1. Nta gap na matu myit nga ai wa gaw garai n gap hpang shi yang hpa galaw ging ai kun?

NTA GAP na matu myit nga ai wa hpe shingran yu ga. Gara baw nta gap mayu ai hpe shi chye ai. Dai majaw nta gap hpang na matu ra ai arai ni hpe kalang ta sa mari ging ai kun? N mari ging ai. Nta garai n gap shi yang kade daram ma na hpe sawn yu na matu ahkyak ai. Hpa majaw kun? Nta gap ngut ai du hkra gumhpraw law na, n law na hpe chye da ra ai. Gumhpraw kade daram ma na hpe tau hkrau myit da yang, nta nnan hpe ngut hkra gap lu na masa nga ai.

2. Luka 14:27-30 hku nga yang hkalup garai n hkam shi yang hpa hpe atsawm myit ra na kun?

² Yehowa hpe tsawra nna chyeju dum ai majaw hkalup hkam na matu myit wa ai n re i? Rai yang, nta gap mayu ai masha zawn, nang mung dawdan lam ni jahkrat ra ai. Hpa majaw dai hku tsun ai kun? Luka 14:27-30 (hti u) hta mu lu ai Yesu a ga ni hpe myit yu ga. Shi a sape ngu ai gaw hpa lachyum re ai hpe Yesu tsun dan nga ai re. Shi hpang hkan na matu, mayak mahkak nkau mi hpe sharawng awng let hkam sharang ra nna, lam nkau hpe mung sharawng awng let sak jaw ra ai. (Luk 9:23-26; 12:51-53) Dai majaw, nang hkalup garai n hkam shi yang, dai lam ni yawng hpe atsawm myit yu ra ai. Rai yang she, hkalup hkam da ai Hkristan hku nna Karai Kasang hpe sadi dung let matut nawku na matu atsawm hkyen lajang lu na re.

3. Ndai sumhpa hta hpa lam hkaja na kun?

³ Hkalup hkam da ai Hkristu a sape byin na matu sak jaw wa ai lam ni gaw ging dan ai kun? Ging dan ai. Hkalup hkam ai gaw ya aten hta mung, htawm hpang hta mung, hti n dang ai shaman chyeju ni lu na matu lam hpaw ya ai. Hkalup hkam ai hte seng nna ahkyak ai ga san nkau hpe hkaja yu ga. Dai ga san ni gaw, “hkalup hkam na matu ngai jin sai kun?” ngu ai ga san hpe htai lu na matu karum ya na re.

4. (a) Apnawng ai ngu ai gaw hpa rai kun? (b) Mahte 16:24 hta tsun da ai tinang hkum hpe “nyet kau” ai ngu ai lachyum gaw hpa rai kun?

⁴ Apnawng ai ngu ai gaw hpa rai kun? Hkalup garai n hkam shi yang, apnawng ai lam galaw ra ai. Yehowa kaw apnawng ai shaloi, akroi anoi akyu hpyi nna, na a prat hpe shi hpang de prat tup sak jaw mayu ai lam tsun dan u. Karai Kasang kaw apnawng ai gaw tinang hkum hpe “nyet kau” ai re. (Mahte 16:24 hpe hti u.) Ya gaw Yehowa nang hpe madu sai. Dai gaw ahkaw ahkang kaba langai re. (Rom 14:8) Ya kaw nna nang gaw tinang myit ra ai hpe n re ai sha, shi hpe nawku daw jau na matu myit maju jung na ngu shi hpe tsun nga ai re. Na a apnawng ai lam gaw Karai Kasang hpe ahkyak ai ga sadi jaw nga ai re. Dai zawn ga sadi jaw na matu Yehowa nang hpe atik anang n shadut ai. Raitim, anhte ga sadi jaw ai hte maren, hkan galaw na matu shi myit mada ai.​—Shk 116:12, 14.

5. Apnawng ai gaw hkalup hkam ai hte gara hku matut mahkai ai kun?

⁵ Apnawng ai gaw hkalup hkam ai hte gara hku matut mahkai ai kun? Yehowa kaw, na a prat hpe apnawng ai shaloi kadai mung n mu ai. Raitim, hkalup hkam ai gaw kaga masha ni a man hta re. Law malawng gaw ninghtawn zuphpawng (sh) ginwang zuphpawng ni hta re. Nang hkalup hkam ai gaw na a prat hpe Yehowa hpang apnawng ngut sai lam kaga ni hpe madun ai re. * Karai Kasang Yehowa hpe myit kraw lawang mahkra, myit masin mahkra, myit mang mahkra, n-gun lagaw mahkra hte nang tsawra wa ai. Dai majaw, shi hpe htani htana nawku daw jau na matu, dawdan da ai hpe hkalup hkam ai hku nna kaga ni hpe chye shangun ai re.​—Mrk 12:30.

6-7. 1 Petru 3:18-22 hku nga yang anhte hpa majaw hkalup hkam ra ai kun?

⁶ Hkalup hkam na matu teng sha ra ai kun? 1 Petru 3:18-22 (hti u) hta lawm ai ga si ni hpe myit yu ga. Noa gaw shi a makam masham hpe sanghpaw gap nna sakse madun wa ai zawn, hkalup hkam ai mung Yehowa hpang nang apnawng da sai lam masha ni hpe sakse madun ai re. Raitim, hkalup hkam na matu teng sha ra ai kun? Ra ai. Hpa majaw re ai hpe Petru tsun da ai. Langai, hkalup hkam ai gaw nang hpe “hkye hkrang la lu” ai. Yesu hpe kamsham ai lam, na a matu shi si hkam nna, sumsing lamu de hkrung rawt mat ai lam hte ya nga yang ‘Karai Kasang a hkra maga de nga nga ai’ hpe kamsham yang, hkalup hkam ai gaw nang hpe hkye hkrang la lu ai.

⁷ Lahkawng, hkalup hkam ai gaw, “san seng ai myit nsam” lu shangun ai. Karai Kasang hpang apnawng nna hkalup hkam ai shaloi, shi hte kaja ai hku hkau lam nga shangun ai. Anhte teng sha myit malai lu nna, gawng malai hkungga hpe kam ai majaw, Karai Kasang gaw anhte hpe mara raw ya ai re. Dai majaw, anhte gaw shi a man hta myit nsam san seng lu ai.

8. Hkalup hkam na matu dawdan ai a madung lam gaw hpa rai ging ai kun?

⁸ Hkalup hkam na matu dawdan ai a madung lam gaw hpa rai ging ai kun? Chyum Laika hpe atsawm hkaja ai majaw, Yehowa a atsam ningja ni hte shi a lam ni hpe anhte chye wa ai. Shi a lam chye wa ai hte maren, shi hpe grau tsawra wa na matu mung shadut ya na re. Yehowa hpe tsawra ai myit gaw hkalup hkam na matu dawdan ai a madung lam rai ging ai.

9. Mahte 28:19, 20 hta tsun da ai hte maren Kawa a, Kasha a, chyoi pra ai Wenyi a amying nsang hta hkalup hkam ra ai ngu ai lachyum gaw hpa rai kun?

⁹ Hkalup hkam na matu dawdan ai gaw nang hkap la ai Chyum Laika tengman ai lam ni hta mung madung tawn ra ai. Sape shatai na matu Yesu matsun ai shaloi, shi hpa hpe tsun mayu  ai lam myit yu ga. (Mahte 28:19, 20 hpe hti u.) Yesu tsun ai hku nga yang, “Kawa a, Kasha a, chyoi pra ai Wenyi a amying nsang hta” hkalup hkam ra ai. De a lachyum gaw hpa rai kun? Yehowa, shi a Kasha Yesu hte chyoi pra ai wenyi hte seng ai Chyum Laika tengman ai lam ni hpe, myit masin mahkra hte nang kam ra ai. Dai tengman ai lam ni gaw grai atsam kaba nna, na a myit masin hpe teng sha shadut ya lu ai. (Heb 4:12) Dai ni kaw nna nkau mi hpe bai myit yu ga.

10-11. Kawa hte seng ai gara tengman lam hpe nang sharin la nna hkap la wa ai kun?

¹⁰ Kawa hte seng nna ndai tengman ai lam ni hpe chye wa ai shaloi nang gara hku hkamsha ai kun? Shi a amying gaw “Yehowa,” “Ga ting hta e Tsaw Htum nga ai,” shi chyu sha “teng man ai Karai Kasang” rai nga ai. (Shk 83:17; Yer 10:10) Yehowa gaw anhte a Hpan Madu hte “hkye hkrang la ai lam rai nga ai.” (Shk 3:8; 36:9) Yubak hte si ai kaw nna anhte hpe hkye la na matu shi lajang ya nna, htani htana asak myit mada lam mung jaw da ai. (Yhn 17:3) Nang apnawng ai hte hkalup hkam ai gaw, Yehowa Sakse langai re ai hpe sakse madun ai re. (Esa 43:10-12) Karai Kasang a amying hkam la ai hpe arawng la nna Yehowa a amying hpe kaga masha ni chye hkra galaw nga ai mungkan ting na hpunau nauna ni hta nang mung lawm wa ai.​—Shk 86:12.

¹¹ Kawa hte seng nna Chyum Laika sharin ya ai hpe chye na lu ai gaw ahkaw ahkang kaba re. Dai zawn manu dan ai tengman lam ni hpe hkap la ai shaloi, Yehowa hpang apnawng nna hkalup hkam na matu nang hpe shadut ya ai.

12-13. Kasha hte seng ai gara tengman lam hpe sharin la nna hkap la wa ai kun?

¹² Kasha hte seng nna ndai tengman lam ni hpe sharin la ai shaloi nang gara hku bai htang ai kun? Yesu gaw ninggawn tawa hta nambat lahkawng ahkyak htum ai wa re. Shi gaw anhte a matu asak hpe sharawng awng let gawng malai hkungga jaw wa ai. Dai hpe kamsham ai lam anhte tatut madun ai shaloi, mara raw dat hkrum nna, Karai Kasang hte hku hkau lam rawt jat wa ai. Htani htana asak mung lu la na re. (Yhn 3:16) Yesu gaw anhte a Hkinjawng Agyi re. Shi gaw gawng malai hkungga kaw nna anhte akyu lu na matu karum ya mayu nna, Karai Kasang hte ni htep shangun mayu ai. (Heb 4:15; 7:24, 25) Yehowa gaw tinang a amying san seng na matu, nhkru ai ni hpe jahtum kau na matu, Hparadisu hta htani htana shaman chyeju lu na matu, Karai Mungdan a Hkawhkam re ai Yesu hku nna, galaw ya na re. (Mat 6:9, 10; Shr 11:15) Yesu gaw anhte a kasi ningli re. (1 Pe 2:21) Shi a prat hkrun lam hta Karai a myit ra ai hpe sha galaw ai hku nna anhte hpe kasi madun wa ai.​—Yhn 4:34.

¹³ Yesu hte seng nna Chyum Laika sharin ya ai hpe hkap la ai shaloi, Karai Kasang tsawra ai Kasha hpe nang tsawra wa ai. Dai tsawra myit gaw, Karai a myit ra ai lam hpe Yesu galaw wa ai hte maren galaw na matu nang hpe shadut ya ai. Na a prat hpe Yehowa kaw apnawng nna hkalup hkam mayu wa na re.

14-15. Chyoi pra ai wenyi hte seng ai gara tengman lam hpe sharin la nna hkap la wa ai kun?

¹⁴ Chyoi pra ai wenyi hte seng nna ndai tengman lam ni hpe sharin la ai shaloi nang gara hku myit ai kun? Dai gaw marai hkum langai n re ai sha, Karai a atsam re. Yehowa gaw Chyum Laika ka na matu, chyoi pra ai wenyi hpe akyu jashawn ai. Bai nna, Chyum Laika hpe chye na na matu hte anhte hti ai lam hpe tatut hkan sa lu na matu, dai wenyi gaw karum ya ai. (Yhn 14:26; 2 Pe 1:21) Dai wenyi hpe akyu jashawn nna, Yehowa gaw anhte hpe “chyahtum chyalai re ai n-gun atsam” jaw ai. (2 Ko 4:7) Kabu gara shiga hkaw tsun na matu, agung alau hpe ninghkap na matu, myit daw ai lam hpe hparan na matu hte yakhkak ai lam ni hpe tawt lai lu na matu n-gun atsam jaw ai. “Wenyi a asi” re ai  kaja ai atsam ningja ni hpe madun lu na matu mung karum ya ai. (Gal 5:22) Karai Kasang gaw, shi hpe teng sha kamsham ai ni hte dai wenyi hpe myit madung hte hpyi ai ni hpe sharawng awng let jaw ai.​—Luk 11:13.

¹⁵ Yehowa hpe nawku daw jau ai ni gaw, shi a magam gun lu na matu chyoi pra ai wenyi hpe shamyet shanat lu ai. Dai hpe chye ai majaw n-gun lu la nna, shalan shabran lam lu ai. Chyoi pra ai wenyi hte seng ai tengman ai lam hpe nang hkap la ai shaloi, na a aprat hpe Karai Kasang kaw apnawng nna hkalup hkam mayu wa na re.

16. Anhte bawngban wa ai lam ni hta hpa hpe chye na wa sai kun?

¹⁶ Na a prat hpe Karai Kasang kaw apnawng nna hkalup hkam na matu dawdan ai gaw ahkyak ai lahkam re. Anhte chye wa sai hte maren, manu jahpu hku nna jaw ra na chyam dinglik ai lam ni hte sak jaw ai lam ni hpe sharawng awng let hkap la ra ai. Raitim, nang jaw ai manu jahpu hta grau ai shaman chyeju ni lu la na re. Hkalup hkam ai gaw nang hpe hkye hkrang la lu nna, Karai a man hta kaja ai myit nsam nga shangun ai. Hkalup hkam na matu dawdan ai gaw, Yehowa Karai Kasang hpe tsawra ai majaw sha rai ra ai. Kawa, Kasha, chyoi pra ai wenyi hte seng ai tengman lam ni hpe mung myit masin mahkra hte kam ra ai. Hkaja wa ai lam ni hpe myit yu ngut ai hpang, “hkalup hkam na matu ngai jin sai kun?” ngu ai ga san hpe nang gara hku htai na kun?

17. Hkalup hkam na matu galaw ra ai lam nkau gaw hpa rai kun?

¹⁷ Hkalup hkam na matu jin sai nga yang, Yehowa hte kaja ai hku hkau lam nga hkra lam law law hpe galaw wa na re. * Chyum Laika hpe ayan hkaja wa ai majaw, Yehowa hte Yesu a lam grau nna chye wa ai. Makam masham rawt jat wa ai. (Heb 11:6) Chyum Laika hta mu lu ai Yehowa a ga sadi ni hpe nang tsep kawp kam wa nna, Yesu a gawng malai hkungga gaw yubak hte si ai kaw nna anhte hpe hkye hkrang la lu ai lam hpe mung kam ai. Nang galaw shut wa ai mara ni a matu myit malai lu nna grai yawn hkyen ai majaw, mara raw ya na matu Yehowa kaw hpyi shawn ai. N kaja ai prat hkrun lam hpe nang nyet kau nna, Karai Kasang ra sharawng ai hte maren asak hkrung wa ai. (Kas 3:20) Na a makam masham a lam kaga ni hpe myit rawt let tsun dan ai. Hkalup garai n hkam shi ai hkaw tsun masha byin na matu atsam hpring wa nna, nawku hpung hte arau hkaw tsun hpang wa ai. (Mat 24:14) Dai zawn n galaw n mai galaw ra ai lam ni hpe galaw wa ai majaw, Yehowa nang hpe arawng la na re. Shi myit pyaw hkra mung nang galaw wa ai.​—Gsh 27:11.

18. Hkalup garai n hkam shi yang hpa naw galaw ra ai kun?

¹⁸ Nang hkalup garai n hkam shi yang, galaw ra ai kaga lam loi mi naw nga ai. Anhte hkaja wa sai hte maren, Karai Kasang kaw tinang hkum tinang apnawng ra ai. Myit masin mahkra hte shi kaw akyu hpyi ra nna, shi a myit ra ai lam galaw na matu, tinang a prat hpe akyu  jashawn na ngu ga sadi jaw ai. (1 Pe 4:2) Nang hkalup hkam mayu yang, myitsu salang hpung a bawng jahkrup hpa-awn hpe shana u. Shi gaw nang hte hkrum na matu myitsu salang nkau hpe tsun na re. Myitsu salang ni hte hkrum na matu n tsang ra ai. Shanhte gaw nang hpe chye nna nang hpe grai tsawra ai. Nang sharin la wa ai Chyum Laika madung lam ni hpe, nang hte bai sawn maram yu na re. Sharin la wa ai lam ni hpe nang chye na ai kun? apnawng nna hkalup hkam ai gaw ahkyak ai hpe nang chye ai kun? ngu ai hpe shanhte chye mayu ma ai. Nang jin nga sai lam shanhte myit hkrum ai nga yang, hpang na ninghtawn zuphpawng (sh) ginwang zuphpawng hta hkalup hkam mai sai lam nang hpe shana ya na re.

19-20. Hkalup hkam ngut ai hpang hpa galaw ra ai kun? Dai hpe gara hku galaw lu na kun?

¹⁹ Hkalup hkam ngut ai hpang hpa naw galaw ra ai kun? * Apnawng ai lam gaw ga sadi tawn ai rai nna, ga sadi dung na matu Yehowa myit mada ai. Dai majaw, hkalup hkam ngut ai hpang, apnawng da ai hte maren asak hkrung ra ai. Gara hku galaw lu na kun?

²⁰ Nawku hpung hte ni htep hkra nga u. Hkalup hkam da ai Hkristan hku nna, ya nang gaw “kahpu kanau ni” kaw nna langai byin wa sai. (1 Pe 2:17) Nawku hpung kaw nna hpunau nauna ni gaw, na a nta masha ni hte bung ai. Zuphpawng ni hpe ayan lung yang, shanhte hte grau hku hkau wa na re. Chyum Laika hpe shani shagu hti nna myit sawn sumru u. (Shk 1:1, 2) Chyum Laika daw langai hpe hti ngut ai hpang, dai hpe atsawm myit sawn sumru na matu aten jaw u. Chyum ga si ni gaw na a myit masin hpe shadut ya na re. Matut “akyu hpyi” u. (Mat 26:41) Myit madung hte hpyi ai akyu hpyi ga gaw Yehowa hte grau ni htep wa shangun ai. “Mungdan . . . lam hpe shawng tam nga mu.” (Mat 6:33) Na a prat hta hkaw tsun bungli hpe shawng tawn ai hku nna, dai hpe nang galaw lu ai. Nang ayan hkaw tsun yang, na a makam masham grau ngang kang wa nna, masha ni hpe htani htana asak myit mada lam lu hkra karum ya lu na re.​—1 Tm 4:16.

21. Hkalup hkam ai gaw gara lam lu la na matu lam hpaw wa ai kun?

²¹ Yehowa kaw apnawng nna hkalup hkam na matu dawdan ai gaw, nang galaw wa ai lam ni kaw nna ahkyak htum ai lam re. Dai hta manu jahpu lawm ai. Nang jaw wa ai manu jahpu gaw gingdan ai kun? Gingdan ai. Ndai mungkan dingsa hta anhte hkrum ai mayak mahkak ni gaw, chyahkring chyahkra sha rai nna, “atsang sha rai nga ai.” (2 Ko 4:18) Hkalup hkam ai gaw ya aten hta mung myit dik ai lam grau lu la na matu, “asak majing” lu na matu lam hpaw wa ai. (1 Tm 6:19) Dai majaw, “hkalup hkam na matu ngai jin sai kun?” ngu ai ga san hpe htai na matu atsawm myit yu nna akyu hpyi u.