1. Bichi omuntu akwanene ajire embere ahwanze kuyumbaka enju?

OWAZE oku muntu wamapanga kuyumbaka enju. Ayinji inju ya buko buchi alonzeze ayumbake. Akafi yimanga n’okuja omu soko, anagula ebikoleso n’okunahwanza kuyumbaka si? Nanga. Embere ahwanze, hali echintu ch’engenzi bwenene bimuhemere arhange ajire. Bimuhemere arhange agerereze akachiro k’enju ayumbaka. Bula gurhe? Bulala bimuhemere amenye akaba kweri anaherhe efuranga ziyenere z’okuyunjuza eyola nju. Nk’arhangire kuganja bwinja akachiro, ahola bibonekene oku hali okuntu akanagala kuyunjuza eyola nju.

2. Nk’oku Luka 14:27-30 ederhere, bichi okwanene owazeko bwenene embere obatizwe?

² Obuzigire bwawe n’eshukrani ku byoshi Yehova akujirire bikala bikushunikire ohwanze kuwaza gurhe wakabatizwa si? Akaba ntyo, obuchaguzi wajira buli kuguma n’ob’omuntu walonza kuyumbaka enju. Chirhumire rhwaderha ntyo? Waza oku binwa bya Yesu bili omu Luka 14:27-30. (Osome.) Ahala Yesu aliri aganira oku bilolere okuba mwanafunzi wage k’okuderha gurhe. Yi rhuba nkulikizi za Yesu, hali ebibazo rhukwanene rhuyemere kulembera n’okulekana na bintu biguma-biguma. (Lu. 9:23-26; 12:51-53) Che chirhumire, embere obatizwe bikuhemere obe wawaza oku byoshi byakakuhikira n’ebiwakajira amango wamaba mwanafunzi wa Kristu. Ahola waba eyi ochirheganyize bwinja kukolera Mungu oku bwimana nka Mukristu obatizwe.

3. Bichi rhwaganirako mu gunola mwazi?

³ Okuba mwanafunzi wa Kristu obatizwe, kuherhe akachiro kanene kulusha ebibazo walembera n’ebintu waleka si? Nechi, ntyo kubinali! Obubatizo bufungulire omuntu omulyango oku migisho kamama zene n’amango mayinjire. Leka rhuganire oku bibazo biguma by’akamaro oku bilolere obubatizo. Okujira ntyo kwakurhabala oshubize oku chibazo, “Indi tayari kubatizwa si?”

4. a) Okuchihana emwa Yehova k’okuderha gurhe? b) “Okuchilahira” kuderherwe omu andiko lya Matayo 16:24, k’okuderha gurhe?

⁴ Okuchihana emwa Yehova k’okuderha gurhe? Embere obatizwe okwanene ochihane emwa Mungu. Eyi wachihana, onayegera Yehova omu sala ly’omurhima goshi n’okumubwira oku wamukolera omu kalamo kawe koshi. Ey’ochihana emwa Mungu, ahola “wanachilahira.” (Osome Matayo 16:24.) Ahola wanagwarha olukengo lunene l’okuba muntu wa Yehova. (Ro. 14:8) Wanamubwira oku gurhangirira ahola, echi waseza k’obwenge kuli kumukolera s’arhali oku kuchisimisa. Okuchihana kwawe chili chilagane chikomere ohere Mungu. Yehova arharhusezeze rhujire echo chilagane. S’aliko amango rhwamachijira, ahola anarhulingiriza rhuchiyeneze.​—Zb. 116:12, 14.

5. Tofauti ehe eli ahakagarhi k’okuchihana emwa Yehova n’obubatizo?

⁵ Tofauti ehe eli ahakagarhi k’okuchihana emwa Yehova n’obubatizo? Okuchihana emwa Yehova kuli kwawe wenyine buzira abandi okumenya; kuli kwawe woyo na Yehova. Obubatizo bowe buli bw’embere z’abantu boshi, ahanene oku mbuganano nkulu. Ey’obatizwa, wanayereka abandi oku wachihanire emwa Yehova. * Che chirhumire obubatizo bwawe bwayereka abandi oku osimire Yehova n’omurhima, obuguma-guma, obwenge, n’emisi yawe yoshi, n’oku wachishogere okumukolera emyaka n’emyaka.—Mk 12:30.

6-7. Nk’oku biyerekenwe omu lwandiko 1 Petro 3:18-22, mpanvu ebiri zihe ziyerekene oku okubatizwa kuli kw’akamaro?

⁶ Kweri si binali by’akamaro okubatizwa? Waza oku binwa bili omu 1 Petro 3:18-22. (Osome.) Nka kulala esafina yaliyerekene oku bantu boshi obwemere bwa Nowa, obubatizo bwawe nawe chili chemezo chibonekene oku wachihanire emwa Yehova. Aliko si, obubatizo buli bw’akamaro bwenene si? Nechi buli bw’akamaro. Petro aliyerekene bula gurhe. Ech’oburhanzi, aliderhere: “bubachungwire.” Obubatizo bwakarhuchungula nka rhuyerekene oku bijiro byerhu oku rhuherhe obwemere mu Yesu n’oku rhuyemerere oku arhufirire, afuka aje embingu, n’oku akala ali “omu kulyo kwa Mungu.”

⁷ Echakabiri, amango rhwamabatizwa rhwanagwarha “ezamiri zinja.” Amango rhwamachihana emwa Yehova n’okubatizwa, eyi rhwamaja obwira bukomere bwenene haguma na Yehova. Bulala rhwahungamire loshi-loshi, rhunaherhe obwemere omu nchungu, Mungu anababalira ebyaha byerhu. Nantyo rhwanagwarha ezamiri zichere embere zage.

8. Mpanvu ehe nkulu ekwanene kukushunika obatizwe?

⁸ Mpanvu ehe nkulu ekwanene kukushunika obatizwe? Omu kuyiga Ebiblia, wayigire binene eju ya Yehova, oborhere bwage, n’okuntu anakola ebintu. Ebi wayigire eju yage byahuma oku murhima gwawe, byanarhuma wayunva omusimire bwenene. Obuzigire bwawe ku Yehova bukwanene kuba mpanvu y’oburhanzi yarhuma wachishoga kubatizwa.

9. Nk’oku biyerekenwe omu Matayo 28:19, 20, okubatizwa omu zino lya Darha, ely’Omugala n’ely’eroho lichesibwa; k’okuderha gurhe?

⁹ Kandi okubatizwa kwawe kurhengene n’obukweri bwe Biblia wayigire wanabuyemera. Waza oku bi Yesu aderhaga amango aha abanafunzi bage erhegeko ly’okujira abanafunzi. (Osome Matayo 28:19, 20.) Kulingana na Yesu yewe, ababatizwa bakwanene kujira ntyo “omu zino lya Darha, ely’Omugala n’ely’eroho lichesibwa.” K’okuderha gurhe? Okwanene  oyemere n’omurhima gwawe goshi obukweri bwe Biblia eju ya Yehova, Omugala Yesu, n’eroho lichesibwa. Obola bukweri boshi buherhe emisi, bwakanakuhuma oku murhima bwenene. (Ebr. 4:12) Leka rhushube rhulole buguma m’obola bukweri.

10-11. Bukweri buhe wayigire wanayemera eju ya Darha?

¹⁰ Yibuka gurhe walichiyunvirhe amango wayigaga obula bukweri buderhere ntya eju ya Darha: “Ezino lyage ye Yehova,” yeli “Enyanya Bwenene y’egulu lyoshi,” na yenyine ye “Mungu w’okuli.” (Zb. 83:18; Isa. 37:16) Ye Mulemi werhu, “n’obuchunguke buli bwa Yehova.” (Zb. 3:8; 36:9) Ajirire omupango g’okurhuchungula kurhenga omu chaha n’olufu, arhuha n’obunihire bw’akalamo k’esiku n’amango. (Yoh. 17:3) Obubatizo bwawe bwakuyerekana nka muguma w’Abahamirizi ba Yehova. (Isa. 43:10-12) Waba omu mulala g’omu gulu lyoshi gw’abaharamye ba Yehova baherhe omwishingo g’okuyirikwa oku zino lya Mungu n’okulimenyesa oku bandi.​—Zb. 86:12.

¹¹ Hali olukengo lungana l’okuyunva ebye Biblia eyigirize eju ya Darha weh! Amango wamayemera obola bukweri bw’engenzi wanayunva omurhima gwawe yigwakushunika ochihane emwa Yehova n’okubatizwa.

12-13. Bukweri buhe wayigire wanabuyemera oku bilolere Omugala?

¹² Gurhe walichiyunvirhe amango oyiga obula bukweri eju y’Omugala? Yesu ye muntu wa kabiri w’akamaro bwenene omu mahanga moshi. Yewe ye Muchunguzi werhu. Ayemerere ahana akalamo kage eju yerhu. Nka rhuli rhwayerekana kugerera ebijiro byerhu oku rhuherhe obwemere omu nchungu, rhwakababalirwa ebyaha byerhu n’okugwarha obwira bukomere haguma na Mungu, n’okupata akalamo k’esiku n’amango. (Yoh. 3:16) Yesu ye Mudahwa (Kuhani) werhu mukulu. Alonzeze arhurhabale rhuyunguke n’enchungu n’okugwarha obwira bukomere haguma na Mungu. (Ebr. 4:15; 7:24, 25) Yewe nka Mwami w’Obwami bwa Mungu, kugerera ku yewe yenyine yi Yehova nji achesa ezino lyage, okumala obubi, n’okulerha emigisho kamama omu Paradizo yayinjire. (Mt. 6:9, 10; Ufu. 11:15) Yesu ye lwiganyo rhukwanene kukulikira. (1 Pe. 2:21) Alirhulekere olwiganyo omu kahana akalamo kage y’ajira obulonza bwa Mungu.​—Yoh 4:34.

¹³ Amango wamayemera ebi Ebiblia eyigirize eju ya Yesu, wanayunva osimire bwenene oyola Mugala wa Mungu muzigirwa. Obola buzigire bukwanene bukuhire m’omurhima okolese akalamo kawe omu kujira obulonza bwa Mungu kuguma nk’oku Yesu naye ajiraga. Echo chanarhuma wayunva oshunikirwe ohane akalamo kawe emwa Yehova n’okubatizwa.

14-15. Bukweri buhe wayigire wanabuyemera oku bilolere eroho lichesibwa?

¹⁴ Gurhe waliwazize amango oyiga obula bukweri bukulikireho eju y’eroho lichesibwa? Arhali muntu, si misi Mungu anakolesa. Yehova alikoleseze elyola roho lichesibwa omu kuyerekeza abayandikaga Ebiblia, n’eroho lichesibwa linarhurhabala kuyunva n’okukolesa ebi rhwayigire omu Biblia. (Yoh. 14:26; 2 Pe. 1:21) Kugerera eroho lyage, Yehova anarhuha “emisi erhalwise ey’olugero lwerhu.” (2 Ko. 4:7) Eroho linarhuhira mw’emisi y’okuhubiri emyazi minja, okulwisa ebigeregezo, okuvunika omurhima n’okulembera amalibuko. Linarhurhabala rhugale kuyerekana engeso zikwirire zikolere “elehe ly’eroho.” (Gal. 5:22) Mungu anaha okubulonza eroho lichesibwa oku balala bamulangalira n’okumuhema lyo n’omurhima goshi.​—Lu. 11:13.

¹⁵ Birhulezeze bwenene okumenya oku gasi abanaharamya Yehova bakanihira oku eroho lichesibwa lyabarhabala kukolera Mungu! Arhali ntyo si? Amango wamayemera  obukweri wayigire eju y’eroho lichesibwa, wachiyunva tu okubikuhemere ochihane emwa Mungu n’okubatizwa.

16. Kuhikira hanola, bichi rhwayigire omu nganiro yerhu?

¹⁶ Okuchishoga kuchihana emwa Yehova n’okubatizwa kuli kw’engenzi bwenene. Nk’okurhwayigire, okwanene kuyemera loshi-loshi ebibazo byakarhengerera n’okuchihana kwawe. S’aliko emigisho wapata eli minene bwenene kulusha byoshi wahana n’ebi walekana nabyo. Obubatizo bwakakuchugula, bwakanarhuma wagwarha ezamiri zinja embere za Mungu. Empanvu nkulu ekwanene kukushunika ochishoge okubatizwa buli buzigire bwawe ku Yehova Mungu. N’echindi, okwanene kuyemera n’omurhima gwawe goshi obukweri boshi wayigire eju ya Darha, Omugala, n’eroho lichesibwa. Omukuwaza ku ebila byoshi rhwamayiga kuhikira hanola, gurhe okala wakashubiza oku chibazo “Indi tayari kubatizwa si?”

17. Bichi omuntu akwanene ajire byakamuyerekeza oku bubatizo?

¹⁷ Akaba oli wachiyunva ok’oli tayari kubatizwa, k’okuderha oku okala wajirire bintu binene omu kujira obwira bukomere na Yehova. * Bulala wayigire Ebiblia oku kahunda, wamenyere binene eju ya Yehova na Yesu. Wakuzize obwemere. (Ebr. 11:6) Olangalire bwenene ebilagane bya Yehova bili omu Biblia, onachiyemezeze oku obwemere bwawe omu nterekero ya Yesu bwakakuchungula gurhenga omu chaha n’olufu. Wahungamire ebyaha byawe; k’okuderha okuyunva obabere bwenene oku mabi moshi wakaba wajirire, wanahemere Yehova akubabalire. Wachigalukireko omu kalamo kawe, wakabulira hale oborhere bwawe bubi bwa mira, n’okuhwanza kulama omu bulyo busimisize Mungu. (Mdo. 3:19) Oyunvirhe omurhumambo g’okubwira abandi eju y’obwemere bwawe. Waba y’okala okwanene kuba muhubiri orhaza batizwa n’okuhwanza kuhubiri haguma n’echibaga. (Mt. 24:14) Yehova y’achishinga eju yawe okubona gurhe wakajira ebyola byoshi. Wasimisize omurhima gwage bwenene.​—Mez. 27:11.

18. Bichi bindi okwanene ojire embere obatizwe?

¹⁸ Embere obatizwe, hali ebindi okwanene ojire. Nk’oku rhwarhangaga kuyiga, okwanene kuchihana emwa Mungu. Omuyegere omu bwihunze, osalire n’omurhima goshi, omulaganye oku wakolesa akalamo kawe koshi omu kujira obulonza bwage. (1 Pe. 4:2) Sasa, ojage wabwira omwimangizi w’ebaraza ly’abashamuka oku osimire kubatizwa. Abwira bashamuka baguma babonane nawe. Mani orhayunvaga obuba b’okubonana nabo. Nta ngangane, abola bene-berhu bazigirwa bayinji oku oli muntu mwinja banakusimire. Bashuba kuganira haguma nawe oku nyigirizo z’omusinji ze Biblia wayigire. Balonzeze bachibonere akaba kweri wayunvirhe ezola nyigirizo n’akaba onamenyere kangana gurhe okuchihana n’okubatizwa chili chintu ch’akamaro bwenene.  Bakayemera oku oli tayari, bakumenyesa oku wakabatizwa oku mbuganano nkulu yayinjire.

19-20. Enyuma y’obubatizo bwawe, bichi bindi byakuhema ojire, na gurhe wagala kubijira?

¹⁹ Enyuma y’obubatizo bwawe, bichi byakuhema ojirage? * Oyibuke oku okuchihana chili chilagane, na Yehova akulingirize ochiyeneze. Che chirhumire enyuma y’okubatizwa, okwanene kulama kulingana n’echilagane chawe. Gurhe wakagala?

²⁰ Ochiyegeze oku chibaga chenyu bwenene. Obola wamaba mukristu obatizwe, okala wamaba muguma w’omu “chinyabuguma cha bene-berhu.” (1 Pe. 2:17) Bene-benyu na bali-benyu b’omu chibaga bali mulala gwawe gw’ekiroho. Omu kuja oku mbuganano buli mango, wakomeza obuguma bwawe haguma nabo. Osome echinwa cha Mungu n’okuchiwazako bwenene buli lusiku. (Zb. 1:1, 2) Enyuma y’okusoma echigabi chiguma che Biblia, orhole akasanzi k’okukengera oku biwasomere. Ahola echinwa cha Mungu chanahuma oku murhima gwawe. “Ogenderere kusalira.” (Mt. 26:41) Amasala mawe m’omurhima goshi makuyegeza haguma na Yehova bwenene. “Ogenderere . . . kurhanga kulonza Obwami.” (Mt. 6:33) Wakajira ntyo omu kuhira akasi k’okuhubiri oku nafasi y’oburhanzi omu kalamo kawe. Omu kuhubiri oku kahunda, wakomeza obwemere bwawe, n’okurhabala abandi babone enjira ejire ewa kalamo k’esiku n’amomgo.​—1 Ti. 4:16.

21. Obubatizo bwawe bwakufungulira enjira y’okupata bichi?

²¹ Okuchihana kwawe emwa Yehova n’okubatizwa, ch’echintu ch’akamaro bwenene wakachishoga. Omu bukweri hali ebibazo. Aliko chiro akaba bili ntyo, ebyola bibazo bivire byakomera oku bulyo byakakubuza okuchihana n’okubatizwa si? Nanga! Ebibazo byoshi wakahurana nabyo mw’elila gulu lishajire, bili “byakasanzi katyu binayanguhire.” (2 Ko. 4:17) N’obola, obubatizo bwawe bowe bwakuyerekeza oku kalamo kasimisize bwenene mu manola mango “n’obuguma-guma b’okuli” bwayinjire. (1 Ti. 6:19) Che chirhumire bili bya bulagirire, owaze bwenene n’okusalira oku chishubizo cha chinola chibazo: “Indi tayari kubatizwa si?”