1. Etẹwẹ mẹde dona wà whẹpo do jẹ owhé de gbá ji?

MÍ NI dọ dọ mẹde basi dide nado gbá owhé de. E yọ́n owhé wunmẹ he e jlo na gbá. Ṣigba, be e na yì nusatẹn de bo yì họ̀ azọ́nwanu delẹ to afọdopolọji bosọ jẹ azọ́n ji wẹ ya? Paali. Whẹpo e nado bẹjẹeji, e dona wà onú titengbe de—e dona lẹn akuẹzinzan he owhé lọ gbigbá na biọ to e si whẹ́. Etẹwutu? Na e dona yọnẹn eyin vlavo e tindo akuẹ he pé nado dotana owhé lọ. Eyin e yí sọwhiwhe do lẹn akuẹ lọ jẹnukọn, e yọnbasi taun dọ e na dotana owhé yọyọ etọn po kọdetọn dagbe po.

2. Sọgbe hẹ Luku 14:27-30, etẹ ji wẹ a dona yí sọwhiwhe do lẹnnupọndo whẹpo do yí baptẹm?

² Be owanyi po pinpẹn-nutọn-yinyọnẹn he a tindo na Jehovah po nọ whàn we nado lẹnnupọndo baptẹm yíyí ji ya? Eyin mọ wẹ, be a pannukọn nudide de he taidi dehe dawe he jlo na gbá owhé de lọ pannukọn. Naegbọn mí sọgan dọ mọ? Lẹnnupọndo nuhe Jesu dọ to Luku 14:27-30 mẹ ji. (Hia.) Jesu to hodọdo nuhe e zẹẹmẹdo nado yin devi etọn ji. Nado yin hodotọ etọn, mí dona wleawufo nado kẹalọyi ‘akuẹzinzan’ he e na biọ, enẹ wẹ avùnnukundiọsọmẹnu po avọ́sinsan he e nọ bẹhẹn lẹ po. (Luku 9:23-26; 12:51-53) Enẹwutu, whẹpo a nido yí baptẹm, a dona yí sọwhiwhe do lẹnnupọndo nuhe e bẹhẹn lẹpo ji. To whenẹnu, a na pegan dogọ nado to Jiwheyẹwhe sẹ̀n po nugbonọ-yinyin po zọnmii taidi Klistiani he yí baptẹm de.

3. Etẹ ji wẹ mí na dọhodo to hosọ ehe mẹ?

³ Be e doale nado lẹzun devi Klisti tọn he yí baptẹm de ya? Gbau! Baptẹm nọ hùn ohọ̀n dona madosọha lẹ tọn dote, todin podọ to sọgodo. Mì gbọ mí ni dọhodo kanbiọ titengbe delẹ ji gando baptẹm go. Mọwiwà na gọalọna we nado na gblọndo na kanbiọ lọ dọ, “Be n’ko wleawufo nado yí baptẹm ya?”

4. (a) Etẹwẹ yin klandowiwe? (b) Sọgbe hẹ Matiu 16:24, etẹwẹ mẹdetiti ‘mimọ́n’ zẹẹmẹdo?

⁴ Etẹwẹ yin klandowiwe? Whẹpo a nido sọgan yí baptẹm, a dona basi klandowiwe. Whenue a to klandowiwe basi, a na hodẹ̀ ahundopo tọn hlan Jehovah bo dọna ẹn dọ a jlo na yí gbẹzan towe do sẹ̀n ẹn kakadoi. Whenue a to klandowiwe basi hlan Jiwheyẹwhe, a na “mọ́n” dewe. (Hia Matiu 16:24.) Todin, a na yin Jehovah tọn, ehe yin lẹblanulọkẹyi daho de. (Lom. 14:8) A to didọna ẹn dọ, bẹsọn din sọyi nuhe na to otẹn tintan mẹ na we wẹ sinsẹ̀n-bibasi hlan ẹn, e ma yin homẹ dewe tọn hinhẹnhùn. Klandowiwe towe yin opà vonọtaun de, he nọ yin didona Jiwheyẹwhe. Jehovah ma nọ hẹn mí gánnugánnu nado do opà mọnkọ. Ṣigba, whenue mí do e, e nọ donukun dọ mí ni de e.—Salm. 116:12, 14.

5. Nawẹ klandowiwe tindo kanṣiṣa hẹ baptẹm gbọn?

⁵ Nawẹ klandowiwe tindo kanṣiṣa hẹ baptẹm gbọn? Klandowiwe yin nuyiwa mẹdetiti tọn de he nọ yin bibasi to nuglọ, to hiẹ po Jehovah po ṣẹnṣẹn. Baptẹm nọ yin bibasi to gbangba to nukọn mẹdevo lẹ tọn, bo nọ saba yin to plidopọ lẹdo tọn kavi plidopọ daho de ji. To whenue a yí baptẹm, a na dohia mẹdevo lẹ dọ a ko basi klandowiwe towe hlan Jehovah. * Enẹwutu, baptẹm towe nọ dohia mẹdevo lẹ dọ a yí ahun towe, alindọn towe, ayiha towe po huhlọn towe lẹpo po do yiwanna Jehovah Jiwheyẹwhe towe, podọ dọ a magbe nado sẹ̀n ewọ kakadoi.—Malku 12:30.

6, 7. Sọgbe hẹ 1 Pita 3:18-22, whẹwhinwhẹ́n awe tẹlẹ wutu wẹ e do yin dandan nado yí baptẹm?

⁶ Be dandan wẹ nado yí baptẹm ya? Lẹnnupọndo nuhe 1 Pita 3:18-22 dọ ji. (Hia.) Kẹdẹdile aki lọ yin kunnudenu yinukundomọ yise he Noa tindo tọn do, baptẹm towe yin kunnudenu he họnwun de dọ a ko basi klandowiwe hlan Jehovah. Ṣigba, be dandan wẹ nado yí baptẹm ya? Mọwẹ. Pita dọ whẹwhinwhẹ́n he wutu wẹ. Tintan, e nọ ‘whlẹn mí gán.’ Baptẹm sọgan whlẹn mí eyin mí ko ze afọdide dandan tọn lẹ nado dohia dọ mí tindo yise to Jesu mẹ, bosọ yise dọ ewọ kú na mí, yin finfọnsọnku do olọn mẹ, bo tin “to adusilọ Jiwheyẹwhe tọn mẹ” todin.

⁷ Awetọ, baptẹm nọ zọ́n bọ yè nọ tindo “ayihadawhẹnamẹnu dagbe de.” Whenue mí klan míde do wiwe hlan Jiwheyẹwhe bo yí baptẹm, mí nọ biọ haṣinṣan vonọtaun de mẹ hẹ ẹ. Jiwheyẹwhe nọ jo ylando mítọn lẹ na mí, na mí do lẹnvọjọ ahundopo tọn hia bo tindo yise to ofligọ lọ mẹ wutu. Gbọnmọ dali, mí sọgan tindo ayihadawhẹnamẹnu dagbe de to nukọn etọn.

8. Dodonu tẹ ji wẹ nudide towe nado yí baptẹm dona sinai do?

⁸ Dodonu tẹ ji wẹ nudide towe nado yí baptẹm dona sinai do? Na a yí sọwhiwhe do plọn Biblu wutu, a ko yọ́n nususu gando Jehovah go, yèdọ jẹhẹnu etọn lẹ po aliho nuyiwa tọn etọn lẹ po. Nuhe a plọn gando ewọ go lẹ ko yinuwado ahun towe ji bo whàn we nado yiwanna ẹn sisosiso. Owanyi he a tindo na Jehovah wẹ dona yin dodonu tangan he ji nudide towe nado yí baptẹm na sinai do.

9. Sọgbe hẹ Matiu 28:19, 20, etẹwẹ e zẹẹmẹdo nado yin bibaptizi to oyín Otọ́ tọn, Visunnu tọn po gbigbọ wiwe tọn po mẹ?

⁹ Nudide towe nado yí baptẹm sọ sinai do nugbo Biblu tọn he a ko kẹalọyi lẹ ji. Lẹnnupọndo nuhe Jesu dọ to whenue e na gbedide lọ nado hẹn gbẹtọ lẹ zun devi lẹ ji. (Hia Matiu 28:19, 20.) Sọgbe hẹ nuhe Jesu dọ, mẹhe yí baptẹm lẹ dona wàmọ “to oyín Otọ́ tọn, Visunnu tọn, po gbigbọ wiwe tọn po mẹ.” Etẹwẹ ehe zẹẹmẹdo? A dona yí ahun towe lẹpo do tindo  yise to nugbo Biblu tọn he gando Jehovah; Visunnu etọn Jesu, po gbigbọ wiwe po go lẹ mẹ. Nugbo ehelẹ dohuhlọn taun bo sọgan yinuwado ahun towe ji sisosiso. (Heb. 4:12) Mì gbọ mí ni gbadopọnna delẹ to yé mẹ.

10, 11. Nugbo he gando Otọ́ lọ go tẹlẹ wẹ a ko plọn bosọ kẹalọyi?

¹⁰ Lẹnnupọn yì godo do ojlẹ he mẹ a plọn nugbo ehelẹ gando Otọ́ lọ go te ji: “Oyín [etọn] nọ yin Jehovah,” ewọ wẹ “Gigogán to aigba lẹpo ji,” podọ ewọ kẹdẹ wẹ yin “Jiwheyẹwhe nugbo lọ.” (Salm. 83:18; Isa. 37:16) Ewọ wẹ Mẹdatọ mítọn, podọ “Jehovah dè wẹ whlẹngán nọ wá sọn.” (Salm. 3:8; 36:9) E ko basi tito nado whlẹn mí sọn ylando po okú po si, bosọ na mí todido ogbẹ̀ madopodo tọn. (Joh. 17:3) Klandowiwe po baptẹm towe po na do we hia taidi dopo to Kunnudetọ Jehovah tọn lẹ mẹ. (Isa. 43:10-12) A na lẹzun apadewhe whẹndo etọn tọn, he bẹ sinsẹ̀n-basitọ etọn lẹ hẹn lẹdo aihọn pé, yèdọ mẹhe homẹ yetọn nọ hùn nado tindo yinkọ Jiwheyẹwhe tọn to ota podọ nado hẹn yinkọ ehe zun yinyọnẹn na mẹdevo lẹ.—Salm. 86:12.

¹¹ Lẹblanulọkẹyi nankọ die nado mọnukunnujẹ nuhe Biblu plọnmẹ gando Otọ́ lọ go mẹ! Whenue a kẹalọyi nugbo họakuẹ ehelẹ, enẹ whàn we sisosiso nado klan dewe do wiwe hlan Jehovah bosọ yí baptẹm.

12, 13. Nugbo he gando Visunnu lọ go tẹlẹ wẹ a ko plọn bosọ kẹalọyi?

¹² To whenue a plọn nugbo he bọdego ehelẹ gando Visunnu lọ go, nawẹ a yinuwa gbọn? Jesu wẹ yin omẹ awetọ he klohugan to wẹkẹ lọ mẹ. Ewọ wẹ Mẹfligọtọ mítọn. E desọn ojlo mẹ bo ze ogbẹ̀ ede tọn jo do ota mítọn mẹ. Eyin mí nọ dohia to nuyiwa mítọn lẹ mẹ dọ mí tindo yise to ofligọ lọ mẹ, ylando mítọn lẹ sọgan yin jijona mí, bọ mí na lẹzun họntọn Jiwheyẹwhe tọn bo nasọ mọ ogbẹ̀ madopodo. (Joh. 3:16) Jesu wẹ yin Yẹwhenọ Daho mítọn. E jlo na gọalọna mí nado mọaleyi sọn ofligọ lọ mẹ bosọ tindo haṣinṣan pẹkipẹki de hẹ Jiwheyẹwhe. (Heb. 4:15; 7:24, 25) Taidi Ahọlu Ahọluduta Jiwheyẹwhe tọn, gbọn ewọ gblamẹ wẹ Jehovah na klan oyín Etọn do wiwe, doalọtena kanyinylan bosọ hẹn dona madopodo lẹ wá to Paladisi he ja lọ mẹ. (Mat. 6:9, 10; Osọ. 11:15) Jesu wẹ apajlẹnọ mítọn. (1 Pita 2:21) E ze apajlẹ dai na mí gbọn gbẹzan ede tọn zizejo nado wà ojlo Jiwheyẹwhe tọn dali.—Joh. 4:34.

¹³ Eyin a kẹalọyi nuhe Biblu plọnmẹ gando Jesu go, a na wá yiwanna Visunnu vivẹ́ Jiwheyẹwhe tọn. Owanyi enẹ na whàn we nado yí gbẹzan towe do wà ojlo Jiwheyẹwhe tọn dile Jesu wà do. Podọ enẹ na na we tuli nado klan gbẹzan towe do wiwe hlan Jehovah bo yí baptẹm.

14, 15. Nugbo he gando gbigbọ wiwe go tẹlẹ wẹ a ko plọn bosọ kẹalọyi?

¹⁴ Etẹwẹ a lẹn to whenue a plọn nugbo he bọdego ehelẹ gando gbigbọ wiwe go? E ma yin gbẹtọ de gba, ṣigba huhlọn-yido-wazọ́n Jiwheyẹwhe tọn wẹ. Jehovah yí gbigbọ wiwe lọ zan nado deanana mẹhe kàn Biblu lẹ, podọ gbigbọ lọ nọ gọalọna mí nado mọnukunnujẹ nuhe mí hia to e mẹ lẹ mẹ bosọ yí yé do yizan mẹ. (Joh. 14:26; 2 Pita 1:21) Jehovah nọ na mí “huhlọn he hú jọwamọ tọn” gbọn gbigbọ etọn gblamẹ. (2 Kọl. 4:7) Gbigbọ lọ nọ na mí huhlọn nado dọyẹwheho wẹndagbe lọ tọn, nado diahi hẹ mẹtẹnpọn po gbigbọjọ po, bosọ doakọnna whlepọn lẹ. E nọ gọalọna mí nado do jẹhẹnu dagbedagbe he “sinsẹ́n gbigbọ tọn” bẹhẹn lẹ hia. (Gal. 5:22) Jiwheyẹwhe nọ desọn ojlo mẹ nado na gbigbọ etọn mẹhe nọ dejidego bosọ nọ biọ ẹ po ahundopo po lẹ.—Luku 11:13.

¹⁵ Lehe e vọ́ jidenamẹ bo miọnhomẹnamẹ do sọ, nado yọnẹn dọ sinsẹ̀n-basitọ Jehovah tọn lẹ sọgan ganjẹ gbigbọ wiwe go nado gọalọna yé  na yé nido sẹ̀n Jiwheyẹwhe! Eyin a kẹalọyi nugbo he a plọn gando gbigbọ wiwe lọ go lẹ, a na yin whinwhàn nado klan dewe do wiwe hlan Jiwheyẹwhe bo yí baptẹm.

16. Etẹwẹ mí ko plọn kakajẹ dín dile mí to dogbapọnna hosọ ehe?

¹⁶ Eyin a basi dide nado klan gbẹzan towe do wiwe hlan Jiwheyẹwhe bo yí baptẹm, afọdide titengbe de ze wẹ a te. Dile mí ko plọn do, a dona wleawufo nado kẹalọyi akuẹzinzan he e nọ biọ, yèdọ avùnnukundiọsọmẹnu po avọ́sinsan lẹ po. Ṣigba, avọ́sinsan lọ lẹ ma sọtẹ́n yijlẹdo dona he e nọ hẹnwa lẹ go. Baptẹm sọgan whlẹn we, bo nasọ zọ́n bọ a na tindo ayihadawhẹnamẹnu dagbe de to Jiwheyẹwhe nukọn. Owanyi he a tindo na Jehovah Jiwheyẹwhe wẹ dona yin onú titengbe he ji nudide towe nado yí baptẹm na sinai do. A dona sọ yí ahun towe lẹpo do tindo yise to nuhe a ko plọn gando Otọ́ lọ, Visunnu lọ po gbigbọ wiwe po go mẹ. To whenue a ko lẹnnupọndo nuhe ji mí dọhodo wayi lẹ ji godo, nawẹ a na na gblọndo kanbiọ ehe tọn gbọn he dọ, “Be n’ko wleawufo nado yí baptẹm ya?”

17. Etẹwẹ yin delẹ to afọdide he nọ planmẹ jẹ baptẹm kọ̀n lẹ mẹ?

¹⁷ Eyin a tindo numọtolanmẹ lọ dọ emi ko wleawufo nado yí baptẹm, be ayihaawe ma tin dọ a ko ze afọdide susu lẹ nado wleawuna haṣinṣan dagbe de hẹ Jehovah. * Na a nọ hia Biblu to gbesisọ mẹ wutu, a ko wá yọ́n nususu gando Jehovah po Jesu po go. A ko wleawuna yise. (Heb. 11:6) A deji mlẹnmlẹn do opagbe Jehovah tọn he tin to Biblu mẹ lẹ go, podọ a sọ kudeji dọ yise towe to avọ́sinsan Jesu tọn mẹ sọgan whlẹn we sọn ylando po okú po si. A ko lẹnvọjọ sọn ylando towe lẹ mẹ; nuhe a ko ṣiwà wayi lẹ nọ vẹna we yì ahun mẹ, podọ a ko biọ to Jehovah si nado jona we. A ko diọ aliho gbẹninọ tọn towe; bo gbẹ́ gbẹzan ylankan towe hoho tọn dai petepete, bo ko sọ jẹ nuhe nọ hẹn homẹ Jiwheyẹwhe tọn hùn lẹ wà ji. (Owalọ 3:19) Apàpà nọ sọ́ we nado dọhona mẹdevo lẹ gando yise towe go. A pegan nado lẹzun wẹnlatọ he ma ko yí baptẹm de bo ko sọ jẹ yẹwhehodọ ji hẹ agun lọ. (Mat. 24:14) Homẹ Jehovah tọn nọ hùn do gowe na afọdide titengbe ehelẹ he a ze. A hẹn ayajẹ daho wá na ẹn.—Howh. 27:11.

18. Nudevo tẹwẹ a dona wà whẹpo do sọgan yí baptẹm?

¹⁸ Whẹpo a nido sọgan yí baptẹm, onú kleun delẹ gbẹ́ pò he a dona wà. Dile mí ko plọn do wayi, a dona klan dewe do wiwe hlan Jiwheyẹwhe. Hodẹ̀ ahundopo tọn hlan ẹn to nuglọ, bo dopà na ẹn dọ a na yí gbẹzan towe zan nado wà ojlo etọn. (1 Pita 4:2) Enẹgodo, dọna anadenanutọ to pipli mẹho lẹ tọn mẹ dọ a jlo na yí baptẹm. Ewọ na biọ to mẹho delẹ si nado dọho hẹ we. Jaale, a dibu to whenue yé pli hẹ we blo. Matin ayihaawe, mẹmẹsunnu vivẹ́ ehelẹ ko yọ́n we bo yiwanna we. Yé na vọ́ nuplọnmẹ dodonu tọn Biblu tọn he a ko plọn lẹ gbeje pọ́n  hẹ we. Yé jlo na hẹn ẹn diun dọ a mọnukunnujẹ nuplọnmẹ enẹlẹ mẹ bosọ yọ́n nujọnu-yinyin klandowiwe po baptẹm po tọn. Eyin yé kọngbedopọ dọ a ko wleawufo, yé na wá dọna we dọ a sọgan yí baptẹm to plidopọ lẹdo tọn kavi plidopọ daho he na bọdego ji.

19, 20. Etẹwẹ e na biọ dọ a ni wà to baptẹm towe godo, podọ nawẹ a sọgan wàmọ gbọn?

¹⁹ To whenue a ko yí baptẹm, etẹwẹ a dona wà? * Flindọ opà de wẹ klandowiwe yin, podọ Jehovah nọ donukun dọ a ni de opà enẹ. Enẹwutu, to baptẹm towe godo, a dona nọgbẹ̀ sọgbe hẹ klandowiwe towe. Nawẹ a sọgan wàmọ gbọn?

²⁰ Nọ dogbẹ́ hẹ agun towe pẹkipẹki. Taidi Klistiani he yí baptẹm de, a yin apadewhe “pipli mẹmẹsunnu lẹ tọn” de todin. (1 Pita 2:17) Mẹmẹsunnu po mẹmẹyọnnu he to agun towe mẹ lẹ po wẹ yin whẹndo gbigbọmẹ tọn towe. Eyin a nọ yì opli lẹ to gbesisọ mẹ, a na hẹn kanṣiṣa he to ṣẹnṣẹn mìtọn lodo. Nọ hia Ohó Jiwheyẹwhe tọn bo nọ lẹnayihamẹpọn deji to azán lẹpo ji. (Salm. 1:1, 2) To whenue a ko hia adà Biblu tọn de godo, yí whenu zan nado lẹnnupọn sisosiso do nuhe a hia ji. To whenẹnu, nuhe a hia lẹ na mọ ahun towe. “Nọ hodẹ̀ to whepoponu.” (Mat. 26:41) Odẹ̀ ahundopo tọn towe lẹ na dọ̀n we sẹpọ Jehovah dogọ. “Zindonukọn nado to Ahọluduta lọ . . . dín whẹ́.” (Mat. 6:33) A sọgan wàmọ eyin a nọ ze azọ́n yẹwhehodidọ tọn lọ do otẹn tintan mẹ to gbẹzan towe mẹ. Eyin a nọ tindo mahẹ gbesisọ tọn to lizọnyizọn lọ mẹ, a na hẹn yise towe lodo podọ a sọgan gọalọna mẹdevo lẹ nado wá ali ogbẹ̀ madopodo tọn lọ ji.—1 Tim. 4:16.

21. Dotẹnmẹ tẹwẹ baptẹm towe na hùn dote?

²¹ Nudide lọ nado klan dewe do wiwe hlan Jehovah bo yí baptẹm, yin nudide titengbe hugan he a sọgan basi. Nugbo wẹ dọ e nọ biọ avọ́sinsan. Amọ́ be e ka nọ hẹn ale wá ya? Gbau! Nuhahun depope he a sọgan pehẹ to aihọn ylankan ehe mẹ yin na ‘ojlẹ gli bosọ fua.’ (2 Kọl. 4:17) To alọ devo mẹ, baptẹm towe na hùn dotẹnmẹ dote na we nado tindo gbẹzan pekọnọ de todin gọna “ogbẹ̀ nujọnu tọn” lọ to sọgodo. (1 Tim. 6:19) Enẹwutu, yí sọwhiwhe do lẹnnupọn bosọ hodẹ̀ nado yọ́n gblọndo towe na kanbiọ ehe dọ: “Be n’ko wleawufo nado yí baptẹm ya?”