1. Ania ti masapul nga aramiden ti maysa a tao sakbay a mangbangon iti balay?

PANUNOTEM nga adda maysa a tao a kayatna ti agibangon iti balay. Ammonan no ania a balay ti ibangonna. Gumatang kadin a dagus iti materiales ket rugiannan ti agibangon? Saan. Sakbay a mangrugi, adda pay napateg a banag a masapul nga aramidenna—kuentaenna ti magastos. Apay? Gapu ta masapul nga ammona no umanay met laeng ti kuartana a mangileppas iti balay. No nasaksakbay a kuentaenna a naimbag ti magastos, dakdakkel ti posibilidad a maileppasna ti baro a balayna.

2. Sigun iti Lucas 14:27-30, ania ti masapul a panunotem a naimbag sakbay nga agpabautisarka?

² Ti kadi ayat ken apresasionmo ken Jehova ti nangtignay kenka a mangpanunot nga agpabautisar? No wen, masapul nga agdesisionka a kas iti lalaki a mayat a mangibangon iti balay. Apay? Usigentayo ti sasao ni Jesus iti Lucas 14:27-30. (Basaen.) Inlawlawag ni Jesus ditoy ti kaipapanan ti panagbalin nga adalanna. Tapno agbalintayo a pasurotna, masapul a situtulok nga akseptarentayo ti “magastos,” wenno dagiti karit ken sakripisio. (Luc. 9:23-26; 12:51-53) Sakbay ngarud nga agpabautisarka, masapul a panunotem a naimbag ti amin a karaman iti dayta. Iti kasta, ad-addanto a nakasaganaka nga agserbi a simamatalek iti Dios kas bautisado a Kristiano.

3. Ania ti pagsasaritaantayo iti daytoy nga artikulo?

³ Sulit kadi ti sakripisiom nga agbalin a bautisado nga adalan ni Kristo? Siempre! No agpabautisarka, adu a bendision ti agur-uray kenka—ita ken iti masanguanan. Pagsasaritaantayo ti dadduma a napapateg a saludsod maipapan iti bautismo. Iti kasta, matulonganka a mangsungbat iti saludsod a, “Nakasaganaak kadin nga agpabautisar?”

4. (a) Ania ti panagdedikar? (b) Ania ti kaipapanan ti ‘panangtallikud’ iti bagi, a nadakamat iti Mateo 16:24?

⁴ Ania ti panagdedikar? Sakbay a makapagbautisarka, masapul pay nga agdedikarka. No agdedikarka, naimpusuan nga agkararagka ken Jehova ket ibagam nga usarem ti biagmo nga agserbi kenkuana iti agnanayon. No agdedikarka iti Dios, masapul a ‘tallikudam’ ti bagim. (Basaen ti Mateo 16:24.) Kukuanakan ni Jehova, ket dakkel a pribilehio dayta. (Roma 14:8) Ibagam kenkuana a manipud ita, ipamaysamon ti agserbi kenkuana imbes nga ay-aywem ti bagim. Ti panagdedikarmo ket maysa a serioso a kari iti Dios. Saannatayo a piliten ni Jehova a mangaramid iti kasta a kari. Ngem no agkaritayo, namnamaenna a tungpalentayo dayta.—Sal. 116:12, 14.

5. Ania ti koneksion ti panagdedikar ken panagbautisar?

⁵ Ania ti koneksion ti panagdedikar ken panagbautisar? Ti panagdedikarmo ket personal ken pribado; dayta ket iti nagbaetanyo ken Jehova. Ti panagbautisar ket publiko; maaramid dayta iti sango ti sabsabali, a gagangay iti asamblea wenno kombension. No agpabautisarka, ipakpakitam iti sabsabali nga indedikarmon ti bagim ken Jehova. * Ti ngarud bautismom ipakaammona iti sabsabali nga ay-ayatem ni Jehova iti amin a puso, kararua, panunot, ken pigsam, ken determinadoka nga agserbi kenkuana iti agnanayon.—Mar. 12:30.

6-7. Sigun iti 1 Pedro 3:18-22, ania ti dua a rason a napateg ti bautismo?

⁶ Talaga kadi a napateg ti panagpabautisar? Usigentayo ti ibagbaga ti 1 Pedro 3:18-22. (Basaen.) No kasano a ti daong ket pammaneknek iti pammati ni Noe, ti bautismom ket pammaneknek iti panagdedikarmo iti Dios. Ngem talaga kadi a napateg ti bautismo? Wen. Ibaga ni Pedro no apay. Umuna, dayta ti ‘mangisalakan kenka.’ Maisalakannatayo ti bautismo no aramidentayo dagiti banag a mangipakita nga adda pammatitayo ken Jesus ken mamatitayo a natay para kadatayo, napagungar idiay langit, ken “adda [itan] iti makannawan ti Dios.”

⁷ Maikadua, no agpabautisartayo, maaddaantayo iti “nasayaat a konsiensia.” No agdedikartayo iti Dios ken agpabautisartayo, maaddaantayo iti espesial a relasion kenkuana. No naimpusuan nga agbabawitayo ken mamatitayo iti subbot, pakawanen ti Dios dagiti basoltayo. Iti kasta, maaddaantayo iti nasayaat a konsiensia iti sanguananna.

8. Ania koma ti rason ti desisionmo nga agpabautisar?

⁸ Ania koma ti rason ti desisionmo nga agpabautisar? Gapu ta inadalmo a naimbag ti Biblia, adun ti nasursurom maipapan ken Jehova—ti personalidad, panagpampanunot, ken ar-aramidna. Dagiti nasursurom maipapan kenkuana ti nangtukay iti pusom ken nangtignay kenka a mangayat kenkuana. Masapul a ti ayatmo ken Jehova ti kangrunaan a rason ti desisionmo nga agpabautisar.

9. Ania ti kayat a sawen ti mabautisaran iti nagan ti Ama ken iti Anak ken iti nasantuan nga espiritu a nadakamat iti Mateo 28:19, 20?

⁹ Ti sabali pay a rason ti desisionmo nga agpabautisar ket dagiti kinapudno iti Biblia nga inakseptarmo. Usigentayo ti imbaga ni Jesus idi intedna ti bilin a panagaramid iti ad-adalan. (Basaen ti Mateo 28:19, 20.) Sigun ken Jesus, masapul nga agpabautisar dagiti tattao “iti nagan ti Ama ken iti nagan ti Anak ken iti nagan ti nasantuan nga espiritu.” Ania ti kayat a sawen daytoy? Masapul a patiem iti amin a pusom dagiti kinapudno iti Biblia maipapan ken Jehova, iti Anakna a ni Jesus, ken  iti nasantuan nga espiritu. Nakabilbileg dagitoy a kinapudno ken matukayda ti pusom. (Heb. 4:12) Kitaentayo ti dadduma kadagita.

10-11. Ania dagiti kinapudno maipapan iti Ama ti nasursurom ken inakseptarmo?

¹⁰ Lagipem ti nariknam idi nasursurom dagitoy a kinapudno maipapan iti Ama: Ti naganna ket “Jehova,” isu ti “Kangatuan iti intero a daga,” ken isu laeng ti “pudno a Dios.” (Sal. 83:18; Isa. 37:16) Ni Jehova ti Namarsua, ken ti ‘manangisalakantayo.’ (Sal. 3:8; 36:9) Nangaramid iti pamay-an tapno maisalakantayo iti basol ken ipapatay ken impaayannatayo iti namnama a biag nga agnanayon. (Juan 17:3) Ti panagdedikar ken panagbautisarmo ipakitana a maysakan a Saksi ni Jehova. (Isa. 43:10-12) Agbalinka a paset ti sangalubongan a pamilia dagiti agdaydayaw iti Dios a maragragsakan a mangawit iti naganna ken mangipakaammo iti dayta iti sabsabali.—Sal. 86:12.

¹¹ Anian a nagdakkel a pribilehio a maawatantayo ti isursuro ti Biblia maipapan iti Ama! No akseptarem dagitoy a napapateg a kinapudno, matignayka a mangidedikar iti bagim ken Jehova ken agpabautisar.

12-13. Ania dagiti kinapudno maipapan iti Anak ti nasursurom ken inakseptarmo?

¹² Ania ti reaksionmo idi naammuam dagitoy a kinapudno maipapan iti Anak? Ni Jesus ti maikadua a kapatgan a persona iti uniberso. Isu ti Mannubbottayo. Situtulok nga impaayna ti biagna para kadatayo. No ipakitatayo iti aramidtayo a mamatitayo iti subbot, mapakawan dagiti basoltayo, agbalintayo a gayyem ti Dios, ken magun-odtayo ti biag nga agnanayon. (Juan 3:16) Ni Jesus ti Nangato a Paditayo. Kayatna a magunggonaantayo iti subbot ken maaddaantayo iti nasinged a relasion iti Dios. (Heb. 4:15; 7:24, 25) Kas Ari ti Pagarian ti Dios, isu ti usaren ni Jehova a mangsantipikar iti naganna, mangikkat iti kinadakes, ken mangipaay iti agnanayon a bendision iti asidegen a Paraiso. (Mat. 6:9, 10; Apoc. 11:15) Ni Jesus ti ulidantayo. (1 Ped. 2:21) Nangipaay iti pagtuladantayo babaen ti panangipamaysana iti biagna a mangaramid iti pagayatan ti Dios.—Juan 4:34.

¹³ No akseptarem ti isursuro ti Biblia maipapan ken Jesus, masursurom nga ayaten ti Anak ti Dios. Tignayennaka dayta nga ayat a mangusar iti biagmo a mangaramid iti pagayatan ti Dios, kas iti inaramid ni Jesus. Gapu iti dayta, matignayka a mangidedikar iti bagim ken Jehova ken agpabautisar.

14-15. Ania dagiti kinapudno maipapan iti nasantuan nga espiritu ti nasursurom ken inakseptarmo?

¹⁴ Ania ti napanunotmo idi naammuam dagitoy a kinapudno maipapan iti nasantuan nga espiritu? Saan a persona dayta no di ket aktibo a puersa ti Dios. Inusar ni Jehova ti nasantuan nga espiritu tapno maisurat ti Biblia, ken dayta ti tumultulong kadatayo a mangtarus ken mangyaplikar iti mabasatayo iti dayta. (Juan 14:26; 2 Ped. 1:21) Babaen ti espiritu ni Jehova, ipapaayannatayo iti “bileg a nalablabes ngem iti gagangay.” (2 Cor. 4:7) Pabpabilgennatayo ti nasantuan nga espiritu a mangikasaba iti naimbag a damag, manglaban iti sulisog, agballigi iti pannakaupay, ken mangibtur iti pannubok. Tultulongannatayo a mangipakita kadagiti nagsasayaat a kualidad a paset ti “bunga ti espiritu.” (Gal. 5:22) Sisasagana ti Dios a mangipaay iti espirituna kadagiti agtaltalek kenkuana ken naimpusuan a mangdawdawat iti dayta.—Luc. 11:13.

¹⁵ Anian a makaliwliwa a maammuan a manamnama dagiti agdaydayaw ken Jehova a tulongan ida ti nasantuan nga espirituna tapno makapagserbida kenkuana! No akseptarem dagiti nasursurom a kinapudno maipapan iti  nasantuan nga espiritu, matignayka a mangidedikar iti bagim iti Dios ken agpabautisar.

16. Ania dagiti punto a naammuantayon?

¹⁶ Nagpateg ti aramidem a desision a mangidedikar iti bagim iti Dios ken agpabautisar. Kas naammuantayon, masapul a situtulokka a mangakseptar iti magastos, wenno dagiti karit ken sakripisio. Ngem adayo a nasaysayaat dagiti bendision nga awatentayo ngem kadagiti isakripisiotayo. Maisalakannaka ti bautismo, ken mabalin a maaddaanka iti nasayaat a konsiensia iti sanguanan ti Dios. Masapul a ti ayatmo ken Jehova a Dios ti kangrunaan a rason ti desisionmo nga agpabautisar. Masapul met a patiem iti amin a pusom dagiti kinapudno a nasursurom maipapan iti Ama, iti Anak, ken iti nasantuan nga espiritu. Kalpasan a pinanunotmo dagitoy a banag, ania ti sungbatmo iti saludsod a, “Nakasaganaak kadin nga agpabautisar?”

17. Ania ti dadduma a masapul nga aramidem sakbay nga agpabautisarka?

¹⁷ No mariknam a nakasaganakan nga agpabautisar, sigurado nga adun ti inaramidmo tapno maaddaanka iti nasayaat a relasion ken Jehova. * Gapu iti regular a panagadalmo iti Biblia, adun ti naammuam maipapan ken Jehova ken ni Jesus. Naaddaanka metten iti pammati. (Heb. 11:6) Naan-anay ti panagtalekmo kadagiti kari ni Jehova iti Biblia, ken kombinsidoka a ti pammatim iti sakripisio ni Jesus maisalakannaka iti basol ken ipapatay. Nagbabawyamon dagiti basolmo; maladingitanka unay kadagiti naaramidmo a kamali, ket impakaasim a pakawanennaka ni Jehova. Binalbaliwamon ti biagmo; naan-anayen a tinallikudam ti dakes a panagbiagmo ken rinugiamon ti agbiag iti pamay-an a makaay-ayo iti Dios. (Ara. 3:19) Magagaranka a mangibaga iti pammatim iti sabsabali. Kualipikadokan nga agbalin a di bautisado nga agibumbunannag ken mangaskasabakan a kadua ti kongregasion. (Mat. 24:14) Ipagpannakkelnaka ni Jehova gapu ta inaramidmo dagitoy a napateg nga addang. Naparagsakmo ti pusona.—Prov. 27:11.

18. Ania pay ti dadduma a masapul nga aramidem sakbay a mabalinmo ti agpabautisar?

¹⁸ Sakbay a mabalinmo ti agpabautisar, adda pay dadduma a banag a masapul nga aramidem. Kas naammuantayon, masapul nga idedikarmo ti bagim iti Dios. Naimpusuan nga agkararagka kenkuana, ket ikarim nga usarem ti biagmo a mangaramid iti pagayatanna. (1 Ped. 4:2) Kalpasanna, ibagam iti koordineytor ti bagi dagiti panglakayen a kayatmon ti agpabautisar. Iyurnosna a kasaritadaka ti dadduma a panglakayen. Pangngaasim ta dika koma madanagan a makisarita kadakuada. Sigurado nga am-ammo ken ipatpategdaka dagitoy a naayat a kakabsat. Irepasoda kenka dagiti kangrunaan a sursuro ti Biblia  a naadalmon. Kayatda a siguraduen a maawatam dagidiay a pannursuro ken ammom ti kinapateg ti panagdedikar ken bautismo. No makitada a nakasaganakan, ibagada a mabalinmon ti agpabautisar iti sumaruno nga asamblea wenno kombension.

19-20. Ania ti masapul nga aramidem kalpasan ti bautismom, ken kasanom a maaramid dayta?

¹⁹ No nabautisarankan, ania ti masapul nga aramidem? * Laglagipem a ti panagdedikar ket maysa a kari ken namnamaen ni Jehova a tungpalem dayta. Isu a kalpasan ti bautismom, masapul a tungpalem ti inkarim idi nagdedikarka. Kasanom a maaramid dayta?

²⁰ Agtalinaedka a nasinged iti kongregasionmo. Kas bautisado a Kristiano, pasetkan ti maysa a sangalubongan a panagkakabsat. (1 Ped. 2:17) Dagiti kakabsat iti kongregasion ti naespirituan a pamiliam. Bumileg ti relasionmo kadakuada no regular a makigimongka. Basaem ti Sao ti Dios ken utobem dayta iti inaldaw. (Sal. 1:1, 2) Kalpasan a mabasam ti maysa a paset ti Biblia, iwayaam a panunoten a naimbag ti nabasam tapno dumanon dayta iti pusom. “Itultuloy[mo] ti agkararag.” (Mat. 26:41) Dagiti naimpusuan a kararagmo pasingedennaka ken Jehova. “Itultuloy[mo] . . . a sapulen nga umuna ti Pagarian.” (Mat. 6:33) Maaramidmo dayta no pagbalinem a prioridadmo ti trabaho a panangasaba. No regular a makiramanka iti ministerio, agtalinaed a natibker ti pammatim, ken matulongam ti sabsabali a manggun-od iti biag nga agnanayon.—1 Tim. 4:16.

21. Ania ti ipaay kenka ti bautismom?

²¹ Ti desisionmo nga agdedikar ken Jehova ken agpabautisar ti kapatgan pay laeng a desision nga aramidem. Agpayso nga adda kakuykuyogna a panagsakripisio. Ngem sulit kadi? Wen! Aniaman a pakarigatan a mapasaram iti daytoy daan a lubong ket “apagbiit ken nalag-an.” (2 Cor. 4:17) Iti sabali a bangir, no agpabautisarka, agbalin nga ad-adda a makapnek ti biagmo ita ken magun-odmo ti “pudpudno a biag” iti masanguanan. (1 Tim. 6:19) Gapuna, pangngaasim ta panunotem a naimbag ken ikararagmo ti sungbatmo iti saludsod a, “Nakasaganaak kadin nga agpabautisar?”