1. Ek ghor bandchea poilim eka munxan kitem korunk zai?

CHINTAT ek munis ghor bandunk sodhta. Taka kosle torechem ghor bandunk zai tem to zannam. Tor to somtoch vochon apnnank zai teo vostu gheun ghor bandunk suru kortolo kai? Na. Tannem bandchea poilim, kitem tori mhotvachem korunk zai. Tem ghor bandunk, kitlo korch lagtolo tem tannem chintunk zai. Kiteak? Karonn tednam tem ghor bandun sompounk aplea lagim zai titlo poiso asa vo na tem taka kollttolem. Tannem adim fuddench borea bhaxen kitlo khorch lagtolo tem chintlem zalear to tem novem ghor bandun sompounk pavtolo.

2. Lukas 14:27-30-a pormonnem bautizm gheunchea poilim tunvem kitem chintunk zai?

² Jehova pasot aslolea tujea mogak lagon ani upkariponnak lagon tunvem atam bautizm gheunk chintlam kai? Toxem zalear, tumi pasun tea ghor bandpi munxa bhaxen nirnnoi gheuncho poddttolo. Ami oxem kiteak mhunnttat? Lukas 14:27-30-ant Jezun sanglolea utrancher ami dhean dium-ia. (Vachat.) Aplo xis zatolo zalear tantunt kitem mellon asa tea vixim Jezu tea versamnim sangtalo. Tacho pattlav korunk ami thoddea oddchonneank tondd diunk poddttolem ani thoddeo vostu soddun diuncheo poddttoleo. (Lukas 9:23-26; 12:51-53) Tor bautizm gheunchea poilim tunvem tantunt kitem soglem mellon asa tem bariksannen chintop gorjechem. Toxem kelear, bautizm gheun Jehovachi seva visvaxiponnan korit ravonk tuka adar zatolo.

3. Hea lekhant ami kitem bhasabhas kortolim?

³ Bautizm gheunk lagon oddchonneancho fuddo korop ani thoddeo vostu soddun divop faideachem asa kai? Hoi, faideachem asa! Bautizm ghetlolean tuka aiz ani fuddarak  zaitim besanvam mellonk xoktat. Bautizma vixim thoddea mhotvachea prosnancher ami bhasabhas korum-ia. Oxem kelolean tum hea prosnancho zobab diunk pavtolo, “Hanv bautizm gheunk toiar asa?”

4. (a) Jehovak somorponn korop mhunnttlear kitem? (b) Matev 16:24-ant sanglolea pormonnem aple “khuxechi vatt soddchi vo nakarchi,” hacho orth kitem?

⁴ Somorponn mhunnche kitem? Bautizm gheunchea poilim tunvem somorponn korunk zai. Tum somorponn korta tednam tum Jehovak magnnem korta ani tachi seva sodankall tujea jivitant korit ravtolo mhunn taka sangta. Toxench tum tujea ‘khuxechi vatt soddtta vo apnnakuch nakarta.’ (Matev 16:24 vachat.) Tum atam Jehovacho zata, zo ek vhodd sueog zaun asa. (Rom. 14:8) Atam thaun tuji khuxi korchea bodlek, tum Jehovachi seva kortolo mhunn tunch sangta. Somorponn kortana tum Devak ek utor dita. Hem korunk Dev amcher dobhav ghalina. Punn ami oxem utor ditat tednam, tem ami pallunk zai mhunn to amche thaun opekxa korta.—St. 116:12, 14.

5. Somorponn ani bautizma modem koslo ontor asa?

⁵ Somorponn ani bautizma modem koslo ontor asa? Tum somorponn kortana tem tujea ani Jehova modench asta, dusreank tem dixtti poddona. Punn bautizm tum sogleanchea hujir gheta, ghoddie eka zomatint vo eka odhivexonant. Tujea bautizma udexim tunvem adim fuddench Jehovak somorponn kelam mhunn tum dusreank dakhoun dita. * Tor tum bautizm gheta tednam tum Jehovacho soglea kallzan, bollan, monan ani xokten mog korta mhunn dakhoun dita ani tachi seva tum sodanch korunk axeta mhunn dakhoita.—Marku 12:30.

6-7. Bautizm kiteak gorjecho tea vixim 1 Pedru 3:18-22-ant khoinchim don karonnam dileant?

⁶ Bautizm gheunk korench gorjechem kai? 1 Pedru 3:18-22-ant dilolea utrancher dhean diat. (Vachat.) Zoxem ark-pett polloitana Noah-cho bhavarth distalo, teach toren tumi bautizm ghetat tednam tumi Jehovak somorponn kelam mhunn dusreank kollon ieta. Punn bautizm ghevop khorench gorjechem asa kai? Hoi gorjechem. Kiteak tem Pedru amkam sangta. Poilem karonn mhunnttlear, tem ‘tuka taronn’ dita. Koxem? Ami Jezucher bhavarth dovrun, to amchea pasot melo, sorgar punorjivont zalo ani “Devachea uzveak” bosla mhunn amkam asloli patienni ami kornneamnim dakhoitat tednam bautizm amkam taronn diunk xokta.

⁷ Dusrem karonn, bautizma udexim amkam ‘ek borem ontoskornn’ melltta. Ami somorponn korun bautizm ghetat tednam Jehova lagim amchi ek khas ixttagot suru zata. Ami kallzant thaun poschatap kortat ani soddvonnecher bhavarth dovortat dekhun Dev amchim patkam bhogxita. Haka lagon ami tache fuddem ek borem ontoskornn dovrunk pavtat.

8. Bautizm gheuncho tuzo nirnnoi kiteacher adarit asonk zai?

⁸ Bautizm gheuncho tuzo nirnnoi kiteacher adarit asonk zai? Tunvem Bible-a vixim bariksannen obheas kelo tednam tum Jehovachea gunnam vixim ani to koso vagta tea vixim zaitem xikonk pavlo. Tum tachea vixim jem kitem xiklo tem tujea kallzak laglem ani tum tacho khub mog korunk pavlo. Jehova pasot tuka aslolea moga khatir tunvem bautizm gheuncho nirnnoi gheunk zai.

9. Matthew 28:19, 20-an sanglam tea pormonnem Bapachea, Putachea ani povitr xoktechea nanvan bautizm ghevop, hacho orth kitem?

⁹ Bautizm gheuncho nirnnoi gheunk anik ek karonn mhunnttlear tum Bible-antlean jem xikla tacher tum bhavarth dovorta. Xis korchea  kamam vixim Jezun adnea dili tednam tannem kitem mhunnttlem tacher dhean diat. (Matev 28:19, 20 vachat.) Bautizm ghetat tannim to ‘Bapachea, Putachea ani povitr xoktechea nanvan’ gheunk zai mhunn tannem sanglem. Hacho orth kitem? Hacho orth tunvem Jehova vixim, tacho Put Jezu vixim ani povitr xokte vixim Bible-antlea sotancher kallzantlean bhavarth dovrunk zai. Hea sotant khub xokti asa ani tim tujea kallzant rigonk xoktat. (Heb. 4:12) Tantuntlea thoddea sotam vixim atam ami bhasabhas korum-ia.

10-11. Tum Bapa vixim khoinchim sotam xikla ani tunvem manun ghetleant?

¹⁰ Tea vella vixim ugddas kor jednam tum Bapa vixim him sotam xiklo. Tachem nanv ‘Yahveh vo Jehova.’ To ‘ak’khe prithume voir ekloch bhov vorto’ ani to “ekloch Dev” zaun asa. (St. 83:18; 117:1; Iz. 37:16) To amcho Rochnnar ani tachea udexim amkam taronn melltta. (St. 3:8; 36:9) Patok ani mornna thaun salvar korunk tannem manddavoll kelea ani sasnak jieuncho ek fuddar tannem amkam dila. (Juanv 17:3) Tum somorponn korun bautizm gheta tednam lok tuka Jehovacho Sakxi mhunn vollkhotole. (Iz. 43:10-12) Tum sonvsarbhor aslolea eka kuttumbacho bhag zata. Hea kuttumbachea sodoxiank Devachea nanvan apnnank vollkhonk ani tea nanva vixim dusreank sangonk gorv bhogta.—St. 86:12.

¹¹ Bapa vixim Bible jem xikoita tem zannam zavop kitlo vhoddlo sueog zaun asa! Him moladik sotam tum zannam zata tednam Jehovak tujem jivit somorponn korun bautizm gheunk tum fuddem sorta.

12-13. Puta vixim tum khoinchim sotam xikla ani tunvem manun ghetleant?

¹² Puta vixim sokol dilolim sotam tum xiklo tednam tuka koxem dislem? Jehova uprant, ak’khea vixvant Jezu mhotvacho zaun asa. To amcho soddvonndar. Tannem ap-khuxen amchea pasot aplo jiv dilo. Amkam soddvonnecher bhavarth asa mhunn ami korneamnim dakhoitat tednam amkam amchea patkanchem bhogsonnem melltta, ami Deva sangata ixttagot zoddttat ani amkam sasnachem jivit melltta. (Juanv 3:16) Jezu amcho Porom Iadnik zaun asa. Ami soddvonne thaun faido zoddlolo ani Deva sangata ek laginchi ixttagot zoddloli taka zai. (Heb. 4:14; 7:24, 25) To Devachea Rajeacho Raza zalolean, Jehova tachea udexim aplea nanvacher add ghatlole opman kaddttolo, noxtteponn kabar kortolo ani fuddarachea Sobit Bagent sasnachim besanvam ditolo. (Mt. 6:9, 10; Prok. 11:15) Jezuchi ami dekh gheunk zata. (1 Ped. 2:21) Tannem Devachi khuxi korunk aplem ak’khem jivit uzar korun amkam ek bori dekh dovorlea.—Juanv 4:34.

¹³ Jezu vixim Bible kitem xikoita tem tum manun gheta tednam tumi tacho mog korunk pavtolim ani ho mog Jezu bhaxen tujea jivitant Devachi khuxi korunk tuka modot kortolo. Tea udexim tum Jehovak somorponn korun bautizm gheunk pavtolo.

14-15. Povitr xokte vixim tum khoinchim sotam xikla ani tunvem manun ghetleant?

¹⁴ Povitr xokte vixim sokol dilolim sotam tum xiklo tednam tuka koxem dislem? Povitr xokti ek veokti nhoi punn Devachi xokti zaun asa. Jehovan Bible borounk povitr xokti uzar korun lokank prerit kel’le, ani ti xokti ami Bible-antlean vachlam tem somzonk ani apnnaunk amkam modot korta. (Juanv 14:26; 2 Ped. 1:21) Aplea povitr xokte udexim Jehova amchea xokte poros “vorti” xokti amkam dita. (2 Kor. 4:7) Toxench hi xokti amkam bori khobor porgottunk, tallnni pois korunk, niraxiponnak tondd diunk ani trasancho fuddo korunk modot korta. Ti xokti amkam ‘povitr xoktechea follant’ aslole sobit gunn dakhounk modot korta. (Gal. 5: 22) Tacher bhorvonso dovortat tankam ani tea xokte pasot kallzant thaun magtat tankam Dev udar kallzan apli xokti dita.—Lukas 11:13.

¹⁵ Jehovachi bhokti kortoleamnim tachi seva korunk tachea povitr xoktecher patieun ravonk zata, hem zannam zalolean kitli buzvonn melltta! Tum povitr xokte vixim xiklolem sot manun gheta tednam Devak tujem jivit somorponn korun bautizm gheunk tum fuddem sorta.

16. Hea lekhant ami atam meren kitem xiklim?

¹⁶ Devak somorponn korun bautizm ghevop hem ek mhotvachem pavl zaun asa. Ami atam meren xiklolea pormonnem, hem pavl gheunk ami oddchonneancho fuddo korunk ani thoddeo vostu soddun diunk toiar asonk zai. Punn oxem kelolean tuka khub besanvam mellttolim. Bautizma vorvim tum taronn zoddttolo ani Deva fuddem tuka ek borem ontoskornn astolem. Bautizm gheunk tujem mukhel karonn tuka Jehova pasot aslolo mog asonk zai. Toxench Bapa vixim, Puta vixim ani povitr xokte vixim tum xikla tea sotancher tunvem purnn kallzant thaun bhavarth dovrunk zai. Ami atam meren jem bhasabhas kelam tachea uprant tum hea prosnacho zobab kitem ditolo, “Hanv bautizm gheunk toiar asa?”

17. Bautizm gheunchea poilim eklean kitem-kitem korunk zai?

¹⁷ Tum bautizm gheunk toiar asa oxem tuka dista zalear atam meren tunvem Jehova sangata tuji ixttagot ghott korunk zaitim pavlam ghetleant astolim. * Tum chukonastana Bible obheas gheta dekhun tum Jehova vixim ani Jezu vixim zaito xikla ani tuzo bhavarth vaddla. (Heb. 11:6) Bible-ant aslolea Jehovachea bhasaunneancher tuka purnn bhorvonso asa ani Jezuchea bolidanacher bhavarth dovorlolean tuka patka ani mornna thaun soddvonn mellttoli mhunn khatri asa. Tuka tujea patkank lagon dukh bhogta ani tunvem poschatap kela ani bhogsonnem mellonk lagon tunvem Jehova lagim maglam. Tunvem tujem jivit bodol’lam. Tunvem tujem poilinchem vaitt jivit soddun dilam ani Devak manta toslem jivit jieunk suru kelam. (Itihas 3:19) Tujea bhavartha vixim dusreank sangonk tum khuxal zata. Tum ek bautizm gheunk naslolo porgottnnar zaun sobhe sangata porgottnnent bhag gheta. (Mt. 24:14) Tunvem him gorjechim pavlam ghetleant mhunn Jehova khub khuxal zala.—Mho. 27:11.

18. Bautizm gheunchea poilim tunvem anik kitem korunk zai?

¹⁸ Bautizm gheunchea poilim, tunvem anik thoddeo vostu korchi goroz asa. Atam meren xiklolea pormonnem tujem jivit tunvem Devak somorponn korunk zai. Tum ekttoch astana, Deva lagim kallzantlean magnnem kor ani tujem jivit tachi khuxi korunk uzar kortolo mhunn taka utor di. (1 Ped. 4:2) Tuka bautizm gheunk  zai mhunn vhoddilanchea sohokareak sang. To uprant thoddea vhoddilank tuka mellonk sangtolo. Tankam mellonk bhienaka. He mogall vhoddil tuka vollkhotat ani tuzo mog kortat. Tum xikla tim Bible-antlim mullavim sotam te tujea lagim bhasabhas kortole. Tim mullavim sotam tum somzota kai, ani somorponn ani bautizmachem mhotv tum zannam kai, mhunn te khatri korun ghetole. Tum bautizm gheunk toiar asa zalear te tuka fuddlea zomatik vo odhivexonak tujean bautizm gheunk zata mhunn sangtole.

19-20. Bautizm ghetlea uprant tuka kitem korchem poddttolem, ani tem tum koso korunk xokta?

¹⁹ Bautizm ghetlea uprant tuka kitem korchem poddttolem? * Ami xiklolea pormonnem somorponn mhunnttlear ami Jehovak dita tem utor zaun asa. Ani tunvem tujem utor dovorlolem Jehovak zai. Tor bautizma uprant tunvem dilolea utra pormonnem tunvem jieunk zai. Hem tum koso korunk xokta?

²⁰ Sobhechea bhav-bhoinnam sangata ghott ixttagot zoddat. Bautizm ghetlea uprant, tum ek famil koxim aslolea bhav-bhoinnancho bhag zata. (1 Ped. 2:17) Tum mittingent sodanch hajir zata tednam bhav-bhoinnam sangata tuji ixttagot ghott zatoli. Dor disa Devachem Utor vach ani tacher niall kor. (St. 1:1, 2) Bible-antlo ek bhag vachlea uprant tacher bariksannen niall korunk thoddo vell kadd. Oxem korta tednam tim utram tujea kallzant rigtolim. ‘Magnnem korit rav.’ (Mt. 26:41) Tum kallzant thaun Jehova lagim magnnem korta tednam tum tachea lagim sortolo. ‘Devachem Raj poilea zagear dovor.’ (Mt. 6:33, NW) Porgottnnechea kamak tum tujea jivitant mhotvacho zago dita tednam tum hem korunk pavtolo. Porgottnnent tum sodanch bhag gheta tednam tum tuzo bhavarth ghott kortolo ani dusreank sasnachea jivitachea rostear cholonk modot kortolo.—1 Tim. 4:16.

21. Bautizm ghetlolean tuka kitem mellonk xokta?

²¹ Tujem jivit Jehovak somorponn korop ani bautizm ghevop ho tujea jivitantlo sogleam poros mhotvacho nirnnoi zaun asa. Hem khorem ki hea nirnnoiak lagon tuka thoddeo vostu soddun diuncheo poddttoleo. Punn tuka luksonn zaunchem na, karonn hea sonvsarant tuka sosunk poddttat teo khonti-dukhi “lhan ani thoddea kallacheo” zaun asat. (2 Kor. 4:17) Punn, bautizm ghetlolean tuka aiz khuxalkaiechem jivit mellonk xokta ani fuddarak “khorem jivit.” (1 Tim. 6:19) Tor doia korun hea prosnacho zobab tum koso ditolo tem bariksannen chintun magnnem korun polloi, “Hanv bautizm gheunk toiar asa?”