1. Kuzê ki un algen debe faze antis di el kumesa faze un kaza?

IMAJINA ma un algen disidi faze un kaza. El sabe ki tipu di kaza ki el krê faze. Má, el debe bai lógu pa lója i kunpra alguns material i kumesa ta faze kaza? Nau. Antis di el kumesa trabadju, ten un kuza inportanti ki el meste faze. El meste sabe kantu ki el ta gasta pa faze kel kaza. Pamodi? Pamodi el meste sabe si el tene dinheru ki ta txiga pa faze kel kaza ti kaba. Si el faze kónta dretu antis di el kumesa trabadju, el ta ten más xansi di tirmina se kaza.

2. Sima sta na Lucas 14:27-30, na kuzê ki bu debe pensa dretu antis di bu batiza?

² Bu sta pensa na batiza? Di sertéza é bu amor i gratidon pa Jeová ki sta pô-u pensa na kel asuntu li. Nu pode fla ma bu disizon di batiza é sima di kel ómi ki krê faze un kaza. Pamodi ki nu ta fla kel-li? Odja kuzê ki Jizus fla na Lucas 14:27-30. (Lé.) Jizus staba ta splika kuzê ki siginifika ser se disiplu. Si nu krê ser se sigidor, nu meste sta dispostu na aguenta alguns difikuldadi i dizisti di alguns kuza. (Luc. 9:23-26; 12:51-53) Pur isu, antis di bu batiza, bu meste pensa dretu na kuzê ki bu ta ben pasa si bu bira un disiplu di Kristu. Asi, bu ta sta más ben priparadu pa kontinua ta sirbi Deus di manera fiel dipôs ki bu batiza.

3. Kuzê ki nu sta ben odja na kel studu li?

³ Bale péna aguenta difikuldadis i dizisti di alguns kuza pa ser un disiplu di Kristu? É klaru ki sin! Batismu ta  abri-nu pórta pa nu resebe txeu benson gósi i na futuru. Na kel studu li, nu sta ben odja alguns pergunta inportanti sobri batismu. Faze kel-li ta djuda-u responde kel pergunta li: “N sta prontu pa N batiza?”

4. (a) Modi ki un algen ta da se vida pa Deus? (b) Di akordu ku Mateus 16:24, kuzê ki siginifika ‘nega nos kabésa’?

⁴ Modi ki un algen ta da se vida pa Deus? Antis di bu batiza, bu meste da bu vida pa Deus. Modi ki bu ta faze kel-li? Bu ta faze un orason di korason i bu ta promete Jeová ma bu ta uza bu vida pa sirbi-l pa tudu ténpu. Óras ki bu faze kel-li, bu sta ‘nega bu kabésa’. (Lé Mateus 16:24.) Di kel dia pa frenti abo é di Jeová i kel-li é un priviléjiu grandi. (Rom. 14:8) Bu sta ta fla-l ma di kel dia pa dianti, kuza más inportanti pa bo é sirbi-l envês di agrada bu kabésa. Kantu bu da bu vida pa Jeová, bu faze un promésa sériu pa el. Jeová ka ta obriga ningen pa faze kel promésa li. Má si nu faze-l, el ta spéra ma nu ta kunpri-l. — Sal. 116:12, 14.

5. Kal ki é diferénsa entri da bu vida pa Jeová i batiza?

⁵ Kal ki é diferénsa entri da vida pa Deus i batiza? Óras ki bu ta da bu vida pa Deus, é un kuza ki bu ta faze bo sô; ningen más ka ta sabe di kel-li. Má batismu é na frenti di otus algen. I kuazi sénpri el ta kontise na un asenbleia ô kongrésu. Óras ki bu batiza, bu ta mostra otus algen ma dja bu da bu vida pa Jeová. * Pur isu, bu batismu ta mostra otus algen ma bu ta ama Jeová, bu Deus, di tudu bu korason, alma, menti i forsa. I tanbê ma bu sta disididu na sirbi-l pa tudu ténpu. — Mar. 12:30.

6-7. Sima 1 Pedro 3:18-22 ta mostra, pamodi ki algen meste batiza?

⁶ Algen meste batiza mê? Odja kuzê ki Bíblia ta fla na 1 Pedro 3:18-22. (Lé.) Arka ta mostraba pesoas ma Nué tinha fé na Deus. Di mésmu manera, bu batismu ta mostra pesoas ma dja bu da bu vida pa Jeová. Má, algen meste batiza mê? Sin. Pedru splika pamodi ki nu meste faze kel-li. Primeru, batismu ‘ta salva nhos’. Batismu pode salva-nu si nu mostra na kuzas ki nu ta faze ma nu ten fé na Jizus. Tanbê si nu kridita ma el móre pa nos, ma el resusitadu pa ba vive na Séu i ma gósi el sta ‘na direita di Deus’.

⁷ Sugundu, batismu ta da-nu ‘un bon konsénsia’. Óras ki nu da nos vida pa Deus i nu batiza, nu ta pasa ta ten un amizadi fórti ku el. Deus ta púrdua nos pekadu pamodi nu rapende di korason i nu ten fé na resgati. Pur isu, nu pode ten un bon konsénsia dianti di Deus.

8. Kal ki é razon prinsipal ki debe pô-u ta batiza?

⁸ Kal ki é razon prinsipal ki debe pô-u ta batiza? Na bu studu di Bíblia, bu prende txeu kuza sobri Jeová, sima se manera di ser i se manera di faze kuzas. Kes kuza li mexe ku bu korason i pô-u ta ama-l más txeu. Pur isu, razon prinsipal ki debe pô-u ta batiza é bu amor pa Jeová.

9. Sima sta na Mateus 28:19, 20, kuzê ki siginifika batiza na nómi di Pai, di Fidju i di spritu santu?

⁹ Otu kuza ki debe pô-u ta batiza é kes verdadi ki bu prende na Bíblia i ki bu pasa ta kridita na es. Odja kuzê ki Jizus  fla kantu el manda pa faze disiplus. (Lé Mateus 28:19, 20.) Sima el fla, kes ki ta batiza meste faze-l ‘na nómi di Pai, di Fidju i di spritu santu’. Kuzê ki kel-li siginifika? Bu meste kridita di tudu bu korason na kes verdadi di Bíblia sobri Jeová; sobri se Fidju, Jizus i sobri spritu santu. Kes verdadi ten txeu forsa i es pode mexe txeu ku bu korason. (Heb. 4:12) Nu ben odja alguns di es.

10-11. Ki verdadis sobri Pai bu prende i bu pasa ta kridita na el?

¹⁰ Lenbra kantu bu prende kes verdadi sobri Pai. Pur izénplu, bu prende ma el ‘txoma Jeová’, el é ‘kel Más Grandi riba Téra interu’ i sô el ki é ‘Deus verdaderu’. (Sal. 83:18; Isa. 37:16) El é nos Kriador, i ‘salvason é di Jeová.’ (Sal. 3:8; 36:9) El ranja manera di salva-nu di pekadu ku mórti i el da-nu speransa di vive pa tudu ténpu. (João 17:3 ) Óras ki bu da bu vida pa Jeová i bu batiza, kel-li ta mostra ma bo é un Tistimunha di Jeová. (Isa. 43:10-12) Bu ta bira ta faze párti di un família na mundu interu ki ta adora Deus. Na es família, tudu algen ta xinti orgulhu di txomadu pa nómi di Deus i di djuda otus algen konxe kel nómi. — Sal. 86:12.

¹¹ É un priviléjiu grandi ntende kuzê ki Bíblia ta inxina sobri Pai! Óras ki bu kridita na kes verdadi inportanti li, bu korason ta pô-u ta da bu vida pa Jeová i batiza.

12-13. Ki verdadis sobri Fidju bu prende i bu pasa ta kridita na el?

¹² Modi ki bu xinti kantu bu prende kes verdadi li sobri Fidju? Jizus é sugundu algen más inportanti na Séu ku Téra. El da se vida di livri vontadi pa salva-nu. Óras ki nu ta mostra pa kuzas ki nu ta faze ma nu ten fé na resgati, nu pode ten perdon di nos pekadu, ten amizadi ku Deus i ganha vida pa tudu ténpu. (João 3:16 ) Jizus é nos Saserdóti Prinsipal. El krê djuda-nu ten kes benson ki resgati ta da i ten un amizadi fórti ku Deus. (Heb. 4:15; 7:24, 25) Jizus é Rei di Reinu di Deus, i é el ki Jeová ta ben uza pa santifika Se nómi, pa kaba ku maldadi i pa traze bensons pa tudu ténpu na Paraízu. (Mat. 6:9, 10; Apo. 11:15) Jizus é kel izénplu ki nu debe sigi. (1 Ped. 2:21) El uza se vida pa faze vontadi di Deus, asi pa nu pode sigi se izénplu. — João 4:34.

¹³ Óras ki bu seta kuzê ki Bíblia ta inxina sobri Jizus, bu ta pasa ta ama kel Fidju ki Deus ta ama. Kel amor ta pô-u ta uza bu vida pa faze vontadi di Deus, sima Jizus faze. Asi, bu ta xinti gana di da bu vida pa Jeová i batiza.

14-15. Ki verdadis sobri spritu santu bu prende i bu pasa ta kridita na el?

¹⁴ Kuzê ki bu pensa kantu bu prende kes verdadi li sobri spritu santu? Spritu santu é ka un algen, el é forsa ki Deus ta uza. Jeová uza spritu santu pa orienta ómis pa skrebe Bíblia. Tanbê, el ta uza kel spritu pa djuda-nu ntende i faze sima nu ta lé na Bíblia. (João 14:26; 2 Ped. 1:21) Através di se spritu, Jeová ta da-nu ‘puder alén di normal’. (2 Cor. 4:7) Kel spritu li ta da-nu forsa pa nu prega notísia sábi, luta kóntra tentason, aguenta difikuldadis i djuda-nu óras ki nu sta dizanimadu. Tanbê, el ta djuda-nu mostra kes kualidadi bunitu ki ta faze párti di ‘frutu di spritu’. (Gál. 5:22) Deus sénpri ta da se spritu santu avontádi pa kes ki ta kunfia na El i ki ta  pidi-l spritu santu di korason. — Luc. 11:13.

¹⁵ Nu ta xinti konsoladu di sabe ma kes ki ta adora Jeová, pode kunfia ma spritu santu ta djuda-s sirbi Deus! Óras ki bu seta kes verdadi ki bu prende sobri spritu santu, bu ta xinti gana di da bu vida pa Deus i batiza.

16. Kuzê ki dja nu prende ti gósi?

¹⁶ Óras ki bu disidi da bu vida pa Jeová i batiza, bu sta toma un disizon inportanti. Sima dja nu prende, bu meste sta dispostu na aguenta kes difikuldadi i faze sakrifisius. Má bensons ki bu ta ben resebe é mutu más txeu di ki kes sakrifisiu ki bu ta faze. Batismu pode salva-u i da-u un konsénsia linpu dianti di Deus. Kel razon prinsipal ki debe pô-u ta batiza, é bu amor pa Jeová Deus. Tanbê, bu meste kridita di tudu bu korason na kes verdadi ki bu prende sobri Pai, Fidju i spritu santu. Dipôs di tudu kuza ki dja nu pâpia ti gósi, modi ki bu ta respondeba kel pergunta li: “N sta prontu pa batiza?”

17. Kal ki é alguns kuza ki un algen meste faze antis di el batiza?

¹⁷ Si bu xinti ma bu sta prontu pa batiza, di sertéza dja bu faze txeu kuza pa bu ten un bon amizadi ku Jeová. * Bu prende txeu kuza sobri Jeová i Jizus, pamodi bu studa Bíblia sénpri. Tanbê bu dizenvolve fé. (Heb. 11:6) Bu pasa ta kunfia di tudu korason na promésas di Jeová ki sta na Bíblia, i bu ten sertéza ma bu fé na sakrifisiu di Jizus pode salva-u di pekadu i mórti. Bu rapende di bus pekadu, bu xinti txeu tristi pamodi kuzas mariadu ki bu fazeba i bu pidi Jeová pa purdua-u bus pekadu. Bu muda bu vida, ô bu bandona kel manera di vive mariadu ki bu tinha i bu pasa ta vive di manera ki ta agrada Jeová. (Atos 3:19 ) Bu fika ku gana di pâpia ku otus sobri bu fé. Pur isu, bu faze kel ki un algen meste faze pa ser un publikador ki é ka batizadu i bu kumesa ta prega djuntu ku kongregason. (Mat. 24:14) Jeová ten orgulhu di bo pamodi kes kuza li ki bu faze. Bu poi se korason ta fika txeu kontenti. — Pro. 27:11.

18. Kuzê más ki bu meste faze antis di bu batiza?

¹⁸ Ten otus kuza ki bu meste faze antis di bu batiza. Sima dja nu prende, bu meste da bu vida pa Deus. Faze un orason di korason bo sô, i promete Jeová ma bu ta uza bu vida pa faze se vontadi. (1 Ped. 4:2) Dipôs, fla kordenador di grupu di ansions di bu kongregason ma bu krê batiza. El ta pidi alguns ansion pa  faze un runion ku bo. Má bu ka meste xinti medu di kel runion. Lenbra ma kes ansion ki nu krê txeu, dja konxe-u i es ta ama-u. Es ta ba pâpia ku bo sobri kes verdadi prinsipal di Bíblia ki dja bu prende. Es krê ten sertéza ma bu ntende kes verdadi i ma bu sabe pamodi ki é inportanti da bu vida pa Jeová i batiza. Si es konkorda ma bu sta prontu, es ta fla-u ma bu pode batiza na kel asenbleia ô kongrésu ki sta pa ben.

19-20. Kuzê ki bu meste faze dipôs ki bu batiza i modi ki bu pode faze-l?

¹⁹ Kuzê ki bu meste faze dipôs ki bu batiza? * Lenbra ma kantu bu da bu vida pa Jeová, bu faze un promésa i el ta spéra ma bu ta kunpri-l. Pur isu, dipôs ki bu batiza bu meste kontinua ta kunpri bu promésa. Modi ki bu pode faze-l?

²⁰ Fika sénpri djuntu ku bu kongregason. Óras ki bu batiza, bu ta faze párti di un família na mundu interu. (1 Ped. 2:17) Bus irmon ku irmans di kongregason ta bira bu família. Si bu sisti runion sénpri, nhos ta ser más amigu. Lé Palavra di Deus i pensa na el tudu dia. (Sal. 1:1, 2) Dipôs di lé un párti di Bíblia, tra algun ténpu pa bu pensa txeu na kuzê ki bu lé. Asi, kes palavra ta toka bu korason. Faze ‘orason sénpri’. (Mat. 26:41) Orasons ki bu ta faze di korason ta pô-u ta bira más amigu di Jeová. ‘Kontinua ta buska Reinu primeru’. (Mat. 6:33) Bu pode faze kel-li óras ki bu ta poi trabadju di pregason na primeru lugar na bu vida. Si bu partisipa sénpri na pregason, bu fé ta kontinua fórti i bu ta djuda otus ten speransa di vive pa tudu ténpu. — 1 Tim. 4:16.

21. Bu batismu ta da-u xansi di ten kuzê?

²¹ Da bu vida pa Jeová i batiza é disizon más inportanti ki bu pode toma na bu vida. É klaru ki kel-li ta iziji sakrifisius. Má bale péna faze kes sakrifisiu? Klaru ki sin! Kalker prubléma ki bu pode pasa na es mundu li ta ‘dura poku i el é lébi’. (2 Cor. 4:17) Má, bu batismu ta da-u xansi di ten un vida más sábi gósi i kel ‘vida di verdadi’ ki sta pa ben. (1 Tim. 6:19) Pur isu, pensa dretu i faze orason sobri modi ki bu ta responde kel pergunta li: “N sta prontu pa N batiza?”