1. Wetin pɔsin fɔ du bifo i bigin bil os?

IMAJIN se pɔsin disayd se i want fɔ bil os. I sabi di kayn os we i want fɔ bil. Yu tink se i fɔ jɔs go na shɔp bay bay wetin i want ɛn kam bigin bil? Nɔ, i nɔ fɔ du so. I fɔ du wan impɔtant tin bifo i bigin bil; dat na fɔ chɛk ɔmɔs i go nid bifo i bigin bil di os. Wetin mek? Na bikɔs i nid fɔ no if di mɔni we i gɛt go du fɔ dɔn di os. If i tek tɛm chɛk ɔmɔs mɔni i gɛt bifo tɛm, dat go mɔs ɛp am fɔ dɔn fɔ bil di os.

2. Akɔdin to Lyuk 14:​27-30 (NWT), wetin yu fɔ tek tɛm tink bɔt bifo yu baptayz?

² Yu de tink fɔ baptayz bikɔs yu lɛk Jiova ɛn yu gladi fɔ wetin i dɔn du fɔ yu? If na so i bi, dat min se yu de disayd fɔ du sɔntin we fiba pɔsin we want fɔ bil os. Wetin mek wi se so? Lɛ wi tink bɔt wetin Jizɔs bin tɔk na Lyuk 14:​27-30, NWT (Rid.) Jizɔs bin de tɔk bɔt wetin i min fɔ bi in disaypul. Fɔ mek pɔsin bi in disaypul, i fɔ rɛdi fɔ chɛk “ɔmɔs i gɛt fɔ spɛn,” we min se i fɔ rɛdi fɔ lɛf sɔm tin dɛn biɛn ɛn bia ɛni prɔblɛm we go mit am. (Lyuk 9:​23-26, NWT; 12:​51-53) So bifo yu baptayz, yu fɔ tek tɛm tink gud gud wan bɔt wetin-ɛn-wetin go apin we yu bi Krays in disaypul. If yu du dat, i go mek yu rɛdi yusɛf fɔ kɔntinyu fɔ sav Jiova fetful wan we yu go dɔn baptayz.

3. Wetin wi go tɔk bɔt insay dis atikul?

³ Yu tink se fɔ bi Krays in disaypul bɛtɛ pas di tin dɛn we yu go lɛf biɛn ɛn di prɔblɛm dɛn we go mit yu? Yɛs, i bɛtɛ pas dɛn! We yu baptayz yu go ɛnjɔy bɔku blɛsin dɛn naw ɛn tumara bambay. Lɛ wi tɔk bɔt sɔm impɔtant kwɛstyɔn dɛn bɔt baptizim. We yu du dat i go ɛp yu fɔ ansa di kwɛstyɔn we se: “A dɔn rɛdi fɔ baptayz?”

4. (a) Wetin i min fɔ gi wi layf to Jiova? (b) Wetin i min fɔ du wetin Matyu 16:​24 tɔk bɔt?

⁴ Wetin i min fɔ gi yu layf to Gɔd? Bifo yu baptayz, yu fɔ gi yu layf to Jiova fɔs. Fɔ du dat, yu fɔ pre to Jiova wit ɔl yu at ɛn tɛl am se yu want fɔ yuz yu layf fɔ sav am sote go. We yu gi yu layf to Jiova, i min se yu “nɔ fɔ du wetin [yu] want fɔ du nɔmɔ.” (Rid Matyu 16:​24.) Na Jiova gɛt yu naw ɛn dat na big big ɔnɔ. (Rom. 14:​8, NWT) Yu de tɛl Jiova se, frɔm di tɛm we yu pre to am, yu nɔ de du wetin yu want igen bɔt na wetin Jiova want yu go de du. We yu pre to Jiova se yu de gi yu layf to am, na siriɔs prɔmis yu de mek. Jiova nɔ de fos wi fɔ mek da prɔmis de, bɔt we wi prɔmis am, i want mek wi du wetin wi dɔn prɔmis.—Sam 116:​12, 14.

5. We yu gi yu layf to Jiova wetin dat gɛt fɔ du wit baptizim?

⁵ We yu gi yu layf to Jiova wetin dat gɛt fɔ du wit baptizim? Nɔbɔdi nɔ de no we yu de pre fɔ gi yu layf to Jiova; na sɔntin we de bitwin yu ɛn in. We yu de baptayz, yu de du am bifo ɔlman; bɔku tɛm i kin bi na asɛmbli ɔ kɔnvɛnshɔn. Baptizim de sho ɔlman se yu bin dɔn ɔlrɛdi pre to Jiova fɔ gi yu layf to am. * So we yu de baptayz, yu de mek pipul dɛn no se yu lɛk Jiova wit ɔl yu at, yu layf, yu maynd, yu trɛnk, ɛn yu dɔn mekɔp yu maynd fɔ sav am sote go.—Mak 12:​30.

6-7. Akɔdin to 1 Pita 3:​18-22 (NWT), us tu rizin dɛn mek i impɔtant fɔ baptayz?

⁶ I rili impɔtant fɔ baptayz? Tink bɔt wetin de na 1 Pita 3:​18-22, NWT. (Rid.) Jɔs lɛk aw di ak bin de sho pipul dɛn se Noa gɛt fet pan Gɔd, na di sem we yu baptizim de sho pipul dɛn se yu dɔn gi yu layf to Jiova. Bɔt i rili impɔtant fɔ baptayz? Yɛs, i impɔtant. Pita bin tɛl wi wetin mek i impɔtant. Fɔs, i de “sev” wi. Baptizim go sev wi if wi de du tin dɛn we de sho se wi gɛt fet pan Jizɔs, ɛn wi biliv se i day fɔ wi, i dɔn gɛt layf bak, ɛn i go na ɛvin, dɔn naw “i de na Gɔd in raytan.”

⁷ Sɛkɔn, baptizim de mek wi gɛt “klin kɔnshɛns.” We wi gi wi layf to Gɔd ɛn baptayz, wi de gɛt spɛshal padi biznɛs wit am. Gɔd de fɔgiv wi sin dɛn bikɔs wi dɔn rili lɛf di bad tin dɛn we wi bin de du ɛn wi gɛt fet pan Jizɔs in day. So dat de mek wi gɛt klin kɔnshɛns bifo Gɔd.

8. Wetin fɔ bi di men rizin we mek yu de disayd fɔ baptayz?

⁸ Wetin fɔ bi di men rizin we mek yu de disayd fɔ baptayz? Bikɔs yu dɔn stɔdi di Baybul, yu go dɔn lan bɔt wetin Jiova lɛk ɛn aw i de du tin. Di tin dɛn we yu lan bɔt am rili tɔch yu at ɛn mek yu lɛk am mɔ ɛn mɔ. Di lɛk we yu lɛk Jiova na in fɔ bi di men rizin we mek yu de disayd fɔ baptayz.

9. Akɔdin to Matyu 28:​19, 20 (NWT), wetin i min fɔ baptayz insay di Papa in nem, di Pikin in nem, ɛn di oli spirit in nem?

⁹ Wan ɔda rizin we mek yu de disayd fɔ baptayz na bikɔs yu dɔn lan di tru tin dɛn we de na di Baybul ɛn yu biliv dɛn. Tink bɔt wetin Jizɔs bin tɔk di tɛm we i gi wi di kɔmand fɔ mek disaypul. (Rid Matyu 28:​19, 20, NWT.) Frɔm wetin Jizɔs bin se, di wan dɛn we want fɔ baptayz fɔ du so, “insay di Papa in nem, di Pikin in nem, ɛn di oli spirit in nem.”  Wetin dis bin min? I min se yu fɔ biliv di tru tin dɛn we di Baybul tich bɔt Jiova; in Pikin Jizɔs; ɛn di oli spirit. Di tru bɔt dɛn tin dɛn ya rili pawaful ɛn dɛn go rili tɔch yu at. (Ibru 4:​12) Lɛ wi tɔk bɔt sɔm pan dɛn.

10-11. Us tru tin dɛn yu dɔn lan ɛn biliv bɔt di Papa?

¹⁰ Tink bak bɔt di tɛm we yu lan di tru fɔ se di Papa “nem Jiova,” na in “de oba ɔlman na di wɔl,” ɛn na in “wangren na Gɔd.” (Sams 83:​18 NWT; Ayz. 37:​16) Na Jiova Mek wi, ɛn na in “nɔmɔ de pul pɔsin pan trɔbul.” (Sam 3:​8; 36:​9) I dɔn mek arenjmɛnt fɔ pul wi pan sin ɛn day, ɛn i dɔn gi wi di op fɔ gɛt layf we go de sote go. (Jɔn 17:​3) We yu gi yu layf to Jiova ɛn baptayz, dat de sho se yu na wan pan Jiova Witnɛs dɛn. (Ayz. 43:​10-12) Da tɛm de, yu go jɔyn pipul dɛn we de difrɛn say dɛn na di wɔl we gɛt Gɔd in nem ɛn we de tɛl ɔda pipul dɛn bɔt da nem de.—Sams 86:​12, NWT.

¹¹ Na big big ɔnɔ fɔ ɔndastand wetin di Baybul de tich bɔt di Papa! We yu biliv dɛn tru tin dɛn ya we yu dɔn lan, dat go muv yu fɔ gi yu layf to Jiova ɛn baptayz.

12-13. Us tru tin dɛn yu dɔn lan ɛn biliv bɔt di Pikin?

¹² Aw yu bin fil we yu bin lan se, Jizɔs na di sɛkɔn impɔtant pɔsin na di wan ol wɔl, ɛn i day fɔ wi? We wi du tin dɛn we de sho se wi gɛt fet pan Jizɔs in day, dat go mek wi gɛt tayt padi biznɛs wit Gɔd, i go fɔgiv wi sin, ɛn wi go gɛt layf we go de sote go. (Jɔn 3:​16) Jizɔs na wi Ay Prist. I want fɔ ɛp wi fɔ bɛnifit frɔm in day, ɛn mek wi gɛt tayt padi biznɛs wit Gɔd. (Ibru 4:​15; 7:​24, 25) Bikɔs in na Kiŋ na Gɔd in Kiŋdɔm, na in Jiova go yuz fɔ mek In nem oli, fɔ pul wikɛdnɛs, ɛn fɔ mek pipul dɛn ɛnjɔy fayn blɛsin dɛn na Paradays sote go. (Mat. 6:​9, 10, NWT; Rɛv. 11:​15) Na Jizɔs in ɛgzampul wi fɔ fala. (1 Pit. 2:​21, NWT) I yuz in layf fɔ du wetin Gɔd want ɛn dat na fayn ɛgzampul fɔ wi.—Jɔn 4:​34.

¹³ We yu biliv wetin di Baybul de tich bɔt Jizɔs, dat go mek yu lɛk Gɔd in Pikin. Na da lɔv de go mek yu yuz yu layf fɔ du wetin Gɔd want lɛk aw Jizɔs bin du. Ɛn na in go mek yu gi yu layf to Jiova ɛn baptayz.

14-15. Us tru tin dɛn yu dɔn lan ɛn biliv bɔt di oli spirit?

¹⁴ Aw yu bin fil we yu lan se di oli spirit nɔto pɔsin bɔt na di pawa we Gɔd de yuz fɔ du ɛnitin we i want. Na di oli spirit Jiova bin yuz fɔ tɛl di man dɛn we rayt di Baybul wetin fɔ rayt, ɛn na di oli spirit de ɛp wi fɔ ɔndastand ɛn du wetin wi de lan na di Baybul. (Jɔn 14:​26; 2 Pit. 1:​21) Na di oli spirit Jiova de yuz fɔ gi wi “pawa we pas mɔtalman in yon.” (2 Kɔr. 4:​7, NWT) Di oli spirit de gi wi di trɛnk fɔ prich di gud nyuz, fɔ tinap tranga wan we sɔntin tɛmt wi, fɔ bia we wi at pwɛl, ɛn fɔ bia prɔblɛm dɛn. I de ɛp wi fɔ gɛt di fayn “kwaliti dɛn we di spirit de mek pɔsin gɛt.” (Gal. 5:​22, NWT) Gɔd de gi in spirit fri wan to di wan dɛn we abop pan am ɛn we de rili aks fɔ am.—Lyuk 11:​13.

¹⁵ I rili fayn fɔ no se di oli spirit de ɛnkɔrej di wan dɛn we de wɔship Jiova ɛn we biliv se di spirit de ɛp dɛn fɔ sav Gɔd! We yu dɔn lan di tru tin dɛn bɔt di oli spirit, dat fɔ muv yu fɔ gi yu layf to Gɔd ɛn fɔ baptayz.

16. Wetin yu dɔn lan frɔm ɔl wetin wi dɔn tɔk bɔt?

 ¹⁶ We yu disayd fɔ gi yu layf to Gɔd ɛn baptayz, dat na impɔtant tin. Ɛn as wi dɔn lan, yu fɔ rɛdi fɔ lɛf sɔm tin dɛn biɛn ɛn bia wit di prɔblɛm dɛn we go mit yu. Bɔt mɛmba se, di blɛsin dɛn we yu go gɛt bɔku fa fawe pas di tin dɛn we yu go lɛf biɛn. We yu baptayz, dat go sev yu ɛn mek yu gɛt klin kɔnshɛns bifo Gɔd. Na di lɛk we yu lɛk Jiova fɔ bi di men rizin we mek yu de baptayz. Yu fɔ biliv wit ɔl yu at di tru tin dɛn we yu dɔn lan bɔt di Papa, di Pikin, ɛn di oli spirit. We yu tink bɔt ɔl wetin wi dɔn tɔk bɔt, aw yu go ansa di kwɛstyɔn we se “A dɔn rɛdi fɔ baptayz?”

17. Wetin na sɔm tin dɛn we yu fɔ du bifo yu baptayz?

¹⁷ If yu fil se yu dɔn rɛdi fɔ baptayz, dat min se yu go mɔs dɔn du bɔku tin dɛn fɔ mek yu gɛt tayt padi biznɛs wit Jiova. * Bikɔs yu dɔn de stɔdi di Baybul ɔltɛm, yu dɔn no bɔku tin bɔt Jiova ɛn Jizɔs. Yu dɔn gɛt fet. (Ibru 11:​6) Yu biliv wit ɔl yu at di tin dɛn we Jiova dɔn prɔmis we de insay di Baybul, ɛn yu biliv tranga wan bak se di fet we yu gɛt pan Jizɔs in day go pul yu pan sin ɛn day. Yu dɔn ripɛnt ɛn sho se yu sɔri fɔ di bad tin dɛn we yu bin de du, yu dɔn lɛf fɔ du dɛn, ɛn yu dɔn beg Jiova fɔ mek i fɔgiv yu. Yu dɔn chenj; yu dɔn rili lɛf di bad we aw yu bin de liv ɛn yu dɔn bigin liv di we aw Jiova want. (Akt 3:​19) Yu gladi fɔ tɛl ɔda pipul dɛn bɔt wetin yu biliv. Yu kwalifay fɔ bi ɔnbaptayz pɔblisha ɛn bigin prich wit di kɔngrigeshɔn. (Mat. 24:​14) Jiova rili gladi fɔ we yu dɔn du ɔl dɛn tin dɛn de.—Prɔv. 27:​11.

18. Wetin bak yu nid fɔ du bifo yu baptayz?

¹⁸ Bifo yu baptayz, sɔm ɔda tin dɛn de we yu nid fɔ du. As wi bin dɔn lan, yu fɔ gi yu layf to Gɔd. Yu wangren fɔ pre to am wit ɔl yu at ɛn prɔmis am se yu go yuz yu layf fɔ du wetin i want. (1 Pit. 4:​2) Afta dat, tɛl di kɔdinetɔ fɔ di ɛlda dɛn na di kɔngrigeshɔn se yu want fɔ baptayz. Di kɔdinetɔ go mek sɔm ɛlda dɛn tɔk wit yu. Bɔt duya nɔ fred. Di ɛlda dɛn ɔlrɛdi sabi yu ɛn dɛn lɛk yu. Dɛn go aks yu sɔm kwɛstyɔn dɛn bɔt sɔm tin dɛn we yu dɔn lan na di Baybul. Dɛn go du dat fɔ mek shɔ se yu ɔndastand di tin dɛn we yu dɔn lan ɛn yu no wetin mek i impɔtant fɔ gi yu layf to Jiova ɛn baptayz. If dɛn gri se yu dɔn rɛdi, dɛn go tɛl yu se yu go baptayz na di nɛks asɛmbli ɔ kɔnvɛnshɔn.

19-20. Wetin yu nid fɔ du afta we yu baptayz? Aw yu go du dat?

¹⁹ Wetin yu nid fɔ du afta yu baptayz? * Mɛmba se, we yu pre to Jiova ɛn gi yu layf to am na prɔmis we i want yu fɔ kip. So afta yu baptayz, kɔntinyu fɔ du tin dɛn we de sho se yu de kip to yu prɔmis. Aw yu go du dat?

²⁰ Kɔntinyu fɔ de wit di kɔngrigeshɔn. We yu baptayz, yu de jɔyn ɔl yu “brɔda dɛn” we de difrɛn say dɛn na di wɔl. (1 Pit. 2:​17, NWT) Yu brɔda ɛn sista dɛn na di kɔngrigeshɔn dɔn bi yu famili. We yu de atɛnd di mitin dɛn ɔltɛm yu go gɛt tayt padi biznɛs wit di brɔda ɛn sista dɛn. Ɛvride, rid Gɔd in Wɔd ɛn tink gud gud wan bɔt wetin yu de rid. (Sam 1:​1, 2) We yu dɔn rid smɔl pat na di Baybul, yu fɔ tek tɛm tink gud gud wan bɔt wetin yu dɔn rid. Dɔn wetin yu dɔn rid go rili tɔch yu at. “Pre ɔltɛm.” (Mat. 26:​41, NWT) We yu de pre wit ɔl yu at, dat de briŋ yu kam nia Jiova. “Kɔntinyu fɔ put di Kiŋdɔm . . . fɔs.” (Mat. 6:​33, NWT) Yu kin du dis bay we yu put di prichin wok fɔs na yu layf. We yu de prich ɔltɛm, dat go mek yu fet strɔng, ɛn yu go ɛp ɔda pipul dɛn fɔ waka na di rod we go mek dɛn gɛt layf sote go.—1 Tim. 4:​16.

21. Us blɛsin yu go gɛt we yu baptayz?

²¹ We yu disayd fɔ gi yu layf to Jiova ɛn baptayz, dat na di bɛst tin we yu go disayd fɔ du. Na tru se prɔblɛm dɛn go mit yu. Bɔt yu tink se dɛn prɔblɛm dɛn ya bɛtɛ pas di tin dɛn we yu go lɛf biɛn? Nɔ! Fɔ gi yu layf to Jiova ɛn baptayz bɛtɛ pas ɛnitin we go mit yu, bikɔs ɛni prɔblɛm we go mit yu na dis wɔl na fɔ “shɔt tɛm” nɔmɔ. (2 Kɔr. 4:​17) Di baptayz we yu go baptayz go mek yu satisfay naw, ɛn yu go gɛt “di tru layf” we gɛt fɔ kam. (1 Tim. 6:​19) So duya, tink ɛn pre gud wan bifo yu ansa dis kwɛstyɔn, “A dɔn rɛdi fɔ baptayz?”