1. Ɛbɛ pɩwɛɛ se nɔɔyʋ ɛla pʋcɔ nɛ ɛpaɣzɩ ɖɩɣa nakɛyɛ maʋ?

KPAƔ se ɛyʋ nɔɔyʋ wɛɛ nɛ ɛmaɣzɩɣ se ɛmaɣ ɖɩɣa. Ɛsɩm ɖɩɣa ŋga ɛcaɣ maʋ yɔ. Ɛzɩ ɛkʋyʋʋ kpaagbaa nɛ ewolo nɛ ɛya wondu ndʋ pɩpɔzʋʋ yɔ tɩ-taa natʋyʋ nɛ ɛpaɣzɩ ɖɩɣa maʋ na? Aayɩ. Pʋcɔ nɛ ɛpaɣzɩ lɛ, pɩcɛyaa se ɛla nabʋyʋ; pɩwɛɛ se ɛtʋʋzɩ nɛ ɛna liidiye ɛzɩma ɖɩɣa ŋga ka-maʋ kaɣ-ɩ pɔzʋʋ yɔ. Ɛbɛ yɔɔ? Mbʋ pʋyɔɔ yɔ, pɩwɛɛ se ɛtɩlɩ se liidiye nɖɩ ɛwɛna yɔ, ɖɩkaɣ-ɩ talʋʋ nɛ ɛtɛzɩ ɛ-ɖɩɣa na. Ye ɛtʋʋzɩ liidiye camɩyɛ pʋcɔ nɛ ɛpaɣzɩ yɔ, pɩtʋʋ fɛyɩ se ɛkaɣ pɩzʋʋ nɛ ɛtɛzɩ ɛ-ɖɩɣa ŋga maʋ.

2. Ɛzɩ Luka 14:27-30 yɔɔdʋʋ yɔ, ɛbɛ yɔɔ pɩwɛɛ se ŋmaɣzɩ camɩyɛ pʋcɔ nɛ pamɩyɩsɩ-ŋ lɩm?

² Sɔɔlɩm nɛ ɛsɩmɩyɛ nɖɩ ŋwɛnɩ Yehowa yɔɔ yɔ, piseɣtiɣ-ŋ se ŋmaɣzɩ lɩm mɩyɩsʋʋ yɔɔ yaa we? Ye ɛɛɛ yɔ, lɩmaɣzɩyɛ nɖɩ ŋcaɣ kpaɣʋ yɔ, ɖɩwɛ ɖeyi ɖeyi ɛzɩ nɖɩ weyi ɛsɔɔlaa se ɛma ɖɩɣa nakɛyɛ yɔ ɛkpakɩɣ yɔ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Na tɔm ndʋ Yesu yɔɔdɩ Luka 14:27-30 taa yɔ. (Kalɩ Luka 14:27-30.) Yesu kaawɛɛ nɛ ɛyɔɔdʋʋ mbʋ ɛ-tɔmkpɛlɩkɩyʋ kɛʋ pɔzʋʋ yɔ pɩ-tɔm. Ye ɖɩsɔɔlaa se ɖɩtɩŋ ɛ-wayɩ yɔ, pɩwɛɛ se ɖitisi faaa se ɖɩɖɔkʋʋ ɖa-tɩ kala naayɛ taa, nɛ ɖikizi ɖɔɖɔ wondu natʋyʋ. (Luka 9:23-26; 12:51-53) Ye mbʋ, pʋcɔ nɛ pamɩyɩsɩ-ŋ lɩm lɛ, pɩwɛɛ se ŋmaɣzɩ mbʋ payɩ lɩm mɩyɩsʋʋ pɔzʋʋ yɔ pɩ-yɔɔ camɩyɛ. Ye ŋlabɩ mbʋ yɔ, pɩkaɣ yebu nɛ ŋñɔɔzɩ ña-tɩ camɩyɛ se ŋɖɔkɩ ñe-siɣsiɣ wɛtʋ ña-lɩm mɩyɩsʋʋ wayɩ.

3. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Ɛzɩ pɩcɛyaa se ŋɖɔkɩ ña-tɩ kala taa, nɛ ŋkizi wondu natʋyʋ nɛ pɩsa nɛ ŋpɩsɩ Krɩstʋ tɔmkpɛlɩkɩyʋ weyi pamɩyɩsɩ-ɩ lɩm yɔ? Ɛɛɛ pɩcɛyaa! Lɩm mɩyɩsʋʋ yeki se ŋhiɣ wazasɩ sakɩyɛ lɛɛlɛɛyɔ  nɛ cee wayɩ. Yele nɛ ɖicosi tɔm pɔzʋʋ nabʋyʋ yɔɔ; pitukuuni lɩm mɩyɩsʋʋ nɛ pɩ-tɔm cɛyɩ siŋŋ. Ɛzɩma ŋkaɣ tɔm pɔzʋʋ mbʋ pɩ-yɔɔ cosuu yɔ, pɩkaɣ-ŋ sɩnʋʋ nɛ ŋcosi tɔm tʋnɛ tɩ-yɔɔ ɖɔɖɔ: “Mantalaa se pamɩyɩsɩ-m lɩm na?”

4. (a) Ɛbɛ tɩ-haʋ kɛnaa? (b) Ɛzɩ Maatiyee 16:24 yɔɔdʋʋ yɔ, ye pɔtɔm se ɛyʋ “ekizi” ɛ-tɩ yɔ, pʋ-tɔbʋʋ lɛ suwe?

⁴ Ɛbɛ tɩ-haʋ kɛnaa? Pʋcɔ nɛ pamɩyɩsɩ-ŋ lɩm lɛ, pɩwɛɛ se ŋha ña-tɩ Ɛsɔ. Alɩwaatʋ ndʋ ŋhaɣ ña-tɩ Yehowa yɔ, ŋtɩmɩɣnɩ-ɩ nɛ ña-laŋɩyɛ pilim, nɛ ŋheyi-i se ŋkaɣ kpaɣʋ ñe-wezuu nɛ ŋsɛɛ-ɩ tam. Alɩwaatʋ ndʋ ŋhaɣ ña-tɩ Ɛsɔ yɔ, ‘ŋkizi’ ña-tɩ. (Kalɩ Maatiyee 16:24.) Lɛɛlɛɛyɔ lɛ, ŋkɛ Yehowa pʋyʋ, nɛ waɖɛ sɔsɔɖɛ pɩkɛnaa. (Roma 14:8) Ŋwɛɛ nɛ ŋheyiɣ-i se kpaɣnɩ lɛɛlɛɛyɔ lɛ, ŋkaɣ ña-lɩmaɣza kam ɛ-sɛtʋ yɔɔ, nɛ ŋŋtasɩɣ ña-lɩmaɣza kam mbʋ pɩkɛdɩɣnɩ ña-maɣmaɣ yɔ pɩ-yɔɔ. Tɩ-haʋ kɛnɩ ɖuutu ndʋ ŋlabɩ Ɛsɔ yɔ, nɛ pɩtɩkɛ aleɣya tɔm. Yehowa ɛɛkpaɣ-ɖʋ nɛ ɖoŋ se ɖɩla ɖuutu ndʋ. Ɛlɛ alɩwaatʋ ndʋ ɖɩlakɩ ɖuutu ndʋ yɔ, ɛñɩnɩɣ se ɖɩɖɔ tɩ-yɔɔ.—Keɣa 115:12, 14.

5. Nɔɔ kʋɖʋmaɣ ŋga wɛ tɩ-haʋ nɛ lɩm mɩyɩsʋʋ pɛ-hɛkʋ taa?

⁵ Nɔɔ kʋɖʋmaɣ ŋga wɛ tɩ-haʋ nɛ lɩm mɩyɩsʋʋ pɛ-hɛkʋ taa? Ña-maɣmaɣ ñahaɣnɩ ña-tɩ Yehowa, nɛ pɩkɛ mɛsaɣ tɛɛ tɔm, ñe-ɖeke ñasɩmnɩ alɩwaatʋ ndʋ ŋkpakɩɣ ñe-wezuu nɛ ŋha-ɩ yɔ. Samaɣ taa palakɩ lɩm mɩyɩsʋʋ; palakɩ-pʋ ɛyaa lalaa ɛsɩndaa, nɛ ɖoŋ ɖoŋ lɛ, palakɩ-pʋ kigbeɣliŋ taa na. Alɩwaatʋ ndʋ pamɩyɩsɩɣ-ŋ lɩm yɔ, ŋwɩlɩɣ lalaa se ŋtɛm ña-tɩ haʋ Yehowa. * Ye mbʋ, ña-lɩm mɩyɩsʋʋ yeki se lalaa ɩtɩlɩ se ŋsɔɔlɩ ñɛ-Ɛsɔ Yehowa nɛ ña-laŋɩyɛ pilim, ña-kalɩzaɣ pilim, ña-maɣzɩm pilim nɛ ño-ɖoŋ pilim, nɛ ŋtɛm ña-taa se ŋwɛɣ-ɩ sɛʋ yɔɔ tam.—Mark. 12:30.

6-7. Ɛzɩ 1 Pɩyɛɛrɩ 3:18-22 yɔɔdʋʋ yɔ, lɩmaɣza naalɛ wena yɔɔ lɩm mɩyɩsʋʋ tɔm cɛyaa?

⁶ Ɛzɩ pɩcɛyɩ toovenim se pamɩyɩsɩ ɛyʋ lɩm na? Na tɔm ndʋ tɩwɛ 1 Pɩyɛɛrɩ 3:18-22 taa yɔ. (Kalɩ 1 Pɩyɛɛrɩ 3:18-22.) Aɖakaɣ wɩlaɣ kaɣlaa se Noowa wɛnɩ tisuu, mbʋ ɖɔɖɔ ña-lɩm mɩyɩsʋʋ wɩlɩɣ se ŋha ña-tɩ Yehowa. Ɛlɛ, ɛzɩ lɩm mɩyɩsʋʋ tɔm cɛyɩ toovenim na? Ɛɛɛ pɩcɛyaa. Pɩyɛɛrɩ yɔɔdɩ mbʋ pʋyɔɔ pɩ-tɔm cɛyaa yɔ. Kajalaɣ lɛ, “pɩyakɩ mɩ-ñʋʋ.”, Ye ɖɩwɩlɩ ɖa-lakasɩ taa se ɖɩwɛnɩ tisuu Yesu yɔɔ nɛ ɖitisiɣ se ɛsɩbɩ ɖɔ-yɔɔ, pefezi-i nɛ ɛkpa ɛsɔdaa nɛ lɛɛlɛɛyɔ ɛwɛ “Ɛsɔ nesi kɩbanzɩ yɔɔ” yɔ, lɩm mɩyɩsʋʋ pɩzɩɣ nɛ pɩya ɖa-ñʋʋ.

⁷ Nabʋlɛ lɛ, lɩm mɩyɩsʋʋ yeki se ɖɩwɛɛnɩ “ɛhʋyɛ kɩbanɖɛ.” Alɩwaatʋ ndʋ ɖɩhaɣ ɖa-tɩ Ɛsɔ nɛ pamɩyɩsɩ-ɖʋ lɩm yɔ, ŋgee taabalɩyɛ naɖɩyɛ paɣzɩɣ ɖa nɛ ɩ ɖɛ-hɛkʋ taa. Ɛzɩma ɖikpiɖi siŋŋ nɛ ɖɩwɛɛnɩ tisuu kɩhɛyʋʋ pʋ-ñʋʋ taa kɩlaʋ yɔɔ yɔ, Ɛsɔ kpeɣu-ɖʋ ɖa-kɩwɛɛkɩm. Pʋyɔɔ lɛ, ɖɩpɩzɩɣ nɛ ɖɩwɛɛnɩ ɛhʋyɛ kɩbanɖɛ ɛ-ɛsɩndaa.

8. Ɛbɛ pɩwɛɛ se piseɣti-ŋ nɛ ŋkpaɣ lɩmaɣzɩyɛ se pamɩyɩsɩ-ŋ lɩm?

⁸ Ɛbɛ pɩwɛɛ se piseɣti-ŋ nɛ ŋkpaɣ lɩmaɣzɩyɛ se pamɩyɩsɩ-ŋ lɩm? Ŋtisaa nɛ ŋkpɛlɩkɩ Bibl camɩyɛ mbʋ yebina nɛ ŋtɩlɩ tɔm sakɩyɛ Yehowa yɔɔ; ɛzɩma ɛwɛɛ yɔ, nɛ ɛzɩma ɛlakɩ nabʋyʋ yɔ. Tɔm ndʋ ŋkpɛlɩkɩ ɛ-yɔɔ yɔ, titukuni ña-laŋɩyɛ nɛ tiseɣti-ŋ se ŋsɔɔlɩ-ɩ siŋŋ. Sɔɔlɩm mbʋ ŋwɛnɩ Yehowa yɔɔ yɔ, mbʋ pɩwɛɛ se pɩcalɩ-ŋ seɣtuu nɛ ŋkpaɣ lɩmaɣzɩyɛ se pamɩyɩsɩ-ŋ lɩm.

9. Ɛzɩ pɔyɔɔdʋʋ Maatiyee 28:19, 20 taa yɔ, ye pɔtɔm se pamɩyɩsɩ nɔɔyʋ lɩm Caa nɛ Pɩyalʋ nɛ fezuu kiɖeɖeu pa-hɩɖɛ taa yɔ, pʋ-tɔbʋʋ lɛ suwe?

⁹ Bibl taa toovenim tɔm ndʋ tɩ-yɔɔ ŋtisaa yɔ, tiseɣtiɣ-ŋ ɖɔɖɔ se ŋkpaɣ lɩmaɣzɩyɛ se pamɩyɩsɩ-ŋ lɩm. Maɣzɩ tɔm ndʋ Yesu yɔɔdaa,  alɩwaatʋ ndʋ ɛɖʋ paɣtʋ se pala tɔmkpɛlɩkɩyaa yɔ tɩ-yɔɔ nɛ ŋna. (Kalɩ Maatiyee 28:19, 20.) Ɛzɩ Yesu yɔɔdʋʋ yɔ, mba pamɩyɩsɩɣ-wɛ lɩm yɔ, pɩwɛɛ se pala mbʋ “Caa nɛ Pɩyalʋ nɛ fezuu kiɖeɖeu pa-hɩɖɛ taa.” Yesu tɔm ndʋ tɩ-tɔbʋʋ lɛ suwe? Toovenim tɔm ndʋ Bibl wɩlɩɣ Yehowa yɔɔ, ɛ-Pɩyalʋ Yesu yɔɔ nɛ fezuu kiɖeɖeu yɔɔ yɔ, pɩwɛɛ se ŋtisi tɩ-yɔɔ nɛ ña-laŋɩyɛ pilim. Toovenim tɔm ndʋ, tɩwɛnɩ ɖoŋ pɩŋŋ nɛ tɩpɩzɩɣ nɛ titukuni ña-laŋɩyɛ siŋŋ. (Ebr. 4:12) Yele nɛ ɖɩɖaɣnɩ naʋ tɩ-taa natʋyʋ.

10-11. Caa yɔɔ toovenim tɔm ndʋ ŋkpɛlɩkaa nɛ ŋtisi tɩ-yɔɔ?

¹⁰ Ðaɣnɩ maɣzʋʋ alɩwaatʋ ndʋ ŋkpɛlɩkɩ toovenim tɔm tʋnɛ Caa yɔɔ yɔ tɩ-yɔɔ nɛ ŋna: ‘Ɛ-hɩɖɛ lɛ [Yehowa]’ nɛ ɛnʋ lɛ “Kɩlɩm, tataa cɩnɛ” nɛ e-ɖeke ɛkɛnɩ ‘Ɛsɔ toovenim tʋ.’ (Keɣa 82:18; Yer. 10:10) Ɛkɛ ɖa-Lɩzɩyʋ nɛ ɛ-cɔlɔ “ñʋʋ yabɩtʋ lɩɣna.” (Keɣa 3:9; 35:10) Ɛlabɩ ɖʋtʋ se ɛya ɖa-ñʋʋ kɩdɛkɛdɩm nɛ sɩm pe-nesi tɛɛ, nɛ ɛha-ɖʋ tamtam wezuu lidaʋ. (Yoh. 17:3) Ña-tɩ haʋ nɛ lɩm mɩyɩsʋʋ kaɣ wɩlʋʋ se ŋkɛ Yehowa Aseɣɖe Tʋ. (Iza. 43:10-12) Ŋkaɣ sʋʋ ɛjaɖɛ kpeekpe yɔɔ Ɛsɔ sɛyaa hɔʋ ŋgʋ kɩ-taa yɔ, kɩ-taa ɛyaa taa wɛ leleŋ se payaɣ-wɛ nɛ Ɛsɔ hɩɖɛ nɛ peyeki se lalaa ɩtɩlɩ hɩɖɛ nɖɩ.—Keɣa 85:12.

¹¹ Pɩkɛnɩ waɖɛ sɔsɔɖɛ se ɛyʋ ɛnɩɩ tɔm ndʋ Bibl wɩlɩɣ Caa yɔɔ yɔ tɩ-taa. Alɩwaatʋ ndʋ ŋtisiɣ toovenim tɔm ndʋ tɩ-yɔɔ yɔ, ña-laŋɩyɛ seɣtiɣ-ŋ se ŋha ña-tɩ Yehowa nɛ pamɩyɩsɩ-ŋ lɩm.

12-13. Pɩyalʋ yɔɔ toovenim tɔm ndʋ ŋkpɛlɩkaa nɛ ŋtisi tɩ-yɔɔ?

¹² Alɩwaatʋ ndʋ ŋkpɛlɩkɩ toovenim tɔm tʋnɛ Pɩyalʋ yɔɔ yɔ, ɛzɩma pɩlabɩ-ŋ? Yesu kɛnɩ ɛyʋ naalɛ tʋ weyi ɛ-tɔm kɩlɩ cɛyʋʋ kedeŋa kpeekpe yɔɔ yɔ. Etisi faaa nɛ ɛcɛlɩ e-wezuu se pɩkɛ kɩhɛyʋʋ pʋ-ñʋʋ taa ɖɔ-yɔɔ. Alɩwaatʋ ndʋ ɖɩtɩŋɩɣnɩ ɖa-lakasɩ yɔɔ nɛ ɖɩwɩlɩɣ se ɖɩwɛnɩ tisuu kɩhɛyʋʋ pʋ-ñʋʋ taa kɩlaʋ yɔɔ yɔ, papɩzɩɣ nɛ pekpeɣ-ɖʋ ɖa-kɩwɛɛkɩm, taabalɩyɛ wɛɛ ɖa nɛ Ɛsɔ ɖɛ-hɛkʋ taa nɛ ɖihiɣ wezuu maatɛŋ. (Yoh. 3:16) Yesu kɛnɩ ɖɔ-Cɔjɔ Sɔsɔ. Ɛsɔɔlaa se ɛsɩnɩ-ɖʋ nɛ kɩhɛyʋʋ pʋ-ñʋʋ taa kɩlaʋ wazɩ-ɖʋ, nɛ taabalɩyɛ kɩbanɖɛ wɛɛ ɖa nɛ Ɛsɔ ɖɛ-hɛkʋ taa. (Ebr. 4:15; 7:24, 25) Ɛkɛ Ɛsɔ Kewiyaɣ Wiyaʋ nɛ pʋyɔɔ lɛ, Yehowa kaɣ tɩŋnʋʋ ɛ-yɔɔ nɛ ɛñalɩ ɛ-hɩɖɛ yɔɔ, ɛɖɩzɩ kañatʋ lakasɩ, nɛ ɛkɔnɩ tamtam wazasɩ cee wayɩ Paradisuu taa. (Mat. 6:9, 10; Natʋ 11:15) Yesu kɛ kɩɖaʋ ŋgʋ pɩwɛɛ se ɖɩmaɣzɩna yɔ. (1 Pɩy. 2:21) Ɛha-ɖʋ kɩɖaʋ mbʋ pʋyɔɔ yɔ, ɛkpaɣ e-wezuu kpeekpe nɛ ɛlabɩnɩ Ɛsɔ sɔɔlɩm.—Yoh. 4:34.

¹³ Ŋtisi tɔm ndʋ Bibl wɩlɩɣ Yesu yɔɔ yɔ tɩ-yɔɔ, mbʋ yebina nɛ ŋsɔɔlɩ Ɛsɔ Pɩyalʋ kʋsɔɔlʋ siŋŋ. Sɔɔlɩm mbʋ, piseɣtiɣ-ŋ se ŋkpaɣ ñe-wezuu nɛ ŋlabɩnɩ Ɛsɔ sɔɔlɩm ɛzɩ Yesu kaalabʋ yɔ. Piyeba nɛ piseɣti-ŋ se ŋha ña-tɩ Yehowa nɛ pamɩyɩsɩ-ŋ lɩm.

14-15. Toovenim tɔm ndʋ ŋkpɛlɩkɩ fezuu kiɖeɖeu yɔɔ nɛ ŋtisi tɩ-yɔɔ?

¹⁴ Alɩwaatʋ ndʋ ŋkpɛlɩkɩ toovenim tɔm tʋnɛ fezuu kiɖeɖeu yɔɔ yɔ, suwe ŋmaɣzaa? Kɩtɩkɛ ɛyʋ, ɛlɛ kɩkɛnɩ ɖoŋ weyi Ɛsɔ lakɩnɩ tʋmɩyɛ yɔ. Yehowa tɩŋnɩ fezuu kiɖeɖeu yɔɔ nɛ ɛwɩlɩ abalaa nabɛyɛ tɔm ndʋ pɩwɛɛ se pama Bibl taa yɔ, nɛ fezuu kiɖeɖeu sɩɣnɩ-ɖʋ se ɖɩnɩɩ tɔm ndʋ ɖɩkalɩɣ kɩ-taa yɔ tɩ-taa nɛ ɖɩlabɩnɩ-tʋ tʋmɩyɛ. (Yoh. 14:26; 2 Pɩy. 1:21) Yehowa tɩŋɩɣnɩ e-fezuu kiɖeɖeu yɔɔ nɛ ɛhaɣ-ɖʋ “ɖoŋ weyi ɩcɛzɩ ɛyʋ ɖoŋ yɔ.” (2 Kɔr. 4:7) Fezuu haɣ-ɖʋ ɖoŋ se ɖisusi tɔm kɩbandʋ, ɖɩkaɖɩnɩ takɩm, ɖɩlʋ nɛ pitaatibi-ɖʋ yɔɔɔ nɛ ɖɩɖɔkɩ ɖa-tɩ kala taa. Kɩsɩɣnɩ-ɖʋ se ɖɩwɛɛnɩ wɛtʋ kɩbandʋ ndʋ pɛkpɛndaa nɛ payaa se “piye nɖɩ fezuu lʋlʋʋ yɔ.” (Gal. 5:22) Ɛsɔ haɣ e-fezuu faaa mba pataɣ-ɩ liu nɛ pɔpɔzʋʋ-ɩ kʋ nɛ pa-laŋɩyɛ pilim yɔ.—Luka 11:13.

 ¹⁵ Pɩhɛzɩɣ ɖa-laŋa siŋŋ, alɩwaatʋ ndʋ ɖɩnaɣ se Yehowa sɛyaa pɩzɩɣ nɛ pataa fezuu kiɖeɖeu liu se kɩsɩnɩ-wɛ nɛ pɛsɛɛ Ɛsɔ yɔ. Alɩwaatʋ ndʋ ŋtisiɣ toovenim tɔm ndʋ ŋkpɛlɩkɩ fezuu kiɖeɖeu yɔɔ yɔ tɩ-yɔɔ yɔ, pɩkaɣ-ŋ seɣtuu se ŋha ñe-wezuu Ɛsɔ nɛ pamɩyɩsɩ-ŋ lɩm.

16. Ðɩyɔɔdʋʋ nɛ pɩtalɩ cɩnɛ yɔ, ɛbɛ ɖɩkpɛlɩkaa?

¹⁶ Lɩmaɣzɩyɛ nɖɩ ŋkpakɩɣ se ŋhaɣ ña-tɩ Ɛsɔ nɛ pamɩyɩsɩ-ŋ lɩm yɔ, ɖɩ-tɔm cɛyɩ siŋŋ. Ɛzɩ ɖɩkpɛlɩkʋʋ nɛ pɩɖɛɛ yɔ, pɩwɛɛ se ŋtisi faaa se ŋɖɔkʋʋ ña-tɩ kala taa, nɛ ŋlaa kɩlaŋ ɖɔɖɔ. Ɛlɛ wazasɩ nzɩ ŋkaɣ hiɣu yɔ, sɩɖɔwa nɛ pɩcɛzɩ kɩlaŋ weyi ŋkaɣ laʋ yɔ. Lɩm mɩyɩsʋʋ pɩzɩɣ nɛ pɩya ña-ñʋʋ, nɛ pɩhaɣ-ŋ waɖɛ se ŋwɛɛnɩ ɛhʋyɛ kɩbanɖɛ Ɛsɔ ɛsɩndaa. Sɔɔlɩm mbʋ ŋwɛnɩ Ɛsɔ Yehowa yɔɔ yɔ, pɩwɛɛ se mbʋ ɛcalɩnɩ-ŋ seɣtuu nɛ ŋkpaɣ lɩmaɣzɩyɛ se pamɩyɩsɩ-ŋ lɩm. Toovenim tɔm ndʋ ŋkpɛlɩkɩ Caa, Pɩyalʋ nɛ fezuu kiɖeɖeu pɔ-yɔɔ yɔ, pɩwɛɛ ɖɔɖɔ se ŋtisi tɩ-yɔɔ nɛ ña-laŋɩyɛ pilim. Ðɩtazʋʋ tɔm taa nɛ pɩtalɩ cɩnɛ yɔ, suwe ŋkaɣ cosuu tɔm pɔzʋʋ pʋnɛ pɩ-yɔɔ: “Mantalaa se pamɩyɩsɩ-m lɩm na?”

17. Nɩŋgbanzɩ nzɩ pɩwɛɛ se ɛyʋ ɛkpɛzɩ pʋcɔ nɛ pamɩyɩsɩ-ɩ lɩm yɔ, sɩ-taa nasɩyɩ lɛ nzɩ?

¹⁷ Ye ŋmaɣzɩɣ se ŋtalaa se pamɩyɩsɩ-ŋ lɩm yɔ, pɩtʋʋ fɛyɩ se ŋtɛm kpɛzʋʋ nɩŋgbanzɩ sakɩyɛ nzɩ siyeki se taabalɩyɛ kɩbanɖɛ ɛwɛɛ ña nɛ Yehowa mɩ-hɛkʋ taa yɔ. * Ɛzɩma ŋkpɛlɩkɩɣ Bibl ɖoŋ ɖoŋ yɔ, piyeba nɛ ŋtɩlɩ Yehowa nɛ Yesu pɔ-yɔɔ tɔm sakɩyɛ. Ŋñaɣ pana nɛ ŋwɛɛnɩ tisuu. (Ebr. 11:6) Yehowa tamasɩ nzɩ sɩwɛ Bibl taa yɔ, ŋtaɣ-sɩ liu nɛ ña-laŋɩyɛ pilim, nɛ ña-taa tɛma se tisuu mbʋ ŋwɛnɩ Yesu kɩlaʋ yɔɔ yɔ, pɩpɩzɩɣ nɛ pɩya ña-ñʋʋ kɩwɛɛkɩm nɛ sɩm pe-nesi tɛɛ. Ŋkpiɖi ña-kɩwɛɛkɩm yɔɔ, pʋ-tɔbʋʋ se ŋtendi Yehowa nɛ ŋpɔzɩ-ɩ se ɛkpaɣ kɩwɛɛkɩm mbʋ ŋlaba nɛ pɩɖɛɛ yɔ nɛ ekpeɣ-ŋ. Ŋlɛɣzɩ ñe-wezuu caɣʋ, pʋ-tɔbʋʋ se ŋyebi wezuu kɩdɛkɛdʋʋ ŋgʋ ŋcakaɣ yɔ nɛ ŋpaɣzɩ caɣʋ wezuu ŋgʋ kɩkɛdɩnɩ Ɛsɔ yɔ. (Tʋma 3:19) Ŋsɔɔlɩ kpem se ŋheyi lalaa tisuu mbʋ ŋwɛna yɔ pɩ-tɔm. Ŋmʋnaa; nɛ paha-ŋ waɖɛ se ŋkɛ tɔm susuyu patɩmɩyɩsɩtɩ-m lɩm, nɛ ña nɛ ɛgbɛyɛ taa ñɩma ɩpaɣzɩ tɔm susuu. (Mat. 24:14) Yehowa taa wɛnɩ-ŋ leleŋ mbʋ pʋyɔɔ yɔ, ŋkpɛzɩ nɩŋgbanzɩ kɩcɛyɩsɩ nzɩ. Ŋyeba nɛ ɛ-taa la leleŋ siŋŋ.—Adu. 27:11.

18. Ɛbɛ ɖɔɖɔ pɩwɛɛ se ŋtasɩ labʋ pʋcɔ papɩzɩ nɛ pamɩyɩsɩ-ŋ lɩm?

¹⁸ Pʋcɔ nɛ papɩzɩ nɛ pamɩyɩsɩ-ŋ lɩm lɛ, pɩwɛɛ se ŋtasɩ labʋ nabʋyʋ ɖɔɖɔ. Ɛzɩ ɖɩkpɛlɩkʋʋ nɛ pɩɖɛɛ yɔ, pɩpɔzʋʋ se ŋha ña-tɩ Ɛsɔ. Ñɔtɩnɩ-ɩ mɛsaɣ tɛɛ, tɩmnɩ-ɩ nɛ ña-laŋɩyɛ pilim nɛ ŋɖuu nɛ ŋheyi-i se ŋkaɣ kpaɣʋ ñe-wezuu nɛ ŋlabɩnɩ ɛ-sɔɔlɩm. (1 Pɩy. 4:2) Pʋwayɩ lɛ, ŋyele nɛ Ɛgbɛyɛ taa ɛzʋtʋyaa tʋmɩyɛ kpɛndɩyʋ tɩlɩ se ŋsɔɔlaa se pamɩyɩsɩ-ŋ lɩm. Ɛkaɣ pɔzʋʋ ɛzʋtʋyaa nabɛyɛ se ña nɛ  wɛ ɩkatɩ. Ðitendi-ŋ sɔɔndʋ ɛtaakpa-ŋ se ña nɛ wɛ ɩkatɩ. Koobiya kʋsɔɔlaa mba, pɩtʋʋ fɛyɩ se pɛtɛmɩ-ŋ sɩm nɛ pɔsɔɔlɩ-ŋ. Ña nɛ wɛ ɩkaɣ ɖaɣnʋʋ tazʋʋ Bibl taa kajalaɣ wɩlɩtʋ ndʋ ŋkpɛlɩkaa yɔ tɩ-taa. Pɔsɔɔlaa se pana se ŋnɩ wɩlɩtʋ ndʋ tɩ-taa camɩyɛ, nɛ ŋsɩm mbʋ pʋyɔɔ tɩ-haʋ nɛ lɩm mɩyɩsʋʋ pɔ-tɔm cɛyaa yɔ. Ye panawa se ŋtalaa yɔ, pakaɣ-ŋ heyuu se papɩzɩɣ nɛ pamɩyɩsɩ-ŋ lɩm kigbeɣluu ŋgʋ kɩwɛnɩ ɛsɩndaa yɔ kɩ-taa.

19-20. (a) Ɛbɛ pɩkaɣ pɔzʋʋ se ŋla ña-lɩm mɩyɩsʋʋ wayɩ? (b) Nɛ ɛzɩma ŋpɩzɩɣ nɛ ŋlabɩ-pʋ?

¹⁹ Pamɩyɩsɩɣ-ŋ lɩm nɛ pɩtɛ lɛ, ɛbɛ pɩkaɣ pɔzʋʋ se ŋla? * Taasɔɔ se tɩ-haʋ kɛ ɖuutu, nɛ Yehowa sɔɔlaa se ŋɖɔ tɩ-yɔɔ. Ye mbʋ, ña-lɩm mɩyɩsʋʋ wayɩ lɛ, pɩwɛɛ se ŋɖɔ tɔm ndʋ ŋŋyɔɔdɩ alɩwaatʋ ndʋ ŋŋha ña-tɩ Yehowa yɔ, tɩ-yɔɔ. Ɛzɩma ŋpɩzɩɣ nɛ ŋla mbʋ?

²⁰ Ñɔɔnɩ ñɛ-ɛgbɛyɛ kpam. Ŋkɛ Krɩstʋ tʋ weyi pamɩyɩsɩ-ɩ lɩm yɔ; pʋyɔɔ lɛ, lɛɛlɛɛyɔ ŋwɛ ɛjaɖɛ kpeekpe yɔɔ “koobiya” hɛkʋ taa. (1 Pɩy. 2:17) Ño-koobiya halaa nɛ abalaa mba pɛwɛ ɛgbɛyɛ taa yɔ, pɛkɛ ñɔ-hɔʋ fezuu taa. Alɩwaatʋ ndʋ ŋwoki kediɣzisi ɖoŋ ɖoŋ yɔ, pɩkaɣ yebu nɛ ña nɛ wɛ mɩ-taabalɩyɛ cɛyɩsɩ. Kalɩɣ Ɛsɔtɔm nɛ ŋmaɣzɩɣ tɩ-yɔɔ paa evemiye nɖɩ. (Keɣa 1:1, 2) Ŋkalɩɣ Bibl hɔɔlʋʋ nakʋyʋ nɛ pɩtɛ lɛ, kpaɣ alɩwaatʋ nɛ ŋmaɣzɩ ndʋ ŋkalaa yɔ tɩ-yɔɔ camɩyɛ. Piyeki nɛ pitukuni ña-laŋɩyɛ. ‘Wɛɛ adɩma yɔɔ.’ (Mat. 26:41) Adɩma wena ŋlakɩnɩ ña-laŋɩyɛ pilim yɔ, akaɣ yebu nɛ ŋñɔtɩnɩ Yehowa nɛ pɩkpaɖɩ. ‘Wolo pɩ-yɔɔ nɛ ŋcalɩɣnɩ ñɩnʋʋ Kewiyaɣ.’ (Mat. 6:33) Ŋpɩzɩɣ nɛ ŋla mbʋ, ye ŋsɩɣ tɔm susuu tʋmɩyɛ kajalaɣ ɖeɖe ñe-wezuu caɣʋ taa yɔ. Ye ŋsusuu tɔm ɖoŋ ɖoŋ yɔ, piyeki nɛ ñe-tisuu wɛɛ ɖoŋ nɛ pɩtɩla ŋpɩzɩɣ nɛ ŋsɩnɩ lalaa nɛ pɛwɛɛnɩ wezuu maatɛŋ lidaʋ.—1 Tim. 4:16.

21. Ɛbɛ ña-lɩm mɩyɩsʋʋ kaɣ-ŋ haʋ waɖɛ se ŋwɛɛna?

²¹ Lɩmaɣzɩyɛ nɖɩ ŋkpaɣaa se ŋhaɣ ña-tɩ Yehowa nɛ pamɩyɩsɩ-ŋ lɩm yɔ, ɖɩ-tɔm kɩlɩnɩ cɛyʋʋ ñe-wezuu caɣʋ taa. Pɩkɛ toovenim se pɩkaɣ-ŋ pɔzʋʋ kɩlaŋ nɩɩyɩ. Ɛzɩ kɩlaŋ ɛnɩ ɩ-tɔm cɛyaa? Ɛɛɛ ɩ-tɔm cɛyaa! Paa kala wena ŋpɩzɩɣ se ŋkatɩ ɛjaɖɛ kɩdɛkɛdɩyɛ ɖɩnɛ ɖɩ-taa yɔ, ‘awɛɣ alɩwaatʋ pazɩ nɛ atɩpaɣlɩ.’ (2 Kɔr. 4:17) Ɛlɛ, ña-lɩm mɩyɩsʋʋ kaɣ-ŋ haʋ waɖɛ se ŋnɩɩ leleŋ ñe-wezuu caɣʋ taa lɛɛlɛɛyɔ, nɛ ŋhiɣ “wezuu siŋŋ” cee wayɩ. (1 Tim. 6:19) Ye mbʋ ɖitendi-ŋ, maɣzɩ camɩyɛ nɛ ŋtɩmɩ ɛzɩma ŋkaɣ cosuu tɔm pɔzʋʋ pʋnɛ pɩ-yɔɔ yɔ: “Mantalaa se pamɩyɩsɩ-m lɩm na?”