1. Мәрьве кӧ дьхԝазә хԝәрʹа там ава кә, гәрәке пешийе чь бькә?

БЬДЬНӘ бәр чʹәʹве хԝә мәрьвәк дьхԝазә там хԝәрʹа ава кә. Әԝи ида сафи кьрийә, кӧ там чь щурʹәйи чекә. Ле гәло әԝ гәрәке дәрберʹа дәстпекә тьштед бона авакьрьне бькʹьрʹә? На. Пешийе әԝ гәрәке тьштәки фәрз бькә, демәк һʹәсаб кә, кӧ сәр ви тами ԝе чьԛас бе хәрщкьрьне. Чьрʹа? Сәва бьзаньбә һәла пʹәре ԝи ԝе тʹере бькә, ԝәки әԝи шьхӧли һʹәта хьлазийе бинә сери. Һәрге әԝ пешда хәрщ рʹьнд һʹәсаб кә, әԝе ида бькарьбә әви тами хԝәрʹа чекә.

2. Ль гора Луԛа 14:27-30, пешийа ньхӧмандьне һун гәрәке дәрһәԛа чь бьфькьрьн?

² Гәло һʹьзкьрьн у рʹазибуна ԝә һьндава Йаһоԝа, ԝә һелан дькә бенә ньхӧмандьне? Һәрге әре, һун гәрәке мина мәрьве кӧ дьхԝазә хԝәрʹа мале ава кә, хәрще хԝә бьдьн бәр һʹәсеб. Ле чьрʹа? Дина хԝә бьдьнә гьлийед Иса жь Луԛа 14:27-30 (Бьхунә.) Ԝан рʹезада Иса шьровәдькә, кӧ чь те һʹәсабе бьбьнә шагьртед ԝи. Сәва бьбьнә шагьртед ԝи, әм гәрәке хәрщ бьдьн «бәр һʹәсеб», демәк бона чәтьнайа һазьр бьн у һьнә тьшта ԛӧрбан кьн (Луԛа 9:23-26; 12:51-53). Ләма жи пешийа ньхӧмандьне, һун гәрәке бьзаньбьн һуне рʹасти чь бен. Паше һуне ида һе рʹьнд һазьр бьн, ԝәки ча Мәсиһийед ньхӧманди бь амьни Хԝәдерʹа хьзмәт кьн.

3. Әме ве готареда дәрһәԛа чь шеԝьр кьн?

³ Ле һежа йә мәрьв ԝан ԛӧрбана бькә, сәва бьбә Мәсиһи? Бәле! Ньхӧмандьн рʹе вәдькә сәва беһʹәсаб кʹәрәма бьстиньн, һьн ньһа һьн жи ахьрийеда. Ԝәрә ньһа дәрһәԛа ньхӧмандьне, чәнд пьрсед фәрз шеԝьр кьн. Әԝ йәк ԝе али ԝә бькә, кӧ щаба ве пьрсе бьдьн: «Әз һазьр ьм бемә ньхӧмандьне йан на?»

4. а) Хԝәтʹәсмилкьрьн чь те һʹәсабе? б) Анәгори Мәтта 16:24, чь те һʹәсабе хԝә «инкʹар» кьн?

⁴ Хԝәтʹәсмилкьрьн чь йә? Пешийа кӧ бенә ньхӧмандьне, һун гәрәке хԝә тʹәсмили Йаһоԝа кьн. Һун гәрәке дӧада жерʹа бежьн, ԝәки һун хԝә тʹәсмили ԝи дькьн у дьхԝазьн һʹәта-һʹәтайе жерʹа хьзмәт кьн. Чахе һун хԝә тʹәсмили Хԝәде дькьн, һун хԝә «инкʹар» дькьн. (Бьхунә Мәтта 16:24.) Һьнгеда һун дьбьнә пʹара Йаһоԝа у әԝ йәк бона ԝә рʹасти жи ԛәдьрәки гәләк мәзьн ә (Рʹом. 14:8). Һун Йаһоԝарʹа дьбежьн, ԝәки һуне ида жийина хԝәда хьзмәтийе дайньн щийе пешьн, нә кӧ хԝәстьнед хԝә. Әԝ тʹәсмилкьрьна ԝә сонд ә, йан жи соз ә, кӧ һун дьдьнә Хԝәде. Йаһоԝа тʹӧ щар зоре мә накә ԝәки әви сонди бьхԝьн. Ле чахе әм әви сози дьдьн, әԝ дьхԝазә ԝәки әм хԝәйе созе хԝә бьн (Зәб. 116:12, 14).

5. Чь фьрԛи һәйә ортʹа хԝәтʹәсмилкьрьне у ньхӧмандьне?

⁵ Фьрԛийа ортʹа хԝәтʹәсмилкьрьне у ньхӧмандьне чь йә? Тʹәсмилкьрьн әԝ һәйә созе шәхси, кӧ һун дьдьнә Йаһоԝа. Ле ньхӧмандьн әԝ ә, кӧ һун бәр мәрьва ве йәке избат дькьн, мәсәлә сәр щьвата мәзьн. Демәк, чахе һун тенә ньхӧмандьне, һун әшкәрә дьдьнә кʹьфше, ԝәки ԝә ида хԝә тʹәсмили Йаһоԝа кьрьйә. * Ләма жи ньхӧмандьна ԝә мәрьварʹа әʹйан дькә, ԝәки һун Хԝәдайе хԝә Йаһоԝа бь тʹәмамийа дьле хԝә, щанийа хԝә, һʹьше хԝә у ԛәԝата хԝә һʹьз дькьн, у ԝә сафи кьрийә һʹәта-һʹәтайе жерʹа хьзмәт кьн (Марԛ. 12:30).

6-7. Ль гора 1 Пәтрус 3:18-22, чь дӧ мәʹни һәнә кӧ ньхӧмандьн әʹсә лазьм ә?

⁶ Гәло әʹсә лазьм ә һун бенә ньхӧмандьне? Дина хԝә бьдә гьлийед жь 1 Пәтрус 3:18-22 (Бьхунә.) Чаԝа кӧ гәмийе әшкәрә избат дькьр, кӧ баԝәрийа Нӧһ һәйә, ӧса жи ньхӧмандьн мәрьварʹа әшкәрә дьдә кʹьфше, ԝәки ԝә хԝә тʹәсмили Йаһоԝа кьрийә. Ле чьрʹа лазьм ә һун әʹсә бенә ньхӧмандьне? Пәтрус шьровәкьр чьрʹа. Йа пешьн, ньхӧмандьн ԝә «хьлаз дькә». Бәле, ньхӧмандьн ԝе мә хьлаз кә, һәрге әм пе кьред хԝә дьдьн кʹьфше, ԝәки мә баԝәрийа хԝә Иса ани, у баԝәр дькьн, ԝәки әԝ бона мә мьр, һатә сахкьрьне, у ньһа әԝ «ль мьле Хԝәдейи рʹасте йә».

⁷ Йа дӧда, бь сайа ньхӧмандьне, әм «исафа рʹьһʹәт» дьстиньн. Чахе әм хԝә тʹәсмили Йаһоԝа дькьн у тенә ньхӧмандьне, һәләԛәтийа мә тʹәви ԝи һе незик дьбә. Һьн жи чьмки әм бь дьл у щан гӧнед хԝә тʹобә дькьн у баԝәрийа хԝә кʹьрʹине тиньн, Хԝәде гӧнед мә дьбахшинә. Ләма жи исафа мә бәр ԝи тʹәмьз дьбә.

8. Мәʹнийа сәрәкә бона ньхӧмандьна тә гәрәке чь бә?

⁸ Мәʹнийа ԝәйә сәрәкә бона ньхӧмандьне гәрәке чь бә? Һун бь сайа леколинкьрьна Кʹьтеба Пироз һе зедә пеһʹәсийанә дәрһәԛа Йаһоԝа, хәйсәт-һʹӧнӧред ԝи у рʹийед ԝи. Һун дәрһәԛа ԝи чь жи пеһʹәсийан дьле ԝә гьрт, у ԝә Йаһоԝа һе зәʹф һʹьз кьр. Һʹьзкьрьна ԝә һьндава Йаһоԝа гәрәке мәʹнийа сәрәкә бә кӧ бенә ньхӧмандьне.

9. Ль гора Мәтта 28:19, 20, чь те һʹәсабе пе наве Бав, Кӧрʹ у рʹӧһʹе пироз бенә ньхӧмандьне?

⁹ Диса мәʹник кӧ чьрʹа ԝә сафи кьрийә бенә ньхӧмандьне әԝ ә, кӧ ԝә баԝәрийа хԝә һинкьрьнед Кʹьтеба Пироз анийә. Дина хԝә бьдьне, Иса чь гот чахе тʹәми да, кӧ шагьрта һазьр кьн. (Бьхунә Мәтта 28:19, 20.) Ль гора гьлийед Иса, әԝед кӧ тенә ньхӧмандьне гәрәке «бь наве Бав, Кӧрʹ у рʹӧһʹе пироз» бенә ньхӧмандьне. Ле әԝ чь дьһатә һʹәсабе? Һун гәрәке бь тʹәмамийа  дьле хԝә рʹастийед дәрһәԛа Йаһоԝа, Кӧрʹе ԝи Иса у рʹӧһʹе пироз, баԝәр кьн. Ԛәԝата ԝан рʹастийа мәзьн ә у әԝ дькарьн дьле ԝә бьгьрьн (Ибрн. 4:12). Ԝәрә әм дәрһәԛа һьнә жь ԝан рʹастийа шеԝьр кьн.

10-11. Һун кʹижан рʹастийед дәрһәԛа Бав пеһʹәсийан у баԝәр кьр?

¹⁰ Бьфькьрьн сәр рʹастийед дәрһәԛа Бав, йед кӧ һун пеһʹәсийанә, мәсәлә кӧ наве ԝи Йаһоԝа йә, кӧ әԝ «Йе Һәри Жорьн . . . ль сәр тʹәмамийа әʹрде» йә, у кӧ тʹәне әԝ ә Хԝәдейе рʹаст (Зәб. 83:18; Иша. 37:16). Әԝ ә Әʹфьрандаре мә у «хьлазбун дәсте Хӧданда йә» (Зәб. 3:8; 36:9). Әԝи мәрʹа рʹе вәкьр, сәва әм жь гӧнә у мьрьне хьлаз бьн у һивийа жийина һʹәта-һʹәтайе сәр әʹрде бьн (Йуһʹн. 17:3). Хԝәтʹәсмилкьрьн у ньхӧмандьн ԝе ԝә әʹйан кә ча Шәʹдед Йаһоԝа (Иша. 43:10-12). Һуне бьбьнә нәфәред малбәта һʹәмдьнйайе, кʹижанеда гьшк Хԝәдерʹа хьзмәт дькьн, фьрнаԛ дьбьн кӧ наве Хԝәде сәр ԝан ә у һьн жи мәрьварʹа дәрһәԛа наве Ԝи гьли дькьн (Зәб. 86:12).

¹¹ Рʹасти жи ԛәдьрәки чьԛас мәзьн ә кӧ әм заньн, ԝәки Кʹьтеба Пироз дәрһәԛа Бав чь һин дькә! Чахе һун ԝан рʹастийед ԛимәт баԝәр бькьн, һуне бьхԝазьн кӧ хԝә тʹәсмили Йаһоԝа кьн у бенә ньхӧмандьне.

12-13. Һун кʹижан рʹастийед дәрһәԛа Кӧрʹ пеһʹәсийанә у баԝәр кьрьйә?

¹² Ԝә чь тʹәхмин кьр чахе һун пеһʹәсийан рʹастийед дәрһәԛа Иса, Кӧрʹе Хԝәде? Нава гәрдунеда паши Хԝәде, Иса кәсе лапи мәзьн ә. Әԝ Хьлазкʹаре мә йә, чьмки әԝи бь дьл бона мә әʹмьре хԝә да. Әм чахе пе кьред хԝә баԝәрийа хԝә һьндава кʹьрʹине нишан дькьн, гӧнед мә тенә бахшандьне, әм дьбьнә достед Хԝәде, у дькарьн жийина һʹәта-һʹәтайе бьстиньн (Йуһʹн. 3:16). Иса Сәрәккʹаһине мә йә. Әԝ дьхԝазә али мә бькә, ԝәки әм жь кʹьрʹине кʹаре бьстиньн у һәләԛәтийа мә тʹәви Хԝәде незик бә (Ибрн. 4:15; 7:24, 25). Бь сайа Иса, ча Пʹадше Пʹадшатийа Хԝәде, ԝе наве Йаһоԝа бе рʹумәткьрьне, һʹәму хьраби ԝе бе һьлдане у мәрьве Щьнәтеда сәр әʹрде кʹәрәмед һʹәта-һʹәтайе бьстиньн (Мәт. 6:9, 10; Әʹйан. 11:15). Иса мәрʹа нәхшәк һишт, ԝәки әм пʹегәһа ԝида һәрʹьн (1 Пәт. 2:21). Әԝи мәсәлә һишт ве йәкеда, кӧ әʹмьре хԝәда ԛьрара Хԝәде датани щийе пешийе (Йуһʹн. 4:34).

¹³ Чахе һун рʹастийед Кʹьтеба Пироз ԛәбул дькьн, һун дәстпедькьн Кӧрʹе Хԝәдейи дәлал һʹьз бькьн. Әԝ һʹьзкьрьн ԝә һелан дькә мина Иса әʹмьре хԝәда ԛьрара Хԝәде биньн сери. Ахьрийа ве йәке әԝ ә, кӧ һуне бьхԝазьн хԝә тʹәсмили Йаһоԝа кьн у бенә ньхӧмандьне.

14-15. Һун кʹижан рʹастийед дәрһәԛа рʹӧһʹе пироз пеһʹәсийан у ԛәбул кьр?

¹⁴ Ле ԝә чь тʹәхмин кьр гава һун пеһʹәсийан рʹастийед дәрһәԛа рʹӧһʹе пироз? Рʹӧһʹе пироз нә кӧ кәс ә, ле ԛәԝата Хԝәде йә. Йаһоԝа пе рʹӧһʹе хԝәйи пироз рʹебәрийа ньвискʹаред Кʹьтеба Пироз кьр, у әԝ рʹӧһʹ али мә дькә, ԝәки фәʹм кьн у бьдьнә хәбате чь кӧ әм теда дьхуньн (Йуһʹн. 14:26; 2 Пәт. 1:21). Йаһоԝа бь сайа рʹӧһʹе хԝә, «зорайийа ԛәԝате» дьдә мә (2 Корн. 4:7). Әԝ рʹӧһʹ ԛәԝате дьдә мә кӧ мьзгинийе бәла кьн, щерʹьбандьнада амьн бьминьн, чахе дьлтәнг дьбьн тәйах кьн, у тәнгасийада сәбьр кьн. Әԝ али мә дькә ԝан хәйсәт-һʹӧнӧред баш нав хԝәда пешда биньн, йед кӧ дькʹәвьнә нава «бәре рʹӧһʹ» (Галт. 5:22, ДТʹ). Хԝәде бь мәрʹдани рʹӧһʹе хԝә дьдә ԝан, йед кӧ итʹбарийа хԝә ԝи тиньн у бь дьл у щан рʹӧһʹе пироз жь ԝи дьхԝазьн (Луԛа 11:13).

¹⁵ Әм чьԛас дьлбинийе дьстиньн, кӧ заньн, ԝәки рʹӧһʹе пироз али мә дькә кӧ Йаһоԝарʹа хьзмәт кьн! Чахе һун ԝан рʹастийа дәрһәԛа рʹӧһʹе пироз ԛәбул кьн, һуне бьхԝазьн хԝә тʹәсмили Хԝәде кьн у бенә ньхӧмандьне.

16. Әм чь пеһʹәсийан?

 ¹⁶ Чахе һун сафи дькьн әʹмьре хԝә тʹәсмили Хԝәде кьн у бенә ньхӧмандьне, бь ве йәке һун гавәкә фәрз давежьн. Чаԝа әм пеһʹәсийан, һун гәрәке һазьр бьн бона чәтьнайа, у һьнә ԛӧрбана бькьн. Ле кʹәрәмед кӧ һуне ахьрийеда бьстиньн, жь һʹәму ԛӧрбана зедәтьр ьн. Ньхӧмандьн дькарә хьлазбуне ԝәрʹа бинә, у исафа ԝә бәр Хԝәде тʹәмьз бә. Ле һун гәрәке әве гаве бавежьн жь бо мәʹнийа сәрәкә, демәк жь бо һʹьзкьрьна ԝә һьндава Йаһоԝа Хԝәде. Һун ӧса жи гәрәке бь тʹәмамийа дьле хԝә баԝәр кьн рʹастийед дәрһәԛа Бав, Кӧрʹ, у рʹӧһʹе пироз. Паши ве шеԝьркьрьне, һуне ча щаба ве пьрсе бьдьн: «Әз һазьр ьм бемә ньхӧмандьне?»

17. Кʹижан ьн һьнә әԝ гав, йед кӧ мәрьва бәрбь ньхӧмандьне дьбьн?

¹⁷ Һәрге һун дьфькьрьн, кӧ һазьр ьн бенә ньхӧмандьне, демәк ԝә ида гәләк гав авитийә, сәва һәләԛәтийа ԝә тʹәви Йаһоԝа баш у незик бә. * Һун Кʹьтеба Пироз һәр гав леколин дькьн у ләма һун ида епʹещәйи дәрһәԛа Йаһоԝа у Иса заньн. У бь сайа ве йәке баԝәрийа ԝә пешда һатийә (Ибрн. 11:6). Һун бь тʹәмами итʹбарийа хԝә созед Йаһоԝа тиньн, кʹижан кӧ һун жь Кʹьтеба Пироз пеһʹәсийанә, у һун баԝәр дькьн, ԝәки һун бь сайа баԝәрийа хԝәйә һьндава ԛӧрбана Иса, дькарьн жь гӧнә у мьрьне хьлаз бьн. Ԝә гӧне хԝә анийә рʹуйе хԝә у жь Йаһоԝа бахшандьн хԝәстийә. Ԝә әʹмьре хԝә гӧһастийә, демәк ԝә тʹәрка жийина хԝәйә бәре дайә у дәстпекьрийә ӧса бьжин ча Хԝәде хԝәш те (Кʹар. Шанд. 3:19). Һун ӧса жи дьхԝазьн, ԝәки дәрһәԛа баԝәрийа хԝә мәрьварʹа гьли кьн. Демәк һун ида һазьр ьн бьбьнә мьзгинване нәньхӧманди у дәстпекьн тʹәви хушк-бьред щьвате хьзмәт бькьн (Мәт. 24:14). Йаһоԝа ԝәрʹа фьрнаԛ дьбә кӧ ԝә әԝ гавед фәрз авитийә. Һун дьле ԝи гәләк ша дькьн (Мәтʹлк. 27:11).

18. Пешийа ньхӧмандьне диса чь һун гәрәке бькьн?

¹⁸ Пешийа ньхӧмандьне, һун гәрәке чәнд тьшта бькьн. Ча әм ве готареда пеһʹәсийан, һун пешийе гәрәке хԝә тʹәсмили Хԝәде кьн, демәк жерʹа дӧада соз бьдьн, кӧ һуне әʹмьре хԝәда тʹьме ԛьрара ԝи биньн сери (1 Пәт. 4:2). Паше, координаторе кʹома рʹуспийарʹа бежьн, кӧ һун дьхԝазьн бенә ньхӧмандьне. Әԝ ԝе рʹуспийед майинрʹа бежә, кӧ тʹәви ԝә хәбәр дьн, ле бона ве йәке бәрхԝә нәкʹәвьн, чьмки әԝ бьра ԝә ида нас дькьн у ԝә һʹьз дькьн. Әԝана ԝе тʹәви ԝә һинкьрьнед сәрәкәйә Кʹьтеба Пироз шеԝьр кьн, кʹижан кӧ һун ида заньн. Әԝана ве йәке дькьн сәва баԝәр бьн, ԝәки һун ԝан һинкьрьна рʹьнд фәʹм дькьн у заньн кӧ хԝәтʹәсмилкьрьн у ньхӧмандьн гавәкә чьԛас фәрз ә. Һәрге әԝана бьвиньн  кӧ һун һазьр ьн, ԝе ԝәрʹа бежьн, ԝәки һун дькарьн сәр щьвата мәзьн бенә ньхӧмандьне.

19-20. Паши ньхӧмандьне һун гәрәке чь бькьн, у ча һун дькарьн ве йәке бькьн?

¹⁹ Паши ньхӧмандьне, һун гәрәке чь бькьн? * Бир нәкьн ԝәки хԝәтʹәсмилкьрьн әԝ һәйә сонд, у Йаһоԝа дьхԝазә һун хԝәйе сонда хԝә бьн. Ләма жи паши ньхӧмандьне, һун гәрәке ль гора тʹәсмилкьрьна хԝә бьжин. Ле әԝ чь те һʹәсабе?

²⁰ Хԝә ль щьвата хԝә бьгьрьн. Чахе һун тенә ньхӧмандьне, һун ида дьбьнә пʹара бьратийа һʹәмдьнйайе (1 Пәт. 2:17). Хушк-бьред ԝәйә щьвате ида малбәта ԝәйә рʹӧһʹани нә. Һәләԛәтийа ԝә тʹәви ԝан ԝе дьһа незик у ԛәԝи бә, һәрге һун тʹьме бенә сәр щьвата. Һәр рʹож Хәбәра Хԝәде бьхуньн у сәр бьфькьрьн (Зәб. 1:1, 2). Паши хԝәндьна пʹарәкә жь Кʹьтеба Пироз, ԝәʹдә бьвиньн сәва кʹур бьфькьрьн сәр ве чь ԝә хԝәнд. Һьнге ида әԝ гьли ԝе дьле ԝә бьгьрьн. Ӧса жи һәр гав дӧа бькьн (Мәт. 26:41). Дӧайед ԝәйи бь дьл, ԝе ԝә һе незики Йаһоԝа кьн. Бәрдәԝам кьн «бәре пешьн ль Пʹадшатийа Хԝәде бьгәрʹьн» (Мәт. 6:33). Ве йәке һун дькарьн бькьн, һәрге әʹмьре хԝәда хьзмәтийе дайньн щийе пешийе. Һәрге һун һәр гав хьзмәт кьн, баԝәрийа ԝә ԝе ԛәԝи бьминә, у һуне бькарьбьн али мәрьва бькьн, ԝәки бенә сәр рʹийа кӧ дьбә бәрбь жийина һʹәта-һʹәтайе (1 Тимтʹ. 4:16).

21. Ньхӧмандьн бона чь ԝәрʹа рʹе вәдькә?

²¹ Хԝә тʹәсмили Йаһоԝа кьн у бенә ньхӧмандьне, әԝ сафикьрьна лапә фәрз ә кӧ һуне әʹмьре хԝәда бькьн. Бәле, хәрщ һәнә, ле һежа йә әве гаве бавежьн? Әʹсә һежа йә! Һәр щәфе кӧ һуне ве дьнйа кәвьнда бьвиньн, «дәм-дәмә сьвьк» ьн (2 Корн. 4:17). Ле ньхӧмандьн ԝе ԝәрʹа рʹе вәкә, ԝәки һун ида ирода бәхтәԝар бьжин, у ахьрийеда һуне «жийина кӧ рʹасти жийин ә» ԛазанщ кьн (1 Тимтʹ. 6:19). Ләма жи кʹур бьфькьрьн у дӧа бькьн сәр щаба ве пьрсе: «Әз һазьр ьм бемә ньхӧмандьне?»