1. Ɔdi nɛ ɔcɛ cika ō ya gbɔbu ɛɛ kóō gbɔɔ ō gwo ɔlɛ a?

LEYI yɛ ɛlā nyā ɛ: Alɔ ka ku ɔcɛ éyi miya ka anuɔ dɔka ō gwo ɔlɛ. Ó kē jé ɛdɔ ɔlɛ nɛ ó dɔka ō gwo a. Amáŋ, ó cika ō gā olihi gáā gbɔɔ ō lá aɔdā nɛ ó gē bi le gwo ɔlɛ a klla gbɔɔ ō gwo ɔ boobu nɛɛ? Ehee. Ohigbu ka ó lɛ ɔdā ō cɛgbá nɛhi éyi nɛ ó cika ō ya, gbɔbu ɛɛ kóō gbɔɔ ō gwo ɔlɛ a. Ó cika ō lɛ ōmiya ya, o ya ɛɛ kóō jé aɔdā nɛ ó géē ŋmo ta ɔ a. Ɔdiya a? Ohigbu ka ɔɔma géē ta ɔ abɔ kóō jé, ɔdaŋ ku ije nɛ ó lɛ a, géē jɛ ɔ ō bi le gwo ɔlɛ a mɛ gla. Ɔdaŋ ka ɔcɛ ɔɔma lɛ ɛnyā jé gbɔbu, á jé ŋ, ó géē tɔɔtɛ lɛ ɔ ō gwo ɔlɛ a mɛ gla.

2. Oŋma ɛlā nōo yɔ ipu ɔkpá ku Ulúku 14:27-30 a, ɔdi nɛ a cika ō gbɛla lɛyikwu ɔ lɔɔlɔhi gbɔbu ɛɛ ku a ya ubatisim a?

² Ihɔtu nɛ a lɛ lɛ Ujehofa, mla ɛgɛ nɛ aɔdā nɛ ó ya gā uwɔ a jɛ uwɔ eyī nɛhi lɛ a, lɛ abɔ kwu uwɔ ɔtu ku a gbɔɔ ō gbɛla lɛyikwu ō ya ubatisim ɛ? Ó lɛ a, āhɔ̄ ku uwɔ lɛbɛɛka aku ɔcɛ ō gwo ɔlɛ ɔɔma a. Ɔdiya nɛ alɔ ka lɛ a? Leyi yɛ aɛlā ku Ujisɔsi nōo yɔ ipu ɔkpá ku Ulúku 14:27-30. (Jé.) Ipu ɛga ku Ubáyíbu ɔɔma, Ujisɔsi yɔ i kɛla lɛyikwu ɔdā nōó wɛ ku ɔcɛ kóō wɛ ɔyikpo ku nu a. Ɔdaŋ ku alɔ dɔka ō yɛce Ujisɔsi, alɔ cika ō le tutu ō lɔtu āhɔ̄ olɔnɔ duuma klla leyi gwo aɔdā ōhī bonu. (Ulúk. 9:23-26; 12:51-53) Ó lɛ a, gbɔbu ɛɛ ku a ya Ubatisim, a cika ō gbɛla lɔɔlɔhi gbɔbu, lɛyikwu aɔdā nɛ a géē má, ɔdaŋ ku a kwu piya ɔyikpo ku Ukraist a. Cɛɛ, eko duuma nɛ a lɛ ubatisim ya a, a géē le tutu lɔɔlɔhi ō gba Ujehofa kpaakpa ɛ.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ó cɛgbá ō lɔtu aɔdā olɔnɔ klla leyi gwo aɔdā ōhī bonu ohigbu ubatisim ō ya a? Ii gboo! Ɔcɛ ō ya ubatisim gē miyɛ ɔhā alɛwa babanya, ó klla géē miyɛ ɔhā alɛwa ɛcɔbu duu. Alɔ leyi yɛ aɔka ōhī nōo cɛgbá nɛhi lɛyikwu ubatisim ɛ. Ɔɔma géē ta uwɔ abɔ ku a jé ohi ku ɔka nōo kahinii: “N le tutu ō ya Ubatisim ɛ?”

4. (a) Ɔdi wɛ ɛyi ō je iyi ɔcɛ gwɛɛya lɛ Ujehofa a? (b) Ɔdi wɛ ɛyi ɛlā nōo kahinii: “leyī gwū iyī nū bónū,” nōo yɔ ipu ɔkpá ku Umátiyu 16:24 a?

⁴ Ɔdi wɛ ɛyi ō je iyi ɔcɛ gwɛɛya lɛ Ujehofa a? Gbɔbu ɛɛ ku a ya ubatisim, a cika ō je iyi uwɔ gwɛɛya lɛ Ujehofa. Eko nɛ a je iyi uwɔ gwɛɛya lɛ Ujehofa a, a gbɔɔkɔ lɛ ɔ ŋma ɔtu ku uwɔ, klla da ɔ ka géē bi ɛjɛɛji oyeeyi ku uwɔ le gba ɔ ɛ̄gbā jaa gā ogboogboo ɛcɛ. Ɔdaŋ ku ɔcɛ lɛ iyi nu gwɛɛya lɛ Ɔwɔico, ó géē “leyī gwū iyī nū bónū.” (Jé Umátiyu 16:24.) Ɔcɛ ɔɔma géē je piya aku Ujehofa, ɛnɛɛnɛ ɛga nɛ ɔɔma kē wɛ a. (Uróm 14:8) A yɔ i da ɔ ku oŋma ɛ̄cī ɔɔma gbɔbu a, ɔdā nōo gáā cɛgbá gā uwɔ fiyɛ duu a wɛ ɛ̄gbā ō gba ku nu nɛ, ó wɛ ō ya ɔdā nōo he uwɔ ɔtu a ŋ. Ɔdaŋ ku a lɛ iyi uwɔ gwɛɛya lɛ Ɔwɔico, okonu nɛ a ce lɛ ɔ ba ɔ a n. Á kē cika ō bi okonu ō ce ɔɔma le hija fluflu ŋ. Ujehofa i gē kwu alɔ abɔfu ku alɔ cokonu ɛgɔɔma lɛ ɔ ŋ. Amáŋ ɔdaŋ ku alɔ le ya lɛ a, ó dɔka ku alɔ lɛ okonu ō ce a ya jila.—Aíjē 116:12, 14.

5. Ɔdi wɛ ɛyɛɛyɛyi ku ō je iyi ɔcɛ gwɛɛya lɛ Ujehofa mla ō ya ubatisim a?

⁵ Ɔdi wɛ ɛyɛɛyɛyi ku ō je iyi ɔcɛ gwɛɛya lɛ Ujehofa mla ō ya ubatisim a? Ɔcɛ duuma i gē jé eko nɛ ɔcɛ gē je iyi nu gwɛɛya lɛ Ujehofa a ŋ. Amáŋ Ubatisim i wɛ ɔdā ō tayinu ŋ, ó wɛ ɔdā néē gē ya iyɔbu ācɛ ipu ojileyi amāŋ ojileyi nɛhi a. Ubatisim ō ya, wɛ ō mafu lɛ ācɛ ku a kwu iyi uwɔ u gwɛɛya lɛ Ujehofa gbɔbu ɛ. * Ɔdaŋ ku a lɛ ubatisim ya, ó géē ya ku ācɛ ɔhá kē jé ku a yihɔtu ku Ujehofa Ɔwɔico ku uwɔ mla ɛjɛɛji ɔtu, odo, ɛlá ō gbo mɛmla ɛjɛɛji ɔfu ku uwɔ. Ó klla géē mafu ku a le miya ō gba Ujehofa ɛ̄gbā ogboogboo ɛcɛ ɛ.—Umák. 12:30.

6-7. Oŋma ɛlā nōo yɔ ipu ɔkpá ku 1 Upíta 3:18-22 a, ɔdi wɛ ɔdā ɛpa nōo ya ɛɛ nɛ alɔ cika ō ya ubatisim a?

⁶ Ō ya Ubatisim kóō cɛgbá a? Leyi yɛ aɛlā nōo yɔ ipu ɔkpá ku 1 Upíta 3:18-22. (Jé.) Ugbeenyi nɛ Unowa gwo a mafu lɛ ācɛ ka Unowa kpɔtuce Ɔwɔico. Ɔwɛ ekponu ɔɔma a, ubatisim ku uwɔ géē mafu lɛ ācɛ ku a lɛ iyi uwɔ gwɛɛya lɛ Ujehofa ɛ. Amáŋ ubatisim kóō cɛgbá a? Ii gboo. Upita kɛla lɛyikwu ɔdā nōo ya ɛɛ nōó cɛgbá a. Aflɛyi, ó gē “nya alɔ tá.” Ubatisim géē nya alɔ ta, ɔdaŋ ku alɔ gē mafu ipu uce ō ya ku alɔ, ku alɔ kpɔtuce Ujisɔsi. Ɔdā ɔhá wɛ ō kpɔtuce ka ó kwū ohigbu alɔ, ka Ɔwɔico klla lɛ ɔ heyi ŋma ɔlekwu gā ɔkpanco, ka ó kē “yɔ̄ abɔ̄lɔ́ná kú Ɔwɔicō” babanya.

⁷ Ɔmpa, ɔdaŋ ku alɔ lɛ ubatisim ya, alɔ géē lɛ “ɔtū o yēŋēē.” Eko duuma nɛ alɔ lɛ iyi alɔ gwɛɛya lɛ Ujehofa klla lɛ ubatisim ya, alɔ géē gáā lɛ ɛnɛɛnɛ ɛma mla ɔ. Ɔwɔico gē je oyabiya ku alɔ ya alɔ ɛhi, ohigbu ku alɔ le piyabɔ ɔkwɔɔkwɛyi ŋma íne nɛ alɔ biya a, klla kpɔtuce ikwū nɛ Ujisɔsi gáā kwū a. Ohigbu ɔɔma a, alɔ lɔfu lɛ ɔtu o yeŋee iyɔbu ku Ujehofa.

8. Ɔdi wɛ ɔdā nōo ya ɛɛ nɛ alɔ cika ō miya ō ya ubatisim a?

⁸ Ɔdi wɛ ɔdā nōo ya ɛɛ nɛ alɔ cika ō miya ō ya ubatisim a? Ohigbu ɛgɛ nɛ a gē klɔcɛ ku Ubáyíbu lɔɔlɔhi a, a gáā lɛ aɔdā alɛwa nwu lɛyikwu Ujehofa ɛ, ɛdɔ ɔcɛ nɛ ó wɛ, mla ɛgɛ nɛ ó gē ya odee lɛ a. Aɔdā nɛ a nwu lɛyikwu ɔ a, lɛ abɔ kwu uwɔ ɔtu klla ya ku a gbɔɔ ō yihɔtu nu nɛɛnɛhi. Ihɔtu nɛ a lɛ lɛ Ujehofa a, wɛ ɔdā ō cɛgbá fiyɛ duu nōo ya nɛ a cika ō miya ō ya ubatisim á.

9. Ɛgɛ nɛ ɔkpá ku Umátiyu 28:19, 20 ka a, ɔdi wɛ ɛyi ku ubatisim ō ya ŋma lɛ iyē ku Adā, mla ɔyi, mɛmla Alelekwu Ihɔ a?

⁹ Ɔdā ɔhá nōo ya ɛɛ nɛ a cika ō miya ō ya ubatisim a, wɛ ɔdaŋ ku a nwu ɛlā nōo yɔ ipu Ubáyíbu a klla kpɔtuce ɔ. Leyi yɛ ɛlā nɛ Ujisɔsi  ka, eko nɛ ó je ɔ́da kéē lɛ ācɛ piya ayikpo ku nu a. (Jé Umátiyu 28:19, 20.) Oŋma ɛlā nɛ Ujisɔsi ka a, ācɛ nōo gáā ya ubatisim a, géē ya ɔ “ŋmá lɛ iyē kú Ádā ā, mɛ́mla ɔyí ā, mɛ́mla Alelékwū Ihɔ ā.” Ɔdi wɛ ɛyi ɛlā ɔɔma a? A cika ō bi ɛjɛɛji ɔtu ku uwɔ lɛ ɔtu kpo ce aɛlā ɔkwɛyi nōo yɔ ipu Ubáyíbu a. Aɛlā ɔkwɛyi lɛyikwu Ujehofa, ɔyi nu Ujisɔsi, mla Alelekwu ihɔ a. Aɔkwɛyi nyā lɔfu nɛɛnɛhi, é klla lɔfu lɛ abɔ kwu uwɔ ɔtu gla. (Uhíb. 4:12) Alɔ kɛla lɛyikwu ōhī ku uwa.

10-11. Ɔkwɛyi ɛyɛɛyɛyi nyá lɛyikwu Adā alɔ nɛ a nwu klla kpɔtuce ɔ ɛ ma?

¹⁰ A blakwu eko nɛ a nwu aɛlā ɔkwɛyi nōo ba nyā lɛyikwu Adā a kpɔ ɛ?: Iye ku nu wɛ “Ujehofa,” anu foofunu kē “ī gbo odúúdú ɛcɛ kpɛ́mm á.” Anu ofoofunu kē wɛ “Ɔwɔicō” á. (Aíjē 83:18 NW; Ayis. 37:16) A nwu ka Ɔwɔico ya alɔ á, ka “Óndú ā [Ujehofa klla] gē hɛ́ ɔ̄cɛ tá á.” (Aíjē 3:8; 36:9) Ó lɛ ōmiya ya kóō lɛ alɔ nyata ŋma oyabiya mla ikwū, klla ya ku alɔ lɛ eyiyoce ō lā oyeeyi opiyoo. (Ujɔ́n. 17:3) Ō lɛ iyi uwɔ gwɛɛya lɛ Ujehofa mla ō ya ubatisim géē mafu ku a kwu piya Ɔcɛ Ocijali Ku Ujehofa ɛ. (Ayis. 43:10-12) A géē wa i wɛ ipu apɔlɛ ku ācɛ ō gba Ujehofa ɛ̄gbā nōo yɔ ipu oduudu ɛcɛ a. Ācɛ nōo gē gweeye nɛhi ō lé iye ku Ɔwɔico klla yɔ i ya ku ācɛ kéē jé ɔ.—Aíjē 86:12.

¹¹ Alɔ lɛ ɛnɛɛnɛ ɛga ō jɛyi ku ɔdā nɛ Ubáyíbu gē nwu lɛyikwu Adā alɔ a! Ɔdaŋ ku a lɛ ɔtu kpoce ɛlā ɔkwɛyi ɔɔma, ó géē lɛ abɔ kwu uwɔ ɔtu ku a lɛ iyi uwɔ gwɛɛya lɛ Ujehofa klla ya ubatisim.

12-13. Aɔkwɛyi nyá lɛyikwu Ujisɔsi ɔyi ku Ɔwɔico nɛ a nwu klla kpɔtuce ɛ ma?

¹² Ɔdi nɛ a ya eko nɛ a gáā nwu ɛlā ɔkwɛyi nōo ba nyā lɛyikwu ɔyi nu a? Ujisɔsi wɛ ɔcɛ ɔmpa nōo fiyɛ duu ɔkpanco mɛmla ɛcɛ a. Ó wɛ Ohɔnyɛta ku alɔ. Ó cɛ ō je oyeeyi ku nu gwɛɛya ohigbu alɔ. Ɔdaŋ ku alɔ gē mafu ŋma lɛ uce ō ya ku alɔ, ku alɔ kpɔtuce ikwū ku Ujisɔsi, Ɔwɔico géē je oyabiya ku alɔ ya alɔ ɛhi, alɔ géē lɛ ɛma olɔhi mla ɔ klla géē lɛ oyeeyi opiyoo. (Ujɔ́n. 3:16) Ujisɔsi wɛ Otrɛyi Ku Acogwɛɛya ku alɔ á. Ó dɔka ō ta alɔ abɔ ku alɔ lɛ itene ŋma ikwū nɛ ó kwū a. Ó klla dɔka ō ya ku alɔ lɛ ɛma olɔhi mla Ɔwɔico. (Uhíb. 4:15; 7:24, 25) Abɔ Ujisɔsi wɛ ɔcɛ́ ku Ajɔɔcɛ ku Ɔwɔico a, Ujehofa géē bi ɔ le ya ku iye ku nu kóō le tiihɔ, kóō bi ɔdobɔbi wa oŋmɛyi klla ya ku ācɛ kóō yɔ i jɔɔnyɛ ɔhā piyoo ipu uparadais. (Umát. 6:9, 10; Mafú 11:15) Ocabɔ ku Ujisɔsi nɛ alɔ cika ō yɔ i yɛce á. (1 Upít. 2:21) Ó bi oyeeyi ku nu le ya ɔdā nɛ Ujehofa dɔka a, ɔwɛ ɔɔma nɛ ó je ocabɔ olɔhi taajɛ lɛ alɔ a.—Ujɔ́n. 4:34.

¹³ Eko nɛ a kpɔtuce ɛlā nɛ Ubáyíbu gē nwu lɛyikwu Ujisɔsi nōo wɛ ɔyi ku Ɔwɔico a, a gáā gbɔɔ ō yihɔtu nu. Ihɔtu ɔɔma lɛ abɔ kwu uwɔ ɔtu ku a bi oyeeyi ku uwɔ le gba Ujehofa ɛ̄gbā ɛgɛ nɛ Ujisɔsi ya a. Ɛnyā kē i ya kóō gbɔɔ ō ŋmo uwɔ unwu ō lɛ iyi uwɔ gwɛɛya lɛ Ujehofa klla ya ubatisim.

14-15. Aɛlā ɔkwɛyi nyá lɛyikwu Alelekwu Ihɔ a nɛ a nwu klla kpɔtuce ɛ ma?

¹⁴ Ɔdi nɛ a gbɛla, eko nɛ a nwu aɛlā ɔkwɛyi nōo ba nyā lɛyikwu Alelekwu Ihɔ a? Alelekwu Ihɔ a i wɛ ɔcɛ ŋ, amáŋ ó wɛ ɔfu ō bi le yuklɔ ku Ɔwɔico. Ujehofa bi Alelekwu Ihɔ ku nu le ma ɔwɛ fu lɛ ācɛ kéē ta ɛlā nōo yɔ ipu Ubáyíbu a. Alelekwu Ihɔ a kē i ta alɔ abɔ ku alɔ jɛyi ɛlā nōo yɔ ipu Ubáyíbu klla bi ɛlā nɛ alɔ gē jé ŋma anu a le yuklɔ. (Ujɔ́n. 14:26; 2 Upít. 1:21) Ujehofa gē je “ɔfú nɛ̄ɛ̄nɛ̄hi” lɛ alɔ o bu ipu Alelekwu Ihɔ ku nu. (2 Ukɔ́r. 4:7) Alelekwu Ihɔ a gē je ɔfu tu alɔ iyē ku alɔ tɔɔna ku ɔkoolɔhi a. Ó gē ta alɔ abɔ ku alɔ ya ojama le, ku alɔ hayi kpaakpa eko nɛ abɔ le hɛ alɔ iyē, klla ya ku alɔ lɔtu ipu unwalu duuma. Ó gē ta alɔ abɔ ku alɔ kóō yɔ i mafu  auce olɔhi nōo wɛ “īkpō kú Alelékwū ā.” (Ugal. 5:22) Ācɛ nōo kpɔtuce Ɔwɔico a, nɛ Ɔwɔico gē je Alelekwu Ihɔ ku nu lɛ uwa a. Ó klla gē je lɛ ācɛ nōo gē ba ɔ kóō je lɛ uwa a duu.—Ulúk. 11:13.

¹⁵ Ó wɛ ɔdā ō tu ɔtu kwu ɔtu ō jé ku ācɛ nōo gē gba Ujehofa ɛ̄gbā lɔfu gbolo ce Alelekwu Ihɔ kóō ta uwa abɔ kéē lɔfu gba Ɔwɔico ɛ̄gbā gla! Ɔdaŋ ku a gáā kpɔtuce aɛlā ɔkwɛyi nɛ a nwu lɛyikwu Alelekwu Ihɔ a, ó géē lɛ abɔ kwu uwɔ ɔtu ku a lɛ iyi uwɔ gwɛɛya lɛ Ujehofa klla ya ubatisim.

16. Ɔdi nɛ alɔ nwu ŋma aɔdā nɛ alɔ humayi ka a?

¹⁶ Ōmiya nɛ a ya ku anuɔ dɔka ō lɛ iyi uwɔ gwɛɛya lɛ Ujehofa klla ya Ubatisim a, wɛ ōmiya nōo cɛgbá nɛɛnɛhi. Oŋma ɛlā nɛ alɔ humayi nwu a, a cika ō le tutu ō lɔtu ku ɔdā duuma klla leyi gwo aɔdā ōhī bonu. Amáŋ ɔhā nɛ a gáā lɛ a, géē nwune fiyɛ ɔdā duuma nɛ a leyi gwo ɔ bonu a. Ubatisim lɔfu nya uwɔ ta, ó klla lɔfu ya ku a lɛ ɔtu ō yeŋee iyɔbu ku Ujehofa. Ihɔtu nɛ a lɛ lɛ Ujehofa a cika ō wɛ ɔdā ō kpɔcii nōo géē ya ku a miya ō ya Ubatisim a. A klla cika ō bi ɛjɛɛji ɔtu ku uwɔ le kpɔtuce aɛlā ɔkwɛyi nɛ a nwu ɛ ma, lɛyikwu Ada a, ɔyi a, mɛmla Alelekwu Ihɔ a. Ɔdaŋ ku a leyi yɛ aɔdā nɛ alɔ humayi nwu a, ɛgɛnyá nɛ a gáā cila ohi ku ɔka nyā nōo kahinii: “N le tutu ō ya Ubatisim ɛ?”

17. Ɔdi wɛ aɔdā nɛ ɔcɛ cika ō ya gbɔbu ɛɛ kóō ya ubatisim a?

¹⁷ Ɔdaŋ ku a gbɛla ku a le tutu ō ya Ubatisim ɛ, ó lɛ aafu ŋ, a lɔfu lɛ aɔdā alɛwa ya, o ya ɛɛ ku a lɛ ɛma olɔhi mla Ujehofa ɛ. * Ohigbu ku a gē klɔcɛ ku Ubáyíbu ojigogo a, a gáā lɛ aɔdā alɛwa jé lɛyikwu Ujehofa mla Ujisɔsi ɛ. A klla gáā kpɔtuce Ɔwɔico ɛ. (Uhíb. 11:6) A lɛ ɔtuce ɛjɛɛji aokonu ō ce ku Ujehofa nōo yɔ ipu Ubáyíbu a. A kē jé kpɔcii duu ku ɔtu nɛ a kpoce ikwū ku Ujisɔsi a géē lɔfu nya uwɔ ta ŋma oyabiya mla ikwū. A le piyabɔ ŋma oyabiya ku uwɔ ɛ, ɔɔma le ka aɔdobɔbi nɛ a ya gbɔbu a kwu uwɔ iyē nɛɛnɛhi, a klla gbɔɔkɔ lɛ Ujehofa kóō kwu ya uwɔ ɛhi. A lɛ ɛgɛ nɛ a gē lā oyeeyi ku uwɔ a piyabɔ ɛ. Ɔɔma le ku a ta ō lā oyeeyi obɔbi nɛ a tɛtɛ gē lā a, klla gbɔɔ ō lā oyeeyi ɛgɛ nɛ Ujehofa dɔka a. (Ācot. 3:19) A yɔ i ya ɔtu caca ō nyɔ i da ācɛ lɛyikwu aɔdā nɛ a gē nwu ŋma ipu Ubáyíbu a. A le cika jɛ ō wɛ ɔcɛ ō tɔɔna nɛ ó ya ubatisim ɛ ŋ (unbaptized publisher), anu a gbɔɔ ō tɔɔna mla ujɔ ku uwɔ a. (Umát. 24:14) Ujehofa yɔ i gwo ohigbu ku a lɛ aɔdā nōo cɛgbá nyā ya ɛ. A le ya ku ɔtu kóō he Ujehofa nɛɛnɛhi ɛ.—Aíit. 27:11.

18. Aɔdā ɔhá nyá nɛ a cika ō ya gbɔbu ɛɛ ku a lɔfu ya ubatisim a?

¹⁸ Gbɔbu ɛɛ ku a ya ubatisim, ó lɛ aɔdā ōhī ɔhá nɛ a cika ō ya kpɔ. Abɔ alɔ nwu gbɔbu a, a cika ō je iyi uwɔ gwɛɛya lɛ Ujehofa piii. Eko nɛ a yɔ foofu uwɔ a, gbɔɔkɔ lɛ Ujehofa ŋma ɔtu, ku a lɛ okonu ce lɛ ɔ ku a géē bi oyeeyi ku uwɔ le gba ɔ ɛ̄gbā. (1 Upít. 4:2) Cɛɛ, a cɛ lɛ ɔcɛ nōo gē leyi kwu ōmiya ku anyakwɔcɛ ku ujɔ le jé ku a dɔka ō ya Ubatisim. Ó géē da anyakwɔcɛ ku ujɔ ōhī kéē jila  mla uwɔ. Kōōcō, a hii yuufi ō jila mla uwa nóó. A hii mlanyi ku ayinɛ alɔ nɔnyilɔ nyā jé uwɔ lɔɔlɔhi klla yihɔtu uwɔ ŋ. Aa géē leyi yɛ aɛlā okpɔcii nōo yɔ ipu Ubáyíbu nɛ a nwu ɛ ma. É dɔka ō jé kpɔcii ɔdaŋ ku aɛlā okpɔcii nyā ta uwɔ eyī peee. É klla dɔka ō jé ɔdaŋ ku a jé ɛgɛ nōo je iyi uwɔ gwɛɛya lɛ Ujehofa mla ō ya ubatisim cɛgbá lɛ a. Ɔdaŋ ka é cɛ ku a le tutu ɛ, é géē cɛ gā awɔ jé, ku a lɔfu ya ubatisim ipu ojileyi ku usɛkut amāŋ ojileyi nɛhi nōo yɔ i wa a.

19-20. Ɔdi nɛ a cika ō ya ɔdaŋ ku a lɛ ubatisim ya a, ɛgɛnyá nɛ a kē gáā lɔfu ya ɛnyā a?

¹⁹ Ɔdi nɛ a cika ō ya ɔdaŋ ku a lɛ ubatisim ya a? * A hii mlanyi nóó, ō je iyi ɔcɛ gwɛɛya lɛ Ujehofa wɛ okonu ō ce nɛ n, Ujehofa kē dɔka ku a lɛ okonu ō ce ɔɔma ya jila. Ohigbu ɔɔma a, ɔdaŋ ku a lɛ ubatisim ya, a cika ō ceyitikwu ku a lɛ okonu nɛ a ce ɔɔma ya jila. Ɛgɛnyá nɛ a lɔfu ya ɛnyā a?

²⁰ Yɔ kwu ujɔ ku uwɔ ajaajɛ. Ɔdaŋ ku a kwu piya Ɔcɛ O Yɛce Ukraist nōo lɛ ubatisim ya ɛ, a géē wa i wɛ éyi ipu “ācɔ̄lóhɔ́yɛtá.” (1 Upít. 2:17) Ayinɛ nɔnya mla ayinɛ nɔnyilɔ nōo yɔ ipu ujɔ a lɛbɛɛka apɔlɛ ku uwɔ a. Ɔdaŋ ku a gē gā ōjila ku ujɔ ojigogo, ɛma ku uwɔ mla uwa géē lɔfu tōōtɔ̄ɔ̄. Bēē jé Ubáyíbu ɛ̄cī doodu ku a klla bēē gbɛla tu ɔdā nɛ a jé a. (Aíjē 1:1, 2) Ɔdaŋ ku a lɛ ɛga ku Ubáyíbu duuma jé, lɛ eko taajɛ ku a gbɛla tu ɛga nɛ a jé a lɔɔlɔhi. Ɛnyā géē ya ku aɛlā nɛ a jé a kóō lɛ abɔ kwu uwɔ ɔtu. Bēē ‘gbɔ̄ɔkɔ eko doodu.’ (Umát. 26:41) Ɔkɔ nɛ a gē gba ŋma ɔtu a, géē ya ku a tubla Ujehofa ajaajɛ. “Ɔtū kú aá kóō kwu ō jɛga lɛ Ɔwɔicō kóō le ɔcɛ́ lé oyēeyī kú aá, cɛ́ɛ́ kú aá bá ī yá ɔdā nōó tíne kú aá yá ā fíyɛ́ ɔdā ɔhá dúúmā.” (Umát. 6:33) A lɔfu ya ɛnyā ŋma lɛ ō ya ku uklɔ ku ɔna ō ta a, kóō wɛ uklɔ nōo cɛgbá fiyɛ duu ipu oyeeyi ku uwɔ. Ɔdaŋ ku a gē tɔɔna eko doodu, ó gē ya ku ɔtu okpoce ku uwɔ kóō yɔ i lɔfu, a klla géē lɔfu ta ācɛ ɔhá abɔ kéē lɛ eyiyoce ō lā oyeeyi opiyoo.—1 Utím. 4:16.

21. Ɔdi nɛ ubatisim ō ya géē ya gā uwɔ a?

²¹ Ó lɛ ɔdā duuma nɛ a géē miya ō ya ipu oyeeyi ku uwɔ nōo géē cɛgbá nɛɛnɛhi bɛɛka ō je iyi uwɔ gwɛɛya lɛ Ujehofa mɛmla ō ya ubatisim ŋ. Ó wɛ ɔkwɛyi ka ó lɛ aɔdā ōhī nɛ alɔ géē má amāŋ leyi gwo uwa bonu. Amáŋ, ó kóō cɛgbá dee? Ii gboo! Owe duuma nɛ alɔ yɔ i má ipu ɛcɛ obɔbi babanya i “gáā [yɔ] gboji ŋ,” ó klla “le nyɛ́.” (2 Ukɔ́r. 4:17) Amáŋ ō ya ubatisim géē ya ku oyeeyi ku uwɔ kóō lɔhi babanya. Ó klla géē ya ku a lɛ “oyēeyi nōo wɛ oyēeyi ɔkwɛ̄yi aā” ɛcɔbu. (1 Utím. 6:19) Ó lɛ a, kōōcō gbɛla lɔɔlɔhi ku a klla gbɔɔkɔ lɛyikwu ohi ku uwɔ ku ɔka nyā nōo kahinii: “N le tutu ō ya ubatisim ɛ?”