1. Gịnị ka mmadụ kwesịrị ime tupu ya ebido ịrụ ụlọ?

KA E were ya na mmadụ chọrọ ịrụ ụlọ. Ọ ma ụdị ụlọ ọ chọrọ ịrụ. Ò kwesịrị ịga ahịa ozugbo zụọ ihe ndị ọ ga-eji arụ ụlọ, bidokwa ịrụ ya? Mba. Tupu ya ebido, e nwere ihe dị mkpa o kwesịrị ime. Ọ ga-ebu ụzọ gbakọọ ihe ịrụ ụlọ ahụ ga-efu ya. N’ihi gịnị? Ọ bụ n’ihi na o kwesịrị ibu ụzọ mata ma ò nwere ego ga-ezuru ya ịrụcha ụlọ ahụ. Ibu ụzọ gbakọọ ihe ọ ga-efu ya nwere ike ime ka o nwee ike ịrụcha ụlọ ahụ ọ chọrọ ịrụ.

2. Dị ka e kwuru na Luk 14:​27-30, gịnị ka i kwesịrị ichebara echiche nke ọma tupu gị emee baptizim?

² Ịhụ Jehova n’anya na inwe obi ụtọ maka ihe ndị o meere gị ò meela ka i chewe gbasara ime baptizim? Ọ bụrụ otú ahụ, i kwesịrị ikpebi ụdị ihe ahụ onye chọrọ ịrụ ụlọ ga-ekpebi. Gịnị mere anyị ji kwuo otú ahụ? Chegodị ihe Jizọs kwuru na Luk 14:​27-30. (Gụọ ya.) Ihe Jizọs na-ekwu bụ ihe ịbụ onye na-eso ụzọ ya pụtara. Onye chọrọ ịbụ onye na-eso ụzọ ya kwesịrị ịdị njikere maka “ihe ọ ga-efu” ya, ya bụ, idi nsogbu na ịhapụ ihe ụfọdụ. (Luk 9:​23-26; 12:​51-53) N’ihi ya, tupu gị emee baptizim, i kwesịrị iche echiche nke ọma gbasara ihe niile ya na ya so. Ọ ga-eme ka ị dị njikere iji obi gị niile na-efe Jehova ma i mechaa baptizim.

3. Olee ihe anyị ga-eleba anya na ya n’isiokwu a?

³ Mmadụ ò kwesịrị ịgbalị mee baptizim n’agbanyeghị ihe ọ ga-efu ya? Ee. O kwesịrị. Baptizim na-eme ka ọtụtụ ngọzi ruo mmadụ aka, ma ugbu a ma n’ọdịnihu. Ka anyị leba anya n’ajụjụ ụfọdụ dị mkpa gbasara baptizim. Ọ ga-enyere gị aka ịza ajụjụ bụ́, “Àdịla m njikere ime baptizim?”

4. (a) Olee otú mmadụ si enyefe Chineke onwe ya? (b) Gịnị ka mmadụ ‘ịjụ onwe ya’ e kwuru okwu ya na Matiu 16:24 pụtara?

⁴ Olee otú mmadụ si enyefe Chineke onwe ya? Tupu gị emee baptizim, i kwesịrị inyefe Chineke onwe gị. Otú ị ga-esi nyefee Chineke onwe gị bụ iji obi gị niile kpee ekpere, gwa ya na ị ga-eji ndụ gị na-efe ya ruo mgbe ebighị ebi. I nyefee Chineke onwe gị, ị ‘ga-ajụ onwe gị.’ (Gụọ Matiu 16:24.) Ị bụzi nke Jehova, nke bụ́kwanụ ezigbo ihe ọma. (Rom 14:8) Ihe ị na-agwa Jehova bụ na malite ugbu a gawa, ihe ga-akacha gị mkpa bụ ife ya, ọ bụghị ime ihe ga-adị gị mma. Inyefe Chineke onwe gị pụtara na i kwere ya nkwa ị na-agaghị eji gwuo egwu. Jehova anaghị amanye anyị ikwe ya ụdị nkwa ahụ. Ma, anyị kwehaala ya nkwa, ọ na-atụ anya ka anyị mezuo ya.​—Ọma 116:​12, 14.

5. Olee ihe dị iche n’inyefe Chineke onwe gị na ime baptizim?

⁵ Olee ihe dị iche n’inyefe Chineke onwe gị na ime baptizim? Ọ bụ naanị gị na Jehova ma mgbe i nyefere ya onwe gị. Ma, a na-eme baptizim n’ihu ọtụtụ ndị. Ọ na-abụkarị ná mgbakọ. I mee baptizim, ị na-egosi ndị ọzọ na i nyefeela Jehova onwe gị. * N’ihi ya, baptizim i mere na-egosi ndị ọzọ na i ji obi gị niile, mkpụrụ obi gị niile, uche gị niile, na ike gị niile hụ Jehova n’anya nakwa na i kpebiela ife ya ruo mgbe ebighị ebi.​—Mak 12:30.

6-7. Dị ka e kwuru na 1 Pita 3:​18-22, olee ihe abụọ mere baptizim ji dị mkpa?

⁶ Ime baptizim ọ̀ dị mkpa n’eziokwu? Chegodị gbasara ihe e kwuru na 1 Pita 3:​18-22. (Gụọ ya.) Otú ahụ ụgbọ Noa rụrụ si gosi na o nwere okwukwe, ka baptizim si egosi na i nyefeela Jehova onwe gị. Ma, baptizim ọ̀ dị mkpa n’eziokwu? Ee. Ọ dị mkpa. Pita kwuru ihe mere o ji dị mkpa. Nke mbụ bụ na ọ ‘na-azọpụta gị.’ Baptizim nwere ike ịzọpụta anyị ma anyị mee ihe gosiri na anyị nwere okwukwe na Jizọs nakwa na anyị kwetara na ọ nwụrụ n’ihi anyị, na a kpọlitere ya ya agaa eluigwe, nakwa na ọ nọ “n’aka nri Chineke” ugbu a.

⁷ Nke abụọ bụ na baptizim na-eme ka anyị nwee ‘ezi akọnuche.’ Anyị nyefee Chineke onwe anyị ma mee baptizim, anyị na Chineke ga-adị n’ezigbo mma. Chineke ga-agbaghara anyị mmehie anyị n’ihi na anyị ji obi anyị niile chegharịa ma nwee okwukwe n’àjà ahụ Jizọs chụrụ. Ọ ga-eme ka anyị nwee ezi akọnuche n’ebe Chineke nọ.

8. Olee ihe kwesịrị ime ka i kpebie ime baptizim?

⁸ Gịnị kwesịrị ime ka i kpebie ime baptizim? Ị mụọla Baịbụl nke ọma mụta ọtụtụ ihe gbasara Jehova, ma àgwà ya ma otú o si eme ihe. Ihe ndị ị mụtara gbasara ya metụrụ gị n’obi, meekwa ka ị hụ ya n’anya nke ukwuu. Ihe kacha mkpa mere i ji kpebie ime baptizim kwesịrị ịbụ na ị hụrụ Jehova n’anya.

9. Gịnị ka ime baptizim n’aha nke Nna na nke Ọkpara na nke mmụọ nsọ e kwuru na Matiu 28:​19, 20 pụtara?

⁹ Ihe ọzọ mere ị ga-eji kpebie ime baptizim bụ na i kwetara na ihe ndị ị mụtara na Baịbụl bụ eziokwu. Chegodị ihe Jizọs kwuru mgbe o nyere iwu ka e mee ndị na-eso ụzọ. (Gụọ Matiu 28:​19, 20.) Dị ka Jizọs kwuru, a ga-eme ndị mmadụ baptizim “n’aha nke Nna na nke Ọkpara  na nke mmụọ nsọ.” Gịnị ka ọ pụtara? I kwesịrị iji obi gị niile kweta ihe Baịbụl kwuru gbasara Jehova, Ọkpara ya bụ́ Jizọs, nakwa mmụọ nsọ. Eziokwu ndị a na-akpa ike. Ha nwere ike iru gị n’obi. (Hib. 4:12) Ka anyị leba anya n’ụfọdụ n’ime ha.

10-11. Olee eziokwu gbasara Nna anyị nke eluigwe ị mụtara ma kweta?

¹⁰ Cheta mgbe ị mụtara eziokwu ndị a gbasara Nna anyị nke eluigwe: ‘Aha ya bụ Jehova,’ na ọ bụ ‘naanị ya Kasị Elu n’ụwa niile,’ nakwa na ọ bụ naanị ya bụ “ezi Chineke.” (Ọma 83:18; Aịza. 37:16) Ọ bụ Jehova kere anyị. Ọ bụkwa ya “nwe nzọpụta.” (Ọma 3:8; 36:9) Ọ haziri otú a ga-esi zọpụta anyị n’aka mmehie na ọnwụ, meekwa ka anyị nwee olileanya ịdị ndụ ebighị ebi. (Jọn 17:3) Inyefe Chineke onwe gị na ime baptizim ga-eme ka a mata na ị ghọọla Onyeàmà Jehova. (Aịza. 43:​10-12) Ị ga-eso ná ndị na-efe Chineke n’ụwa niile, ndị ji obi ụtọ na-aza aha ya, na-emekwa ka ndị ọzọ mara gbasara ya.​—Ọma 86:12.

¹¹ Ịghọta ihe Baịbụl na-akụzi gbasara Nna anyị nke eluigwe bụ ihe ọma na-enweghị atụ. I kweta eziokwu ndị a magburu onwe ha, obi gị ga-agwa gị ka i kpebie na ị ga-enyefe Jehova onwe gị ma mee baptizim.

12-13. Olee eziokwu gbasara Ọkpara Chineke ị mụtara ma kweta?

¹² Gịnị ka i mere mgbe ị mụtara eziokwu ndị a gbasara Ọkpara Chineke? Jizọs bụ onye nke abụọ kachanụ n’eluigwe na ụwa. Ọ bụ Onye Mgbapụta anyị. O ji obi ya niile kweta ịnwụ maka anyị. Ọ bụrụ na omume anyị egosi na anyị nwere okwukwe n’àjà ahụ ọ chụrụ, Chineke ga-agbaghara anyị mmehie anyị, anyị na ya adịrị ná mma, anyị enwetakwa ndụ ebighị ebi. (Jọn 3:16) Jizọs bụ Nnukwu Onye Nchụàjà. Ọ chọrọ inyere anyị aka ka anyị rite uru n’àjà ahụ ọ chụrụ nakwa ka anyị na Chineke dịrị n’ezigbo mma. (Hib. 4:15; 7:​24, 25) Ebe ọ bụ Eze nke Alaeze Chineke, ọ bụ ya ka Chineke ga-esi n’aka ya mee ka e doo aha ya nsọ, mee ka ihe ọjọọ kwụsị, meekwa ka ndị mmadụ nweta ngọzi ebighị ebi na Paradaịs na-abịanụ. (Mat. 6:​9, 10; Mkpu. 11:15) Ọ bụ Jizọs ka anyị kwesịrị ịna-eso nzọụkwụ ya. (1 Pita 2:21) O ji ndụ ya niile mee uche Chineke, sikwa otú ahụ gosi anyị ihe anyị kwesịrị ime.​—Jọn 4:34.

¹³ I kweta ihe Baịbụl na-akụzi gbasara Jizọs, ị ga-ahụ Ọkpara Chineke n’anya. Ịhụnanya ahụ ga-eme ka ị chọọ iji ndụ gị na-eme uche Chineke otú ahụ Jizọs mere. Ọ ga-emekwa ka ị chọọ inyefe Jehova onwe gị ma mee baptizim.

14-15. Olee eziokwu gbasara mmụọ nsọ ị mụtara ma kweta?

¹⁴ Olee ihe i chere mgbe ị mụtara eziokwu ndị a gbasara mmụọ nsọ? Mmụọ nsọ abụghị Chineke. Kama ọ bụ ike Chineke. Jehova ji mmụọ nsọ ya gwa ndị dere Baịbụl ihe ha dere, jirikwa ya na-enyere anyị aka ịghọta ihe anyị gụtara na ya ma na-eme ya eme. (Jọn 14:26; 2 Pita 1:21) Jehova na-eji mmụọ nsọ ya enye anyị “ike karịrị ike nkịtị.” (2 Kọr. 4:7) Mmụọ nsọ na-enye anyị ike ikwusa ozi ọma, imeri ọnwụnwa, ịtachi obi ná nsogbu bịaara anyị, na-emekwa ka anyị ghara ịda mbà n’obi. Ọ na-enyere anyị aka ịna-akpa àgwà ndị magburu onwe ha so ná “mkpụrụ nke mmụọ nsọ.” (Gal. 5:22) Chineke  na-enye ndị tụkwasịrị ya obi mmụọ nsọ ma ha jiri obi ha niile na-arịọ ya.​—Luk 11:13.

¹⁵ Obi dị anyị ụtọ ịmata na mmụọ nsọ ga-enyere ndị na-efe Chineke aka ịna-ejere ya ozi. I kweta eziokwu ndị ị mụtara gbasara mmụọ nsọ, ọ ga-eme ka ị chọọ inyefe Chineke onwe gị ma mee baptizim.

16. Gịnị na gịnị ka anyị mụtarala n’isiokwu a?

¹⁶ Ikpebi inyefe Chineke onwe gị ma mee baptizim dị ezigbo mkpa. Dị ka anyị mụtara, i kwesịrị ịdị njikere maka ihe ọ ga-efu gị, ya bụ, idi nsogbu na ịhapụ ihe ụfọdụ. Ma uru ị ga-erite na ya karịrị ihe ọ bụla o furu gị. Baptizim nwere ike ịzọpụta gị, meekwa ka i nwee ezi akọnuche n’ebe Chineke nọ. Ihe kacha mkpa mere i ji kpebie ime baptizim kwesịrị ịbụ na ị hụrụ Jehova Chineke n’anya. I kwesịkwara iji obi gị niile kweta eziokwu ndị ahụ ị mụtara gbasara Nna, Ọkpara, na mmụọ nsọ. I chechaa gbasara ihe niile anyị mụrụla n’isiokwu a, gịnị ka ị ga-aza n’ajụjụ bụ́, “Àdịla m njikere ime baptizim?”

17. Olee ihe ụfọdụ mmadụ kwesịrị ime tupu e mee ya baptizim?

¹⁷ Ọ bụrụ na i chere na ị dịla njikere ime baptizim, ọ ga-abụ na i meela ọtụtụ ihe ga-eme ka gị na Jehova dị ná mma. * Ịmụ Baịbụl emeela ka ị mata ọtụtụ ihe gbasara Jehova na Jizọs. I nweela okwukwe. (Hib. 11:6) I ji obi gị niile kweta nkwa ndị Jehova kwere na Baịbụl, obi esiekwa gị ike na okwukwe i nwere n’àjà Jizọs chụrụ ga-anapụtali gị n’aka mmehie na ọnwụ. I chegharịala ná mmehie gị. Ihe ọjọọ ndị i mere na-ewuteru gị n’ọkpụkpụ. Ị rịọkwala Jehova ka ọ gbaghara gị. I chigharịala, ya bụ, ị kwụsịla ndụ ọjọọ ị na-ebi ma bido ibi ndụ otú ga-adị Chineke mma. (Ọrụ 3:19) Ọ na-agụ gị agụụ ịgwa ndị ọzọ ihe i kweere. I ruola eru ịbụ onye nkwusa a na-emebeghị baptizim, sorokwa ọgbakọ na-aga ozi ọma. (Mat. 24:14) Jehova ji gị eme ọnụ n’ihi na i meela ihe ndị a dị ezigbo mkpa. I meela ka obi dị ya ezigbo ụtọ.​—Ilu 27:11.

18. Olee ihe ọzọ ị ga-eme tupu gị emee baptizim?

¹⁸ Tupu e mee gị baptizim, e nwere ihe ndị ọzọ i kwesịrị ime. Dị ka anyị mụtara, ị ga-enyefe Jehova onwe gị. Kpee ekpere, jiri obi gị niile kwe ya nkwa na ị ga-eji ndụ gị na-eme uche ya. (1 Pita 4:2) Gwazie onye na-ahaziri ndị okenye ọrụ n’ọgbakọ unu na ị chọrọ ime baptizim. Ọ ga-agwa ndị okenye ụfọdụ ka gị na ha nọkọọ. Biko, ụjọ ha atụla gị. Cheta na ụmụnna ndị a ma gị. Ha nwere obiọma, hụkwa gị n’anya. Gị  na ha ga-eleba anya n’ihe ndị gbara ọkpụrụkpụ Baịbụl na-akụzi ị mụtara. Ha chọrọ ijide n’aka na ị ghọtara ihe ndị ahụ Baịbụl na-akụzi nakwa na ị ma ihe mere mmadụ ji kwesị inyefe Chineke onwe ya ma mee baptizim. Ha kweta na ị dịla njikere ime baptizim, ha ga-agwa gị na ị ga-eme ya ná mgbakọ ọzọ unu ga-aga.

19-20. Gịnị ka i kwesịrị ime ma i mechaa baptizim? Oleekwa otú ị ga-esi eme ya?

¹⁹ I mechaa baptizim, olee ihe i kwesịrị ịna-eme? * Cheta na inyefe Chineke onwe gị pụtara na i kwela ya nkwa. Jehova na-atụkwa anya ka i mezuo ya. N’ihi ya, i mechaa baptizim, otú i si ebi ndụ kwesịrị igosi na ị na-emezu nkwa ahụ i kwere Jehova. Olee otú ị ga-esi mee ya?

²⁰ Ụkwụ sie gị ike n’ọgbakọ. Ebe ị bụ Onye Kraịst e mere baptizim, i so n’ụmụnna zuru ụwa ọnụ. (1 Pita 2:17) Ụmụnna gị ndị nwoke na ndị nwaanyị dị ka ndị ezinụlọ gị. Ịga ọmụmụ ihe niile ga-eme ka gị na ha na-adịkwu ná mma. Na-agụ Okwu Chineke kwa ụbọchị ma na-echebara ihe ị gụrụ echiche. (Ọma 1:​1, 2) Ị gụchaa otu ebe na Baịbụl, wepụta oge chebara ihe ị gụrụ echiche. Ọ ga-eme ka ihe ị gụrụ ruo gị n’obi. “Na-ekpe ekpere mgbe niile.” (Mat. 26:41) Ekpere si gị n’ala ala obi ga-eme ka gị na Jehova na-adịkwu ná mma. ‘Buru ụzọ na-achọ alaeze Chineke.’ (Mat. 6:33) Otú ị ga-esi eme ya bụ iwere ozi ọma ka ihe kacha mkpa ná ndụ gị. Ikwusa ozi ọma mgbe niile ga-eme ka okwukwe gị na-esi ike. I nwekwara ike inyere ndị ọzọ aka ka ha nwee olileanya ịdị ndụ ebighị ebi.​—1 Tim. 4:16.

21. Gịnị ka ime baptizim ga-eme ka i nweta?

²¹ Ikpebi inyefe Jehova onwe gị na ime baptizim bụ ihe kacha mkpa mmadụ nwere ike ikpebi ime ná ndụ ya. Ọ bụ eziokwu na ọ ga-efu gị ihe, ma ì kwesịrị ime ya n’agbanyeghị ihe ọ ga-efu gị? Ee. Nsogbu ọ bụla ga-abịara gị n’ụwa ochie a “na-adịru nwa oge, dịkwa mfe.” (2 Kọr. 4:17) Ma, ime baptizim ga-eme ka ndụ gị ka mma ugbu a, gị enweekwa olileanya inweta “ndụ ahụ nke bụ́ ndụ n’ezie.” (1 Tim. 6:19) N’ihi ya, biko chesie echiche ike ma kpee ekpere gbasara ihe ị ga-aza n’ajụjụ ahụ bụ́, “Àdịla m njikere ime baptizim?”