1. Тура пӱдірер алнында, ниме идерге кирек?

 ПІР кӧзідім кӧр кӧреелер: кізі тура пӱдіріп аларға сағынча. Хайдағ тура пӱдірерін ол пілче, че сах андох пӱдірҷең материаллар аларға парар ба? Чох. Тура пӱдірер алнында, хорадығлар санап аларға кирек. Хорадығлар санабаза, піл полбассың: пӱдіріге ахча чидер бе, чох па. Кізі азынада хорадығлар санап алза, тураны пӱдіріп алар.

2. Лука 14:27—30 хоостыра, кіреске тӱзер алнында, нимедеңер чахсы иде сағынып аларға кирек?

² Иеговаа хынызыңар паза ағаа алғыстығ полғаныңар кіреске тӱзерге кӧӧктірче бе? Кӧӧктірчетсе, сірерні тура пӱдірерге итчеткен кізінең тиңнестірерге чарир. Ноға? Иисустың Лука 14:27—30-ғы (хығырыбызыңар) сӧстерін ӱзӱр кӧреелер. Мында Иисус аның ӱгренҷізі полғаны ниме таныхтапчатханын чоохтапча. Иисустың соонҷа парар ӱчӱн, хорадығларға — сидіктерге паза тайығларға — парарға тимде поларға кирек (Лука 9:23—26; 12:51—53). Аннаңар, кіреске тӱзер алнында, прай нимені чахсы иде сағынып аларға паза прай хорадығларны санап аларға кирек. Андада сірер, кіреске тӱскен соонда, Худайға киртістіг нымысчыланарға тимде поларзар.

3. Пу статьяда ниме ӱзӱрібізербіс?

³ Кіреске тӱскені хорадығларға турыстығ ба? Я, турыстығ! Ол амғы паза алнынзархы чуртастағы алғастарға чол асча. Кіреске тӱскенінең палғалыстығ пірее сурығларны ӱзӱр кӧреелер. Ол сурығлар сірер кіреске тӱзерге тимдезер бе, чох па піліп аларға полыс пирерлер.

4. а) Худайға пирін салғаны нимедір ол? б) Матфей 16:24-гі «позынаңар ундут салзын» теені ниме таныхтапча?

⁴ Худайға пирін салғаны нимедір ол? Кіреске тӱзер алнында, чуртазыңарны Худайға пазырыста пирібізерге кирек. Иеговаа пирінгені — прай чӱрекнең ағаа пазырыста мӧгі тус нымысчыланарға сӧс пиргені полча. Худайға пирінчетсер, позыңарны ундут салчазар. (Матфей 16:24 хығырыбызыңар.) Ол тустаң сығара сірер Иегованың кізізі пол парчазар. Анзы, тізең, улуғ аарлас (Рим. 14:8). Сірер ағаа ам паза хаҷан даа постарыңны нимес, че Худайны чуртазыңарда пастағы орынға турғызарға сӧс пирчезер. Худайға пазырыста пирінгені ағаа прай чӱрекнең аарлығ сӧс пиргені полча. Иегова сірерні анзын идерге кӱстебинче. Че сірер андағ молҷағ пирчетсер, Иегова сірердең ол молҷағны хайди даа толдырарзар тіп сағыпча (Пс. 116:12, 14).

5. Хайди Худайға пирінгені кіреске тӱскенінең палғалыстығ?

⁵ Хайди Худайға пирінгені кіреске тӱскенінең палғалыстығ? Иеговаа чуртазыңарны пазырыста пирчетсер, анзын Иегова ла исче. Кіреске тӱскені чон алнында, кӧбізін конгрессте, иртірілче. Кіреске тӱсчетсер, Иеговаа пазырыста чуртазыңарны пир салғаныңарны пасха кізілерге кӧзітчезер b. Кіреске тӱскеніңернең сірер Иегова Худайға «прай чӱрееңернең, прай кӧңніңернең, прай сағызыңарнаң, прай кӱзіңернең» хынчатханыңарны паза ағаа мӧгі тус нымысчыланарға пӧгін алғаныңарны кӧзітчезер (Марк 12:30).

6, 7. 1 Петрның 3:18—22 хоостыра, ноға кіреске тӱзерге кирек?

⁶ Кіреске тӱзерге сынап кирек пе? 1 Петрның 3:18—22-гі (хығырыбызыңар) сӧстерні ӱзӱр кӧреелер. Хайди керіп Нойның киртінізін киречілеен, ідӧк кіреске тӱскені сірернің Иеговаа пирін салғаныңарны кӧзітче. Че кіреске тӱзерге сынап кирек пе? Я. Петр илҷі ноға кіреске тӱзерге кирек полчатханын чарыда чоохтап пирген. Пастағызын, кіреске тӱскені чуртазыңарны арачылапча. Кізі позының киректерінең Иисусха киртінчеткенін кӧзітчетсе, Христос ол кізінің ӱчӱн чуртазын пирібізіп, тигірдегі чуртасха тірілгеніне паза ол Худайның оң саринда одырчатханына киртінчетсе, кіреске тӱскені аны арачылапча.

⁷ Ікінҷізін, кіреске тӱскені арығ совестьтіг поларға оңдай пирче. Піс позыбысты Худайға пазырыста пирчетсебіс паза кіреске тӱсчетсебіс, піс аннаң пик палғалыстығ пол парчабыс. Пістің прай чӱреебіснең пыросынчатханыбысты паза Христостың тайиина киртінізібісті кӧрчетсе, Худай чазыхтарыбысты тастапча. Іди пістің совезібіс арығ пол парча.

8. Сірерні кіреске тӱзерге ниме кӧӧктірерге кирек?

⁸ Сірерні кіреске тӱзерге ниме кӧӧктірерге кирек? Библияны ситкеп ӱгреніп, сірер Иеговадаңар кӧп піліп алғазар: хайдағ аның качестволары, хайди ол аймах-пасха киректерде тудынча. Анзы сірернің чӱрееңерге теңен паза сірер ағаа тың хын сыххазар. Иң пастағызын Иеговаа хыныс сірерні кіреске тӱзерге кӧӧктірерге кирек.

9. Матфей 28:19, 20-гі «Пабаның, Оолғының паза Худай Худының адынаң кіреске тӱскені» тіп Иисустың сӧстері ниме таныхтапчалар?

⁹ Кіреске тӱзіп алар ӱчӱн, Библиядағы сыннарны чахсы оңнирға кирек. Иисустың ӱгренҷілерні тимнирге чоохтаанын сағысха кир кӧреелер. (Матфей 28:19, 20 хығырыбызыңар.) Иисус наа ӱгренҷілер Пабаның, Оолғының паза Худай Худының адынаң кіреске тӱзерге киректер теен. Анзы ниме таныхтапча? Сірерге Иеговадаңар, аның Оолғынаңар, Иисустаңар, паза ызых хуттаңар Библиядағы сыннарға прай чӱрекнең киртінерге кирек. Ол сыннарның сірернің чӱрееңерге теңерге кӱзі пар (Евр. 4:12). Оларны сағысха кир кӧреелер.

10, 11. Пабаңардаңар хайдағ сыннарны піліп алғазар паза постарыңа алғазар?

¹⁰ Библияны ӱгренчеткенде, сірер Пабаңардаңар мындағ сыннар піліп алғазар: аның ады Иегова, ол «Иң Пӧзік Худай» паза ол ла сын Худай (Пс. 83:18; Ис. 37:16). Ол Чайаачы. Арачыланыс Иеговадаң (Пс. 3:8; 36:9). Піске чазыхтаң паза ӧлімнең позып аларға оңдай пирген паза мӧгі чуртасха ізеніс сыйлап пирген (Иоанн 17:3). Иеговаа пазырыста пирінібіссер паза кіреске тӱссер, сірер Иегованың киречізі пол парарзар (Ис. 43:10—12). Сірер Иегованың киречілерінің сӧбірезінің чардығы пол парчазар. Иегованың нымысчылары аның адынаң поғдархап аданчалар паза аның адынаңар пасха кізілерге чоохтапчалар (Пс. 86:12).

¹¹ Пабаңардаңар сыннарны пілгені — улуғ аарлас! Сірер ол аарлығ сыннарны постарыңа алчатсар, чӱрееңер Иеговаа пазырыста пирін саларға паза кіреске тӱзерге кӧӧктірче.

12, 13. Худайның Оолғынаңар хайдағ сыннар піліп алғазар паза постарыңа алып алғазар?

¹² Худайның Оолғынаңар сыннарны піліп алғанда, нимедеңер сағынғазар? Иисус Тилекейде Иегованың соонда ікінҷі орында. Ол позының чуртазын толыға пирібіскен. Киртінізібісті киректерібіснең кӧзітсебіс, пістің чазыхтарыбыс тасталар, піс Худайнаң пик палғалыстығ поларбыс паза піске мӧгі чуртас пирілер (Иоанн 3:16). Иисус — пістің Улуғ абызыбыс. Ол пісті толығ пирчеткен алғастар алзыннар паза Худайның нанҷылары полып алзыннар тіп хынча (Евр. 4:15; 7:24, 25). Ол Худайның Хан-ӱлгӱзінің Ханы. Аннаң пастыра Иегова позының адын чарыдар, чабал киректерні чох идібізер, чир ӱстӱнде рай хатап турғыс салар паза кізілерге мӧгі тус чуртирға оңдай пирер (Матф. 6:9, 10; Аз. ч. 11:15). Иисус кӧӧгерге турыстығ (1 Пет. 2:21). Ол піске Худайның кӧңнін, прай кӱс салып, толдырарында кӧзідім полча (Иоанн 4:34).

¹³ Иисустаңар Библиядаң алған пілістер чӱрееңерге теепчетсе, сірер Худайның Оолғына хын сыхчазар. Ол хыныс Худайның кӧңнін, Иисусох чіли, толдырарға кӧӧктірче. Андада сірер Иеговаа постарыңны пирібізерге паза кіреске тӱзерге хынарзар.

14, 15. Ызых хуттаңар хайдағ пілістер піліп алғазар паза постарыңа алып алғазар?

¹⁴ Ызых хуттаңар сынны піліп алғанда, ниме сағынғазар? Ызых хут — ӱс сырайлығ Худайның чардығы нимес, ол Худайның тоғынчатхан кӱзі. Иегова ызых хут пастыра Библияны пазарынаң устаан. Олох хут анда пазылған нимені оңнирға паза аның хоостыра тудынарға полысча (Иоанн 14:26; 2 Пет. 1:21). Иегова піске ызых худынаң пастыра кізінің кӱзінең артых кӱс пирче (2 Кор. 4:7). Ызых хут піске чахсы хабарны искірерге, хыҷаланыстарнаң кӱрезерге, чобалыстарны тобырарға паза сынағларда тур халарға полысча. Ол хут пастыра сіліг качестволарны тилітчебіс. Ол качестволар Худай худы пирчеткен нимелернің чардығы полчалар (Гал. 5:22). Худай ағаа ізенчеткеннерге паза прай чӱрекнең аның ызых худын сурынчатханнарға позының худын ӧрініснең пирче (Лука 11:13).

¹⁵ Иегованың нымысчыларына, ағаа нымысчыланар ӱчӱн, Иегованың ызых худына ізенерге чарир. Анзын пілгені кӱс пирче. Ызых хуттаңар Библиядағы сыннар алзар, сірер Иеговаа чуртасты пирібізерге паза кіреске тӱзерге хынарзар.

16. Пу статьяда ниме ӱзӱрібіскебіс?

¹⁶ Худайға чуртасты пирібізерге паза кіреске тӱзерге уғаа кирек. Хайди піліп алғабыс, піске хорадығларға алай сидіктерге паза тайығларға парарға тимде поларға кирек. Че алғастар ол тайығлардаң хай-хай кӧп полар. Кіреске тӱскені сірернің чуртастарыңны арачылир паза Худайның алнында арығ совестьтіг поларға оңдай пирер. Кіреске тӱзерге сірерні Иеговаа хыныс кӧӧктірерге кирек. Ідӧк сірерге Пабабыстаңар, Оолғынаңар паза ызых хуттаңар алған пілістерге прай чӱрекнең киртінерге кирек. Пу статья ӱзӱрген соонда, кіреске тӱзерге тимдезер бе, чох па піліп алдар ба?

17. Кіреске тӱзер алнында, хайдағ алтымнар идерге кирек?

¹⁷ Кіреске тӱзерге тимде ползар, ікінҷілес чоғыл, Иегованаң чағын палғалыстығ полар ӱчӱн, прай кӱс салғазар c. Библияны сыбыра істезіп, сірер Иеговадаңар паза Иисустаңар кӧп ниме піліп алғазар. Паза киртіністеріңні тиліткезер (Евр. 11:6). Сірер Иегованың молҷағларына киртінерге чарирын паза Христостың толиина киртініс чазыхтаң паза ӧлімнең ал халарын піліп алғазар. Сірер иткен чазыхтарның ӱчӱн Иегованың алнында пыросынғазар. Мының алнында апарған чуртастаң айланып, Худайның нормаларынҷа чуртап сыххазар (Илҷ. 3:19). Киртіністеріңнеңер пасхаларына чоохтирға хын сыххазар. Сірер кіреске тӱскелек искірігҷі пол парғазар паза ӧменең хада Худай сӧзін искір сыххазар (Матф. 24:14). Кіреске тӱзер ӱчӱн, нинҷе алызығ иткеннеріңе Иегова уғаа поғдархапча! Сірер аның чӱреен уғаа ӧріндірчезер (Прит. 27:11).

18. Кіреске тӱзер алнында, паза хайдағ алтымнар идерге кирек?

¹⁸ Кіреске тӱзер алнында, паза нинҷе-де алтым идерге кирек. Хайди піс кӧргебіс, пазырыста Иеговаа пирінібізерге кирек. Чалғызан пазырчатсар, аның кӧңнін толдырарға сӧс пиріңер (1 Пет. 4:2). Анаң ах сағалларның чӧбінің координаторына кіреске тӱзерге хынчатханыңарны чоохтап пиріңер. Ол ах сағалларға сірернең чоохтазып аларға чоохтир. Оларнаң тоғазарға хорыхпаңар. Ікінҷілес чоғыл, ол аарлығ харындастар сірерні пілчелер паза сірерге хынчалар. Олар сірернең хада Библияның ӧӧн ӱгредіглерін ӱзӱрібізерлер. Ол ӱгредіглерні оңнапчатханыңарны кӧріп аларлар паза Худайға пирін салғанын паза кіреске тӱскенін аарлыға санапчатханыңарны піліп аларлар. Кіреске тӱзерге тимде полчатханыңарны кӧр салзалар, иң чағын конгрессте кіреске тӱзерге чарадарлар.

19, 20. Кіреске тӱскен соонда, ниме идерге кирек паза анзына ниме кірче?

¹⁹ Кіреске тӱскен соонда, ниме идерге кирек? d Хайди кӧргебіс, Худайға пирінгені ағаа сӧс пиргені полча. Иегова, тізең, пістең пирген сӧс хоостыра тудынарын сағыпча. Аннаңар піске, кіреске тӱскен соонда, ол пирген сӧс хоостыра тудынарға кирек. Анзына ниме кірче?

²⁰ Ӧмедегі харындас-пиҷелернең ынағ тудынарға кӱстеніңер. Кіреске тӱзіп, сірер христианскай сӧбіренің чардығы пол парчазар (1 Пет. 2:17). Ӧме чыылығларына чӧріп, сірер харындас-пиҷелерге чағыннаң чағын полып одырчазар. Худайның Сӧзін, Библияны, кӱннің сай хығырыңар паза хығырған нимелердеңер сағын турыңар (Пс. 1:1, 2). Библияның кизегін хығырған соонда, ол кизектеңер тирең сағынарға тус таап турыңар. Андада Библиядағы сӧстер сірернің чӱрееңерге теңер. Иеговаа сыбыра пазырыңар (Матф. 26:41). Прай чӱрекнең пазырғаны сірерні Иеговаа чағын идер. «Худай хан-ӱлгӱзін» тілеңер (Матф. 6:33). Анзын идер ӱчӱн, Худай сӧзін искіргені чуртазыңарда ӧӧн орында турарға кирек. Худай сӧзін сыбыра искіргені сірерге киртіністеріңні тыыдарға паза пасхаларына мӧгі чуртасха апарчатхан чолға турып аларға полыс пирер (1 Тим. 4:16).

21. Кіреске тӱскені сірерге хайдағ оңдайлар асча?

²¹ Худайға пирінгені паза кіреске тӱскені — чуртаста иң аарлығ пӧгін! Хайди піс кӧргебіс, ол пӧгін хорадығларнаң палғалыстығ. Че анзы хорадығларға турыстығ ба? Ікінҷілес чоғыл, турыстығ! Пу чир-чалбахтағы хайдағ даа сидіктер оой паза табырах ирт парарлар (2 Кор. 4:17). Кіреске тӱскені ам часкалығ поларға паза мӧгі тус чуртирға оңдай пирче (1 Тим. 6:19). Аннаңар пазырып паза чахсы сағынып алып, пу сурыға нандырыңар: «Кіреске тӱзерге тимдезім ме?»