1. ¿Ni iti törbadre ju sribei ngwane rabadre dre nuainne käne?

ANI BÄMIKE, ni iti tönibi ju sribedi aune tönibi sribei ño ye nibira gare ie. Aisete ¿raba niken jondron ribedi kwe jai ju sribekäre ye kökö aune kömike? Ñakare, käne rabadre kukwe keteiti ütiäte nuainne, ye abokän ngwian ribedi nuäi kwe jai ju ye sribekäre ye rabadre denkä käne. ¿Ñobätä rabadre ye nuainne? Ñobätä ñan aune ngwian ñaka täte ie ngwane ju ye ñan rabai bare ie.

2. Lucas 14:27-30 tä niere erere, ¿mä jämi ja ngökö ñöte ye känenkri drebätä mäkwe töbikadre kwin käne?

² ¿Jehová tare mäkwe aune mätä debe bien krubäte ie yebätä mä tö ja ngökai ñöte? Ye erere ngwane, ni iti tö ju sribedi ie kukweta diandre nuaindre jai ye erere kukweta diandre nuaindre jai mäi. ¿Ñobätä nita ye niere? Jesukwe kukwe niebare Lucas 14:27-30 yebätä töbike (ñäkädrebätä). * Ye abokän ni tö ja tuai nänkä niara jiebiti ngwane nikwe kukwe ruäre nuaindre aune nikwe ja tuai kukwe ruäre ben ye kräke ni tädre juto abokänbätä nämäne blite (Luc. 9:23-26; 12:51-53). Ye medenbätä mä jämi ja ngökö ñöte ye känenkri mäkwe töbika kwin käne dre dre ben mäkwe ja tuai yebätä. Mäkwe ye erere nuaindi ngwane mäkwe ja ngökai ñöte ye bitikäre mä täi juto Ngöbö mikakäre täte jankunu.

3. ¿Dre mikai gare jai kukwe ja tötikara nekänti?

³ Kukwe keta kabre tä nuaindre ja ngökakäre ñöte, ¿aisete nuaindre ye ütiäte? Jän, ja ngökadre ñöte ye kwin krubäte ñobätä  ñan aune ye köböire kukwe kwin rabai mäkwe kä nengwane aune ja känenkäre. Kukwe ütiäte ngwantarita ja ngöka ñöte yebätä ye mikai gare kukwe ja tötikara nekänti. Kukwe ngwantarita mikai gare yekwe mä dimikai mike gare jai mä niena juto ja ngökakäre ñöte o ñakare.

4. a) ¿Ja diankata mento Ngöbö kräke ye dre gärätä? b) ¿Ni ñan nemena ja töi nuainne nieta Mateo 16:24 ye dre gärätä?

⁴ ¿Ja diankata mento Ngöbö kräke ye dre gärätä? Ja ngöka jämi ñöte ye känenkri ja diankata mento Ngöbö kräke. Ye abokän ja nire yebiti sribidi käre niara kräke meden nieta ie orasionte ja brukwä tätebiti. Ni iti tä ja denkä mento Ngöbö kräke ngwane ñan niena ja töi nuainne (ñäkädre Mateo 16:24 yebätä). Yete ja käne ja nire ye tä nemen Jehovakwe ye kukwe kwin krubäte (Rom. 14:8). Mäkwe ja diainkä mento Ngöbö kräke ngwane yete ja käne mäkwe käbämikai ie, niara töi nuaindre ye rabai bäri ütiäte mä kräke aune mäkwe ñaka ja töi nuaindi. Ja diankata mento Ngöbö kräke ye ja kukwei kitakata Ngöböi. Jehová ñaka tä ni mike ja dibiti kukwe ye nuainne, akwa ja kukwei kitakata ie ye mikadre täte ngübata kwe (Sal. 116:12, 14).

5. ¿Ja diankata mento Ngöbö kräke aune ja ngökata ñöte ye ñobätä ñaka ja erebe?

⁵ ¿Ja diankata mento Ngöbö kräke aune ja ngökata ñöte ye ñobätä ñaka ja erebe? Ja diankata mento Ngöbö kräke ye nuainta kaibe, ye kukwe mäkwe aune Jehovakwe. Akwa ja ngökata ñöte ye nuainta ni kwati okwäbiti, metrere nuainta gätä kri yete. Ja ngökata ñöte ngwane, ja dianinanka mento Jehová kräke bämikata ni kwati ngwärekri. * Ye abokän Jehová tareta ja brukwä tätebiti, ja nire tätebiti, ja töi tätebiti, ja di tätebiti aune ja töi mikata sribire kärekäre kräke bämikata ietre (Mar. 12:30, TNM).

6, 7. 1 Pedro 3:21, 22 tä niere erere, ¿kukwe meden ketebubätä ütiäte ja ngökadre ñöte?

⁶ ¿Ja ngökadre ñöte ye ütiäte? Noé arka sribebare yebiti niara nämäne tödeke bämikani kwe, ye erere arato mäkwe ja ngökai ñöte ye käkwe bämikai mäkwe ja dianinanka mento Ngöbö kräke. ¿Akwa ja ngökadre ñöte ye ütiäte? Jän ye ütiäte krubäte. Ñobätä ütiäte ye Pedrokwe mikani gare 1 Pedro 3:21, 22 yekänti (ñäkädrebätä). Kena, tä ni mike kwäre. Nikwe kukwe ruäre nuainbarera nita tödeke Jesús ie ye bämikakäre aune niara ja nire biani ni ütiäre aune ganinkröta kä kwinbiti bätä nengwane tä Ngöbö kise ruinkri yei nita tö ngwen ngwane, ja ngöka ñöte ye raba ni mike kwäre.

⁷ Ketebukäre, ja ngökata ñöte ye köböire ni töita nemen merebe. Nita ja denkä mento Ngöbö kräke aune nita ja ngökö ñöte ngwane nita kite ja kete kwin ben. Nikwe ja töi kwitani ja brukwä tätebiti kukwe blo yebätä aune nita tödeke ni kökanintari yei ye köböire Ngöböta ngite juen ta nibiti. Ye köböire ni töita kwin niara ngwärekri.

8. ¿Dre käkwe mä töi mikadre ja ngökö ñöte?

⁸ ¿Dre käkwe mä töi mikadre ja ngökö ñöte? Mätä ja tötike nguseta Bibliabätä ye köböire kukwe keta kabre namanina gare mäi Jehovabätä. Ñodre niara töi ño aune tä ja ngwen ño ye namanina gare mäi. Kukwe jökrä ye matani mä brukwäte, aisete mä tö ja ngökai ñöte ngwane, metrere niara tare krubäte mäkwe yebätä mäkwe ja töi mikadre ja ngökö ñöte.

9. Mateo 28:19, 20 tä niere erere, ¿ja ngökadre ñöte ni Rün käbiti, monso kwe käbiti aune üai deme käbiti ye dre gärätä?

⁹ Kukwe Bibliabätä nemen gare mäi aune era mä kräke yebätä mäkwe ja töi mikadre ja ngökö  ñöte arato. Nitre mikadre ja tötikaka niebare Jesukwe yebätä töbike (ñäkädre Mateo 28:19, 20 yebätä). Nire tö ja ngökai ñöte ye rabadre nuainne “Rün käbti, Ngöbö Odei käbti amne Ngöbö Üai Deme käbti” niebare kwe. Ye abokän dre drieta Bibliakwe Jehová yebätä, üai deme yebätä aune Jesús yebätä ye mikadre era jai ja brukwä ngöibiti gärätä. Kukwe metre ye dite krubäte aisete raba mate mä brukwäte (Heb. 4:12). Ani ruäre mike gare jai.

10, 11. ¿Kukwe meden metre Ngöböbätä namanina gare mäi aune meden mäkwe kanina ngäbiti?

¹⁰ Kukwe metre namani gare mäi ni Rün kä kwinbiti yebätä ngwane, ja namani ruin ño mäi yebätä töbiketa: niara kä Jehová, niara ye bäri kri kä jökräbiti tibien aune niara aibe Ngöbö metre (Sal. 83:18; Is. 37:16). Arato niarakwe ni sribebare aune niara aibe raba ni mike kwäre (Sal. 3:8; 36:9). Ne madakäre niarakwe kukwe ütiäte krubäte nuainbare ni mikakäre kwäre ngite aune gata kisete, bätä tä ja nire käre ye käbämike nie ja känenkäre yebätä töbiketa (Juan 17:3). Mäkwe ja diainkä mento Ngöbö kräke biti mäkwe ja ngökai ñöte yebiti mäkwe bämikai ni kwati ngwärekri mä abokän testiko Jehovakwe (Is. 43:10-12). Ja mräkätre kwati kä jökräbiti tibien tä Jehová mike täte, tä kä jutobiti niara kä ngwen jabätä aune tä mike gare nitre madai ye ngätäite mä rabai siba (Sal. 86:12).

¹¹ Biblia tä dre driere Ngöböbätä tä nüke gare nie ye ütiäte krubäte. Kukwe metre ye mäkwe kai ngäbiti ngwane mä brukwä käkwe mä töi mikai ja denkä mento Ngöbö kräke aune ja ngökö ñöte.

12, 13. ¿Kukwe meden metre Ngöbö Monsoibätä namanina gare mäi aune meden mäkwe kanina ngäbiti?

¹² Kukwe metre namani gare mäi ni Rün Monsoi yebätä ngwane, ja namani ruin ño mäi yebätä töbiketa: Jehová ye bitikäre Jesús ye bäri ütiäte kä jökräbiti tibien. Ja nire biani kwe ni ütiäre aisete niara ye ni diantarikä. Ni dianintari yei nita tö ngwen ye nita bämike ngwane, ni ja mikani ngite ye dian raba ta nibiti, ni raba ja kete Ngöböbe aune ja nire käre ye raba nemen nikwe (Juan 3:16). Arato Jesukristo ye Sacerdote Bäri Kri, aisete niara tö ni dimikai ne kwe ni kökanintari ye köböire kukwe kwin rabadre nikwe aune ni rabadre ja kete kwin Jehovabe (Heb. 4:15; 7:24, 25). Niara Rei Gobran Ngöbökwe yete, aisete niarabiti Jehovakwe ja kä ye mikaita deme, kukwe käme ye diainkä kwe aune kukwe kwin mikai nemen bare kwe ni kräke Kä Bä Nuäre yete (Mat. 6:9, 10; Apoc. 11:15). Ne madakäre, Jesús ye kukwe kwin bämikaka ni käne (1 Ped. 2:21). Ja nire tätebiti Ngöbö töi nuainbare kwe yebiti kukwe kwin bämikani kwe ni käne aune nikwe ye erere nuaindre arato (Juan 4:34).

¹³ Biblia tä dre driere Jesubätä ye mäkwe kai ngäbiti ngwane, Monso tare Jehovakwe ye mä rabai tarere arato. Ye käkwe mä töi mikai Ngöbö töi nuainne ja nire tätebiti Jesukwe nuainbare erere. Ye köböire mäkwe ja töi mikai ja denkä mento Jehová kräke aune ja ngökö ñöte.

14, 15. ¿Kukwe meden metre üai demebätä namanina gare mäi aune meden mäkwe kanina ngäbiti?

¹⁴ Kukwe metre namani gare mäi üai demebätä ngwane, ja namani ruin ño mäi yebätä töbiketa: üai deme ye ñaka ni nire ye erere, ñakare aune ye Ngöbö die. Üai deme yebiti Ngöbökwe nitre Biblia tikaka jie ngwani aune üai deme ye arabe tä ni dimike kukwe ye mike nüke gare jai aune mike täte (Juan 14:26; 2 Ped. 1:21). Jehovata ja üai deme yebiti ja di bien nie (2 Cor. 4:7). Üai deme ye tä ni dimike kukwe kwin Ngöbökwe ye driere, ja tuin ni nuateta yebe, nita kite di nekä yebe aune nita nemen ulire yebe. Arato tä ni dimike ne kwe ni töi rabadre Ngöböta ribere nie ye erere (Gál. 5:22). Nireta üai deme ye kärere Ngöböi töi bökänbiti  aune tä tö ngwen ie yei niarata ja üai deme bien (Luc. 11:13).

¹⁵ Üai deme käkwe ni dimikai Ngöbö mike täte jankunu ie ni raba tö ngwen ye tä ni töi mike jäme. Kukwe metre üai deme yebätä ye mäkwe kai ngäbiti ngwane mä töi rabai ja denkä mento Ngöbö kräke aune ja ngökö ñöte.

16. ¿Dre dre nikwe miri gare jai?

¹⁶ Ja diandrekä mento Ngöbö kräke aune ja ngökadre ñöte ye kukwe ütiäte krubäte dianta nuaindre jai. Nikwe miri gare jai erere, mäkwe ja ngökai ñöte ngwane dre dre tä ja känenkäre ye mä tädre juto ka ngäbitikäre. Mäkwe ja tuai kukwe ño ben o mäkwe dre tuainmetre akwa yebiti ta kukwe kwin keta kabre rabai mäkwe. Mäkwe ja ngökai ñöte ye köböire mä töi rabai kwin Ngöbö ngwärekri aune mä raba nemente nire. Jehová tare mäkwe ye käkwe mä töi mikadre ja ngökö ñöte. Arato kukwe metre nemen gare mäi ni Rün kä kwinbiti yebätä, Monso kwe yebätä aune üai deme yebätä ye mäkwe mikadre era jai ja brukwä tätebiti. Kukwe keta kabre nikwe miri gare jai, ¿aisete mä nibira juto ja ngökakäre ñöte?

17. ¿Kukwe meden meden nuaindre ja ngöka ñöte ye känenkri?

¹⁷ Mä niena juto ja ngökakäre ñöte ruin mäi ye tä mike gare mäkwe kukwe keta kabre nuainbarera ja ketakäre kwin Jehovabe. * Mätä ja tötike mantre jetebe Bibliabätä ye köböire kukwe keta kabre niena gare mäi Jehovabätä aune Jesubätä aune tödeka niena mäkwe (Heb. 11:6). Kukwe käbämikata Jehovakwe tä Bibliabätä yei mätä tö ngwen kwatibe aune Jesukwe ja nire biani ni ütiäre ie mätä tödeke ye raba mä mike kwäre ngite aune gätä yebätä ye gare metre mäi. Ne madakäre, kukwe blo nuain nämäne mäkwe yebätä ja ruin ngite mäi aune mäkwe ngite kita mananbarera ta jabiti Jehovai. Aune mäkwe trö kwitani kukwe käme yei, ye abokän mä brukwäta kwatibe kukwe käne ye kräke aune Ngöbö tö dre ie ye erere mätä nuainne (Hech. 3:19). Arato kukwe mikata täte mäkwe ye mä töta mikabätä gare ni madai. Mä jämi ja ngökö ñöte, akwa kukwe ribeta nuaindre mäi ne kwe mäkwe kukwe driedre konkrekasion ben ye mäkwe nuainbarera (Mat. 24:14). Kukwe keteitire keteitire ribeta ye mäkwe nuainbarera yebätä kätä juto krubäte Jehovabätä (Prov. 27:11).

18. ¿Mä jämi ja ngökö ñöte ye känenkri mäkwe dre mada nuaindre?

¹⁸ Mä jämi ja ngökö ñöte ye känenkri mä rabadre kukwe mada nuainne. Nikwe miri gare jai erere, mäkwe ja diandrekä mento Ngöbö kräke. Ye abokän mäkwe orasion nuain kaibe aune ja brukwä tätebiti Jehovai känti mäkwe ja nire mäkwe yebiti niara töi nuaindi kärekäre mäkwe niei ie (1 Ped. 4:2). Ye bitikäre, mä tö ja ngökai ñöte ye mäkwe nie ni umbre ji ngwanka coordinador ie. Niarakwe blitai ni umbre ji  ngwanka mada ben ne kwe ja ükadrekrö kwetre mäbe. Ñaka kä jürä ngwan jabätä ñobätä ñan aune ja mräkätre yei mä niena gare aune tätre mä tarere. Ja diandrekä mento Ngöbö kräke aune ja ngökadre ñöte ye ütiäte krubäte aune nüke gare mäi ye mikakäre gare jai niaratre käkwe kukwe ruäre Bibliabätä niena gare mäi ye kädrieita mäbe. Mä niena juto ja ngökakäre ñöte rabai tuin ietre ngwane mäkwe ja ngökadre ñöte gätä krite niei kwetre mäi.

19, 20. ¿Mäkwe ja ngökai ñöte ye bitikäre mäkwe dre nuaindre aune dre käkwe mä dimikai mike nemen bare?

¹⁹ ¿Mäkwe ja ngökai ñöte ye bitikäre mäkwe dre nuaindre? * Ja diankata mento Ngöbö kräke ye abokän ja kukwei kitakata Jehovai, aisete ye mikadre täte ngübata Jehovakwe. Yebätä, mäkwe ja ngökai ñöte ye bitikäre mä rabadre nüne mätä kukwe käbämike ye ererebätä. ¿Dre käkwe mä dimikai kukwe ye mike nemen bare?

²⁰ Mäkwe ñaka kämikaka konkrekasionbätä. Mäkwe ja ngökai ñöte ngwane, “ja mräkätre tödekaka Jesubti” ye ngätäite mä rabai siba (1 Ped. 2:17). Nitre konkrekasionte ye rabai mä mräkäre kukwe ja üairebiti. Mäkwe ja di ngwain ñaka gätä juen ja bäre ngwane mä jatai ja kete bäri kwin bentre. Mantre jetebe mäkwe ñäkä Bibliabätä aune mäkwe kä dianka jai töbikatarikärebätä (Sal. 1:1, 2). Ye köböire kukwe Bibliabätä ye rabai mä brukwäte. Arato, Jesukwe niebare erere käre mäkwe “blita jakrä Ngöböbe” (Mat. 26:41). Mäkwe orasion nuaindi ja brukwä tätebiti ye köböire mä rökrai bäri Ngöbö ken. Aune mäkwe Gobran Ngöbökwe ye mika käne kukwe jökräbiti ta (Mat. 6:33, TNM). Mäkwe kukwe drie ye mikai bäri ütiäte jai yebiti mäkwe Gobran Ngöbökwe mikai käne. Mäkwe kukwe driedi mantre jetebe ngwane tödeka mäkwe täi dite aune mäkwe ni mada dimikai näin ji niken ni ngwena ja nire käre kwäre yebiti (1 Tim. 4:16).

21. ¿Mäkwe ja ngökai ñöte ye köböire dre rabai mäkwe?

²¹ Ja diandrekä mento Ngöbö kräke aune ja ngökadre ñöte ye kukwe bäri ütiäte mäkwe diain nuaindre jai. Ye nuainkäre kukwe ruäre ñan nuäre rabai nuaindre mäi, akwa kukwe kwin rabai mäkwe. Kukwe ben ja tuai mäkwe kä nengwane ye “jötrö amne ñakare tare” krubäte (2 Cor. 4:17). Mäkwe ja ngökai ñöte ye köböire mäkwe nünain kä jutobiti nengwane aune kä ja känenkäre yete arato (1 Tim. 6:19, TNM). Ye medenbätä töbike kwinbätä, orare Jehovai aune kukwe ne ngwentari jai: “¿Ti nibira juto ja ngökakäre ñöte?”.