nnyịn idotenyịn ndidu uwem ke nsinsi. (John 17:3) Afo ndiyak idemfo nnọ enye nnyụn̄ nna baptism ayanam ẹdiọn̄ọ ke afo etiene edi Ntiense Jehovah. (Isa. 43:10-12) Oro ayanam fi esịne ke ubon ofụri ererimbot emi ẹkponode Jehovah ẹnyụn̄ ẹkopde inemesịt ndikere enyịn̄ ndian enye nnyụn̄ nnam mbon en̄wen ẹdiọn̄ọ enyịn̄ oro.—Ps. 86:12.

¹¹ Edi ata n̄kpọ ukpono ndifiọk se Bible ekpepde aban̄a Ete! Ama enịm akpanikọ emi, esịt fo oyonụk fi ndiyak idemfo nnọ Jehovah nnyụn̄ nna baptism.

12-13. Nso akpanikọ ke afo ekpep onyụn̄ enịm aban̄a Eyen?

¹² Eketie fi didie ke idem ini afo ekekpepde akpanikọ emi aban̄ade Eyen? Jesus edi udiana n̄kponn̄kan owo ke ofụri ekondo. Enye ekedikpa afak nnyịn. Owo ikenyịkke-nyịk enye edikpa ọnọ nnyịn. Edieke se inamde owụtde ke imọbuọt idem ke ufak, ẹkeme ndifen mme idiọkn̄kpọ nnyịn, imekeme ndidi ufan Abasi, imonyụn̄ ikeme ndidu uwem ke nsinsi. (John 3:16) Jesus edi Akwa Oku nnyịn. Enye oyom ndin̄wam nnyịn ibọ ufọn ufak inyụn̄ inen̄ede ikpere Abasi. (Heb. 4:15; 7:24, 25) Sia enye edide Edidem Obio Ubọn̄ Abasi, enye ke Jehovah edida inam enyịn̄ Esie asana, etre idiọkido, onyụn̄ ọnọ nnyịn nsinsi edidiọn̄ ke Paradise. (Matt. 6:9, 10; Edi. 11:15) Jesus ke ikpekpebe. (1 Pet. 2:21) Enye ama ada ofụri uwem esie anam uduak Abasi onyụn̄ enịm uwụtn̄kpọ ọnọ nnyịn.—John 4:34.

¹³ Ama enịm se Bible ekpepde aban̄a Jesus, ayama edima Eyen Abasi. Ima oro ayanam fi ada ofụri uwem fo anam se Abasi oyomde nte Jesus akanamde. Oro ndien ayanam ọdọn̄ fi ndiyak uwem fo nnọ Jehovah nnyụn̄ nna baptism.

14-15. Nso akpanikọ ke afo ekpep onyụn̄ enịm aban̄a edisana spirit?

¹⁴ Nso ke ekekere ini afo ekekpepde mme akpanikọ emi ẹtienede mi aban̄a edisana spirit? Edisana spirit itiehe nte Jehovah, Jesus, ye mme angel, enye edi odudu emi Abasi esidade anam utom. Edisana spirit ke Jehovah akada eteme mbon emi ẹkewetde Bible se mmọ ẹdiwetde, kpa spirit emi esinam Bible an̄wan̄a nnyịn onyụn̄ an̄wam nnyịn inam se ikotde. (John 14:26; 2 Pet. 1:21) Jehovah esida edisana spirit esie ọnọ nnyịn “odudu eke ebede ukeme owo.” (2 Cor. 4:7) Edisana spirit esinọ nnyịn odudu ikwọrọ eti mbụk, ibiọn̄ọ idomo, ikop idem ke ini idem ememde nnyịn, inyụn̄ ika iso iyọ ukọbọ. Enye esin̄wam nnyịn inyene ndiye edu emi Bible okotde “mbun̄wụm spirit.” (Gal. 5:22) Mbon emi ẹbuọtde idem ye Abasi ẹnyụn̄ ẹben̄ede enye edisana spirit esie ke ofụri esịt  ke enye esinọ edisana spirit ke ntatubọk.—Luke 11:13.

¹⁵ Nnyịn ndifiọk ke mme asan̄autom Jehovah ẹkeme ndiberi edem ke edisana spirit man an̄wam mmọ ẹka iso ẹkpono Abasi ọsọn̄ọ nnyịn idem etieti! Ama enịm se Bible ekpepde aban̄a edisana spirit, oro ayanam ọdọn̄ fi ndiyak idemfo nnọ Abasi nnyụn̄ nna baptism.

16. Se inemede tọn̄ọ ke ikpehe 1 esịm ikpehe 16 ekpep nnyịn nso?

¹⁶ Afo ndibiere ndiyak uwem fo nnọ Abasi nnyụn̄ nna baptism edi ata akpan n̄kpọ. Nte ima ikekpekpep, ana afo enyịme “se iditakde” fi—oro edi, enyịme ndiyọ mme mfịna onyụn̄ asana ndusụk n̄kpọ ayak. Edi, se ededi emi ayakde atak imenke-men udomo ye mme edidiọn̄ emi afo edibọde. Baptism ekeme ndinyan̄a fi onyụn̄ anam fi enyene eti ubieresịt ke iso Abasi. Ana ima emi afo amade Jehovah Abasi edi ata akpan n̄kpọ emi anamde fi ebiere ndina baptism. Ana onyụn̄ enịm kpukpru akpanikọ emi afo ekpepde ke Bible aban̄a Ete, Eyen, ye edisana spirit ke ofụri esịt fo. Ke ama ekekere se inemede emi, nso idi ibọrọ fo ke mbụme emi, “Ndi mmeben̄e idem ndina baptism?”

17. Nso ye nso ke ana owo anam mbemiso enye anade baptism?

¹⁷ Edieke ekerede ke imeben̄e idem ndina baptism, anaedi amananam ediwak n̄kpọ emi ẹn̄wamde fi ekpere Jehovah. * Afo ndisikpep Bible anam fi edifiọk ediwak n̄kpọ aban̄a Jehovah ye Jesus. Afo emenyene mbuọtidem. (Heb. 11:6) Emenen̄ede enịm mme un̄wọn̄ọ Jehovah emi ẹdude ke Bible, omonyụn̄ enịm ke afo ndibuọt idem ke ufak emi Jesus ekekpede ekeme ndinyan̄a fi nsio ke idiọkn̄kpọ ye n̄kpa. Amakabade esịt ọkpọn̄ mme idiọkn̄kpọ fo, oro edi, emenen̄ede atua n̄kpọfiọk aban̄a ndiọi n̄kpọ emi akanamde onyụn̄ eben̄e Jehovah efen ọnọ fi. Omokpụhọde uwem fo, oro edi, emenen̄ede ọsọn utọ uwem emi afo ekesidude akpa onyụn̄ ọtọn̄ọ ndidu utọ uwem emi Abasi amade. (Utom 3:19) Ọdọdọn̄ fi ndinam mbon en̄wen ẹfiọk se afo enịmde. Ama odot ndidi asuanetop emi mînaha baptism onyụn̄ ọtọn̄ọ ndisan̄a ye esop n̄kwọrọ ikọ. (Matt. 24:14) Afo ndinam mme akpan n̄kpọ emi anam Jehovah ama fi. Amanam esịt adat enye.—N̄ke 27:11.

18. Nso efen ke oyom anam mbemiso ekemede ndina baptism?

¹⁸ Enyene n̄kpọ ifan̄ en̄wen emi anade afo anam mbemiso ekemede ndina baptism. Nte ima ikekpekpep, ana ayak idemfo ọnọ Abasi. Bọn̄ akam ke ofụri esịt nọ enye ini odude ikpọn̄, nyụn̄ n̄wọn̄ọ nọ enye ke iyada ofụri uwem imọ inam uduak esie. (1 Pet. 4:2) Ama anam oro ama, dọhọ anam-ndutịm otu mbiowo ke imoyom ndina baptism. Enye ọyọdọhọ ndusụk mbiowo ẹsobo ye afo. Mbọk kûyak idem enyek  fi ndisobo ye mmọ, sia ndima nditọete oro ẹdọdiọn̄ọ fi ẹnyụn̄ ẹma fi. Mmọ ẹyetie ye afo ẹdụn̄ọde mme akpan n̄kpọ emi Bible ekpepde emi afo ọdiọn̄ọde. Mmọ ẹyom ndikụt ẹte ke mme akpan n̄kpọ oro ẹn̄wan̄a fi, ke ọmọfiọk ke ndiyak idemfo nnọ Abasi nnyụn̄ nna baptism ẹdi akpan n̄kpọ. Mmọ ẹma ẹkụt ke afo omodot ndina baptism, mmọ ẹyedọhọ fi ke emekeme ndina baptism ke mbono circuit m̀mê ke akamba mbono emi edide.

19-20. Nso ke ana anam ama ana baptism? Didie ke ekeme ndinam oro?

¹⁹ Nso ke ana anam ama ana baptism? * Ti ke ini akayakde idemfo ọnọ Jehovah ke ama ọn̄wọn̄ọ un̄wọn̄ọ ọnọ enye, ke enye onyụn̄ oyom fi anam se ọkọn̄wọn̄ọde. Ntre ama ana baptism, ana anam se ọkọn̄wọn̄ọde ini akayakde idem ọnọ enye. Didie ke ekeme ndinam oro?

²⁰ Nen̄ede diana ye nditọete ke esịt esop. Idahaemi anade baptism mi, afo emetiene esịne ke “ofụri otu nditọete.” (1 Pet. 2:17) Nditọete ẹtie nte ubon fo. Afo ndisidụk mbono esop kpukpru ini ayanam fi enen̄ede adiana ye mmọ. Kot Ikọ Abasi kpukpru usen nyụn̄ tie kere se okotde. (Ps. 1:1, 2) Ama okot itie Bible ama, da ini tịm kere se okotde. Oro ayanam se okotde odụk fi esịt. ‘Ka iso bọn̄ akam.’ (Matt. 26:41) Akam ofụri esịt emi afo ọbọn̄de ayanam fi ọdọdiọn̄ ekpere Jehovah. ‘Ka iso ndibem iso nyom obio ubọn̄’ Abasi. (Matt. 6:33) Emekeme ndibem iso nyom Obio Ubọn̄ Abasi edieke anamde ukwọrọikọ edi akpan n̄kpọ ke uwem fo. Afo ndisikwọrọ ikọ kpukpru ini ayanam fi ọdọdiọn̄ ọbuọt idem ye Abasi, omonyụn̄ ekeme ndin̄wam mbon en̄wen ẹsan̄a ke usụn̄ emi adade esịm nsinsi uwem.—1 Tim. 4:16.

21. Nso ke afo ndina baptism edinam inọ fi?

²¹ Afo ndibiere ndiyak idemfo nnọ Jehovah nnyụn̄ nna baptism edi n̄kponn̄kan n̄kpọ emi afo edibierede ke uwem fo. Imọfiọk ke ayakpa fi n̄kpọ. Ndi ufọn osụk odu ndinyịme ndiyọ mme mfịna nnyụn̄ nsana ndusụk n̄kpọ nyak man ana baptism? Ih, odu! Se ededi emi afo ọkpọyọde ke idiọk ererimbot emi edi ke ‘ibio ini onyụn̄ efefere.’ (2 Cor. 4:17) Edi afo ndina baptism ayanam uwem fo enyene ibuot idahaemi onyụn̄ anam fi odu “ata uwem” ke ini iso. (1 Tim. 6:19) Ntre mbọk, bọn̄ akam tịm tie kere se idide ibọrọ fo ke mbụme emi, “Ndi mmeben̄e idem ndina baptism?”