1. Anni labbi nakuan i kuan na tadday nga tolay nigena mamataddag tu balay?

ANGNGARIGANNA, egga i tadday nga tolay nga napplano nga mappataddag tu balay. Ammuna ngana i klase na balay nga kayàna nga pataddaggan. Insigida kari yayya nga gumatang tu materiales anna igafu i pamataddag? Ari. Nigena igafu yatun, egga labbi i importante nga mawagna kuan​—karkulanna nu piga i magastona ta balay. Ngatta? Megafu ta mawag tu ammuna nu makalanno i kuartuna tapenu mabalin i balay nga pataddagganna. Nu dati ammuna ngana i magastona, siguradu nga mabalinna i bagu nga balena.

2. Segun ta Lucas 14:27-30, anni nakuan i pannonopammu tu mapia nige mu mappabawtiso?

² Nononopammu ngana kari i mappabawtiso megafu ta aya kani Jehova anna ta appresasiommu ta kingnguana para nikaw? Nu wan, mawag mu i maddesision kagitta na tolay nga ikayana nga mamataddag tu balay. Ngatta kunnatun? Ikonsidera i kinagi ni Jesus ta Lucas 14:27-30, NW. (Bibbigan.) Nipakanawag taw ni Jesus nu anni i kebalinan na mabbalin tu disipulona. Tapenu mabbalin tu disipulona, mawag tu sigga-paran ittam nga alawatan i nelagum nga “magasto”—i kapurueba anna i sakrifisio ira. (Luc. 9:23-26; 12:51-53) Yari tu nige mu mappabawtiso, mawag tu nonopammu tu mapia i ngamin nga nelagum tatun. Nu kunnatun, mas preparadu ka noka nga kanayun nga matalo nga masserbi ta Dios bilang bawtisadu nga Cristiano.

3. Anni i gigiammuattam taw nga artikulo?

³ Sulit kari i pabbalimmu tu bawtisadu nga disipulo ni Cristo kumpara ta ziga nga meparubang nikaw anna ta gannug ira nga isakrifisiom? Siempre! Mangivuka i bawtismo tu napakaru nga bendision ta maddaggun anna ta mappange. Gigiammuattam i importante ira nga pakkiavu meyannung ta bawtismo. Makoffun danatun tapenu matabbag mu yaw nga pakkiavu: “Preparadu ngà ngana kari nga mappabawtiso?”

4. (a) Anni i dedikasion? (b) Anni i kayàna kagian na ‘kattamammu’ i baggim, segun ta Mateo 16:24?

⁴ Anni i dedikasion? Nige mu nga mabawtisowan, mawag mu i maddedika. Nu maddedika ka, napafutuan nga makimallo ka kani Jehova anna kagiammu nisa nga usammu ngana i pattolem tapenu masserbi nisa adde ta mannanayun. Oras tu naddedika ka ta Dios, ‘kattamammu’ ngana i baggim. (Bibbigan i Mateo 16:24, NW.) Kukua naka ngana ni Jehova anna dakal nga pribilehio yatun. (Roma 14:8) Kakkagiammu nisa nga mamegafu sangawe, nakafokus ka ngana ta passerbi nisa, ari tu ta pamagustu ta baggim. I dedikasiommu ay tadday nga tabba​—serioso nga promesam ta Dios. Ari ittam fuersan ni Jehova nga kuan yatun nga tabba. Ngem nu mattabba ittam, ekspektanna nga tuppalattam yatun.​—Sal. 116:12, 14.

5. Anni i nadduman na dedikasion ta bawtismo?

⁵ Anni i nadduman na dedikasion ta bawtismo? I dedikasiommu ay personal anna pribadu; ta nikamu laman yatun dua ni Jehova. I bawtismo ay publiko; mesimmu yatun ta arubang na totolay, maruddu ta asembli onu ta kombension. Nu mappabawtiso ka ngana, ipasingammu ta tanakuan nga nidedikam ngana i pattolem kani Jehova. * Ipakannammu gafu ta tanakuan na bawtismom nga ayatammu si Jehova nga Dios mu ta interu nga futum, kararuam, nono mu, anna sikammu anna determinadu ka nga passerbian yayya adde noka.​—Mar. 12:30.

6-7. Segun ta 1 Pedro 3:18-22, anni i dua nga rason nu ngatta kawagan i bawtismo?

⁶ Talaga kari nga kawagan nga mappabawtiso? Ikonsidera i mabibbig ta 1 Pedro 3:18-22. (Bibbigan.) Nu pakurugan na arka i pangurug ni Noe ta Dios, pakurugan gapa na bawtismom i dedikasiommu kani Jehova. Ngem talaga kawagan kari i bawtismo? Wan. Nipakanawag ni Pedro i rason nu ngatta. Ollu, yatun i ‘mamaliag nikamu.’ Ipaliag ittam na bawtismo nu kuattam i mepangngo ira nga dakkua tapenu ipasingan nga mangurug ittam kani Jesus anna kurugattam nga natay yayya para nittam, napaginnolay ta langi, anna egga ngana “ta ziwanan na Dios.”

⁷ Mekadua, marresulta i bawtismo ta “marenu nga konsensia.” Nu idedika tam i baggi tam ta Dios anna mappabawtiso, mapeggan ittam tu espesial nga relasion nisa. Megafu ta napafutu i pabbabawi tam anna mangurug ittam ta tavvu, pakoman ittam na Dios ta liwi-liwa tam. Yari tu mapeggan ittam gafu tu marenu nga konsensia ta arubanna.

8. Anni i primeru nga rason ta desisiommu nga mappabawtiso?

⁸ Anni nakuan ira i rason nu ngatta maddesisiokka nga mappabawtiso? Megafu ta paggigiammum tu mapia ta Biblia, aru i nagigiammum meyannung kani Jehova​—i personalidadna anna i annangnguana. Natukkal i futum megafu ta nagigiammum meyannung nisa yari tu napaguyu ka nga kuruga ayatan yayya. I aya mu nakuan kani Jehova i primeru nga rason ta desisiommu nga mappabawtiso.

9. Anni i kayà kagian na mappabawtiso ta ngagan na Yama anna na Ana anna na masanto nga espiritu, gitta na mabibbig ta Mateo 28:19, 20?

⁹ I tadday paga nga rason nu ngatta naddesisiokka nga mappabawtiso ay megafu ta kinurug mu i nagigiammum ira ta Biblia. Ikonsidera i kinagi ni Jesus turi ta niyawana i bilin nga mangngua tu disipulos. (Bibbigan i Mateo 28:19, 20, NW.) Segun kani Jesus, danuri nappabawtiso ay mawag tu kuadda yatun “ta ngagan na Yama anna na Ana anna na masanto nga espiritu.” Anni i kayà kagian natun?  Mawag nga interu-futu nga kurugammu i kinakurug ira ta Biblia meyannung kani Jehova; ta Anana nga si Jesus; anna ta masanto nga espiritu. Kuruga mafuersa danaw nga kinakurug anna matukkal danatun i futum. (Heb. 4:12) Repasuattam i karuan tatun.

10-11. Anni ira nga kinakurug meyannung ta Yama i nagigiammum anna kinurug mu?

¹⁰ Nonopammu uli tagga ta nagigiammum danaw nga kinakurug meyannung ta Yama: Yayya ay “mangngagan tu Jehova,” “i Katannangan ta interu nga davvun,” anna “i kurug nga Dios.” (Sal. 83:18, NW; Isa. 37:16) Yayya i Namaratu nittam, anna ‘i kapaliag ay maggafu kani AFU’ Jehova. (Sal. 3:8; 36:9) Nagangngua yayya tu unnug tapenu mapaliag ittam ta liwa anna patay anna niddanna ittam tu tiansa para ta mannanayun nga inango. (Juan 17:3) Ipasingan na dedikasiommu anna bawtismom nga tadday ka ngana nga Saksi ni Jehova. (Isa. 43:10-12) Parte ka ngana na interu mundo nga familia na maddayarayaw nga magayayya nga magalan ta ngagan na Dios anna ipakannammu yatun ta tanakuan.​—Sal. 86:12.

¹¹ Anni mabba kadakalna nga pribilehio nga malippawa i ituttuddu na Biblia meyannung ta Yama! Nu kurugammu danatun nga nabalor nga kinakurug, mapaguyu ka nga idedika i baggim kani Jehova anna mappabawtiso.

12-13. Anni ira nga kinakurug meyannung ta Ana i nagigiammum anna kinurug mu?

¹² Anni i reaksiommu turi ta nagigiammum i tumunug ira nga kinakurug meyannung ta Ana? Si Jesus i mekadua nga pinaka-importante nga persona ta uniberso. Yayya i Taga-tavvu tam. Sigga-paranna nga niyawa i inangona para nittam. Nu ipasingan na annangngua tam nga mangurug ittam ta tavvu, mapakoma i liwi-liwa tam, mapeggan ittam tu monag nga pakikkofun ta Dios, anna mala tam i mannanayun nga inango. (Juan 3:16) Si Jesus i Atannang nga Pari tam. Kayàna ittam duffunan tapenu mabbenefisio ittam ta tavvu anna mapeggan tu meggo nga relasion ta Dios. (Heb. 4:15; 7:24, 25) Bilang Patul na Pappatulan na Dios, usan yayya ni Jehova tapenu mapakarenuan i ngaganna, panuppalan i kinarake, anna mangirattal tu mannanayun ira nga bendision ta mappapange nga Paraiso. (Mat. 6:9, 10; Nep. 11:15) Si Jesus i ehemplo tam. (1 Ped. 2:21) Nangipasingan yayya tu apparigattam ta pangiyusana ta interu nga pattolena ta pagangngua ta uray na Dios.​—Juan 4:34.

¹³ Nu kurugammu i ituttuddu na Biblia meyannung kani Jesus, magga ayatammu i meddu nga Ana na Dios. Yatun nga aya i mamaguyu nikaw nga usan i pattolem ta pagangngua ta uray na Dios kagitta ni Jesus. Megafu tatun, mapaguyu ka nga idedika i baggim kani Jehova anna mappabawtiso.

14-15. Anni ira nga kinakurug meyannung ta masanto nga espiritu i nagigiammum anna kinurug mu?

¹⁴ Anni i nanono mu turi ta nagigiammum i tumunug ira nga kinakurug meyannung ta masanto nga espiritu? Aktibo nga fuersa na Dios i masanto nga espiritu, ari tu persona. Inusana yatun tapenu igiya i lallaki ta patturada ta Biblia, anna i espiritu i manguffun nittam tapenu malippawa anna meyaplika tam i nabibbig tam tatun. (Juan 14:26; 2 Ped. 1:21) Gukaban na espiritu ni Jehova, iddanna ittam tu “ari nga maguku-gukug nga pakapangngua.” (2 Cor. 4:7) I espiritu i mamasikan nittam tapenu ilayyagayya i mapia nga dumug, labanan i tentasion, arubangan i pakkadismaya, anna attamman i kapurueba ira. Duffunan ittam natun nga ipasingan i makkarasta nga kualidad na “vunga na Espiritu.” (Gal. 5:22) Sigga-paran i Dios nga iddan tu espirituna danuri mattalo nisa anna napafutuan nga makkiddaw nisa.​—Luc. 11:13.

¹⁵ Kuruga makapabannay nga mammuan nga  danuri maddayarayaw kani Jehova ay makapattalo ta uffun na masanto nga espiritu ta passerbida ta Dios! Nu kurugammu i kinakurug ira nga nagigiammum meyannung ta masanto nga espiritu, mapaguyu ka nga idedika i baggim ta Dios anna mappabawtiso.

16. Anni ira i naggigiammu tam meyannung ta dedikasion anna bawtismo?

¹⁶ Importante nga dakkua i kuammu nu maddisidi ka nga idedika i baggim ta Dios anna mappabawtiso. Gitta na nagigiammu tam, mawag tu sigga-parakka nga alawatan i nelagum nga magasto​—i kapurueba anna i sakrifisio ira. Ngem mas sulit i bendision ira anne ta magastom onu ta mesakrifisiom. Mepaliag naka na bawtismo, anna mapeggakka paga tu marenu nga konsensia ta arubang na Dios. I pinakarason nakuan nu ngatta mappabawtiso ka ay megafu ta aya mu kani Jehova nga Dios. Mawag gapa tu interu futum nga kurugan i kinakurug nga nagigiammum meyannung ta Yama, ta Ana, anna ta masanto nga espiritu. Sangawe ta nagigiammu tam ngana i meyannung ta dedikasion anna bawtismo, anni ngana i tabbag mu taw nga pakkiavu: “Preparadu ngà ngana kari nga mappabawtiso?”

17. Anni i karuan nga dakkua nga mawag nga makua nige mappabawtiso?

¹⁷ Nu matageno mu nga preparadu ka ngana nga mappabawtiso, siguradu nga aru ngana nga gannug i kingnguam tapenu mapeggakka tu makasta nga relasion kani Jehova. * Megafu ta regular nga paggigiammum tu Biblia, mas aru ngana i nammuammu meyannung kani Jehova anna kani Jesus. Egga ngana i pangurug mu. (Heb. 11:6) Buu i pattalo mu ta promesa ira ni Jehova ta Biblia, anna mangurug ka nga mepaliag naka na sakrifisio ni Jesus ta liwa anna patay. Pinabbabawyammu ngana i liwi-liwa mu; kuruga maraddam ka ta nakaliwatammu ira, anna nakkiddaw ka tu pamakoma ni Jehova. Inulim i pattolem; talaga nilikurammu ngana i dati nga marake nga istilo na pattolay anna nigafum ngana i pattolay nga makapagayayya ta Dios. (King. 3:19) Kakayà mu nga ikagi ta tanakuan i pangurug mu. Kualipikadu ka ngana bilang unbaptized publisher anna mallayyagayya ka ngana kavulu i kongregasion. (Mat. 24:14) Magayayya si Jehova nikaw megafu ta kingnguam danatun nga mepangngo nga dakkua. Kuruga napagayayya mu i futuna.​—Prov. 27:11.

18. Anni paga i mawag mu kuan nige mu mappabawtiso?

¹⁸ Nige mu mabawtisowan, egga paga ira i gannug nga mawag tu kuammu. Kagitta na nagigiammu tam ta nappasa, mawag tu idedikam i baggim ta Dios. Napafutuan nga makimallo nisa ta pribadu, anna ipromesam nisa nga usammu ngana i pattolem ta pagangngua ta urena. (1 Ped. 4:2) Tapus, ikagim ta koordineytor na baggi na elder ira nga kayà mu ngana i mappabawtiso. Iyunnugna nga kibbidan naka na natunno ira nga elder. Fabor bi nga ari ka  nakuan mavurung ta pakibbida nira. Daddammammu nga danatun nga meddu nga brother ay kilala daka ngana anna iddeddu daka. Irepasoda nikaw i primeru ira nga tuddu na Biblia nga nagigiammum ngana. Siguraduadda nga nalippawa mu danatun nga tuddu anna ammum i importansia na dedikasion anna bawtismo. Nu umanugu ira nga preparadu ka ngana, kagiadda nikaw nga puede ka ngana nga mabawtisowan ta tumunug nga asembli onu kombension.

19-20. Anni i mawag tu kuammu kabalin na bawtismom, anna kunnasim makua yatun?

¹⁹ Kabalimmu nabawtisowan, anni i mawag tu kuammu? * Daddamman nga i dedikasion ay tabba anna ekspektan ni Jehova nga tuppalammu yatun. Kabalin gafu na bawtismom, mawag tu talakkurugammu i dedikasiommu. Kunnasim makua yatun?

²⁰ Ariammu umarayyu ta kongregasiommu. Bilang bawtisadu nga Cristiano, parte naka ngana na ‘mawwaragi ta angngurug.’ (1 Ped. 2:17) I wawwaragim ta kongregasion i familiam ta espiritual. Nu kanayukka nga magatende ta study ira, mapaladdam i pakikkofummu nira. Inaggaw nga bibbigan i Uvovug na Dios anna monag nga pannonopan yatun. (Sal. 1:1, 2) Iddammu tu tiempo nga monag nga pannonopan i parte na Biblia nga nabibbig mu. Nu kunnatun, umatto yatun ta futum. “Maddasal” kanayun. (Mat. 26:41) I napafutuan nga pakimallo mu i mas mamaddukko nikaw kani Jehova. ‘Itulu-tuloy nga pagolluan i Pappatulan.’ (Mat. 6:33, NW ) Makuam yatun nu prayoridad mu ta pattolem i pallayyagayya. Gukaban na regular nga pakiparte ta ministerio, mapattalupaddiammu nga masikan i pangurug mu, anna moffunammu i tanakuan nga mapeggan tu tiansa para ta mannanayun nga inango.​—1 Tim. 4:16.

21. Anni i ivuka na bawtismom?

²¹ I desision nga idedikam i baggim kani Jehova anna mappabawtiso i pinaka-importante nga desision nga kuammu. Kurug nga egga i mesakrifisiom. Ngem sulit kari yatun? Siempre! I maski anni nga ziga nga meparubang nikaw taw nga dana nga mundo ay “alappaw anna manganannuan laman.” (2 Cor. 4:17) Ngem i bawtismom i mangivuka nikaw para ta makapagayayya nga pattolay ta maddaggun anna ta “kurug nga pattolay” ta mappange. (1 Tim. 6:19) Fabor bi gafu nga nonopammu tu mapia anna ipakimallo mu i tabbag mu taw nga pakkiavu: “Preparadu ngà ngana kari nga mappabawtiso?”