1. Omundu rutenga ma sokutjita vi ngunda e hiya tunga ondjuwo?

RIPURA nomundu ngu ma vanga okutunga ondjuwo. Eye ma tjiwa kutja ma sokutunga ondjuwo ndji ri vi. Hapo eye u sokuhakana okuranda ovihepwa na utu okutunga? Kako katjiperi. Ngunda e hiya uta pe notjiṋa otjinanḓengu tje sokutjita, eye ma sokutara kutja ondjuwo mai hepa vingapi. Omena ra ye? Mena rokutja eye ma sokutjiwa kutja u novimariva mbya yenene okumana okutunga ondjuwo. Indu tja tjiwa kutja ma hepa vingapi komurungu woruveze, eye mape ya a mana okutunga ondjuwo ye nondoṋeno.

2. Otja ku Lukas 14:27-30, otjikwaye tji mo sokuripurira ko nawa ngunda au hiya papitisiwa?

² Hapo orusuvero nondangi ku Jehova vye kuhinga kutja u vange okupapitisiwa? Indu tji pe ri nao ove u ri mongaro otjingeyo yomurumendu ngu ma vanga okutunga ondjuwo. Ongwaye tji matu tja nao? Ripura nomambo wa Jesus nge ri mu Lukas 14:27-30. (Lesa.) Jesus wa hungira kutja okurira omuhongewa we maku hee tjike. Indu tji matu vanga okumukongorera eṱe matu sokuriyandjera okumuna omauzeu, nokupoka koviṋa tjiva mbi twa suvera. (Luk. 9:23-26; 12:51-53) Ngunda au hiya papitisiwa ove mo hepa okuripura nawa, ohunga noviṋa mbi mo tuurunga mo indu tji wa rire omuhongewa wa Kristus. Nu ove mo rirongere nawa okukarera Mukuru nouṱakame otjOmukriste ngwa papitisiwa.

3. Morupa ndwi matu katara ku ye?

³ Hapo okupapitisiwa otjomuhongewa wa Kristus ku nonḓengu okukapita omauzeu ngu mo munu noviṋa mbi mo sokupoka ko? Ii otjiperi. Ombapitisimo mai ku yetere ozondaya ozengi  nai na moruyaveze. Ngatu hungirire komapuriro omananḓengu ohunga nombapitisimo. Okutjita nao maku ku vatere okuzira epuriro ndi: “Hapo ami mbe rirongerisa pu pa yenene okupapitisiwa?”

4. (a) Omeriyandjerero otjikeṋa? (b) Otja ku Mateus 16:24 ‘okurizemba omuini’ maku hee tjike?

⁴ Omeriyandjerero otjikeṋa? Ngunda au hiya papitisiwa ove mo sokutjita omeriyandjerero. Indu tji mo tjiti omeriyandjerero, ove u kumba ku Jehova okuza komutima tjiri nu u mu raera kutja mo mu karere nga aruhe. Indu tji we ri yandja ku Mukuru ove u ‘rizemba omuini.’ (Lesa Mateus 16:24.) Ove nai oove ouini wa Jehova ndji ri ondjingonekero onene. (Rom. 14:8) Ove okuza keyuva ndo we mu raera kutja otjiṋa otjinanḓengu tjinene okumukarera nungwari ka ku ripahera omuini ouwa. Omeriyandjerero woye oruyano ove omuini ndu wa kwizikira Mukuru. Jehova ke tu ṋiṋikiza okutjita oruyano ndo. Posi yokutja tjitwa tjiti nao eye u undjira ko kutja tu yenenise oruyano ndo.—Eps. 116:12, 14.

5. Pe nombangu ya ye pokati komeriyandjerero nombapitisimo?

⁵ Omomuano uṋe omeriyandjerero mu ye panguka nombapitisimo? Omeriyandjerero otjiṋa tjopokati koye na Jehova. Ombapitisimo otjiṋa tji tji tjitwa pomaworonganeno worukondwa poo wotukondwa komurungu wovandu. Tji wa papitisiwa ove u raisira varwe kutja we riyandja ku Jehova. * Kunao tji wa papitisiwa u raisira varwe kutja wa suvera Jehova nomutima woye auhe, nomuinyo woye auhe nozondunge zoye azehe nomasa woye aehe nokutja u nonḓero yokumukarera nga aruhe.—Mar. 12:30.

6-7. Otja ku 1 Petrus 3:18-22, omapu yeṋe yevari ngu mo sokupapitisirwa?

⁶ Hapo ohepero okupapitisiwa? Tara komambo nge ri mu 1 Petrus 3:18-22. (Lesa.) Noa tja tunga otjitendeze wa raisa kovandu kutja wa ri nongamburiro mu Mukuru, momuano otjingewo ove tji wa papitisiwa u raisa kovandu kutja we riyandja omuini ku Jehova. Hapo ohepero okupapitisiwa? Ii otjiperi. Petrus wa ṋunisa ounahepero wombapitisimo. Indu tja tja: Rutenga, oyo “mai mu yama.” Ombapitisimo mai yenene okutuyama indu tji twa toora omikambo mbi mavi heperwa po, mbi mavi raisa kutja tu nongamburiro mu Jesus kutja wa ṱira eṱe, wa pendurwa na rondo keyuru nu nai “u ri kokunene kwa Ndjambi.”

⁷ Otjitjavari, indu tji twa papitisiwa tu kara ‘nomeritjiviro omawa womomutima.’ Indu tji twe riyandja oveni ku Mukuru nu atu papitisiwa, tu kara noupanga wa peke kuna ye. Mena rokutja twe ritanaura komauvi wetu nu tu nongamburiro motjisuta tjonguturiro, Mukuru u tu isira omauvi wetu. Eṱe matu yenene okukara nomeritjiviro omawa womomutima komurungu we.

8. Epu riṋe ndi ma ri sokutjita kutja u papitisiwe?

⁸ Epu riṋe ndi ma ri sokutjita kutja u papitisiwe? Mena rokutja wa konḓonona Ombeibela nawa, ove we rihonga ovingi ohunga na Jehova ovikaṋena vye nomuano me ungura oviṋa. Imbi mbi we rihonga ohunga na Jehova vye kuṱuna komutima nu vye ku hinga kutja u mu suvere tjinene. Orusuvero rwoye ku Jehova maru sokurira epu enanḓengu tjinene ndi ma ri tjiti kutja u papitisiwe.

9. Otja ku Mateus 28:19, 20, okupapitisiwa mena ra Tate nOmuna nombepo ondjapuke ku heya tjike?

⁹ Epu rarwe ndi ma ri tjiti kutja u papitisiwe orondi rokutja ove we rihonga Ombeibela nu u kambura mu imbi mbi i honga. Ripura na imbi Jesus mbya hungira indu tja yandja erakiza  rokukaisapo ovandu ovahongewa. (Lesa Mateus 28:19, 20.) Otja ku Jesus, imba mbu mave papitisiwa mave sokutjita nao “mena ra Tate nOmuna nOmbepo Ondjapuke.” Hapo ihi aa he tjike? Ove u sokukambura nomutima woye auhe ouatjiri wOmbeibela ohunga na Jehova, Omuna we Jesus nombepo ondjapuke. Ouatjiri mbo u nomasa tjinene nu mau yenene okuṱuna kourekoto womutima woye. (Hebr. 4:12) Ngatu tare ku tjiva wouatjiri mbo.

10-11. Ouatjiri uṋe ohunga na Tate mbu we rihonga nu mbu wa yakura?

¹⁰ Ripura na indu tji we rihonga ouatjiri mbwi ohunga na Tate: “Ngu nena indi Jehova; ingui Uokombanda kombanda jehi arihe,” ‘neye erike onguri Ndjambi.’ (Eps. 83:19, EEP; Jes. 37:16) Eye Omuute wetu, nu “ombatero i za mu Muhona porwe!” (Eps. 3:8; 36:9) Eye wa tjita kutja tu yamwe kouvi nonḓiro nu we tupa omaundjiro wokukahupa nga aruhe. (Joh. 17:3) Omeriyandjerero nombapitisimo yoye vi raisa kutja oove Omuhongonone wa Jehova. (Jes. 43:10-12) Ove mo rire orupa rweṱunḓu rovakambure mouparanga wouye auhe mbe nohange okutjiukirwa kena ra Mukuru nu mbe tjiukisa ena re.—Eps. 86:12.

¹¹ Tjiri indjo ondjingonekero ya peke okutjiwa imbi Ombeibela mbi i honga ohunga na Tate. Indu tji wa yakura ouatjiri mbo mau ku hingi kutja u riyandje ku Jehova nu u papitisiwe.

12-13. Ouatjiri uṋe ohunga nOmuna mbu we rihonga nu mbu wa yakura?

¹² Ove wa raisa ongaro iṋe indu tji we rihonga ouatjiri mbwi ohunga nOmuna? Jesus ongu ri omundu outjavari omunanḓengu mouye auhe. Eye Omukuture wetu. Eye wa ri nonḓero okutuṱira. Indu tji twa raisa movitjitwa kutja tu nongamburiro motjisuta tjonguturiro, omauvi wetu maye yenene okuisirwa, matu kara noupanga ouwa kuna Mukuru, nu matu kamuna omuinyo waaruhe. (Joh. 3:16) Jesus Omupristeri wetu Otjiuru. Eye u vanga kutja tu mune ouwa motjisuta tjonguturiro nokutja tu kare noupanga ouwa kuna Mukuru. (Hebr. 4:15; 7:24, 25) Mena rokutja eye Ombara yOuhona wa Mukuru, Jehova me mu ungurisa okuyapura ena re, okuyandisa ourunde, nokuyeta ozondaya ozongarerere mOparadisa. (Mat. 6:9, 10; Omavan. 11:15) Eṱe matu sokuhorera kotjihorera tja Jesus. (1 Petr. 2:21) Mehupo re arihe wa tjita ombango ya Mukuru nu momuano mbo wa twapo otjihorera otjiwa kweṱe.—Joh. 4:34.

¹³ Indu tji wa yakura imbi Ombeibela mbi i honga ohunga na Jesus ove mo suvere Omuna wa Mukuru. Orusuvero ndo maru kuhingi okuungurisa ehupo roye arihe okutjita ombango ya Mukuru otja Jesus tja tjita. Mena ra nao, mo kara nonḓero yokuriyandja ku Jehova nokupapitisiwa.

14-15. Ouatjiri uṋe ohunga nombepo ondjapuke mbu we rihonga nu mbu wa yakura?

¹⁴ Ove wa raisa ongaro iṋe indu tji we rihonga ouatjiri mbwi ohunga nombepo ondjapuke? Ombepo ondjapuke omasa wa Mukuru, nungwari kamundu. Jehova wa ungurisa ombepo ondjapuke okuvatera ovatjange vOmbeibela, nu ombepo ndjo i tu vatera okuzuva nawa nokuungurira ku imbi mbi matu lese. (Joh. 14:26; 2 Petr. 1:21) Okupitira mombepo ye Jehova u tupa “omasa nge kapita avihe.” (2 Kor. 4:7) Ombepo ndjo i tupa omasa okuzuvarisa ombuze ombwa, okutuurunga omauzeu, okutjinda omerihahiziro, nokupirukira omarorero. Nu oyo i tu vatera okuraisa ovikaṋena oviwa ovyo mbi ri “ovihape vyOmbepo.” (Gal. 5:22) Mukuru u yandja ombepo ye ku imba mbe nongamburiro mu ye nu mbe mu ningira okuza komutima tjiri.—Luk. 11:13.

¹⁵ Imba mbe rikotamena ku Jehova ve tjiwa kutja ombepo ondjapuke mai yenene okuvevatera tjiri kokutja ve yenene okukarera Mukuru. Indu tji wa yakura ouatjiri mbu we rihonga  ohunga nombepo ondjapuke, ove moriyandja omuini ku Mukuru nopapitisiwa.

16. Twe rihongo tjike koviṋa mbi twa hungirire ko?

¹⁶ Omukambo mbu mo toora okuriyandja omuini ku Mukuru nokupapitisiwa omunanḓengu tjinene. Otja tji twe rihongo ove mo sokukara nonḓero yokumuna omauzeu nokuripunguha. Posi yokutja ozondaya nḓu mo munu za kapita omeripunguhiro ngo. Ombapitisimo mai ku yama, nu mai tjiti kutja u kare nomeritjiviro omawa womomutima komurungu wa Mukuru. Epu enanḓengu ndi mo sokupapitisirwa omena rorusuvero rwoye ku Jehova Mukuru. Ove wina mo sokukambura nomutima woye auhe, ouatjiri mbu we rihonga ohunga na Tate, nOmuna, nombepo ondjapuke. Kombunda yokurihonga oviṋa avihe mbi, mo ziri vi epuriro ndi: “Hapo ami mbe rirongerisa pu pa yenene okupapitisiwa?”

17. Omikambo viṋe mbi mo sokutoora tji mo vanga okupapitisiwa?

¹⁷ Indu tji mo munu kutja we rirongerisa pu pa yenene okupapitisiwa, mape ya kutja wa tjita oviṋa ovingi okutunga oupanga ouwa kuna Jehova. * Mena rokutja u konḓonona Ombeibela yoye aruhe, ove wa uta okutjiwa ovingi ohunga na Jehova na Jesus. Ove wa uta okukara nongamburiro. (Hebr. 11:6) Ove u nongamburiro okuura momakwizikiro wa Jehova nge ri mObeibela nu u kambura kutja ombunguhiro ya Jesus mai ku yama kouvi nonḓiro. Ove we ritanaura komauvi woye orimunu ondjo kozondataiziro nḓu wa tjita, nu oningire ondjesiro ku Jehova. Ove wa rundurura ehupo roye, wa pirukira ozongaro ozombi nḓu wa ri nazo nu outu okuhupa komuano mbu tjata ku Mukuru. (Oviung. 3:19) Ove u nonḓero okuraera varwe ohunga nongamburiro yoye. Ove wa yenena okurira omuzuvarise ngu hiya papitisiwa nu outu okuzuvarisa pu nombongo. (Mat. 24:14) Jehova u nonyuṋe move komikambo ominanḓengu mbi wa toora mbyo. Ove wa yorokisa omutima we tjinene.—Omiano 27:11.   

18. Ovikwaye vyarwe mbi mo sokutjita ngunda au hiya papitisiwa?

¹⁸ Ngunda au hiya papitisiwa pe noviṋa vyarwe tjiva mbi mo hepa okutjita. Otja tji twe rihongo rukuru ove mo sokuriyandja omuini ku Mukuru. Kumba ku ye nomutima woye auhe mohamunika, nu mu kwizikira kutja mo hupu otja kombango ye. (1 Petr. 4:2) Nu okuzambo raera omuworonganise worutu rovanene vombongo kutja mo vanga okupapitisiwa. Eye ma ningire ovanene vombongo tjiva okuhakaena kuna ove. Arikana otira okuhakaena kuna wo. Tjiwa kutja ovarumendu ovakambure mbo mave kutjiwa rukuru nu ve ku suvera. Owo mave tara puna ove rukwao ku imbi mbi we rihonga mOmbeibela. Owo mave vanga okutara kutja ove wa zuva vi omahongero ngo, nokutja ove mo tjiwa ounanḓengu womeriyandjerero  nombapitisimo. Indu tji va munu kutja ove wa yenene, mave ku raere kutja mo yenene okukapapitisiwa pomaworonganeno worukondwa poo wotukondwa ngu maye kongorere ko.

19-20. Ovikeṋa mbi mo sokutjita tji wa zu nokupapitisiwa, nu mo yenenisa vi oviṋa mbyo?

¹⁹ Ovikeṋa mbi mo sokutjita tji wazu nokupapitisiwa? * Zemburuka kutja omeriyandjerero oruyano nu Jehova u undjira ko kutja u ruyenenise. Kunao kombunda yombapitisimo yoye ove u sokuhupa otja komakwizikiro ngu wa tjita tji we riyandja ku Mukuru. Ove mo yenene okutjita vi?

²⁰ Kara pozombongarero zombongo. Otjomukriste ngwa papitisiwa ove nai oove orupa ‘rovanangamburiro ovakweṋu!’ (1 Petr. 2:17) Ovakambure ovakweṋu mombongo ombe ri ra eṱunḓu roye. Tji mo kara pozombongarero zombongo aruhe mo kurisa oupanga woye kuna wo. Lesa Embo ra Mukuru nu u ripurire ko oukoto eyuva arihe. (Eps. 1:1, 2) Tji wa zu nokulesa orupa mOmbeibela, twapo oruveze okuripurira ko oukoto ku imbi mbi wazu nokulesa. Omambo otji maye ṱunu komutima woye. Nu ‘kumba’ aruhe. (Mat. 26:41) Ozongumbiro zoye okuza komutima maze ku yeta popezu na Jehova. Ombeibela i tja: “Rutengatenga paheye ouhona wa Ndjambi.” (Mat. 6:33) Ove mo yenene okutjita nao indu tji mo twapo otjiungura tjokuzuvarisa otjotjiṋa otjitenga mehupo roye. Tji mo piti aruhe motjiungura tjokuzuvarisa ove mo kurisa ongamburiro yoye, nu mo yenene okuvatera varwe okukara nomaundjiro wokukahupa nga aruhe.—1 Tim. 4:16.

21. Ombapitisimo yoye mai ku yetere ouwa wa ye?

²¹ Ondando yokuriyandja omuini ku Jehova nokupapitisiwa oomukambo omunanḓengu tjinene ove mbo tjo tjita. Otjiperi kutja mo munu omauzeu. Nu hapo ohepero okuriyandjera okumuna omauzeu otja ingo? Ii ohepero. Omauzeu aehe ngu mape ya omunu mouye mbwi owo ‘omapupu nu ye kapita tjimanga.’ (2 Kor. 4:17) Posi yokutja, ombapitisimo yoye mai ku yetere ehupo ewa nai nu moruyaveze mokamuna “omuinyo watjiri.” (1 Tim. 6:19) Kunao arikana, ripura nawa nu kumba ngunda au hiya zira epuriro ndi: “Hapo ami mbe rirongerisa pu pa yenene okupapitisiwa?”