11-زەرتتەۋ ماقالاسى
شومىلدىرۋ راسىمىنەن وتۋگە دايىنسىز با؟
«قۇتقارىپ جاتقان... شومىلدىرۋ ٴراسىمى» (پەت. 1-ح. 3:21).
28-ٵن ەحوبانىڭ دوسى بولايىق
اڭداتپا *
1. ادام ٷي سوقپاس بۇرىن نە ىستەگەنى ٴجون؟
ٷي سوققالى جاتقان ادامدى ەلەستەتىپ كورىڭىزشى. ول وزىنە قانداي ٷي سوققىسى كەلەتىنىن بىلەدى. ٴبىراق ول بىردەن كەرەك-جاراعىن ساتىپ الىپ، قۇرىلىسقا كىرىسىپ كەتۋى كەرەك پە؟ جوق. ول الدىمەن وتە ماڭىزدى ٸستى ىستەۋى، ياعني شىعىنىن ەسەپتەپ الۋى قاجەت. نەلىكتەن؟ ويتكەنى ٷيدى سالىپ بىتۋگە جەتكىلىكتى قارجىسى بار ما، جوق پا — سونى ٴبىلىپ الۋى كەرەك. قۇرىلىسقا كىرىسپەي تۇرىپ، شىعىنىن مۇقيات ەسەپتەپ السا، ول ٷيىن سوعىپ بىتىرە الادى.
2. لۇقا 14:27—30 تارماقتارعا ساي، شومىلدىرۋ راسىمىنەن وتۋگە قاتىستى نەنى مۇقيات ويلاعانىڭىز ٴجون؟
2 ەحوباعا دەگەن سۇيىسپەنشىلىگىڭىز بەن ريزاشىلىعىڭىز شومىلدىرۋ راسىمىنەن ٶتۋ جايلى ويلاۋعا تالپىندىرا ما؟ وندا ٴسىزدىڭ جاعدايىڭىز ٷي سوققىسى كەلەتىن كىسىنىڭ جاعدايىنا ۇقسايدى. نەگە ولاي دەيمىز؟ لۇقا 14:27—30 (وقىڭىز) تارماقتاردا جازىلعان يسانىڭ سوزدەرىن قاراستىرايىق. يسا شاكىرتى بولۋ نەنى بىلدىرەتىنىن ايتتى. ونىڭ ٸزباسارى بولۋ ٷشىن قيىندىقتار مەن قۇرباندىقتاردان تۇراتىن «شىعىندى» وتەۋگە دايىن بولۋىمىز قاجەت (لۇقا 9:23—26؛ 12:51—53). سوندىقتان وسىلار جايلى شومىلدىرۋ راسىمىنەن وتپەس بۇرىن مۇقيات ويلانعانىڭىز ٴجون. سوندا ٴسىز شومىلدىرۋ راسىمىنەن وتكەن ٴماسىحشى رەتىندە قۇدايعا ادالدىقپەن قىزمەت ەتە بەرۋگە جاقسىراق دايىن بولاسىز.
3. بۇل ماقالادا نە قاراستىرامىز؟
3 ٴماسىحتىڭ شاكىرتى بولىپ شومىلدىرۋ راسىمىنەن ٶتۋ قۇرباندىققا بارۋعا تۇرا ما؟ ارينە! شومىلدىرۋ راسىمىنەن ٶتۋ قازىردىڭ وزىندە جانە بولاشاقتا سانسىز باتالارعا جول اشادى. ال ەندى، شومىلدىرۋ راسىمىنە قاتىستى ماڭىزدى سۇراقتاردى تالقىلايىق. بۇل سىزگە «شومىلدىرۋ راسىمىنەن وتۋگە دايىنمىن با؟» دەگەن ساۋالدىڭ جاۋابىن تابۋعا كومەكتەسەدى.
باعىشتالۋ مەن شومىلدىرۋ ٴراسىمى جايلى نەنى ٴبىلۋىڭىز قاجەت؟
4. ا) باعىشتالۋ دەگەن نە؟ ٵ) ماتاي 16:24 تەگى «وزىنەن باس تارتۋ» دەگەن نەنى بىلدىرەدى؟
4 باعىشتالۋ دەگەن نە؟ شومىلدىرۋ راسىمىنەن وتپەس بۇرىن باعىشتالۋىڭىز قاجەت. ەحوباعا ٶزىڭىزدى باعىشتاعاندا شىن جۇرەكتەن دۇعا ەتىپ، ٶمىرىڭىزدى ماڭگىلىك بويى وعان قىزمەت ەتۋگە ارنايتىنىڭىزدى ايتاسىز. وعان باعىشتالۋ وزىڭىزدەن «باس تارتۋدى» بىلدىرەدى (ماتاي 16:24 وقىڭىز). ەندى ٴسىز ەحوباعا تيەسىلىسىز، ال بۇل — زور مارتەبە (ريم. 14:8). ٴسىز ەحوباعا بۇدان بىلاي بار نازارىڭىزدى ٶز قالاۋلارىڭىزعا ەمەس، وعان قىزمەت ەتۋگە اۋداراتىنىڭىزدى ايتاسىز. باعىشتالۋ — ەحوباعا انت بەرۋمەن تەڭ. ٴبىراق ەحوبا ٴبىزدى مۇنداي انت بەرۋگە كۇشتەمەيدى. ال انت بەرسەك، سوزىمىزدە تۇرادى دەپ كۇتەدى (ٴزاب. 116:12، 14).
5. باعىشتالۋ مەن شومىلدىرۋ راسىمىنىڭ ايىرماشىلىعى قانداي؟
5 باعىشتالۋ مەن شومىلدىرۋ راسىمىنىڭ ايىرماشىلىعى قانداي؟ باعىشتالۋ — جەكە ٶزىڭىز جاسايتىن ارەكەت. ونى تەك ەحوبا مەن ٴسىز عانا بىلەسىز. ال شومىلدىرۋ راسىمىنەن ٶتۋ — كوپشىلىكتىڭ الدىندا جاسالاتىن ارەكەت. بۇل ٴراسىم ادەتتە قانداي دا ٴبىر كونگرەستە وزگەلەردىڭ الدىندا وتەدى. شومىلدىرۋ راسىمىنەن وتكەن كەزدە ەحوباعا باعىشتالعانىڭىزدى كوپشىلىكتىڭ الدىندا پاش ەتەسىز *. شومىلدىرۋ راسىمىنەن وتكەنىڭىزدەن وزگەلەر ەحوبا قۇدايىڭىزدى بار جۇرەگىڭىزبەن، جان-تانىڭىزبەن، اقىل-ويىڭىزبەن، كۇش-قۋاتىڭىزبەن سۇيەتىنىڭىزدى جانە وعان ماڭگىلىك بويى قىزمەت ەتۋگە بەكىنگەنىڭىزدى بىلەدى (مار. 12:30).
6، 7. پەتىردىڭ 1-حاتى 3:18—22 تارماقتارعا ساي، شومىلدىرۋ راسىمىنەن مىندەتتى تۇردە ٶتۋىمىز كەرەكتىگىنە قانداي ەكى سەبەپ بار؟
6 شومىلدىرۋ راسىمىنەن مىندەتتى تۇردە ٶتۋ كەرەك پە؟ پەتىردىڭ 1-حاتى 3:18—22 (وقىڭىز) تارماقتارداعى سوزدەردى قاراستىرىپ كورەيىك. كەمە نۇحتىڭ سەنىمىنىڭ ايقىن دالەلى بولعانى ىسپەتتى، شومىلدىرۋ راسىمىنەن وتكەنىڭىز دە ەحوباعا باعىشتالعانىڭىزدىڭ ايقىن كورىنىسى. ٴبىراق شومىلدىرۋ راسىمىنەن مىندەتتى تۇردە ٶتۋ كەرەك پە؟ ٴيا. مۇنىڭ سەبەبىن ەلشى پەتىر ٴتۇسىندىرىپ كەتكەن. بىرىنشىدەن، بۇل ٴسىزدى «قۇتقارىپ جاتىر». ەگەر يساعا، ونىڭ ٴبىز ٷشىن ولگەنىنە، كەيىن ٴتىرىلىپ كوككە كوتەرىلگەنىنە، قازىر «قۇدايدىڭ وڭ جاعىندا وتىرعانىنا» سەنەتىنىمىزدى ٸس-ارەكەتىمىزبەن كورسەتسەك، شومىلدىرۋ ٴراسىمى ٴبىزدى قۇتقارادى.
7 ەكىنشىدەن، شومىلدىرۋ راسىمىنەن وتسەك، «تازا ار-ۇجدانعا» يە بولامىز. ٶزىمىزدى قۇدايعا باعىشتاپ، شومىلدىرۋ راسىمىنەن وتسەك، ەحوبامەن ەرەكشە قارىم-قاتىناستا بولامىز. كۇنالارىمىزعا شىن جۇرەكتەن وكىنىپ، تولەمگە سەنىم بىلدىرگەنىمىزدىڭ ارقاسىندا قۇداي كۇنالارىمىزدى كەشىرەدى. وسىلايشا ونىڭ الدىندا تازا ار-ۇجدانعا يە بولامىز.
8. شومىلدىرۋ راسىمىنەن وتۋىڭىزدىڭ باستى سەبەبى نە بولۋ كەرەك؟
8 شومىلدىرۋ راسىمىنەن وتۋىڭىزدىڭ باستى سەبەبى نە بولۋ كەرەك؟ كيەلى كىتاپتى مۇقيات زەرتتەي كەلە، ەحوبا تۋرالى، ونىڭ بولمىسى مەن جولدارى تۋرالى كوپ نارسە ٴبىلدىڭىز. ول تۋرالى بىلگەندەرىڭىز سىزگە قاتتى اسەر ەتىپ، ونى جاقسى كورىپ كەتتىڭىز. وعان دەگەن سۇيىسپەنشىلىگىڭىز شومىلدىرۋ راسىمىنەن وتۋىڭىزدىڭ باستى سەبەبى بولۋ كەرەك.
9. ماتاي 28:19، 20 عا ساي، اكەنىڭ، ۇلدىڭ جانە كيەلى رۋحتىڭ اتىنان شومىلدىرۋ راسىمىنەن ٶتۋ دەگەن نەنى بىلدىرەدى؟
9 سونداي-اق شومىلدىرۋ راسىمىنەن وتۋگە دەگەن شەشىمىڭىز وقىپ-بىلگەن كيەلى كىتاپ شىندىقتارىنا نەگىزدەلگەن. يسانىڭ شاكىرت دايىنداۋعا قاتىستى نۇسقاۋىن قاراستىرايىق (ماتاي 28:19، 20 وقىڭىز). يسا «اكەنىڭ، ۇلدىڭ جانە كيەلى رۋحتىڭ اتىنان شومىلدىرۋ راسىمىنەن ٶتۋ» كەرەكتىگىن ايتقان. بۇل نەنى بىلدىرەدى؟ كيەلى كىتاپتاعى ەحوبا تۋرالى، ونىڭ ۇلى يسا تۋرالى جانە كيەلى رۋح جايلى شىندىقتارعا بار جۇرەگىڭىزبەن سەنۋىڭىز قاجەت. بۇل شىندىقتاردىڭ كۇشى زور، ٵرى سىزگە قاتتى اسەر ەتە الادى (ەۆر. 4:12). سولاردىڭ كەيبىرىن تالقىلاپ كورەيىك.
10، 11. اكە تۋرالى قانداي شىندىقتاردى ٴبىلىپ، قابىلدادىڭىز؟
10 اكە جايلى شىندىقتاردى العاش بىلگەن كەزىڭىزدى ەسىڭىزگە ٴتۇسىرىڭىزشى. ٴسىز ونىڭ «ەسىمى ەحوبا ەكەنىن»، «جەر بەتىن بيلەيتىن جالعىز قۇداي تاعالا ەكەنىن» جانە ول عانا «جالعىز شىنايى قۇداي» ەكەنىن ٴبىلدىڭىز (ٴزاب. 83:18؛ يشايا 37:16). ول — ٴبىزدىڭ جاراتۋشىمىز ٵرى قۇتقارۋشىمىز (ٴزاب. 3:8؛ 36:9). ول ٴبىزدى كۇنا مەن ولىمنەن ازات ەتۋ ٷشىن جانە ماڭگى ٶمىر سۇرە الۋىمىز ٷشىن شارا جاسادى (جوح. 17:3). ەگەر وعان باعىشتالىپ، شومىلدىرۋ راسىمىنەن وتسەڭىز، ەحوبا كۋاگەرى بولاسىز (يشايا 43:10—12). وسىلاي قۇداي قىزمەتشىلەرىنەن تۇراتىن دۇنيەجۇزىلىك وتباسىنىڭ ٴبىر بولىگىنە اينالاسىز. ولار قۇداي ەسىمىمەن اتالۋدى ماقتان تۇتادى، ٵرى ونىڭ ەسىمىن وزگەلەرگە پاش ەتەدى (ٴزاب. 86:12).
11 اكەگە قاتىستى كيەلى كىتاپ ىلىمدەرىن تۇسىنگەنىمىز نەتكەن مارتەبە! وسى كەرەمەت شىندىقتاردى قابىلداعاندا، ەحوباعا باعىشتالىپ، شومىلدىرۋ راسىمىنەن وتۋگە تالپىناسىز.
12، 13. ۇل جايلى قانداي شىندىقتاردى ٴبىلىپ، قابىلدادىڭىز؟
12 ۇل تۋرالى شىندىقتاردى بىلگەندە، قانداي سەزىمدە بولدىڭىز؟ يسا — عالامداعى ەكىنشى ماڭىزدى تۇلعا. ول ٶز ٶمىرىن ٴبىز ٷشىن تولەم رەتىندە بەردى. تولەمگە سەنەتىنىمىزدى ٸس-ارەكەتىمىزبەن كورسەتسەك، كۇنالارىمىز كەشىرىلەدى، قۇدايمەن دوستىعىمىز نىعايادى، ٵرى ماڭگىلىك ومىرگە يە بولامىز (جوح. 3:16). يسا — ٴبىزدىڭ باس ٴدىني قىزمەتكەرىمىز. ول بىزگە تولەمنىڭ يگىلىگىن كورۋىمىزگە، قۇدايمەن جاقىن قارىم-قاتىناستا بولۋىمىزعا كومەكتەسكىسى كەلەدى (ەۆر. 4:15؛ 7:24، 25). قۇداي پاتشالىعىنىڭ پاتشاسى بولعاندىقتان، ول ارقىلى ەحوبانىڭ ەسىمى كيەلى تۇتىلادى، زۇلىمدىقتىڭ تامىرىنا بالتا شابىلادى جانە الداعى جۇماقتا ماڭگىلىك باتالارعا يە بولامىز (مات. 6:9، 10؛ ايان 11:15). يسا — ٴبىز ٷشىن ۇلگى (پەت. 1-ح. 2:21). ول ٶز ٶمىرىن قۇداي ەركىن ورىنداۋعا ارناۋىمەن بىزگە جاقسى ۇلگى قالدىردى (جوح. 4:34).
13 كيەلى كىتاپتاعى يسا جايلى ىلىمدەردى قابىلداساڭىز، قۇدايدىڭ اياۋلى ۇلىن جاقسى كورىپ كەتەسىز. وسى سۇيىسپەنشىلىگىڭىز يسا سياقتى ٶز ٶمىرىڭىزدى قۇداي ەركىن ورىنداۋ ٷشىن ارناۋعا تالپىندىرادى. ال بۇل ٶز كەزەگىندە ەحوباعا باعىشتالىپ، شومىلدىرۋ راسىمىنەن وتۋگە قوزعاۋ سالادى.
14، 15. كيەلى رۋح جايلى قانداي شىندىقتاردى ٴبىلىپ، قابىلدادىڭىز؟
14 كيەلى رۋح جايلى شىندىقتاردى بىلگەندە نە سەزىندىڭىز؟ كيەلى رۋح — تۇلعا ەمەس، قۇدايدىڭ كۇشى. ەحوبا كيەلى رۋحى ارقىلى كيەلى كىتاپتى جازدىردى، ٵرى سول رۋح كيەلى كىتاپتا جازىلعانداردى تۇسىنۋگە جانە ومىردە قولدانۋعا كومەكتەسەدى (جوح. 14:26؛ پەت. 2-ح. 1:21). ەحوبا كيەلى رۋحى ارقىلى بىزگە «ادام كۇشىنەن اسقان كۇش» بەرەدى (قور. 2-ح. 4:7). كيەلى رۋح بىزگە ىزگى حاباردى جاريالاۋعا، ازعىرىلۋعا بەرىلمەۋگە، قايعى-مۇڭمەن كۇرەسۋگە، قيىندىقتارعا توتەپ بەرۋگە كۇش بەرەدى. سونداي-اق «كيەلى رۋحتىڭ جەمىسىنە» جاتاتىن كوركەم قاسيەتتەردى تانىتۋعا كومەكتەسەدى (عال. 5:22). ەگەر ادام قۇدايعا سەنسە ٵرى ودان شىن جۇرەكتەن كيەلى رۋح سۇراسا، قۇداي سۇراعانىن جومارتتىقپەن بەرەدى (لۇقا 11:13).
15 ەحوبانىڭ قىزمەتشىلەرى وعان قىزمەت ەتۋ جولىندا كيەلى رۋحتىڭ كومەگىنە جۇگىنە الاتىندارى قانداي جاقسى! كيەلى رۋح جايلى شىندىقتاردى تۇسىنگەندە، ٶزىڭىزدى قۇدايعا باعىشتاپ، شومىلدىرۋ راسىمىنەن وتۋگە تالپىناسىز.
16. وسى ماقالادا قاراستىرعان جايتتاردان نە بىلدىك؟
16 قۇدايعا باعىشتالۋدى جانە شومىلدىرۋ راسىمىنەن ٶتۋدى شەشۋىڭىزبەن وتە ماڭىزدى قادام جاساۋداسىز. بايقاعانىڭىزداي، ٴسىز «شىعىندى» ەسەپتەپ الۋىڭىز، ياعني قيىندىقتار مەن قۇرباندىقتارعا بارۋعا دايىن بولۋىڭىز كەرەك. الايدا الاتىن باتالارىڭىز باراتىن قۇرباندىقتارىڭىزدان اسىپ تۇسەدى. شومىلدىرۋ راسىمىنەن وتكەنىڭىز ٴسىزدى قۇتقارادى جانە قۇداي الدىندا تازا ار-ۇجدانعا يە بولۋعا كومەكتەسەدى. شومىلدىرۋ راسىمىنەن وتەمىن دەگەن شەشىمىڭىز ەحوبا قۇدايعا دەگەن سۇيىسپەنشىلىگىڭىزگە نەگىزدەلۋى قاجەت. سونداي-اق اكە، ۇل جانە كيەلى رۋح تۋرالى بىلگەن شىندىقتارعا بار جۇرەگىڭىزبەن سەنۋىڭىز كەرەك. ەندى وسىلاردى قاراستىرعان سوڭ، «شومىلدىرۋ راسىمىنەن وتۋگە دايىنمىن با؟» دەگەن سۇراققا قالاي جاۋاپ بەرەسىز؟
شومىلدىرۋ راسىمىنەن وتپەس بۇرىن نە ىستەۋىڭىز كەرەك؟
17. شومىلدىرۋ راسىمىنەن وتپەس بۇرىن قانداي قادامدار جاساۋ كەرەك؟
17 شومىلدىرۋ راسىمىنەن وتۋگە دايىن ەكەنىڭىزدى تۇسىنسەڭىز، دەمەك، وسىعان دەيىن ەحوبامەن جاقسى قارىم-قاتىناستا بولۋ ٷشىن ٴبىراز قادامدار جاسادىڭىز *. كيەلى كىتاپتى جۇيەلى تۇردە زەرتتەي كەلە ەحوبا مەن يسا جايلى كوپ نارسە ٴبىلدىڭىز. سەنىمىڭىزدى نىعايتتىڭىز (ەۆر. 11:6). كيەلى كىتاپتاعى ەحوبانىڭ ۋادەلەرىنە تولىق سەندىڭىز، سونداي-اق يسانىڭ قۇرباندىعى ٴسىزدى كۇنا مەن ولىمنەن قۇتقارا الاتىنىنا كوزىڭىز جەتتى. ٴسىز كۇنالارىڭىزعا، جاساعان بۇرىس ىستەرىڭىزگە وكىنىپ، قۇدايدان كەشىرىم سۇرادىڭىز. سونىمەن قاتار تەرىس جولدان قايتتىڭىز، ياعني بۇرىنعى ٶمىر-سالتىڭىزدان باس تارتىپ، ەحوباعا ۇنامدى ٶمىر سۇرە باستادىڭىز (ەل. ٸس. 3:19). سەنىمىڭىز جايلى باسقالارعا ايتۋعا ىقىلاسىڭىز زور. شومىلدىرۋ راسىمىنەن وتپەگەن جاريالاۋشى بولىپ، قاۋىمداعىلارمەن بىرگە ۋاعىزداۋعا كىرىستىڭىز (مات. 24:14). وسى قادامداردى جاساعانىڭىز ٷشىن ەحوبا ٴسىزدى ماقتان ەتەدى. ٴسىز ونىڭ جۇرەگىن قۋانتتىڭىز (ناق. س. 27:11).
18. شومىلدىرۋ راسىمىنەن وتپەس بۇرىن تاعى نە ىستەۋىڭىز كەرەك؟
18 شومىلدىرۋ راسىمىنەن وتەر الدىندا جاساۋىڭىز كەرەك تاعى بىرنەشە قادام بار. ماقالانىڭ باسىندا ايتىلعانداي، ٶزىڭىزدى قۇدايعا باعىشتاۋىڭىز كەرەك. وعان شىن جۇرەكتەن دۇعا ەتىپ، ٶمىرىڭىزدى ونىڭ ەركىن ورىنداۋعا ارنايتىنىڭىزدى ايتىپ ۋادە ەتىڭىز (پەت. 1-ح. 4:2). سوسىن اقساقالدار كەڭەسىنىڭ ۇيلەستىرۋشىسىنە شومىلدىرۋ راسىمىنەن وتكىڭىز كەلەتىنىن ايتىڭىز. ول ٴبىر-ەكى اقساقالدان سىزبەن سويلەسۋدى وتىنەدى. ولارمەن سويلەسۋدەن قورقۋدىڭ قاجەتى جوق. بۇل اياۋلى باۋىرلاستار ٴسىزدى بىلەدى، ٵرى ٴسىزدى جاقسى كورەدى. اقساقالدار سىزبەن ٶزىڭىز وقىپ-بىلگەن كيەلى كىتاپتىڭ نەگىزگى ىلىمدەرى جايلى سويلەسەدى. ولار ٴسىزدىڭ سول ىلىمدەردى تۇسىنەتىنىڭىزگە، باعىشتالۋ مەن شومىلدىرۋ راسىمىنەن وتۋدىڭ ماڭىزدىلىعىن بىلەتىنىڭىزگە كوز جەتكىزگىلەرى كەلەدى. ەگەر ٴسىزدىڭ دايىن ەكەنىڭىزدى بايقاسا، الداعى كونگرەستەردىڭ بىرىندە شومىلدىرۋ راسىمىنەن وتەتىنىڭىزدى ايتادى.
شومىلدىرۋ راسىمىنەن وتكەن سوڭ نە ىستەۋىڭىز كەرەك؟
19، 20. شومىلدىرۋ راسىمىنەن وتكەن سوڭ نە ىستەۋىڭىز كەرەك جانە قالاي؟
19 شومىلدىرۋ راسىمىنەن وتكەن سوڭ نە ىستەۋىڭىز كەرەك *؟ باعىشتالۋ — انت بەرۋمەن تەڭ جانە ەحوبا سىزدەن سوزىڭىزدە تۇرادى دەپ كۇتەدى. دەمەك، شومىلدىرۋ راسىمىنەن وتكەن سوڭ باعىشتالۋىڭىزعا ساي ٶمىر ٴسۇرۋىڭىز قاجەت. بۇنى قالاي ىستەي الاسىز؟
20 قاۋىممەن تىعىز ارالاسىڭىز. شومىلدىرۋ راسىمىنەن وتكەن ٴماسىحشى بولعاندىقتان، ەندى ٴسىز دۇنيەجۇزىلىك «باۋىرلاستىقتىڭ» ٴبىر بولىگىسىز (پەت. 1-ح. 2:17 ٴسىلت.). قاۋىمداعى باۋىرلاستار ٴسىزدىڭ رۋحاني وتباسىڭىزعا جاتادى. قاۋىم كەزدەسۋلەرىنە جۇيەلى تۇردە بارعانىڭىز ولارمەن دوستىعىڭىزدى نىعايتادى. كۇن سايىن قۇداي ٴسوزىن وقىپ، وي جۇگىرتىڭىز (ٴزاب. 1:1، 2). كيەلى كىتاپتى وقىپ بولعان سوڭ، وقىعانىڭىز جايلى تەرەڭ ويلانۋعا ۋاقىت ٴبولىڭىز. سوندا وقىعاندارىڭىز جۇرەگىڭىزگە اسەر ەتەدى. «ۇدايى دۇعا ەتىڭىز» (مات. 26:41). شىن جۇرەكتەن دۇعا ايتساڭىز، ەحوباعا جاقىنداي تۇسەسىز. «قۇداي پاتشالىعىن... ٵردايىم ٴبىرىنشى ورىنعا قويىڭىز» (مات. 6:33). بۇنى ومىرىڭىزدە ۋاعىز ىسىنە باسىمدىق بەرۋ ارقىلى ىستەي الاسىز. جۇيەلى تۇردە قىزمەتكە شىعۋ ارقىلى سەنىمىڭىزدى مىقتى كۇيدە ساقتايسىز، ٵرى وزگەلەرگە ماڭگىلىك ومىرگە اپاراتىن جولعا تۇسۋگە كومەكتەسەسىز (ٴتىم. 1-ح. 4:16).
21. شومىلدىرۋ راسىمىنەن ٶتۋ نە نارسەگە جول اشادى؟
21 ەحوباعا باعىشتالىپ، شومىلدىرۋ راسىمىنەن ٶتۋ — ومىرىڭىزدەگى ەڭ ماڭىزدى شەشىم. ارينە، بۇل ٷشىن قۇرباندىقتارعا بارۋىڭىزعا تۋرا كەلەدى. ٴبىراق بۇل سوعان تاتي ما؟ البەتتە! وسى ەسكى دۇنيەدەگى كەز كەلگەن قيىندىق «ۋاقىتشا ٵرى جەڭىل» (قور. 2-ح. 4:17). ال شومىلدىرۋ راسىمىنەن ٶتۋ قازىردىڭ وزىندە قاناعاتقا تولى ٶمىر كەشۋگە جول اشادى جانە بولاشاقتا «شىنايى ومىرگە» جەتكىزەدى (ٴتىم. 1-ح. 6:19). سوندىقتان سىزدەن وتىنەرىمىز، دۇعا ەتە وتىرىپ، «شومىلدىرۋ راسىمىنەن وتۋگە دايىنمىن با؟» دەپ مۇقيات ويلانىپ كورىڭىز.
50-ٵن باعىشتالۋ دۇعاسى
^ 5-ابزاس شومىلدىرۋ راسىمىنەن ٶتۋدى ويلاپ ٴجۇرسىز بە؟ ولاي بولسا، بۇل ماقالا سىزگە ارنالعان. قازىر شومىلدىرۋ راسىمىنەن وتۋگە قاتىستى وتە ماڭىزدى سۇراقتاردى قاراستىرامىز. سول سۇراقتارعا بەرگەن جاۋابىڭىز شومىلدىرۋ راسىمىنەن وتۋگە دايىنسىز با، سونى انىقتاۋعا كومەكتەسەدى.
^ 5-ابزاس « شومىلدىرۋ راسىمىنەن وتەتىن كۇنى قويىلاتىن ەكى سۇراق» دەگەن قورشاۋدى قاراڭىز.
^ 19-ابزاس «كيەلى جازبالاردان نە بىلەمىز؟» جانە «قۇداي سۇيىسپەنشىلىگىنە بولەنە بەرىڭىز» كىتاپتارىن زەرتتەۋدى اياقتاماعان بولساڭىز، ەكى كىتاپتى دا سوڭىنا دەيىن زەرتتەپ ٴبىتىرىڭىز.
